Atesorá e Berdadero Bida

E BIDA aki ta tur loke tin? Animando nos pa “haña un gara firme riba e berdadero bida,” Bijbel ta indicá cu tin mas. (1 Timoteo 6:​17-19) Si nos bida actual no ta e berdadero bida, kico sí ta?

E contexto dje scritura mencioná ariba ta mustra cu ta riba “bida eterno” un persona temeroso di Dios mester haña un gara firme. (1 Timoteo 6:12) P’e gran mayoria, esaki ta nificá bida eterno riba tera. Adam, e promé homber, tabatin e prospecto di biba pa semper riba un tera paradísico. (Génesis 1:​26, 27) Lo el a muri solamente si el a come for di “e palu di conocimentu di bon i malu.” (Génesis 2:17) Pero debí cu Adam i su esposa, Eva, desobedientemente a come for dje palu ei, Dios a pronunciá e sentencia di morto. ‘Riba e dia cu nan a come for di dje,’ nan a muri den bista di Dios i a cuminsá nan colapso den morto físico. Nan bida no tabata mas dje calidad cu nan a disfrutá di dje promé.

E Caminda pa “e Berdadero Bida”

Pa por haci “e berdadero bida” posibel, Jehova Dios a haci un areglo pa rescatá humanidad. Pa yuda nos comprendé e areglo aki, laga nos imaginá un fábrica chikitu. Tur e mashinnan den dje tin defecto i ta causa problema p’e operadornan pasobra añanan pasá e promé trahador a ignorá e manual di instruccion i a daña tur e mashinnan. E operadornan djawe por solamente haci nan best pa traha cu loke nan tin. E doño dje fábrica kier reconstruí e mashinnan pa yuda su trahadornan, i e ta apartando e fondonan necesario p’e propósito ei.

E promé ‘operador di mashin,’ Adam, no a atesorá e bida cu el a ser duná. Consecuentemente, el a pasa na su desendencia un bida imperfecto, similar na un mashin cu ta funcioná malu. (Romano 5:12) Mescos cu e operadornan mas despues den e fábrica, kendenan no por a remediá e situacion, e desendencia di Adam no ta capas pa alcansá e berdadero bida pa nan mes. (Salmo 49:⁠7) Pa corigí e situacion aparentemente desesperá aki, Jehova a manda su Yu unigénito na tera pa cumpra bek bida eterno pa humanidad. (Lucas 1:35; 1 Pedro 1:​18, 19) Dor di a muri un morto di sacrificio na fabor di humanidad, Dios su Yu unigénito, Jesucristo, a proveé e fondonan​—⁠e bida cu ta corespondé cu esun cu Adam a perde. (Mateo 20:28; 1 Pedro 2:22) Cu e sacrificio precioso aki, awor Jehova tin e base pa proveé e berdadero bida.

Pa humanidad obediente, Jesus su sacrificio di rescate lo nificá bida eterno riba un tera paradísico. (Salmo 37:29) E speransa aki ta ser extendé na tur cu ta sobrebibí “e guera dje gran dia di Dios e Todopoderoso,” yamá Armagedon. (Revelacion 16:​14-16) Lo e caba cu tur maldad for di tera. (Salmo 37:​9-11) Esnan cu ta den Dios su memoria cu ta muri promé cu e tempu ei, lo ser resucitá den Paradijs restorá riba tera i lo tin e prospecto di disfrutá dje berdadero bida cu lo ta disponibel pa tur hende cu ta obedecé Dios.​—⁠Juan 5:​28, 29.

Nos Mester Apreciá Nos Bida Actual

Esaki no ta nificá cu nos hustificadamente por mustra menosprecio p’e santidad di nos bida actual. E doño dje fábrica lo dedicá tempu i placa pa reconstruí un mashin pa un trahador cu no ta cuid’é? Mas bien, e dunadó di trabou lo no confia e mashin reconstruí na un persona cu a haci su best pa mantené esun bieu?

Bida ta un don precioso di Jehova. Como e fuente generoso dje don ei, e kier pa nos apreci’é. (Salmo 36:9; Santiago 1:17) Papiando di Jehova su interes den hende riba tera, Jesus a bisa: “Asta e cabeinan di boso cabes tur ta contá.” (Lucas 12:⁠7) Jehova a manda e israelitanan pa no mata, cua naturalmente a incluí pa no mata bo mes. (Exodo 20:13) Esaki ta yuda nos evitá di mira suicidio como un opcion.

Conociendo Jehova su interes amoroso den nos bienestar, hende temeroso di Dios ta aplicá principionan bíblico den balorá prácticanan moderno. Por ehempel, pa motibu cu cristiannan berdadero mester ‘limpia nan mes di tur contaminacion di carni i di spiritu, perfeccionando santidad den temor di Dios,’ nan ta evitá tabaco i droganan adictivo cu ta bruha e mente.​—⁠2 Corintio 7:⁠1.

Dios su interes den bida humano ta ser mirá mas aleu den su conseho pa mantené “un curason calmu” i pa evitá conducta inmoral. (Proverbio 14:30; Galatio 5:​19-21) Dor di pega n’e normanan haltu aki, nos ta ser protegá for di cosnan manera rabiamentu perhudicial pa salú i malesanan transmití sexualmente.

Jehova su interes den e bida di su pueblo ta bisto tambe den su spiertamentu pa evitá di come i bebe di mas. (Deuteronomio 21:​18-21; Proverbio 23:​20, 21) Cristiannan ta ser spiertá cu personanan golos i buraché lo no heredá e Reino di Dios, esta, nan nunca lo experenciá e berdadero bida. (1 Corintio 6:​9, 10; 1 Pedro 4:⁠3) Dor di animá moderacion, Jehova ta siña nos pa beneficiá nos mes.​—⁠Isaías 48:⁠17.

Ora nos ta tene nos n’e normanan di Dios, nos ta mustra cu nos ta atesorá nos bida actual. Naturalmente, e berdadero bida ta asta mas significativo. Siendo cu e ta eterno, cristiannan berdadero ta duna mas importancia na dje cu na nan bida actual. Ora Jesucristo a sacrificá su bida, el a someté su mes n’e boluntad di Jehova. Obedencia na su Tata a nificá muchu mas p’e cu su bida aki riba tera. Jesus su curso a resultá den su resureccion i den su ricibimentu di bida inmortal den cielu. (Romano 6:⁠9) Su morto tambe ta nificá bida eterno pa humanidad obediente cu ta ehercé fe den su sacrificio di rescate.​—⁠Hebreo 5:​8, 9; 12:⁠2.

Ley Vital riba Sanger

Comprendiblemente, Jesus su siguidornan ta reflehá su pensamentu. Nan ta busca pa agradá Dios den tur cos, mescos cu Cristo a haci. Na promé lugá, esaki ta splica pakico nan ta rechasá transfusion di sanger, cua algun dokter ta yama salbador-di-bida. Laga nos mira con un persona ta mustra cu e ta atesorá e berdadero bida dor di rechasá transfusion di sanger.

Mescos cu Jesucristo, cristiannan berdadero ta deseá pa ta bibu den bista di Dios, i esei ta rekerí obedencia completo na Dje. E Palabra di Dios ta manda siguidornan di Cristo: “Sigui abstené boso dje cosnan sacrificá na ídolonan i di sanger i dje cosnan strangulá i di fornicacion.” (Echo 15:​28, 29) Pakico e ley aki tocante sanger tabata incluí entre e mandamentunan obligatorio pa cristiannan?

E Ley duná n’e israelitanan a rekerí abstinencia for di sanger. (Levítico 17:​13, 14) Cristiannan no ta bou dje Ley di Moises. Pero nan ta realisá cu e mandamentu pa no come sanger tabatei promé cu e Ley; el a ser duná mas promé na Noe despues dje Diluvio. (Génesis 9:​3, 4; Colosense 2:​13, 14) E mandamentu aki a aplicá na tur e desendencia di Noe, for di kende tur nacion dje tera a originá. (Génesis 10:32) Ademas, e Ley di Moises ta yuda nos mira e motibu pa Dios su insistencia riba e santidad di sanger. Despues di prohibí e israelitanan di come cualkier clase di sanger, Dios a bisa: “E alma dje carni ta den e sanger, i ami mes a pon’é riba e altar pa boso haci reconciliacion pa boso almanan, pasobra e sanger ta loke ta haci reconciliacion dor dje alma den dje.” (Levítico 17:11) Dios a reservá sanger pa uso sacrificial riba e altar. Su ley riba e santidad di sanger ta revelá su autoridad riba tur bida riba tera. (Ezekiel 18:4; Revelacion 4:11) Mirando nos bida for di Jehova su punto di bista, nos ta realisá cu e no ta pertenecé na nos sino solamente a ser confiá na nos dor di Dios.

Mescos cu e operador den nos ilustracion tabata responsabel pa un mashin, nos a ser confiá cu nos bida actual. Kico lo bo haci si bo mashin mester ser drechá i un mecánico sugerí bo pa drech’é usando piesanan cu ta specíficamente prohibí den e manual di instruccion? Lo bo no consultá cu otro mecániconan pa mira si e mashin por ser drechá na armonia cu e instruccionnan den e manual? Bida humano ta muchu mas importante i complicá cu un mashin. Den su Palabra inspirá, e manual pa tene sernan humano bibu, nos Formador ta prohibí e uso di sanger pa sostené bida. (Deuteronomio 32:​46, 47; Filipense 2:16) No ta razonabel pa pega n’e rekisito dje manual ei?

Realmente, pashentnan cristian cu ta pidi pa maneho sin sanger di nan caso no ta rechasando tur tratamentu médico. Nan simplemente ta pidiendo pa tratamentu cu lo mustra respet pa nan bida​—⁠tantu actual como futuro. Dokternan kende cu curashi ta respetá e posicion cu cristiannan ta tuma, ta mira e beneficionan di trata nan conforme cu nan peticion. “Encontrando Testigonan di Jehova a conducí mi na un set nobo di balornan,” un ciruhano ta bisa, kende tabatin custumber di suministrá sanger extensamente. Awor e ta purba di trata asta no-Testigonan sin sanger.

Atesorando e Berdadero Bida

Kico tabata e set nobo di balornan cu e ciruhano aki a haña dor di trata Testigonan di Jehova? Awor e ta realisá cu tratando un pashent ta enbolbé no djis e parti dje curpa cu ta afectá dor di un malesa sino henter e persona. Un pashent no mester ser permití pa pidi e mihó cuido pa su bienestar físico, spiritual i emocional?

Pa e mucha muher Kumiko di 15 aña di edad, un transfusion di sanger pa trata su leukemia mortífero tabata e pió opcion posibel. Purbando pa alargá su bida dor di e medio aki pa un par di siman, luna of asta aña no tabata bal loke esei lo a cost’é riba término largu. Siendo cu el a dedicá su bida actual na Jehova Dios como un di su Testigonan, Kumiko a respetá e santidad di bida i sanger. Aunke su tata i otro miembronan di famia a oponé su posicion fuertemente, Kumiko a para firme. Su dokter a puntr’é un biaha: “Si bo Dios ta pordoná erornan, lo e no pordoná bo asta si bo aceptá un transfusion di sanger?” Kumiko a nenga di comprometé i asina rechasá su creencia basá riba Bijbel. “Teniendo un gara firme riba e palabra di bida,” el a mantené su posicion. (Filipense 2:16) Manera su wela incrédulo a bisa, “Kumiko no kier a bandoná su fe.” Pronto e actitud di su tata i su wela, i tambe dje dokternan cu tabata asisti’é, a cambia.

Kumiko su fe fuerte den Jehova Dios, kende por resucit’é for di morto, a conmové hopi curason. Miéntras e tabata na bida ainda, el a suplicá su tata: “Si mi muri mes, lo mi ser resucitá den e Paradijs. Pero si Papi ser destruí na Armagedon, lo mi no mira Papi. Pues por fabor, studia e Bijbel.” Su tata a djis sigui bisa: “Ora bo bira bon, lo mi haci’é.” Pero ora Kumiko a muri dje enfermedad implacabel, su tata a pone den su caha di morto un nota cu a bisa: “Lo mi mirá bo den Paradijs, Kumiko.” Despues dje acto di entiero, el a papia cu esnan cu a asistí n’e acto i a bisa: “Mi a primintí Kumiko cu lo mi mir’é den Paradijs. Aunke ainda mi no por kere den esei pasobra mi no a studia suficiente, mi ta determiná pa examin’é cuidadosamente. Por fabor, yudá mi.” Otronan den su famia tambe a cuminsá studia Bijbel.

Kumiko tabatin berdadero respet pa bida i kier a biba. El a apreciá tur loke su dokternan a haci pa scapa su bida actual. Sin embargo, dor di cumpli cu e instruccionnan den e manual dje Creador, el a proba cu el a atesorá e berdadero bida. Pa miyones di hende, esei lo ta bida eterno den un paradijs riba tera. Abo lo ta entre nan?