LÈS 22

Kon Bo Por Kompartí e Bon Notisia ku Otro Hende?

Edishon Imprimí

Segun ku bo ta siña e bèrdatnan ku tin den Beibel, kisas bo ta pensa: ‘Tur hende mester haña sa loke Beibel ta siña!’ Anto bo tin rason: Tur hende mester haña sa e bèrdatnan akí. Pero, kisas bo tin miedu pa bisa otro hende loke bo ta siñando. Ban wak kon bo por vense e miedu ei i kuminsá kompartí e bon notisia ku otro hende.

1. Kon bo por kompartí loke bo a siña ku hende ku bo konosé?

Hesus su disipelnan a bisa: “[Nos] no por stòp di papia tokante e kosnan ku nos a mira i tende.” (Echonan 4:20) Nan a stima e bèrdat asina tantu ku nan kier a kompartié ku mas tantu hende posibel. Bo tambe ta sinti asina? Si esei ta e kaso, buska oportunidat pa kompartí loke bo a siña ku bo famia- i amigunan na un manera respetuoso.—Lesa Kolosensenan 4:6.

Algun kos ku bo por hasi:

Ora ku bo ta papia ku un miembro di bo famia, bo por bis’é: “Mi a siña algu interesante e siman akí.” Asina, bo por papia kuné tokante un tópiko di Beibel.
Usa un teksto di Beibel pa animá un amigu ku ta malu òf ku ta preokupá.
Ora un kolega di trabou puntra bo kon a bai ku bo wikènt, bo por kont’é loke bo a siña durante bo kurso di Beibel òf na un reunion di kongregashon.
Mustra bo amigunan e website jw.org.
Puntra otro hende pa djòin bo ora bo tin bo kurso di Beibel òf mustra nan kon nan por pidi pa un kurso di Beibel riba jw.org.

2. Dikon ta bale la pena pa bo pone meta pa prediká huntu ku e kongregashon?

E disipelnan di Hesus no a djis kompartí e bon notisia ku hende ku nan tabata konosé. Hesus “a manda nan dos dos su dilanti na tur stat” pa prediká. (Lukas 10:1) E manera organisá di prediká ei a duna mas hende oportunidat pa skucha e bon notisia. Ademas, e disipelnan a haña goso ora nan a bai prediká huntu. (Lukas 10:17) Abo tambe por pone meta pa prediká huntu ku e kongregashon?

KIKO MAS NOS POR SIÑA?

Laga nos wak kon bo por vense bo miedu i eksperensiá e goso ku ta bini di kompartí e bon notisia ku otro hende.

Kolekshon di plachi: Un studiante di Beibel femenino ta prediká na un señora ku ta sintá riba banki den un parke. 1. E studiante di Beibel ta hasi orashon. 2. E ta kompartí algu for di Beibel ku e señora.

3. Yehova lo ta ku bo

Algun hende ku ke prediká tin miedu di loke hende lo pensa di nan i di e manera ku hende lo reakshoná.

Abo tin miedu di kompartí loke bo a siña ku otro hende? Dikon sí, òf dikon nò?

Pasa e VIDIO. Despues, analisá e siguiente pregunta:

VIDIO: Mi A Pidi Yehova Duna Mi Kurashi (4:05)

Kon e Testigunan hóben den e vidio a vense nan miedu?

Lesa Isaías 41:10. Despues, analisá e siguiente pregunta:

Kon orashon por yuda bo ora bo tin miedu di prediká?

Bo tabata sa?

Hopi Testigu di Yehova a yega di pensa ku nunka nan lo por a kompartí e bon notisia ku otro hende. Por ehèmpel, Sergey no tabatin konfiansa den su mes, i tabata difísil pa e papia ku otro hende. Pero despues ku el a studia Beibel, el a bisa: “Apesar ku mi tabatin miedu, mi a kuminsá papia ku otro hende di loke mi tabata siña. Pa mi sorpresa, mi a haña mas konfiansa segun ku mi tabata konta otro hende tokante Beibel. Ademas, mi fe a bira mas fuerte.”

4. Mustra rèspèt

Promé ku bo kompartí e bon notisia ku otro hende, pensa kiko bo ta bai bisa i kon bo ta bai bis’é. Lesa 2 Timoteo 2:24 i 1 Pedro 3:15. Despues, analisá e siguiente preguntanan:

Kon bo por apliká e tekstonan akí ora bo ta papia ku otro hende tokante Beibel?
Kisas algun miembro di bo famia òf amigu lo no ta di akuerdo ku bo. Kiko bo por hasi? Kiko lo no ta sabí pa hasi?
Dikon ta mihó pa hasi pregunta ku takto en bes di bisa hende loke nan tin ku kere?

Un studiante di Beibel ta kompartí algu for di Beibel ku un miembro di su famia.

5. Bo ta haña goso ora bo kompartí e bon notisia ku otro hende

Yehova a duna Hesus e trabou di prediká e bon notisia. Kiko Hesus a pensa di e trabou ei? Lesa Huan 4:34. Despues, analisá e siguiente preguntanan:

Nos mester di kuminda pa nos biba. Kuminda ta hasi nos felis tambe. Dikon Hesus a bisa ku hasi Dios su boluntat—inkluso prediká—ta manera kuminda p’e?
Kon bo ta pensa ku e trabou di prediká por duna bo goso?

Algun sugerensia:

Durante e reunion di den siman, tuma nota di diferente manera ku bo por kuminsá un kòmbersashon.
Puntra e ruman ku ta duna bo kurso di Beibel kiko bo tin ku hasi pa bo por bira un studiante na e reunion di den siman. E asignashonnan ku bo ta haña por yuda bo kompartí loke bo ta siña ku otro hende.
E sekshonnan “Loke Hende Sa Bisa” òf “Si un Hende Puntra” den e publikashon akí por yuda bo praktiká kon pa kontestá pregunta ku hende por hasi bo i kon pa vense opheshon komun.

SI UN HENDE PUNTRA: “Kiko bo tin di konta mi?”

Kon bo por usa e oportunidat akí pa kompartí loke bo a siña durante bo kurso di Beibel?

RESÚMEN

E trabou di prediká e bon notisia lo duna bo goso. Ademas, prediká ta mas fásil di loke bo ta pensa.

Repaso

Dikon ta bon pa bo kompartí e bon notisia ku otro hende?
Kon bo por kompartí e bon notisia na un manera respetuoso?
Kon bo por vense kualke miedu ku bo por tin pa prediká?

A kompletá e lès akí dia:

Meta

Pensa riba un hende ku bo por kompartí e bon notisia kuné. Pensa kiko bo ta bai bisa, kon bo ta bai bis’é i ki ora bo ta bai bis’é.

Otro meta:

Your other goal

MAS INFORMASHON INTERESANTE

Wak kuater manera simpel pa usa e karchi di kontakto di jw.org pa kompartí e bon notisia ku otro hende.

Manera pa Ofresé Karchi di Kontakto di JW.ORG (1:43)

Tuma nota di kuater kualidat ku por yuda bo kompartí e bon notisia ku otro hende.

“Bo Ta Dispuesto pa Bira Piskadó di Hende?” (E Toren di Vigilansia di sèptèmber 2020)

Wak kon un ehèmpel di Beibel por duna nos kurashi pa kompartí e bon notisia ku otro hende asta si nos ta hopi yòn.

Yehova Lo Duna Bo Kurashi (11:59)

Wak kon bo por papia tokante Beibel ku miembro di bo famia ku ainda no konosé Yehova.

“Kon Nos Por Yega na Kurason di Miembronan di Famia Ku No Ta Testigu?” (E Toren di Vigilansia di 15 di mart 2014)