Kuater Disipel A Bira Piskadó di Hende

Despues ku Hesus a skapa di e hendenan ku tabata busk’é pa mata na Názarèt, el a bai biba na Kapernaum, un stat ku tabata keda pegá ku Laman di Galilea, un lago ku tabata yama tambe “Lago di Genesarèt.” (Lukas 5:1) Asina, un otro profesia di Isaías por a kumpli, esta, ku e hendenan di Galilea ku tabata biba kantu di laman lo a mira un lus grandi.—Isaías 9:1, 2.

Sí, na Galilea, Hesus a sigui proklamá ku “e Reino di shelu a yega serka.” (Mateo 4:17) I el a topa ku kuater di su disipelnan. Anteriormente nan tabata biaha huntu kuné. Pero ora nan a bini bèk for di Hudea, nan a sigui ku nan negoshi di piskamentu. (Huan 1:35-42) Pero awor, Hesus tabata ke pa nan ta konstantemente huntu kuné pa e por a prepará nan pa nan sigui ku e trabou ora ku e no tabat’ei mas.

Sí, ora Hesus tabata kana kantu di Laman di Galilea, el a mira Simon Pedro i Andres (kendenan tabata ruman di otro) i tambe algun di nan koleganan kendenan tabata hasi nan redanan limpi. Hesus a kana bai serka nan, subi den e boto di Pedro i pidié pa hala e boto un poko for di kantu. Ora nan tabata na un distansia, Hesus a kai sinta i kuminsá siña e multitut ku tabata na kantu e bèrdat tokante e Reino.

Despues, Hesus a bisa Pedro: “Hala bai afó kaminda ta hundu i tira boso redanan pa kue poko piská.” Ma Pedro a kontest’é: “Maestro, henter anochi nos a traha duru sin kue nada, ma komo ku bo ta pidi mi, lo mi tira e redanan.”—Lukas 5:4, 5.

I nan a baha nan redanan i a kue asina tantu piská ku e redanan a kuminsá kibra. Mesora nan a hasi seña ku nan kompañeronan ku tabata den un boto ei banda pa bin yuda nan. I no a dura mashá ku e dos botonan tabata asina yen di piská te ku e botonan a kuminsá senk. Ora Pedro a mira esaki, el a kai na rudia dilanti di Hesus i bis’é: “Bai for di mi, Señor, pasobra mi ta un hòmber pekadó.” Hesus a bis’é: “No tene miedu mas. Di awor padilanti lo bo piska hende.”—Lukas 5:8, 10.

Hesus a bisa Pedro i Andres: “Sigui mi, i lo mi hasi boso piskadó di hende.” (Mateo 4:19) Hesus a bisa Santiago i Huan tambe, kendenan tabata yunan di Zebedeo, pa nan siguié. Nan tambe a sigui Hesus mesora. Sí, e kuater piskadónan akí a laga nan negoshi di piskamentu pa sigui Hesus, i nan a bira su promé disipelnan di tempu kompleto.