Nan A Kita Trigu Riba Sabat

Hesus i su disipelnan tabata bayendo nort den direkshon di Galilea. Tabata lènte, i e kunukunan tabatin tapushi di trigu kaba. Komo ku e disipelnan tabatin hamber, nan a kita algun tapushi i a kome nan. Pero tabata sabat, i e fariseonan a mira loke e disipelnan tabata hasi.

Kòrda ku un poko mas promé algun hudiu na Herúsalèm tabata ke mata Hesus pasobra segun nan e tabata kibra lei di sabat. Awor, e fariseonan a bin reklam’é tokante su disipelnan. Nan a bis’é: “Wak! Bo disipelnan ta hasi loke no tin mag di hasi riba sabat.”—Mateo 12:2.

Segun e fariseonan, si un persona ta piki tapushi di trigu òf grano i frega esaki den su man tabata komo si fuera e persona akí ta kosechá i bati trigu òf grano. (Éksodo 34:21) Nan interpretashon estrikto di loke ta trabou a hasi sabat un karga pisá, siendo ku e propósito original di sabat tabata pa e ta un dia di goso i spiritualmente edifikante. Pa kontrarestá nan punto di bista robes, Hesus a usa vários ehèmpel pa mustra ku nunka tabata Yehova Dios su propósito pa hende apliká Su lei di sabat di e manera ei.

Un di ehèmpelnan ku Hesus a duna tabata esun di David i su kompañeronan. Na un okashon, ora nan tabatin hamber, nan a bai na e tabernakel i a kome e pannan di presentashon, òf di presensia. E pannan akí tabata pan ku a ser kitá for di dilanti di Yehova i remplasá pa pan fresku; generalmente, ta e saserdotenan tabata kome nan. No opstante, mirando e situashon, David i su kompañeronan no a ser kondená pasobra nan a kome e pannan ei.—Levítiko 24:5-9; 1 Samuel 21:1-6.

Hesus a duna un di dos ehèmpel: “Boso no a lesa den Lei ku e saserdotenan den tèmpel ta traha riba sabat i tòg no ta konsiderá nan kulpabel di a kibra lei di sabat?” Loke Hesus tabata ke men ta ku asta riba sabat e saserdotenan tabata mata bestia pa hasi sakrifisio i tabata hasi otro trabou na tèmpel. El a sigui bisa: “Ma mi ta bisa boso ku algu mas grandi ku e tèmpel ta aki.”—Mateo 12:5, 6; Numbernan 28:9.

Despues, Hesus a bolbe hala atenshon na e Skritura pa splika su punto. El a bisa: “Si boso a komprondé kiko ke men: ‘Mi ke miserikòrdia i no sakrifisio,’ boso lo no a kondená esnan ku no ta kulpabel. Pasobra e Yu di hende ta Señor di sabat.” Ku e palabranan akí, Hesus tabata referí na su binidero reinado di mil aña ku lo trese pas.—Mateo 12:7, 8; Oséas 6:6.

Pa hopi tempu kaba, humanidat ta sufriendo komo esklabo di Satanas. Violensia i guera ta oumentá mas i mas. Pero bou di e gobernashon di Kristu, e situashon lo ta diferente. Durante e gobernashon akí, ku lo ta manera un sabat, nos lo tin e pas i trankilidat ku semper nos a anhelá i ku nos tin asina tantu mester di dje.