Capitulo 5
Ken Su Adoracion Dios Ta Aceptá?
1. Kico un muher samaritano tabata kier a sa tocante adoracion?
BO NUNCA a puntra bo mes, ‘Ken su adoracion Dios ta aceptá?’ Tal bes un pregunta asina a bini n’e mente di un cierto muher ora cu el a papia cu Jesucristo cerca e Ceru Gerizim na Samaria. Dirigiendo atencion na e diferencia entre e adoracion di e samaritanonan i esun di e hudiunan, e muher a bisa: “Nos antepasadonan a adorá riba e ceru aki; pero boso ta bisa cu ta na Jerusalem ta e lugá caminda hendenan mester adorá.” (Juan 4:20) Jesus a bisa e muher samaritano cu Dios ta aceptá tur adoracion? Of el a bisa cu cosnan specífico ta ser rekerí pa agradá Dios?
2. Contestando e muher samaritano, kico Jesus a bisa?
2 Jesus su contesta sorprendente tabata: “E ora ta biniendo cu ni riba e ceru aki ni na Jerusalem boso lo adorá e Tata.” (Juan 4:21) E samaritanonan pa hopi tempu a teme Jehova i a adorá otro diosnan riba e Ceru Gerizim. (2 Reynan 17:33) Awor Jesucristo a bisa cu ni e lugá ei ni Jerusalem lo ta importante den e adoracion berdadero.
ADORA CU SPIRITU I CU BERDAD
3. (a) Pakico e samaritanonan realmente no tabata conocé Dios? (b) Con hudiunan fiel i otronan lo por yega na conocé Dios?
3 Jesus a pasa na bisa e muher samaritano: “Boso ta adorá loke boso no conocé, nos ta adorá loke nos conocé, pasobra salbacion ta originá cu e hudiunan.” (Juan 4:22) E samaritanonan tabatin ideanan religioso falsu i a aceptá solamente e promé cincu bukinan di e Bijbel como inspirá—i esakinan únicamente den nan propio texto revisá conocí como e Pentateuco Samaritano. P’esei, nan realmente no a conocé Dios. Sin embargo, e hudiunan a ser confiá cu conocimentu di e Scritura. (Romanonan 3:1, 2) E Scritura a duna hudiunan fiel i cualkier otronan cu lo a scucha, loke nan tabatin mester afin di conocé Dios.
4. Segun Jesus, kico tantu hudiu como samaritano lo mester a haci pa nan adoracion ser aceptabel pa Dios?
4 Realmente, Jesus a mustra cu tantu hudiu como samaritano lo mester a ahustá nan manera di adorá pa asina agradá Dios. El a bisa: “E ora ta bini, i ta awor, ora cu e adoradornan berdadero lo adorá e Tata cu spiritu i berdad, pasobra, en berdad, e Tata ta buscando esnan di e clase ei pa ador’é. Dios ta un Spiritu, i esnan cu ta ador’é mester adorá cu spiritu i cu berdad.” (Juan 4:23, 24) Nos mester adorá Dios “cu spiritu,” motivá dor di un curason yen di fe i amor. Ta posibel pa adorá Dios ‘cu berdad’ dor di studia su Palabra, e Bijbel, i dor di ador’é di acuerdo cu su berdad revelá. Bo ta ansioso pa haci esei?
5. (a) Kico “adorá” ta nificá? (b) Kico nos mester haci si nos kier pa Dios aceptá nos adoracion?
5 Jesus a enfatisá cu Dios kier adoracion berdadero. Esaki ta mustra cu tin formanan di adoracion inaceptabel pa Jehova. Adorá Dios ta nificá dun’é onor reverente i rindi sirbishi sagrado na dje. Si bo tabata kier a mustra onor na un gobernante poderoso, probablemente lo bo ta ansioso pa sirbi’é i haci loke lo agrad’é. Siguramente, anto, nos kier agradá Dios. En bes di meramente bisa, ‘Mi religion ta bon pa mi,’ nos p’esei mester haci sigur cu nos adoracion ta yena e rekisitonan di Dios.
HACIENDO E BOLUNTAD DI E TATA
6, 7. Pakico Jesus no ta reconocé algun cu ta afirmá di ta su disipelnan?
6 Laga nos lesa Mateo 7:21-23 i mira si nos por señalá un factor crucial cu ta determiná si tur adoracion ta aceptabel pa Dios. Jesus a bisa: “No ta tur hende cu ta bisá mi, ‘Señor, Señor,’ lo drenta den e reino di cielu, sino esun cu ta haciendo e boluntad di mi Tata cu ta den cielu lo drenta. Hopi lo bisá mi den e dia ei, ‘Señor, Señor, nos no a profetisá den bo nomber i a expulsá demoñonan [criaturanan spiritual malbado] den bo nomber, i a ehecutá hopi obranan poderoso den bo nomber?’ I tog lo mi confesá na nan e ora ei: Nunca mi a conocé boso! Bai for di mi, hacidornan di maldad.”
7 Reconociendo Jesucristo como Señor ta esencial den adoracion berdadero. Pero e texto aki ta indicá cu tin algu cu lo ta falta den e adoracion di esnan cu ta afirmá di ta disipelnan di Jesus. El a bisa cu algun lo haci “obranan poderoso,” tal como supuesto curacionnan milagroso. Sin embargo, nan ta keda sin haci loke Jesus a bisa ta vital. Nan lo no ta “haciendo e boluntad di [su] Tata.” Si nos kier agradá Dios, nos mester siña kico ta e boluntad di e Tata anto haci’é.
CONOCIMENTU EXACTO—UN PROTECCION
8. Pa nos por haci e boluntad di Dios, kico ta ser rekerí, i cua puntonan di bista robes nos mester evitá?
8 Haciendo Dios su boluntad ta rekerí un conocimentu exacto di tantu Jehova Dios como Jesucristo. Tal conocimentu ta hiba na bida eterno. Siguramente, anto, nos tur lo kier tuma na serio e asuntu di ganamentu di conocimentu exacto dje Palabra di Dios, e Bijbel. Algun hende ta bisa cu no tin mester di preocupá tanten cu nos ta sincero i celoso den nos adoracion. Otronan ta pretendé, ‘Ménos bo sa, ménos ta ser sperá di bo.’ Sin embargo, e Bijbel ta animá nos pa crece den e conocimentu di Dios i di su propósitonan.—Efesionan 4:13; Filipensenan 1:9; Colosensenan 1:9.
9. Con conocimentu exacto ta protehá nos i pakico nos mester di tal proteccion?
9 Tal conocimentu ta un proteccion contra contaminacion di nos adoracion. E apostel Pablo a papia di un cierto criatura spiritual cu ta pretendé di ta “un angel di lus.” (2 Corintionan 11:14) Disfrasá como tal, e criatura spiritual aki—Satanas—ta trata na desviá nos pa haci cosnan contrario cu Dios su boluntad. Otro criaturanan spiritual asociá cu Satanas tambe a bin ta contaminá hende su adoracion, pasobra Pablo a bisa: “E cosnan cu e nacionnan ta sacrificá, nan ta sacrificá na demoñonan, i no na Dios.” (1 Corintionan 10:20) Probablemente, hopi a pensa cu nan tabata adorando den e manera corecto, aunke nan no tabata haciendo loke cu Dios tabata kier. Nan tabata ser hibá engañosamente den adoracion falsu impuru. Nos lo siña despues mas tocante Satanas i su demoñonan, pero e enemigunan di Dios aki definitivamente a bin ta contaminá e adoracion di humanidad.
10. Kico lo bo haci si un persona deliberadamente venená bo suministro di awa i kico conocimentu exacto di e Palabra di Dios ta ekipá nos pa haci?
10 Si bo tabata sa cu un persona deliberadamente a venená bo suministro di awa, lo bo sigui bebe for di dje? Siguramente, lo bo tuma accion inmediato pa haña un fuente di awa sigur i puru. Wel, un conocimentu exacto dje Palabra di Dios ta ekipá nos pa identificá e religion berdadero i pa rechasá impuresanan cu ta haci adoracion inaceptabel pa Dios.
MANDAMENTU DI HENDE COMO DOCTRINA
11. Kico tabata robes cu e adoracion di hopi hudiu?
11 Ora Jesus tabata riba tera, hopi hudiu no a actua conforme cu e conocimentu exacto di Dios. P’esei nan a perde e oportunidad pa tin un posicion limpi dilanti Jehova. Respecto nan, Pablo a skirbi: “Mi ta duna testimonio di nan cu nan tin celo pa cu Dios; pero no conforme cu conocimentu exacto.” (Romanonan 10:2) Nan a dicidí pa nan mes con pa adorá Dios en bes di scucha na loke Dios a bisa.
12. Kico a contaminá Israel su adoracion, i cu ki resultado?
12 E israelitanan originalmente a practicá e religion puru duná-dor-di-Dios, pero el a bira contaminá cu siñansanan i filosofianan di hende. (Jeremías 8:8, 9; Malakías 2:8, 9; Lucas 11:52) Aunke e lidernan religioso hudiu, conocí como fariseonan, a pensa cu nan adoracion tabata aceptabel pa Dios, Jesus a bisa nan: “Aptamente Isaías a profetisá di boso, hipócritanan, manera ta pará skirbí, ‘E pueblo aki ta onrá mi cu nan lipnan, pero nan curason ta alehá leu for di mi. Ta en bano cu nan ta sigui adorá mi, pasobra nan ta siña mandamentu di hende como doctrina.’”—Marco 7:6, 7.
13. Con nos lo por haci manera e fariseonan a haci?
13 Ta posibel cu nos lo por haci manera e fariseonan a haci? Esaki lo por sosodé si nos sigui tradicionnan religioso cu a ser pasá pa nos en bes di examiná loke Dios a bisa tocante adoracion. Spiertando di e peliger masha real aki, Pablo a skirbi: “E expresion inspirá ta bisa definitivamente cu den periodonan di tempu mas despues algun lo cai for di e fe, prestando atencion na expresionnan inspirá engañoso i siñansanan di demoño.” (1 Timoteo 4:1) Pues no ta suficiente pa meramente asumí cu nos adoracion ta agradá Dios. Manera e muher samaritano cu a topa Jesus, nos kisas a heredá nos moda di adorá for di nos mayornan. Pero nos mester ta sigur cu nos ta haciendo cosnan cu ta haña Dios su aprobacion.
VIGILA CONTRA OFENDE DIOS
14, 15. Asta si nos tin un poco conocimentu di Dios su boluntad, pakico nos mester tene cuidou?
14 Aménos cu nos ta cuidadoso, nos por haci algu cu ta inaceptabel pa Dios. Por ehempel, apostel Juan a cai na pia di un angel “pa ador’é.” Pero e angel a spiertá: “Tene cuidou! No haci esei! Mi ta simplemente un co- esclabo di bo i di bo rumannan kende tin e trabou di duna testimonio di Jesus. Adorá Dios.” (Revelacion 19:10) Bo ta mira, pues, e necesidad pa bo haci sigur cu bo adoracion no ta contaminá dor di ningun sorto di idolatria?—1 Corintionan 10:14.
15 Ora cu algun cristian a cuminsá practicá custumbernan religioso cu no a agradá Dios, Pablo a puntra: “Con por ta cu boso ta bayendo bek atrobe n’e cosnan elementario débil i miserabel i kier sirbi nan como esclabo atrobe? Boso escrupulosamente ta wardando dia i luna i temporada i añanan. Mi ta teme pa boso, cu di algun manera mi a traha duru por nada en cuanto boso.” (Galationan 4:8-11) E individuonan ei a gana un conocimentu di Dios pero despues a cai den eror dor di celebrá custumbernan religioso i dianan santu cu tabata inaceptabel pa Jehova. Manera Pablo a bisa, nos mester “sigui haci sigur di loke ta aceptabel p’e Señor.”—Efesionan 5:10.
16. Con Juan 17:16 i 1 Pedro 4:3 ta yuda nos dicidí si dianan di fiesta i custumbernan ta agradá Dios?
16 Nos mester haci sigur cu nos ta evitá dianan di fiesta religioso i otro custumbernan cu ta violá principionan di Dios. (1 Tesalonicensenan 5:21) Por ehempel, Jesus a bisa di su siguidornan: “Nan no ta parti di mundu, mescos cu ami no ta parti di mundu.” (Juan 17:16) Bo religion ta enbolbí den ceremonianan i dianan di fiesta cu ta violá e principio di neutralidad pa cu asuntunan di e mundu aki? Of e partidarionan di bo religion tin biaha ta participá den custumbernan i fiestanan cu kisas ta enbolbé conducta cu ta cuadra cu loke apostel Pedro a describí? El a skirbi: “E tempu cu a pasa ta suficiente pa boso a obra loke ta e boluntad di e nacionnan tempu boso a sigui den echonan di conducta relahá, pasionnan, demasiado biña, paranda, pustamentu di bebementu, i idolatria ilegal.”—1 Pedro 4:3.
17. Pakico nos mester evitá cualkier cos cu ta reflehá e spiritu di mundu?
17 Apostel Juan a enfatisá e necesidad di evitá cualkier práctica cu ta reflehá e spiritu di e mundu malbado rond di nos. Juan a skirbi: “No stima ni e mundu ni loke ta den e mundu. Si cualkier hende ta stima e mundu, e amor dje Tata no ta den dje; pasobra tur loke tin den e mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu e mundu. Ademas, e mundu ta pasando forbij i tambe su deseo, pero esun cu ta haci e boluntad di Dios ta permanecé pa semper.” (1 Juan 2:15-17) Bo a nota cu esnan cu ta ‘haci e boluntad di Dios’ lo permanecé pa semper? Sí, si nos haci e boluntad di Dios i evitá actividadnan cu ta reflehá e spiritu di e mundu aki, nos por tin e speransa di bida eterno!
CUMPLI CU DIOS SU NORMANAN HALTU
18. Con algun corintio tabata robes en cuanto conducta, i kico nos mester siña for di esaki?
18 Dios kier como su adoradornan esnan cu ta cumpli cu su normanan moral haltu. Algun hende den Corinto di antigua eróneamente a pensa cu Dios lo tolerá comportacion inmoral. Nos por mira ki robes nan tabata dor di lesa 1 Corintionan 6:9, 10. Pa nos adorá Dios aceptablemente, nos mester agrad’é cu palabra i cu echo. Bo forma di adoracion ta capacitando bo pa haci esei?—Mateo 15:8; 23:1-3.
19. Con adoracion berdadero ta afectá nos trato cu otronan?
19 Nos trato cu otro hende tambe mester reflehá e normanan di Dios. Jesucristo a animá nos pa trata otronan manera nos lo kier pa nan trata nos, pasobra esaki ta parti di e adoracion berdadero. (Mateo 7:12) Nota loke el a bisa tambe tocante desplegá amor fraternal: “Pa medio di esaki tur hende lo sa cu boso ta mi disipelnan, si boso tin amor entre boso mes.” (Juan 13:35) Jesus su disipelnan mester stima un e otro i haci loke ta bon pa cu co-adoradornan i otronan.—Galationan 6:10.
ADORACION DI HENTER ALMA
20, 21. (a) Ki clase di adoracion Dios ta rekerí? (b) Pakico Jehova a rechasá Israel su adoracion den tempu di Malakías?
20 Den bo curason, kisas bo kier adorá Dios aceptablemente. Si ta asina, bo mester tin Jehova su punto di bista di adoracion. E disipel Santiago a enfatisá cu ta Dios su punto di bista ta importante, no di nos. Santiago a bisa: “E forma di adoracion cu ta limpi i incontaminá desde e punto di bista di nos Dios i Tata ta esaki: cuida e huérfanonan i biudanan den nan tribulacion, i mantené bo mes sin mancha dje mundu.” (Santiago 1:27) Cu un deseo di agradá Dios, nos cada un mester examiná nos adoracion pa haci sigur cu e no ta contaminá cu prácticanan malbado of cu nos no ta faltando algu cu Dios ta considerá vital.—Santiago 1:26.
21 Solamente adoracion limpi i di henter alma ta agradá Jehova. (Mateo 22:37; Colosensenan 3:23) Ora e nacion di Israel a duna Dios ménos cu esei, el a bisa: “Un yu, di su parti, ta onra un tata; i un sirbidor, su magnífico doño. Pues, si mi ta un tata, unda e onor pa mi ta? I si mi ta un magnífico doño, unda e temor di mi ta?” Nan tabata ofendiendo Dios dor di ofrec’é animalnan ciegu, coho i malu como sacrificio, i el a rechasá tal actonan di adoracion. (Malakías 1:6-8) Jehova ta digno di e forma mas puru di adoracion i ta aceptá solamente debocion exclusivo.—Exodo 20:5; Proverbionan 3:9; Revelacion 4:11.
22. Si nos kier pa Dios aceptá nos adoracion, kico nos lo evitá i kico nos lo haci?
22 E muher samaritano cu a papia cu Jesus aparentemente tabata interesá den adorá Dios den e forma aprobá divinamente. Si esei ta nos deseo, nos lo evitá tur siñansa i práctica contaminá. (2 Corintionan 6:14-18) Mas bien, nos lo forsa nos mes pa haña un conocimentu exacto di Dios i haci su boluntad. Nos lo pega estrechamente na su rekisitonan pa un adoracion aceptabel. (1 Timoteo 2:3, 4) Testigonan di Jehova ta haciendo esfuerso pa haci precisamente esei, i nan calurosamente ta instá bo pa participá cu nan den adorá Dios “cu spiritu i cu berdad.” (Juan 4:24) Jesus a bisa: “E Tata ta buscando esnan di e clase ei pa ador’é.” (Juan 4:23) Nos ta spera cu abo ta un persona asina. Mescos cu e muher samaritano ei, sin duda lo bo kier haña bida eterno. (Juan 4:13-15) Pero bo ta mira hende bira bieu i muri. E siguiente capítulo ta splica pakico.
TEST BO CONOCIMENTU
Manera a ser mustr á na Juan 4:23, 24, ki adoracion Dios ta aceptá?
Con nos por determiná si Dios ta keda contentu cu cierto custumbernan i fiestanan?
Cua ta algun rekisito pa adoracion aceptabel?
[Plachi di henter página 44]