“Pa e Propósito Aki Mi A Wòrdu Mandá”

1-4. (a) Kon Hesus na un manera ábil a siña un muhé samaritano, i ku ki resultado? (b) Kon e apòstelnan a reakshoná?

NAN tabatin basta ora ta kana. Hesus ku su apòstelnan tabata bayendo den direkshon nort, for di Hudea rumbo pa Galilea. Pa sigui e ruta di mas kòrtiku—un biahe di mas o ménos tres dia—nan mester a pasa dor di Samaria. Tabata serka di 12 or di mèrdia ora ku nan a yega na un stat chikí ku yama Sikar, kaminda nan a para pa buska algu di kome i bebe.

² Hesus a keda sosegá banda di un pos pafó di e stat, miéntras ku su apòstelnan a bai kumpra kuminda. Un muhé a yega serka pa saka awa. Hesus tabata “kansá di su biahe,” i si e tabata ke lo e por a ignorá e muhé. (Juan 4:6) Nos lo a komprondé p’e si el a djis sera su wowo sin preokupá ku loke e muhé samaritano aki a bin hasi. Manera nos a mira den Kapítulo 4 di e buki aki, e muhé aki probablemente lo a spera ku kualke hudiu lo a trat’é ku menospresio. Sin embargo, Hesus a start un kòmbersashon kuné.

³ El a kuminsá ku un ilustrashon, unu saká for di e muhé su bida diario i ku tabata de echo konektá ku loke e muhé tabata hasi na e momento ei. E muhé a bin pa saka awa; Hesus a papia kuné di e awa ku ta duna bida i ku lo kita su set spiritual. Vários biaha e muhé a menshoná puntonan ku fásilmente por a hiba na un kontroversia.a Pero ku takto Hesus a evitá e puntonan ei i a sigui ku e kòmbersashon riba e tópiko ku e tabatin na mente. El a konsentrá riba asuntunan spiritual, esta, adorashon puru i Yehova Dios. Su palabranan tabatin efekto di largu alkanse, pasobra e muhé a bai konta e hòmbernan di e stat loke Hesus a bis’é, i nan tambe kier a skucha Hesus.—Juan 4:3-42.

⁴ Ora ku e apòstelnan a bin bèk, kiko nan a pensa di e testimonio remarkabel ku Hesus tabata dunando? No tin ningun indikashon di entusiasmo di nan parti. Nan a keda sorprendí ku Hesus tabata papia mes ku e muhé aki, i aparentemente nan no a papia nada ku e muhé. Despues ku el a bai, nan a urgi Hesus pa kome e kuminda ku nan a trese. Pero Hesus a bisa nan: “Mi tin kuminda pa kome ku boso no sa di dje.” Strañá, nan a kere ku ta di kuminda literal Hesus a papia. E ora ei el a splika nan: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:32, 34) Pues Hesus a siña nan ku su trabou prinsipal den bida tabata mas importante p’e ku kome. E tabata ke pa nan tambe sinti asina tokante e trabou ei. Kua trabou esaki tabata?

5. Kiko tabata e trabou prinsipal den e bida di Hesus, i kiko nos lo konsiderá den e kapítulo aki?

⁵ Un biaha Hesus a bisa: “Mi mester prediká e reino di Dios . . . , pasobra ta pa e propósito aki mi a wòrdu mandá.” (Lukas 4:43) Sí, Hesus a wòrdu manda pa prediká i siña hende e bon notisia di e Reino di Dios.b E siguidónan di Hesus djawe tin e mesun trabou pa hasi. Ta masha importante anto pa nos konsiderá dikon Hesus a prediká, kiko el a prediká i ki aktitut e tabatin relashoná ku su asignashon.

Dikon Hesus A Prediká

6, 7. Kon Hesus tabata ke pa “tur instruktor públiko” sinti tokante e tarea di kompartí e bon nobo ku otro hende? Ilustrá esei.

⁶ Laga nos konsiderá kiko Hesus a pensa di e bèrdatnan ku el a siña hende; kaba nos lo trata su aktitut relashoná ku e hendenan ku el a siña. Hesus a usa un ilustrashon bibu pa mustra kiko el a pensa di e trabou di kompartí ku otro hende e bèrdatnan ku Yehova a siñ’é. El a bisa: “Tur instruktor públiko ora el a ser siñá tokante e reino di shelu, ta manera un hende, un doño di kas, ku ta saka for di su tesoro kosnan nobo i bieu.” (Mateo 13:52, NW) Dikon e doño di kas den e ilustrashon aki ta saka kos for di su tesoro?

⁷ E doño di kas no ta saka kos for di su tesoro djis pa broma ku loke e tin, manera Rei Ezekias di pasado a yega di hasi, anto ku konsekuensianan penoso. (2 Reinan 20:13-20) Kiko ta motivá e doño di kas? Konsiderá e ilustrashon aki: Bo ta bai bishitá un mener di skol masha stimá na su kas. E ta habri un lachi i ta saka dos karta, un ta bieu te el a bira hel, e otro ta mas nobo. Ta karta ku el a haña di su tata, un di nan for di hopi aña pasá tempu ku e mener di skol tabata mucha i e otro ta mas resien. E mener su wowonan ta bria ora e ta konta bo kon importante e kartanan aki ta p’e i kon nan konseho a kambia su bida i lo por yuda bo tambe. Ta bisto ku e kartanan ta di gran balor pa e mener, nan tin un lugá spesial den su kurason. (Lukas 6:45) E ta mustra bo e kartanan aki, no pa broma òf pa saka algun probecho, sino pa benefisiá bo i pa yuda bo komprondé kuantu balor nan tin p’e.

8. Dikon nos tin bon motibu pa konsiderá e bèrdatnan ku nos ta siña for di e Palabra di Dios komo tesoro?

⁸ E Gran Maestro, Hesus, tabatin e mesun motivashon pa kompartí e bèrdatnan di Dios ku otro hende. P’e, e bèrdatnan aki tabata tesoronan di balor inkalkulabel. El a stima nan i tabata ansioso pa kompartí nan. E tabata ke pa tur su siguidónan, “tur instruktor públiko,” sinti asina. Nos ta sinti asina? Nos tin bon motibu pa stima tur bèrdat ku nos siña for di e Palabra di Dios. Nos ta balorá e hoyanan di e bèrdat sea ku nan ta kreensianan ku nos ta apresiá for di hopi tempu òf refinashonnan mas resien. Ora nos ta papia ku entusiasmo sinsero i ta mantené nos amor pa loke Yehova a siña nos, nos ta transmití e amor ei, meskos ku Hesus a hasi.

9. (a) Kiko Hesus a sinti pa e hendenan ku el a siña? (b) Kon nos por imitá e aktitut ku Hesus tabatin pa hende?

⁹ Ademas, Hesus a stima e hendenan ku el a siña, manera nos lo trata mas en detaye den Sekshon 3. Profesia a bisa di antemano ku e Mesias lo “tin kompashon di e pober i di esun den nesesidat.” (Salmo 72:13) I en bèrdat, Hesus tabata interesá den hende. E tabata interesá den loke nan a pensa i den loke a motivá nan; e tabata preokupá pa e karganan ku a pisa nan i e opstákulonan ku a stroba nan di kapta e bèrdat. (Mateo 11:28; 16:13; 23:13, 15) Por ehèmpel, kòrda riba e muhé samaritano. Sin duda, el a keda masha impreshoná ku Hesus a mustra interes den dje. E echo ku Hesus a diserní su situashon personal a motiv’é pa aseptá Hesus komo profeta i pa konta otro hende tokante Hesus. (Juan 4:16-19, 39) Ta bèrdat ku komo siguidó di Hesus djawe nos no por lesa kurason di e hendenan ku nos ta prediká na dje. Loke sí nos por hasi ta mustra interes den hende, meskos ku Hesus a hasi; nos por laga nan mira ku nos ta interesá den nan; i nos por adaptá nos palabranan pa satisfasé nan interesnan, retonan i nesesidatnan spesífiko.

Loke Hesus A Prediká

10, 11. (a) Kiko Hesus a prediká? (b) Kon bin a surgi e nesesidat di e Reino di Dios?

¹⁰ Kiko Hesus a prediká? Si bo mester bai buska e kontesta den e siñansanan di hopi religion ku ta bisa ku nan ta represent’é, lo bo por konkluí ku el a proklamá un tipo di evangelio sosial. Òf podisé lo bo haña e impreshon ku el a boga pa reformanan polítiko òf ku el a enfatisá salbashon personal komo e kos di mas importante. Sin embargo, manera nos a menshoná anteriormente, Hesus a bisa bon kla: “Mi mester prediká e reino di Dios.” Kiko presis esei a enserá?

¹¹ Kòrda ku Hesus tabata den shelu ora ku Satanas na promé instante a lanta duda si ta hustu ku Yehova ta e Soberano di universo. Lo mester tabata hopi doloroso pa Hesus mira Satanas kalumniá su Tata hustu i akus’é di ta un Gobernante inhustu ku ta priva Su kriaturanan di loke ta bon! E Yu di Dios lo mester a sintié hopi tristu ora ku Adam ku Eva, e futuro mayornan di humanidat, a kere e kalumnia di Satanas! E Yu a mira kon piká i morto a pasa pa henter e famia humano debí na e rebelion ei. (Romanonan 5:12) Pero ki emoshoná lo e mester tabata ora el a haña sa ku un dia su Tata lo a korigí e situashon!

12, 13. Ki inhustisianan e Reino di Dios lo korigí, i kon Hesus a hasi e Reino e punto sentral di su ministerio?

¹² Kiko tabata e kuestion prinsipal ku mester a ser resolvé? Mester a santifiká Yehova su nòmber santu, es desir, limpi’é di tur rastro di reproche ku Satanas i tur ku a uni kuné, a pone riba e nòmber ei. Mester a keda demostrá ku Yehova ta e Soberano legítimo. Hesus a komprondé e kuestionnan sumamente importante aki mihó ku kualke otro hende. Den e orashon modelo, el a siña su siguidónan pidi promé pa e nòmber di su Tata ser santifiká, despues pa e Reino di su Tata bin, anto kaba pa Dios su boluntat sosodé na tera. (Mateo 6:9, 10) Djis akí e Reino di Dios, ku Kristu Hesus komo su Gobernante, lo eliminá Satanas su sistema korupto for di riba tera i konfirmá Yehova su gobernashon hustu pa semper.—Daniel 2:44.

¹³ E Reino ei tabata e tema di Hesus su ministerio. Tur su palabra- i akshonnan a yuda klarifiká kiko e Reino ei ta i kon lo e sirbi e propósito di Yehova. Hesus no a laga nada desvi’é for di su mishon di prediká e bon nobo di e Reino di Dios. Den su tempu, tabatin kuestionnan sosial urgente, masha hopi inhustisia, i tòg el a enfoká riba su mensahe i su trabou. Akaso e echo ku Hesus a hasi esei a nifiká ku e tabatin un punto di bista infleksibel i ku su manera di abordá hende tabata laf i ripititivo? Definitivamente ku nò!

14, 15. (a) Kon Hesus a duna prueba di ta “mas ku Salomon”? (b) Kon nos por imitá Hesus den e mensahe ku nos ta prediká?

¹⁴ Manera nos lo bai mira den henter e sekshon aki, Hesus a hasi su siñansa fasinante i yen di variedat. El a papia ku e meta di yega na kurason di e hendenan. Esei por laga nos kòrda riba e rei sabí, Salomon, kende a buska palabranan agradabel, palabranan korekto di e bèrdat, pa transmití e pensamentunan ku Yehova a inspir’é pa skirbi. (Eklesiastés 12:10) Yehova a duna e hòmber imperfekto ei “grandesa di kurason,” i esei a kapasit’é pa papia tokante hopi kos, entre otro di para, piská, mata i bestia. Hende tabata bin di lugánan leu pa tende Salomon papia. (1 Reinan 4:29-34) Sin embargo, Hesus tabata “mas ku Salomon.” (Mateo 12:42) E tabata hopi mas sabí i tabatin hopi mas “grandesa di kurason.” Ora Hesus tabata siña hende, el a usa su konosementu superior di e Palabra di Dios, i tambe su konosementu di para, bestia, piská, agrikultura, klima, susesonan aktual, historia i kondishonnan sosial. Sin embargo, Hesus nunka a broma ku su konosementu afin di impreshoná otro hende. El a tene su mensahe simpel i kla. P’esei ta di komprondé ku e hendenan tabata gusta skuch’é!—Marko 12:37; Lukas 19:48.

¹⁵ Kristiannan djawe ta purba sigui Hesus su ehèmpel. Nos no tin e mesun sabiduria i konosementu inmenso kuné, pero sí nos tur tin un midí di konosementu i eksperensia ku nos por usa ora nos ta kompartí e bèrdatnan di e Palabra di Dios ku otro hende. Por ehèmpel, mayornan por hasi uso di nan eksperensia den kriamentu di yu pa ilustrá Yehova su amor pa Su yunan. Otro kristiannan por usa ehèmpel- òf ilustrashonnan basá riba nan empleo, skol òf nan konosementu di hende i di susesonan aktual. Na mes tempu, nos ta tene kuidou pa no laga nada desviá nos atenshon for di nos mensahe, ku ta e bon nobo di e Reino di Dios.—1 Timoteo 4:16.

Hesus Su Aktitut Relashoná ku Su Ministerio

16, 17. (a) Ki aktitut Hesus tabatin relashoná ku su ministerio? (b) Kon Hesus a mustra ku su ministerio tabata e enfoke prinsipal di su bida?

¹⁶ Hesus a konsiderá su ministerio komo un tesoro presioso. Gustosamente el a yuda hende mira su Tata selestial manera E ta en realidat, no e misterio ku doktrina- i tradishonnan konfuso di hende a krea di dje. Hesus tabata gusta yuda hende haña un relashon aprobá ku Yehova i tambe e speransa di bida eterno. Tabata un plaser p’e pa duna hende e konsuelo i goso di e bon nobo. Kon el a demostrá ku e tabatin e sintimentunan ei? Konsiderá tres manera.

¹⁷ Di promé, Hesus a hasi e ministerio e kos prinsipal den su bida. Su karera tabata pa papia tokante e Reino; esei tabata e obra prinsipal den su bida, e kos ku mas a interes’é. Ta p’esei, manera nos a menshoná den Kapítulo 5, Hesus sabiamente a mantené su bida simpel. El a keda ku su bista enfoká riba loke tabata mas importante, manera el a konsehá otronan pa hasi. E no a laga hopi kos kita su atenshon, kosnan ku segun ku tempu tabata pasa lo e mester a paga, mantené, drecha òf remplasá. El a biba simpel pa no laga nada kit’é innesesariamente for di su ministerio.—Mateo 6:22, NW; 8:20.

18. Den ki maneranan Hesus a usa tur su vigor den e ministerio?

¹⁸ Di dos, Hesus a usa tur su vigor den su ministerio. El a dediká masha hopi energia na e ministerio, kanando literalmente sentenáres di kilometer dor di henter Palestina, en buska di hende ku e por a kompartí e bon nobo kuné. El a papia ku nan den nan kas, riba plenchinan públiko, na marshe i pafó den aire liber. El a papia ku nan asta ora ku e tabatin mester di sosiegu, kuminda, awa òf un ratu pa relahá ku su amigunan íntimo. Asta ora e tabata muriendo, el a sigui kompartí e bon notisia di e Reino di Dios ku otro hende!—Lukas 23:39-43.

19, 20. Kon Hesus a ilustrá e urgensia di e trabou di prediká?

¹⁹ Di tres, Hesus a trata e ministerio komo algu urgente. Kòrda riba su kòmbersashon ku e muhé samaritano na e pos pafó di Sikar. Aparentemente e apòstelnan di Hesus no a mira den e situashon ei pakiko tabata asina urgente pa kompartí e bon nobo ku otro hende. Hesus a bisa nan: “Boso no ta bisa: ‘Falta kuater luna pa tempu di kosecha yega’? Mira, mi ta bisa boso, hisa boso kara wak i mira e kunukunan, pasobra nan ta blanku pa wòrdu kosechá.”—Juan 4:35.

²⁰ Hesus a basa e ilustrashon ei riba e temporada ku nan tabata aden. Evidentemente nan tabata den luna di kisleu (novèmber/desèmber). Tabata falta kuater luna ainda pa e kosecha di puspas, ku lo a tuma lugá rònt di e Pasku Hudiu, riba 14 di nisan. Pues, kunukeronan no a sinti ningun urgensia relashoná ku kosecha na e momentonan ei. Ainda tabata falta hopi dia. Pero kiko di e kosecha di hende? Esei sí tabata otro kos. Tabatin hopi hende kla pa tende, pa siña, pa bira disipel di Kristu i haña e maravioso speransa ku Yehova a ekstendé na nan. Tabata komo si fuera Hesus por a wak e kunukunan figurativo ei i mira ku nan tabata blanku di tur e grano hechu ku tabata zuai suavemente den bientu, indikando ku nan tabata kla pa ser kosechá.c Awor tabata e momento, i e trabou tabata urgente! P’esei ora ku e hendenan di un sierto stat a purba tene Hesus serka nan, el a bisa nan: “Mi mester prediká e reino di Dios na e otro statnan tambe, pasobra ta pa e propósito aki mi a wòrdu mandá.”—Lukas 4:43.

21. Kon nos por imitá Hesus?

²¹ Den tur e tres maneranan ku nos a konsiderá, nos por imitá Hesus. Nos por hasi e ministerio kristian e enfoke prinsipal di nos bida. Maske nos tin famia i obligashonnan den mundu, nos por demostrá ku nos ministerio ta na promé lugá ora nos ta partisipá den dje ku selo i ku regularidat, manera Hesus a hasi. (Mateo 6:33; 1 Timoteo 5:8) Nos por usa tur nos vigor den e ministerio, dunando generosamente di nos tempu, energia i rekursonan pa apoy’é. (Lukas 13:24) Anto semper nos por tene na mente ku nos trabou ta urgente. (2 Timoteo 4:2, NW) Nos tin ku probechá di delaster un oportunidat pa prediká!

22. Kiko nos lo konsiderá den e siguiente kapítulo?

²² Hesus a hasi sigur ku e trabou por a sigui despues di su morto. Di e manera ei tambe el a demostrá ku el a mira e importansia di e trabou. El a enkargá su siguidónan pa sigui ku e trabou di prediká i siña hende. E enkargo ei lo ta e tópiko di e siguiente kapítulo.