Kon pa Buska Esnan Digno
1 E instrukshonnan ku Hesus a duna pa kumpli ku e trabou di prediká por ta un desafio pa nos. El a bisa: “Den kualke stat òf pueblito ku boso drenta, buska pa haña sa ta ken ta digno den dje.” (Mat. 10:11) Siendo ku awendia hende ta pasa kada bes ménos tempu na kas, kon nos por buska esnan digno na un manera efikas?
2 Analisá Bo Teritorio: Promé ku tur kos, analisá bo teritorio. Ki ora bo tin mas chèns di topa hende na kas? Unda bo por haña nan durante dia? Tin un sierto dia den siman—òf ora durante dia—ku nan lo por ta mas dispuesto pa risibí bishita? Dor di adaptá bo sirbishi na e rutina i sirkunstansia di e hendenan den bo teritorio, lo bo por tin mihó resultado.—1 Kor. 9:23, 26.
3 Mayoria publikadó tin éksito durante e promé oranan di anochi. Durante e oranan ei algun doño di kas ta mas relahá i ta mas inkliná pa skucha. Testimonio via telefon (kaminda esei ta permití) por ta un manera efikas pa prediká anochi. Otro maneranan pa alkansá hende ku e bon nobo ta di prediká den teritorio di negoshi i tambe na sitionan públiko.
4 Durante un luna di aktividat spesial, un kongregashon a hasi areglo pa sali prediká atardi lat riba djasabra ku djadumingu i riba djarason ku djabièrnè anochi. Tambe nan a organisá e trabou di duna testimonio via telefon i a hasi areglo pa traha teritorio di negoshi. E areglonan aki a kousa asina tantu entusiasmo pa sirbishi, ku e kongregashon a disidí di sigui ku nan.
5 Sea Diligente den Hasi Rebishita: Si ta difísil pa haña hende na kas den bo teritorio ora bo hasi rebishita, purba na final di kada bishita pa traha un afsprak fiho pa bolbe bèk, hasi esei asta na e promé bishita. Anto hasi sigur di kumpli ku bo afsprak. (Mat. 5:37) Si ta apropiá, bo por pidi e doño di kas su number di telefon. Esaki tambe por yuda bo komuniká ku e persona atrobe.
6 Nos esfuersonan diligente pa buska esnan digno i pa kultivá e interes ku nos a haña, sin duda lo tin Yehova su bendishon.—Pro. 21:5.