Siñanza Divino Ta Triunfa

“Bo wowo mester bira wowo cu ta mira bo Magnífico Instructor. I bo mes orea lo tende un palabra tras di bo bisa: ‘Esaki ta e camina. Boso camna den dje.’ ”​—⁠ISAÍAS 30:​20, 21.

JEHOVA DIOS ta e Fuente dje mihor siñanza cu hende por recibi. Si nos ta scucha ora e ta papia, specialmente mediante su Palabra Sagrado, lo e ser nos Magnífico Instructor. (Isaías 30:20) E texto dje Bijbel Hebreo també ta yamé “E Divino.” (Salmo 50:⁠1) Pues, instruccion di Jehova ta siñanza divino.

² Mundo ta orguyoso di su cantidad di institucion educativo, pero ningun di nan ta duna siñanza divino. Sí, tur e sabiduría di mundo acumulá pa siglonan ta di asina poco balor na comparacion cu instruccion divino fundá ariba e sabiduría infinito di Jehova Dios. Romano 16:27 ta bisa cu Dios so ta sabí, i esei ta cierto den e sentido di cu Jehova so tin sabiduría absoluto.

³ Jesucristo, e Yiu di Dios, ta un modelo di sabiduría i ta e maestro di mas importante cu hamás a camna riba tera. No ta straño! Pa siglonan Jehova Dios tabata su Maestro den cielo. Realmente, siñanza divino a principiá ora Dios a cuminza instrui su promé creacion, su Yiu unigénito. P’sei, Jesús por a bisa: “Mi ta papia net loke e Tata a siñámi.” (Juan 8:28; Proverbio 8:​22, 30) E palabra di Cristo mes skirbí den e Bijbel ta aumenta hopi nos conocimento di siñanza divino. Cu nan siñamento di loke Jesús a siña, cristian ungí ta obedece nan Magnífico Instructor, kende su boluntad tá pe “sabiduría mashá variá di Dios” ser anunciá mediante e congregacion.​—⁠Efesio 3:​10, 11; 5:1; Lucas 6:⁠40.

Buscamento pa sabiduría

⁴ E ganamento dje sabiduría cu ta resulta di siñanza divino ta exigi uso diligente di nos facultad di pensamento cu Dios a duna. Esei ta posibel pasobra e celebro humano tin un potencial tremendo. Segun e buki The Incredible Machine: “Asta computer di mas sofisticá cu nos por imaginá ta crudo na comparacion cu e celebro humano casi infinitamente complicá i flexible​—⁠calidad hací posibel pa medio dje sistema di siñal electroquímico complicá i calibrá. . . . E miyones di siñal pasando instantáneamente door di bo celebro na cualkier momento ta hiba un carga extraordinario di informacion. Nan ta trece noticia dje ambiente interior i exterior di bo curpa: tocante presion riba dede di bo pia, of holor di cofi, of e palabra pret di un amigo. Ora otro siñal ta procesa i ta analiza informacion, nan ta produci cierto emocion, memoria, idea, of plan cu ta resulta den un decision. Casi inmediatamente, siñal di bo celebro ta bisa otro parti di bo curpa kico pa haci: move e dede di bo pia, bebe cofi, hari, of kizás duna un contesta gracioso. Entretanto, bo celebro també ta controlá bo rosea, químico di bo sanger, temperatura, i otro proceso esencial di locual bo no ta tuma cuenta. E ta manda ordu cu ta tenébo na rumbo apesar di cambio di ambiente. També, e ta prepara pa necesidad di futuro.”​—⁠Bladji 326.

⁵ Aunque e celebro humano indudablemente tin un capacidad maraviyoso, cua ta e mihor manera pa nos usa nos mente? No door di ocupános totalmente den un estudio duro di idioma, historia, ciencia, of religion analítico. Nos mester usa nos facultad di pensa primeramente pa recibi siñanza divino. Esei so ta resulta den berdadero sabiduría. Pero, kico ta berdadero sabiduría? Den un sentido bíblico, sabiduría ta duna énfasis na sano huicio fundá ariba conocimento exacto i berdadero comprendimento. Sabiduría ta haci posibel pa nos usa conocimento i comprendimento cu bon éxito pa resolve problema, pa evita of preveni peliger, pa yuda otro hende, i pa cumpli cu meta. Interesantemente, e Bijbel ta haci contraste entre sabiduría i bobedad, stupidez​—⁠inclinacion cu nos siguramente kier evita.​—⁠Deuteronomio 32:6; Proverbio 11:29; Eclesiastés 6:⁠8.

E magnífico Buki di Siñanza di Jehova Dios

⁶ Tin basta sabiduría di mundo rond di nos. (1 Corintio 3:​18, 19) Sí, mundo ta abunda cu scol i biblioteca conteniendo miyones di buki! Hopi di eseinan ta buki di siñanza cu ta duna instruccion den idioma, matemática, ciencia, i otro campo di conocimento. Pero, e Magnífico Instructor a percura e buki di siñanza cu ta sobrepasá tur otro​—⁠su Palabra inspirá, e Bijbel. (2 Timoteo 3:​16, 17) E ta exacto no solamente den su tratamento cu asunto tal como historia, aardrijkskunde, i plantkunde sino també den pronosticacion di futuro. Además, e ta yúdanos hiba e bida di mas feliz i di mas productivo awor aki. Naturalmente, mescos cu alumno den scol di mundo tin cu usa nan buki, nos mester conoce bon e magnífico Buki di Siñanza di Dios i usé pa nos manifesta berdadero sabiduría como hende “siñá pa Jehova.”​—⁠Juan 6:⁠45.

⁷ Sin embargo, conocimento intelectual dje Bijbel no ta mescos cu sabiduría divino i cumplimento cu siñanza divino. Por ehempel: Den siglo 17 EC, un homber católico yamá Cornelius van der Steen kier a bira jesuíta pero tabata rechazá pasobra e tabata mucho cortico. Segun Manfred Barthel den su buki The Jesuits​—⁠History & Legend of the Society of Jesus: “E comité a informa van der Steen cu nan tabata prepará pa pasa por halto dje requisito di estatura, pero solamente cu e condicion cu e siña repiti henter e Bijbel di memoria. Casi no ta bale la pena pa conta e cuenta si van der Steen no a cumpli cu e requisito basta exigente.” Ki un esfuerzo tabata necesario pa memorizá henter e Bijbel! Sin embargo, siguramente ta hopi mas importante pa comprende e Palabra di Dios en bez di memorizé.

⁸ Pa nos saca mayor probecho for di siñanza divino i manifesta berdadero sabiduría, nos tin mester di conocimento exacto dje Scritura. També, e spiritu santo of forza activo di Jehova Dios mester guíanos. Esei ta haci posibel pa nos siña berdad profundo, “e cosnan profundo di Dios.” (1 Corintio 2:10) P’sei, láganos studia diligentemente e magnífico Buki di Siñanza di Jehova Dios i pidi su guía mediante e spiritu santo. Na armonía cu Proverbio 2:​1-6, láganos presta atencion na sabiduría, inclina nos curazón na discernimiento, i sclama pa comprendimento. Nos tin cu haci tur esei como si nos ta busca tesoro scondí, pasobra solamente asina nos por ‘comprende e temor di Jehova i haya e conocimento mes di Dios.’ Consideracion di algun triunfo i beneficio di siñanza divino por aumenta nos aprecio dje sabiduría cu Dios ta duna.

Comprendimento progresivo

⁹ Siñanza divino ta triunfa dunando e pueblo di Jehova Dios un comprendimento progresivo dje Scritura. Por ehempel, nos a siña cu tabata Satanás e Diabel cu a papia mediante un colebra den Eden i a acusa falsamente cu Dios a gaña ora el a bisa cu morto tabata e castigo pa comemento dje fruta prohibí. No obstante, nos ta mira cu desobedencia na Jehova Dios sí a resulta den morto pe raza humano. (Génesis 3:​1-6; Romano 5:12) Pero, Dios a duna humanidad speranza ora el a bisa e colebra, i p’sei Satanás: “Lo mi pone enemistad entre bo i e muher i entre bo simía i su simía. Lo e machica bo cabez i lo bo machica su hilchi.”​—⁠Génesis 3:⁠15.

¹⁰ E palabra a inclui un secreto cu a ser revelá progresivamente mediante siñanza divino. Jehova a siña su pueblo cu e tema principal dje Bijbel ta e vindicacion di su soberanía mediante e Simía, un desendiente di Abraham i David cu tin e derecho legal di gobernacion real. (Génesis 22:​15-18; 2 Samuel 7:​12, 13; Ezekiel 21:​25-27) Nos Magnífico Instructor a síñanos cu Jesucristo ta e Simía principal dje “muher,” e organizacion universal di Dios. (Galatio 3:16) Apesar di tur prueba cu Satanás a manda contra dje, Jesús a mantene su integridad​—⁠te na morto, e machicamento dje Simía den su hilchi. Nos a siña també cu 144.000 coheredero dje Reino escogí for di humanidad lo participa cu Cristo den e machicamento dje cabez di Satanás, “e colebra original.” (Revelacion 14:​1-4; 20:2; Romano 16:20; Galatio 3:29; Efesio 3:​4-6) Cuanto nos ta aprecia tal conocimento dje Palabra di Dios!

Drentando den e luz maraviyoso di Dios

¹¹ Siñanza divino ta triunfa guiando hende pa drenta den e luz spiritual. Cristian ungí tabatin tal experencia na cumplimento di 1 Pedro 2:9: “Boso ta ‘un raza escogí, un sacerdocio real, un nacion santo, un pueblo pa un posesion special, pa boso declara na tur parti excelencia’ di esun cu a yama boso for di scuridad na su luz maraviyoso.” Awe, luz cu Dios ta duna ta un gozo dje “multitud grandi” també locual lo biba pa semper riba un tera paradísico. (Revelacion 7:9; Lucas 23:43) Mientras cu Dios ta siña su pueblo, Proverbio 4:18 ta resulta di ser correcto: “E berea di hende husto ta manera e luz briyante cu ta bira mas i mas cla te cu e dia ta firmemente establecí.” Tal proceso di siñamento progresivo ta refina nos comprendimento di siñanza divino, mescos cu alumno ta haci progreso debí ne yudanza excelente dje maestro ora nan ta studia gramática, historia, of un otro asunto.

¹² Un otro triunfo di siñanza divino ta cu e ta proteha studiante humilde di dje for di “siñanza di demoño.” (1 Timoteo 4:⁠1) En cambio, mira cristiandad! Ayá na 1878, e cardenal católico romano John Henry Newman a skirbi: “Confiando anto den e poder di cristianismo pa resisti e infeccion di maldad, i pa cambia instrumento i práctica mes di adoracion di demoño na un uso evangélico, . . . gobernante dje Iglesia di tempo di antigua tabata prepará, si e ocasion a presenta, pa adoptá, of imitá, of autorizá ceremonia i costumber actual di pueblo, i també e filosofía di hende educá.” Newman a agrega cu cos tal como awa bendita, bistí di sacerdote, i imagen “tur tabata di origen pagano, i santificá via nan adopcion den e Iglesia.” E pueblo di Dios ta berdaderamente agradicido cu siñanza divino ta protehánan di tal apostasía. E ta triunfa riba tur forma di demonismo.​—⁠Echo 19:⁠20.

¹³ Siñanza divino ta triunfa riba error religioso di tur manera. Por ehempel, como hende cu Dios a siña, nos no ta kere den e trinidad sino ta reconoce cu Jehova Dios ta e Haltísimo, Jesús ta su Yiu, i e spiritu santo ta e forza activo di Dios. Nos no ta tene miedu dje candela di fiernu, pasobra nos sa cu fiernu dje Bijbel ta e graf común di humanidad. I aunque hende di religion falso ta bisa cu alma humano ta inmortal, nos sa cu hende morto no sa nada mes. Nos por mencioná un lista largu di berdad cu nos a gana via siñanza divino. Ta ki un bendicion pa ser liber di esclabitud spiritual na Babilonia e Grandi, e imperio mundial di religion falso!​—⁠Juan 8:​31, 32; Revelacion 18:​2, 4, 5.

¹⁴ Pa motibo cu siñanza divino ta triunfa riba error religioso, e ta haci posibel pa sirbidor di Dios camna den e luz spiritual. En efecto, nan ta tende e palabra tras di nan bisa: “Esaki ta e camina. Boso camna den dje.” (Isaías 30:21) E siñanza di Dios també ta proteha sirbidor di dje di razonamento falso. Ora “apóstol falso” tabata causa dificultad den e congregacion di Corinto, apóstol Pablo a skirbi: “Arma di nos gera no ta carnal, sino ta poderoso pa medio di Dios pa tumba cosnan fuertemente fortalecí. Pasobra nos ta tumba razonamento i tur cos halto lantá contra e conocimento di Dios; i nos ta pone tur pensamento bao di control pa hácinan obediente na Cristo.” (2 Corintio 10:​4, 5; 11:​13-15) Razonamento contrario cu siñanza divino ta ser tumbá mediante instruccion duná cu suavidad den e congregacion i mediante e predicacion dje bon nobo na hende pafó.​—⁠2 Timoteo 2:​24-26.

Adora cu spiritu i berdad

¹⁵ Mientras cu e trabao di predica e Reino ta progresa, siñanza divino ta triunfa, mustrando hende manso con pa adora Dios “cu spiritu i berdad.” Ne poz di Jacob cerca e stad di Sicar, Jesús a bisa un samaritana cu e por percura awa cu ta duna bida eterna. Indicando hende samaritano, Jesús a agrega: “Boso ta adora loke boso no conoce . . . E ora ta bini, i ta awor, cu adorador berdadero lo adora e Tata cu spiritu i cu berdad, pasobra, en realidad, e Tata ta busca hende asina pa adoré.” (Juan 4:​7-15, 21-23) Anto Jesús a identifica su mes como Mesías.

¹⁶ Pero, con nos por adora Dios cu spiritu? Door di rindi adoracion puro for di curazón agradicido yen di amor di Dios fundá ariba conocimento exacto di su Palabra. Nos por adoré cu berdad door di rechaza falsedad religioso i door di haci e boluntad divino, cu Jehova Dios ta revelá den su magnífico Buki di Siñanza.

Triunfante riba dificultad i riba mundo

¹⁷ Ora dificultad ta enfrenta e pueblo di Dios, siñanza divino ta triunfa bez tras bez. Considera lo sigiente: Na principio di Gera Mundial II, den September di 1939, sirbidor di Jehova tabatin mester di comprendimento penetrante special di su magnífico Buki di siñanza. Un artículo den The Watchtower di 1 di November di 1939 a duna mashá yudanza, locual a presenta claramente siñanza divino riba e asunto di neutralidad cristian. (Juan 17:16) Di igual manera, un poco despues di 1960, artículo den E Toren di Vigilancia tocante e asunto di sumision na “autoridad superior” gobernamental a yuda e pueblo di Dios cumpli cu siñanza divino enfrentá cu inketud político.​—⁠Romano 13:​1-7; Echo 5:⁠29.

¹⁸ Siñanza divino ta yúdanos triunfa riba tentacion, tal como e tentacion di busca diverticion degradá. Ripara loke hende yamá cristian a bisa den siglo dos i tres di nos era común. Tertuliano a skirbi: “Nos no tin nada cu ber, ni cu boca, bista of orea, cu e locura dje circo, cu teater sin bergüenza, ni cu salbahismo di stadión.” Un otro skirbidor dje tempo ei a puntra: “Kico cristian fiel ta haci meimei di eseinan [diverticion degradá], siendo cu nan ni sikiera ta pensa riba maldad? Pakico nan ta haya placer den representacion di deseo sexual?” Aunque tal skirbidor a biba hopi aña despues di hende cristian dje promé siglo, nan a condená diverticion degradá. Awe, siñanza divino ta dúnanos e sabiduría di evita diverticion obseno, inmoral, i violento.

¹⁹ Cumplimento cu siñanza divino ta haci posibel pa nos triunfa riba e mundo mes. Sí, e aplicacion dje siñanza di nos Magnífico Instructor ta hácinos victorioso riba mal influencia dje mundo aki dominá pe poder di Satanás. (2 Corintio 4:4; 1 Juan 5:19) Efesio 2:​1-3 ta bisa cu Dios a rebibános aunque nos tabata morto den nos delito i picánan ora nos tabata camna conforme cu e gobernante di autoridad di laira. Nos ta gradici Jehova cu e siñanza divino ta yúdanos triunfa riba deseo di mundo i e spiritu cu ta sali for di su enemigo i nos enemigo​—⁠e gañador principal, Satanás e Diabel!

²⁰ Claramente, anto, siñanza divino ta triunfante di varios manera. Realmente, por parce imposibel pa mencioná tur triunfo di dje. E ta afecta hende rond di mundo. Pero, kico e ta haci pa bo? Con siñanza divino ta afecta bo bida?

[Study Questions]

1. Pakico instruccion di Jehova Dios por ta yamá siñanza divino hustamente?

2. Den ki sentido ta cierto cu Dios so ta sabí?

3. Pakico Jesucristo ta e maestro di mas importante cu hamás a camna riba tera?

4. Kico hende ta bisa tocante e capacidad dje celebro?

5. Den un sentido bíblico, kico ta sabiduría?

6. Pa nos manifesta berdadero sabiduría, nos tin cu haci bon uso di kico?

7. Pakico bo mester bisa cu conocimento intelectual di contenido dje Bijbel no ta basta?

8. Kico por yúdanos probecha di siñanza divino i manifesta berdadero sabiduría?

9, 10. Kico Dios a bisa segun Génesis 3:​15, i cua ta e comprendimento correcto dje palabra di dje?

11. Pakico nos por bisa cu siñanza divino ta triunfa guiando hende ne luz spiritual?

12, 13. Siñanza divino a proteha e pueblo di Jehova di cua peliger doctrinal?

14. Pakico sirbidor di Dios por sigi camna den e luz spiritual?

15, 16. Kico kier men adora Jehova cu spiritu i cu berdad?

17. Con bo por duna prueba cu siñanza divino ta yuda sirbidor di Jehova enfrenta dificultad?

18. Con hende yamá cristian den siglo dos i tres EC a considerá diverticion degradá, i siñanza divino ta duna cua yudanza en cuanto esei awe?

19. Con siñanza divino ta yúdanos triunfa riba mundo?

20. Cua pregunta ta merece mas consideracion?

[Caption on page 10]

Jesús a mantene su integridad te na morto​—⁠e machicamento di hilchi dje Simía

[Caption on page 12]

Kico bo a siña?

◻ Kico kier men berdadero sabiduría?

◻ Kico Dios a revela progresivamente tocante Génesis 3:⁠15?

◻ Con siñanza divino a triunfa den asunto spiritual?

◻ Kico kier men adora Dios cu spiritu i cu berdad?

◻ Con siñanza divino a yuda sirbidor di Jehova triunfa riba dificultad i riba mundo?