Un Samaritano A Demostrá di Ta un Berdadero Próhimo

Hesus a keda un poko mas den bisindario di Herúsalèm. Vários hudiu tabata bai serka dje. Algun tabata bai pa siña for di dje i otronan tabata ke djis pon’é na prueba. Un di nan, kende tabata un hòmber vèrsá den e Lei, a puntra Hesus: “Maestro, kiko mi mester hasi pa haña bida eterno?”—Lukas 10:25.

Hesus a diserní ku e hòmber no a hasi e pregunta akí djis pa haña informashon. Podisé e tabata purba di laga Hesus duna un kontesta ku lo a pone e hudiunan rabia. Hesus tabata sa ku e hòmber tabatin su punto di bista formá kaba. P’esei, el a kontestá e hòmber na un manera ku e hòmber mester a ekspresá su opinion.

Hesus a puntr’é: “Kiko tin pará skirbí den Lei? Kiko bo ta komprondé?” E hòmber, kende a studia e Lei di Dios, a kontestá a base di e Lei. El a sita Deuteronomio 6:5 i Levítiko 19:18 i a bisa: “‘Stima Yehova bo Dios ku henter bo kurason, ku henter bo alma, ku tur bo forsa i ku henter bo mente’ i ‘stima bo próhimo meskos ku bo mes.’” (Lukas 10:26, 27) Esei tabata e kontesta pa e pregunta ku e hòmber a hasi Hesus?

Hesus a bisa e hòmber: “Bo a kontestá bon; ‘sigui hasi esaki i lo bo haña bida.’” Pero e hòmber no kier a laga e asuntu te ei; e tabata ke pa Hesus apoyá su punto di bista pa asina e por “a proba ku e tabata hustu” i ku su manera di trata hende tabata bon. P’esei, el a hasi Hesus un otro pregunta. El a puntra: “Ken realmente ta mi próhimo?” (Lukas 10:28, 29) E pregunta ei, ku por a parse simpel, ta un pregunta profundo. Kon asina?

Wèl, e hudiunan tabata kere ku ta hende ku ta sigui nan tradishonnan so tabata nan próhimo. I por a parse ku Levítiko 19:18 tabata apoyá nan punto di bista. Pa nan, un hudiu ‘no tabatin mag di’ anda ku hende ku no tabata hudiu. (Echonan 10:28) E hòmber akí i kisas asta algun disipel di Hesus lo tabata pensa ku, si nan ta trata otro hudiu bon, nan ta hende hustu. Ademas, nan tabata pensa ku nan por a trata hende ku no tabata hudiu na un manera indiferente pasobra segun nan e personanan akí no tabata nan próhimo.

Kon Hesus a korigí e punto di bista robes ei sin ofendé e hòmber i e otro hudiunan? El a hasi esei pa medio di un ilustrashon: “Un hòmber tabata baha di Herúsalèm bai Yériko, i el a kai den man di ladron; nan a kita tur kos for di dje, gòlpi’é i a bai lag’é mitar morto. Awor, pa kasualidat un saserdote tabata baha riba e kaminda ei, ma ora el a mira e hòmber, el a krusa kaminda i a pasa bai lag’é. Asina tambe tabatin un levita, kende, ora el a yega na e lugá ei i a mira e hòmber, el a krusa kaminda i pasa bai lag’é. Ma un samaritano ku tabata pasa riba e kaminda ei a topa e hòmber bentá abou. Ora el a mir’é, el a haña hopi duele di dje.”—Lukas 10:30-33.

E hòmber ku Hesus tabata konta e ilustrashon mester tabata sa ku hopi saserdote i levita ku tabata yuda na e tèmpel tabata biba na Yériko. Pa e personanan ei bai nan kas bèk, nan mester a kana un 23 kilometer. E ruta ei por tabata un ruta peligroso, pasobra tabatin hopi ladron riba e kaminda ei. Si un saserdote òf un levita a mira un otro hudiu ku tabata den problema, nan lo no mester a yud’é? Hesus a mustra den su ilustrashon ku nan no a hasi esei. E persona ku sí a saka un man pa yuda tabata un samaritano, un hòmber di un pueblo ku e hudiunan tabata despresiá.—Huan 8:48.

Kon e samaritano a yuda e hudiu ku nan a asaltá? Hesus a sigui konta: “El a bai serka dje, basha zeta i biña riba su heridanan i mara nan. Despues, el a pon’é riba su bestia di karga, hib’é na un posada i kuid’é. E siguiente dia, el a saka dos denario duna doño di e posada i a bis’é: ‘Kuid’é, i tur loke bo gasta mas ku esaki, lo mi paga bo ora mi bini bèk.’”—Lukas 10:34, 35.

Despues di a kaba di konta e ilustrashon, e Gran Maestro, Hesus, a hasi e hòmber un pregunta ku a pon’é pensa profundamente. Hesus a puntr’é: “Kua di nan tres bo ta kere a hasi su mes próhimo di e hòmber ku a kai den man di ladron?” Podisé e hòmber a sintié inkómodo pa kontestá: “E samaritano.” El a bisa: “Esun ku a trat’é ku miserikòrdia.” Despues Hesus a mustra bon kla kiko tabata e lès tras di e ilustrashon. El a bisa e hòmber: “Bai, i abo hasi meskos.”—Lukas 10:36, 37.

No tin duda ku esei tabata un manera efikas di siña hende! Si Hesus a djis bisa e hòmber ku personanan ku no ta hudiu tambe ta su próhimo, bo ta kere ku e hòmber ei i e otro hudiunan ku tabata skucha lo a aseptá esei? Kasi sigur ku nò. Pero e ilustrashon simpel ku Hesus a konta, ku detayenan ku su oyentenan por a komprondé, a duna un kontesta kla pa e pregunta “Ken realmente ta mi próhimo?” Pues, un berdadero próhimo ta un persona ku ta mustra amor i bondat, manera e Skritura ta ordená.