Comunicacion Sano—Un Clave pa un Bon Matrimonio

Na 1778, Robert Barron a registrá como su invento un lok di porta cu a usa dos palanca cu penchi. Te awe e lok ei ta e base pa e lok moderno di yabi. Barron su diseño a rekerí un solo yabi pa hisa e dos penchinan pareu.

DI IGUAL manera, un matrimonio exitoso ta dependé di un esposo i esposa cu ta traha huntu den union. Pa habri e porta di un bon matrimonio i experenciá e precioso gosonan cu e ta contené, comunicacion sano ta esencial.

Loke Comunicacion Sano Ta Encerá

Kico comunicacion sano ta encerá? Un diccionario ta definí comunicacion como “duna of intercambiá pensamentu, opinion of informacion dor di papia, skirbi of haci seña.” Pues, comunicacion ta encerá compartí sintimentu i ideanan. I comunicacion sano tin di haci cu cosnan cu ta edificante, refrescante, birtuoso, consolador i digno di alabansa.—Efesionan 4:29-32; Filipensenan 4:8.

Loke ta haci comunicacion sano posibel ta confiansa i comprension mutuo. E cualidadnan aki ta bini ora un pareha ta mira matrimonio como un relacion cu mester dura henter nan bida i ora nan ta ègt decididu pa logra éxito den e matrimonio. Comentando riba un relacion asina, e escritor di siglo 18, Joseph Addison, a skirbi: “Dos persona cu a scoge otro for di tur otro hende, cu e propósito di ta un consuelo i placer di otro, cu e accion ei a mara nan mes pa ta di bon humor, cariñoso, discreto, pordonador, paciente i contentu relacioná cu nan cada un su debilidad i perfeccionnan, te na fin di nan bida.” Ki felis un union asina ta! I e cualidadnan precioso aki por dorna bo matrimonio, ya cu bo por haña nan mediante comunicacion sano.

Obstáculonan pa Comunicacion Sano

Mayoria pareha ta drenta matrimonio cu optimismo, asta euforia. Sin embargo, no ta tarda mashá cu pa hopi di nan e euforia ta disparcé, i e optimismo ta caba na nada. Na lugá di tin sigur dje éxito di nan matrimonio, nan tin awor un mescla marga di frustracion, rabia, hostilidad i asta un antipatia fuerte pa nan casá. E ora ei e matrimonio ta bira un situacion di wanta numa “te ora morto separá nos.” Pues anto, pa mehorá of mantené e comunicacion sano necesario pa un bon matrimonio, mester vence cierto obstáculonan.

Un berdadero obstáculo pa comunicacion sano por ta miedu dje manera cu un casá lo bai reaccioná riba cierto informacion of deseo expresá. Por ehempel, ora un hende haña sa cu e ta desaroyando un desabilidad personal serio, lo e por tin miedu cu su casá ta bai rechas’é. Con un persona ta splica su casá cu un operacion cu e tin cu haci lo cambia su aparencia of abilidad di funcioná drásticamente? Den casonan asina, comunicacion onesto i planeamentu cuidadoso pa futuro ta mas necesario cu nunca. Dor di sigurá bo casá cu palabra cu bo ta stim’é ketu bai, huntu cu frecuente actonan di ternura, lo bo comunicá un interes personal cu lo yuda promové un matrimonio berdaderamente satisfaciente. Ta den matrimonio e proverbio aki su cumplimentu mester ta mas bisto: “Un berdadero compañero ta stima na tur tempu, i ta un ruman cu ta nací pa ora tin angustia.”—Proverbionan 17:17.

Rencor ta un otro obstáculo pa comunicacion sano. Un dicho bon bisá ta cu un matrimonio felis ta e union di dos bon pordonadó. Pa cuadra cu e descripcion ei, un pareha casá lo haci tur nan esfuerso pa sigui e conseho práctico di apostel Pablo: “No laga solo baha cu boso den un estado provocá.” (Efesionan 4:26) Ta sigur cu pa aplicá e conseho aki en bes di carga rabia of rencor, ta exigí comunicacion humilde. Partnernan den un bon matrimonio no ta entregá cada bes na rabia, pleitamentu i na carga rencor. (Proverbionan 30:33) Nan ta busca pa imitá Dios, kende no ta carga rencor. (Jeremías 3:12) Sí, nan ta pordoná otro di curason.—Mateo 18:35.

Un obstáculo sigur pa cualkier sorto di comunicacion ta e trato silencioso. Esaki por ta traha cara zuur of sará, saca suspironan pisá, actua manera robot i nenga di papia cu bo casá. Un casá cu ta actua den e manera aki ta comunicá cu e ta malcontentu. Pero si e expresá su sintimentunan personal cu palabra, den un manera franco i agradabel, e ta contribuí muchu mas na mehorá e matrimonio cu keda sin papia i cana rond cu cara cerá.

Keda sin scucha bon of no scucha mes ora un casá ta papia ta un otro obstáculo cu tin cu vence pa por tin bon comunicacion den matrimonio. Kisas nos ta muchu cansá of gewoon muchu ocupá pa por tin e energia mental i emocional necesario pa scucha otro cu atencion. Pleitu por surgi riba malcomprendimentu di areglonan cu un casá a pensa tabata bon palabrá, pero cu e otro ta insistí cu ta promé biaha e ta tende di dje. Ta bisto cu ta mal comunicacion ta responsabel pa e tipo di problemanan ei.

Con pa Promové Comunicacion Sano

Ta masha importante pa tuma tempu pa comunicacion sano i amoroso! Tin hende ta pasa asina tantu tempu dilanti television ta wak bida di otro hende, cu ta resta tiki tempu pa nan mes bida. P’esei, hopi bes paga e television ta un paso necesario pa logra comunicacion sano.

Sin embargo, mescos cu tin un tempu apropiado pa papia, tin un tempu pa keda ketu. E homber sabí a bisa: “Pa tur cos tin un tempu señalá, . . . un tempu pa keda ketu i un tempu pa papia.” Sí, tambe tin e palabra corecto pa papia. “Un palabra na su tempu apropiado, o esta bon e ta!” segun un proverbio. (Eclesiástes 3:1, 7; Proverbionan 15:23) P’esei, determiná ki ora ta e mihó ora pa presentá bo punto of pa expresá e preocupacion di bo curason. Puntra bo mes: ‘Mi casá ta cansá of e ta den un estado di ánimo relahá i refrescá? E tema cu mi kier papia di dje tin chens di bira explosivo? Ultimo biaha cu nos a papia dje asuntu aki, cua palabranan cu mi a usa mi casá no a gusta?’

Ta bon pa corda cu hende ta reaccioná mihó ora nan por mira con dor di cooperá of cumpli cu un peticion nan lo ser beneficiá. Si tin un tension entre un pareha, por ta un di nan ta incliná na bisa: “Tin algu ta molestiá mi, i nos ta bai regl’é awor aki!” Di mes, ki palabranan precis ta usa lo dependé dje circunstancia, pero lo por ta mihó pa bisa algu manera esaki: “Dushi bo sa, mi a keda pensa riba loke nos a papia mas promé i con nos por resolvé e asuntu.” Cua dje métodonan aki di abordá e asuntu bo casá probablemente lo apreciá mas tantu?

Sí, con bo ta bisa algu ta masha importante. Apostel Pablo a skirbi: “Laga boso expresion semper sea cu gracia, sasoná cu salu.” (Colosensenan 4:6) Purba pa bo tono di bos i e palabranan cu bo ta usa tin gracia. Tene na mente cu “dichonan agradabel ta un panal di honing, dushi pa e alma i un curacion p’e wesunan.”—Proverbionan 16:24.

Pa algun pareha, traha huntu riba proyectonan na cas por percurá un bon ambiente pa comunicacion. Tal cooperacion por duna nan un sintimentu di ta compartí algu huntu i na mésun tempu nan tin chens pa combersacion sano. Pa otro parehanan casá, un tempu ketu nan dos so, sin purba haci ningun trabou, ta mihó i ta contribuí mas na comunicacion sano.

Bo por siña hopi dor di tuma nota con casánan cu ta bai bon cu otro ta comunicá cu otro. Con bini nan ta asina? Muy probablemente, nan armonia i e facilidad cu cua nan ta comunicá a bini di esfuerso personal, pacenshi i consideracion amoroso. Aparentemente nan tambe tabatin hopi di siña, pasobra un bon matrimonio no ta bini automáticamente. Ta masha importante anto, pa considerá bo casá su punto di bista, apreciá su necesidadnan i plakia cu un palabra discreto situacionnan cu por resultá den tension. (Proverbionan 16:23) Si bo ta casá, haci esfuerso pa bo ta un hende dushi pa biba cuné i fácil pa pidi despensa. Esei sigur lo yuda mashá pa haci bo matrimonio un bon matrimonio.

Jehova Dios kier pa hende disfrutá di matrimonionan felis i duradero. (Génesis 2:18, 21) Pero e clave of yabi ta den man di esnan uní den matrimonio. Dor di dominá e arte di comunicacion sano, dos hende amoroso cu realmente ta traha huntu, por habri e porta cu ta hiba na un matrimonio exitoso.

[Plachi na página 22]

Paga television ta permití mas tempu pa comunicacion

[Plachi na página 23]

Comunicacion sano ta yuda uni curason den amor duradero