Hesus ku Su Famia A Bai Herúsalèm

Tabata lènte, temporada ku Hose ku su famia- i amigunan tabata hasi nan biahe anual pa Herúsalèm pa selebrá Pasku Hudiu, manera e Lei a stipulá. (Deuteronomio 16:16) Di Názarèt pa Herúsalèm tabata mas o ménos 120 kilometer. Tabata un tempu drùk i emoshonante. Hesus, kende e tempu ei tabatin 12 aña di edat, tabata ansioso pa bai selebrá e fiesta akí i pa e por tabata den bisindario di e tèmpel atrobe.

Pero no ta pa selebrá Pasku Hudiu so Hesus i su famia tabata bai Herúsalèm. Nan tabata bai tambe pa selebrá e Fiesta di Pan sin Zürdeg, ku tabata dura shete dia. E fiesta akí tabata kuminsá ún dia despues di Pasku Hudiu. (Marko 14:1) Pues, e Fiesta di Pan sin Zürdeg tabata parti di e temporada di Pasku. Nan biahe pa Herúsalèm, nan estadia i nan biahe di regreso pa Názarèt normalmente tabata dura na tur mas o ménos dos siman. Pero e biaha akí, nan biahe a dura un tiki mas largu. Dikon? Pasobra na kaminda pa Názarèt a presentá un problema ku a pone ku nan mester a bolbe Herúsalèm.

Tabata asina ku ora Hose ku Maria tabata bayendo kas bèk, nan a asumí ku Hesus tabata huntu ku e grupo di famia- i amigunan ku tabata biaha huntu ku nan. Pero ora nan a para un kaminda pa pasa anochi, nan a ripará ku Hesus no tabat’ei. Mesora nan a bai wak si e tabata huntu ku nan famia- i konosínan, pero nan no a hañ’é. Nan no por a hañ’é niun kaminda! P’esei, nan a disidí di bai Herúsalèm bèk pa busk’é.

Nan a busk’é dos dia largu, sin por a hañ’é. Te riba e di tres dia nan a hañ’é den ún di e tantísimo salanan di e tèmpel. Hesus tabata sintá meimei di algun maestro hudiu i tabata skucha nan i hasi nan pregunta. E maestronan a keda asombrá di kuantu kos e tabata sa i komprondé.

Maria a puntr’é: “Mi yu, pakiko bo a hasi asina ku nos? Ami ku bo tata tabata buska bo tur anshá.”—Lukas 2:48.

Hesus a keda sorprendí ku nan no tabata sa unda e tabata. El a bisa nan: “Pakiko boso tabata buska mi? Boso no tabata sa ku mi mester ta den kas di mi Tata?”—Lukas 2:49.

Anto Hesus a bai kas bèk huntu ku Hose ku Maria i a keda sumiso na nan. Hesus a sigui krese bira grandi i a atkerí mas i mas sabiduria. Aunke e tabata un hóben, e tabatin aprobashon di Dios i di hende. Sí, for di chikitu, Hesus a pone un bon ehèmpel pa nos: E tabatin interes den kosnan spiritual i tabata respetá su mayornan.