Sientos di Hende A Mira Hesus Promé ku Pentekòste

Despues ku Hesus a resusitá, el a palabrá ku su 11 apòstelnan pa nan top’é na un sierto seru na Galilea. Fuera di nan, tabatin mas o ménos 500 disipel mas ku a bini. Algun di e disipelnan akí ainda tabatin nan dudanan. (Mateo 28:17; 1 Korintionan 15:6) Pero, loke Hesus a bisa nan siguientemente a yuda konvensé kada un di nan ku di bèrdat e ta bibu.

Hesus a splika ku Dios a dun’é tur outoridat den shelu i riba tera. Anto el a bisa nan: “Bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso.” (Mateo 28:18-20) No tin duda, Hesus tabata bibu i, manera semper, e tabata masha interesá den e predikashon di e bon notisia.

E mandato pa kumpli ku e trabou di hasi disipel ta konta pa tur siguidó di Hesus, tantu hòmber, muhé komo mucha. Algun hende lo purba di stòp Hesus su siguidónan di prediká i di siña hende, pero Hesus a sigurá nan: “Mi a risibí tur outoridat den shelu i riba tera.” Kiko esei ta nifiká pa su siguidónan? Hesus a bisa su disipelnan: “Wak!, mi ta ku boso tur e dianan, te na konklushon di e era akí.” Hesus no tabata ke men ku tur hende ku partisipá den e trabou di prediká lo por hasi milager. Nò, e tabata ke men ku semper nan lo por konta ku e yudansa di spiritu santu.

Na tur, Hesus a aparesé na su disipelnan “durante 40 dia” despues ku el a resusitá. Kada bes, e tabatin un otro kurpa. Anto “pa medio di hopi prueba konvinsente,” el a mustra su disipelnan ku e ta na bida. I el a instruí nan “tokante e Reino di Dios.”—Echonan 1:3; 1 Korintionan 15:7.

Aparentemente, ainda e apòstelnan tabata na Galilea. P’esei, Hesus a bisa nan pa bai Herúsalèm bèk. Anto ora el a reuní ku nan einan, el a bisa nan: “No bai for di Herúsalèm, ma sigui warda riba loke e Tata a primintí i ku boso a tende mi papia di dje; pasobra Huan a batisá hende ku awa, ma aki poko dia lo batisá boso ku spiritu santu.”—Echonan 1:4, 5.

Mas despues, Hesus a bolbe reuní ku su apòstelnan. El a hiba “nan te na Betania,” ku tabata keda na e bahada parti ost di Seru di Oleifi. (Lukas 24:50) Apesar di tur e kosnan ku Hesus a bisa nan tokante su baimentu di shelu, ketu bai nan tabata kere ku di un òf otro forma e Reino di Hesus lo a bai ta riba tera.—Lukas 22:16, 18, 30; Huan 14:2, 3.

Nan a puntra Hesus: “Señor, ta awor akí bo ta bai restorá e Reino pa Israel?” Hesus simplemente a bisa nan: “Boso no tin nodi di sa e tempu- òf dianan stipulá ku e Tata so tin outoridat pa determiná.” I el a bolbe enfatisá e trabou ku nan mester a hasi: “Boso lo risibí poder ora spiritu santu baha riba boso, i boso lo ta mi testigunan na Herúsalèm, den henter Hudea i Samaria, i te na e parti mas leu di tera.”—Echonan 1:6-8.

I ora Hesus a kaba di bisa nan e kosnan akí riba Seru di Oleifi, el a kuminsá subi na shelu. No a dura mashá, ku un nubia a kit’é for di nan bista. Despues ku Hesus a resusitá, el a tuma vários kurpa humano. Pero awor, Hesus a laga e kurpa ku e tabatin e momento ei i a subi na shelu komo un spiritu. (1 Korintionan 15:44, 50; 1 Pedro 3:18) Miéntras ku su apòstelnan tabata wak segun ku e tabata subi na shelu, “dos hòmber bistí na blanku” a aparesé banda di nan. Tabata dos angel ku kurpa humano, kendenan a bisa e apòstelnan: “Hòmbernan di Galilea, pakiko boso ta para wak na laira? E Hesus akí ku Dios a risibí den shelu lo bolbe di e mesun manera ku boso a mir’é bai shelu.”—Echonan 1:10, 11.

Hesus a bandoná tera ketu ketu, sin niun publisidat. Ta su siguidónan fiel so a mir’é subi na shelu. Pues, lo el a bolbe di “mesun manera:” ketu ketu, sin niun publisidat. Ta su fiel siguidónan so lo a tuma nota di su presensia den poder di Reino.

Despues, e apòstelnan a bai Herúsalèm bèk. Durante e dianan siguiente, nan a reuní ku e otro disipelnan, inkluso “Maria, mama di Hesus, i . . . e ruman hòmbernan di Hesus.” (Echonan 1:14) Huntu nan tabata hasi orashon konstantemente. Un di e kosnan ku nan a hasi orashon tokante dje tabata e skohementu di un disipel pa remplasá Hudas Iskariot pa asina e apòstelnan por tabata 12 atrobe. (Mateo 19:28) Nan tabata ke un persona ku a sigui Hesus tempu e tabata riba tera i ku tabata testigu di Hesus su resurekshon. Di manera ku nan a tira lòt pa por a saka afó kiko tabata Dios su boluntat. Esei ta e último okashon ku Beibel ta menshoná tiramentu di lòt. (Salmo 109:8; Proverbionan 16:33) Nan a skohe Matías, kende probablemente tabata ún di e 70 disipelnan ku Hesus a manda bai prediká. Asina, Matías a ser ‘kontá huntu ku e 11 apòstelnan.’—Echonan 1:26.

Dies dia despues ku Hesus a bai shelu, tabata Pentekòste di aña 33 di promé siglo. Mas o ménos 120 disipel a reuní den un kamber ariba na Herúsalèm. Diripiente un zonido manera di un bientu fuerte a resoná den henter e kas. I nan a mira algu ku tabata parse lenga di kandela bai para riba kada un di nan. Tur e disipelnan a kuminsá papia otro idioma. Sí, nan a risibí spiritu santu, manera Hesus a primintí!—Huan 14:26.