Felipe—Un Evangelisadó Celoso

E SCRITURA ta contené hopi relato di homber i muhernan kende nan fe ta digno di imitá. Tuma Felipe, un misionero cristian di promé siglo. E no tabata un apostel, pero tog Dios a us’é poderosamente pa plama e mensahe di Reino. Echo ta cu Felipe a bira conocí como “e evangelisadó.” (Echonan 21:8) Di con nan a yama Felipe asina? I kico nos por siña for di dje?

Felipe ta presentá den Bijbel djis despues di Pentecoste 33 E.C. N’e tempu ei, e hudiunan di abla griego a cuminsá murmurá contra e hudiunan di abla hebreo, bisando cu tabata pasa nan biudanan por haltu den e partimentu diario di cuminda. E apostelnan a nombra “shete homber acreditá” pa atendé e asuntu. Felipe tabata entre esnan scogé.—Echonan 6:1-6.

E shete hombernan aki tabata “acreditá.” Beibel na papiamentu koriente ta bisa cu nan tabata “di bon reputashon.” Sí, na momento cu a nombra nan, ya nan tabata conocí caba como hombernan spiritual cu abilidad di pensa práctico. Ta mescos cu esnan cu ta sirbi awe como superintendente cristian. No ta nombra e hombernan ei purá-purá. (1 Timoteo 5:22) Nan mester tin “un testimonio excelente di hende djafó,” i nan compañeronan cristian mester sa cu nan ta razonabel i di sano huicio.—1 Timoteo 3:2, 3, 7; Filipensenan 4:5.

Evidentemente, Felipe a cumpli bon cu su asignacion na Jerusalem. Pero, djis despues a cuminsá un ola di persecucion amargo i esei a plama e siguidónan di Cristo. Felipe, mescos cu e otro rumannan, a bandoná e stad, pero su ministerio no a caba. No a tarda hopi cu e tabata druk ta predicá den un teritorio nobo: Samaria.—Echonan 8:1-5.

Felipe Ta Habri Teritorio Nobo

Jesus a profetisá cu su disipelnan lo predicá “tantu den Jerusalem como den henter Hudea i Samaria i te na e parti mas lehano dje tera.” (Echonan 1:8) Dor di predicá na Samaria, Felipe tabata participá den cumplimentu dje palabranan ei. Por lo general e hudiunan a menospreciá samaritano. Pero Felipe sí no a husga e hendenan aki di antemano, i su imparcialidad a ser bendicioná. Sí, hopi samaritano a bautisá, entre nan Simon, un homber cu anteriormente tabata un mago.—Echonan 8:6-13.

Despues di un tempu, e angel di Jehova a dirigí Felipe pa bai n’e caminda di desierto cu ta core for di Jerusalem pa Gaza. Ei Felipe a mira den un garoshi un funcionario etiopio kende tabata lesa na bos haltu for dje profecia di Isaías. Felipe a core banda dje garoshi i a cuminsá un combersacion. Aunke e etiopio tabata un prosélito cu un poco conocimentu di Dios i dje Scritura, el a admití humildemente cu e tabatin mester di yudansa pa comprendé loke e tabata lesa. P’esei, el a invitá Felipe pa drenta sinta den e garoshi cerca dje. Despues cu Felipe a duna un testimonio, nan a yega na un cierto awa. “Kico ta impedí mi di bautisá?” e etiopio a puntra. Felipe a bautis’é unbes, i e etiopio a sigui su caminda alegrando. Probablemente, e disipel nobo aki a plama e bon nobo ora el a yega su patria.—Echonan 8:26-39.

Kico nos por siña for dje ministerio di Felipe relacioná cu e samaritanonan i e funcionario etiopio? Nunca nos no mester asumí cu personanan di cierto nacionalidad, rasa of posicion social, lo no ta interesá den e bon nobo. Mas bien, nos mester declará e mensahe di Reino na “tur clase di hende.” (1 Corintionan 9:19-23) Si nos haci nos mes disponibel dor di predicá na tur hende, Jehova por usa nos den e trabou di “haci disipel di hende di tur nacion” promé cu e fin dje sistema malbado aki yega.—Mateo 28:19, 20.

Mas Privilegio cu Felipe Tabatin

Despues di predicá na e funcionario etiopio, Felipe a duna testimonio den Asdod, “i el a pasa dor dje teritorio i a sigui declará e bon nobo den tur e stadnan te ora el a yega Cesarea.” (Echonan 8:40) Den promé siglo, e dos stadnan aki tabatin un cantidad basta grandi di hende no-hudiu. Riba su caminda bayendo nort pa Cesarea, Felipe a predicá probablemente den centronan hudiu prominente, manera Lida i Jope. Kisas ta p’esei despues por a haña disipelnan den e áreanan aki caba.—Echonan 9:32-43.

Un 20 aña despues nos ta haña e último mencion di Felipe. Na fin di su di tres biahe como misionero, Pablo a desembarcá na Tolemaida. Segun Lucas, Pablo su compañero di biahe: “E siguiente dia nos a sali i a yega Cesarea, i nos a drenta den e cas di Felipe e evangelisadó.” P’e tempu aki, Felipe tabatin “cuater yu muher, bírgennan, cu tabata profetisá.”—Echonan 21:8, 9.

Aparentemente, Felipe a establecé su mes na Cesarea. Pero e no a perde su spiritu di misionero, pasobra Lucas ta yam’é “e evangelisadó.” Hopi bes e expresion aki ta indicá un persona cu ta bandoná su cas pa bai predicá e bon nobo den áreanan cu no a ser trahá. E echo cu Felipe tabatin cuater yu muher cu tabata profetisá, ta duna e idea cu nan a sigui den paso di nan tata celoso.

Mayornan cristian djawe tin cu corda cu nan yunan ta nan disipelnan di mas importante. Asta si e mayornan ei mester a entregá cierto privilegionan teocrático debí na responsabilidad di famia, mescos cu Felipe nan por keda sirbidónan celoso di Dios i mayornan ehemplar.—Efesionan 6:4.

E bishita di Pablo i su compañeronan a duna e famia di Felipe un bon oportunidad pa demostrá hospitalidad. Imaginá bo e intercambio di estímulo cu tabatin! Kisas ta na e ocasion aki Lucas a haña tur e detayenan tocante e actividadnan di Felipe, cu despues el a skirbi den Echonan capítulo 6 i 8.

Jehova Dios a usa Felipe extensamente pa adelantá interesnan di Reino. Felipe su celo a yud’é plama e bon nobo den teritorionan nobo i promové un ambiente spiritual saludabel den su cas. Abo lo kier disfrutá di privilegio i bendicionnan similar? Anto lo bo haci bon di imitá e cualidadnan cu Felipe, e evangelisadó, a desplegá.