‘Boso Mes Bira Santu den Tur Boso Conducta’

“Di acuerdo cu e Santu cu a yama boso, boso mes tambe bira santu den tur boso conducta, pasobra ta pará skirbí: ‘Boso mester ta santu, pasobra ami ta santu.’”—1 PEDRO 1:15, 16.

1. Pakico Pedro a animá cristiannan pa ta santu?

PAKICO apostel Pedro a duna e conseho mencioná ariba? Pa motibu cu el a mira e necesidad pa tur cristian warda nan pensamentu i accionnan afin di tene nan na armonia cu e santidad di Jehova. Pues, promé cu e palabranan citá ariba, el a bisa: “Fortificá boso mente pa actividad, mantené boso sano huicio completamente . . . Como yunan obediente, stop di conformá boso segun e deseonan cu boso tabatin ántes den boso ignorancia.”—1 Pedro 1:13, 14.

2. Pakico nos deseonan tabata profano promé cu nos a siña conocé e berdad?

² Nos deseonan di ántes tabata profano. Pakico? Pasobra hopi di nos a sigui un proceder mundano promé cu nos a aceptá e berdad cristian. Pedro tabata sa esaki ora el a skirbi francamente: “E tempu cu a pasa caba ta suficiente pa boso a cumpli cu e boluntad dje nacionnan ora boso a procedé den echonan di conducta inmoral, mal deseo, demasiado biña, paranda, partido di bebementu, i idolatria ilegal.” Naturalmente, Pedro no a mencioná actonan profano cu ta caracterisá nos mundu moderno, siendo cu nan tabata desconocí e tempu ei.—1 Pedro 4:3, 4.

3, 4. (a) Con nos por contrarestá deseonan incorecto? (b) Cristiannan mester ta sin emocion? Splica.

³ Bo a ripará cu e deseonan aki ta esnan cu ta atraé e carni, e sentidonan i e emocionnan? Ora nos ta permití esakinan dominá nos, e ora ei nos pensamentunan i accionnan ta bira profano masha fácilmente. Esaki ta ilustrá e necesidad pa laga e facultad di razoná controlá nos accionnan. Pablo a expres’é den e manera aki: “P’esei mi ta suplicá boso p’e compasion di Dios, rumannan, pa presentá boso curpa como un sacrificio bibu, santu, i aceptabel na Dios, un sirbishi sagrado cu boso facultad di razoná.”—Romanonan 12:1, 2.

⁴ Pa presentá un sacrificio santu na Dios, nos mester laga e facultad di razoná, i no emocionnan, dominá nos. Cuantu ruman a haña nan enbolbí den inmoralidad pa motibu cu nan a permití nan sintimentunan controlá nan conducta! Esei no kier men cu nos tin cu suprimí nos emocionnan; di otro manera, con nos ta haci expresá goso den e sirbishi di Jehova? Sin embargo, si nos kier producí e fruta di spiritu mas bien cu e obranan di carni, e ora ei nos tin cu rehací nos mente segun Cristo su manera di pensa.—Galationan 5:22, 23; Filipensenan 2:5.

Un Bida Santu, un Prijs Santu

5. Pakico Pedro tabata conciente dje necesidad pa ser santu?

⁵ Pakico Pedro tabata asina conciente dje necesidad pa santidad cristian? Pasobra e tabata bon na altura dje prijs santu cu a ser pagá pa rescatá humanidad obediente. El a skirbi: “Boso sa cu no tabata cu cosnan coruptibel, cu plata of oro, cu boso a ser librá for di boso forma infructífero di conducta cu boso a ricibí mediante tradicion for di boso antepasadonan. Sino tabata cu sanger precioso, manera esun di un lamchi sin mancha i inmaculá, sí, esun di Cristo.” (1 Pedro 1:18, 19) Sí, e Fuente di santidad, Jehova Dios, a manda su Yu unigénito, “e Santu,” na tera p’e paga e rescate cu lo a permití hende tene un bon relacion cu Dios.—Juan 3:16; 6:69; Exodo 28:36; Mateo 20:28.

6. (a) Pakico no ta fácil pa nos sigui tras di un conducta santu? (b) Kico por yuda nos mantené nos conducta santu?

⁶ Sin embargo, nos tin cu reconocé cu no ta fácil pa hiba un bida santu meimei dje mundu corupto di Satanas. E ta pone trampa pa cristiannan berdadero, cu ta purba sobrebibí den su sistema di cosnan. (Efesionan 6:12; 1 Timoteo 6:9, 10) E presionnan di trabou seglar, di oposicion di famia, di mofa na scol i di presion di pareunan ta pone cu ta esencial pa bo tin un spiritualidad fuerte pa bo retené santidad. Esei ta enfatisá e papel vital di nos studio personal i nos asistencia regular na reunionnan cristian. Pablo a consehá Timoteo: “Sigui retené e patronchi di palabranan saludabel cu bo a tende for di mi cu fe i amor en relacion cu Cristo Jesus.” (2 Timoteo 1:13) Nos ta tende e palabranan saludabel ei na nos Salon di Reino i den nos studio personal di Bijbel. Nan por yuda nos ser santu den nos conducta riba un base diario den hopi diferente circunstancia.

Conducta Santu den Famia

7. Con santidad mester afectá nos bida di famia?

⁷ Ora Pedro a cita Levítico 11:44, el a usa e palabra griego haʹgi·os, cu ta nificá “separá for di picá i p’esei consagrá na Dios, sagrado.” (An Expository Dictionary of New Testament Words, di W. E. Vine) Con esaki mester afectá nos den nos bida di famia cristian? Siguramente e mester nificá cu nos bida di famia mester ta basá riba amor, pasobra “Dios ta amor.” (1 Juan 4:8) Amor di sacrificio propio ta e zeta cu ta pone e relacion entre esposo i esposa i entre mayor i yu cana suave.—1 Corintionan 13:4-8; Efesionan 5:28, 29, 33; 6:4; Colosensenan 3:18, 21.

8, 9. (a) Ki situacion ta desaroyá tin biaha den un hogar cristian? (b) Ki conseho sano Bijbel ta duna riba e asuntu aki?

⁸ Kisas nos ta pensa cu ta algu automático pa expresá tal amor den un famia cristian. Tog, nos tin cu admití cu amor no ta reina semper n’e grado cu e mester den algun hogar cristian. Por parce asina na Salon di Reino, pero ki fácilmente nos santidad por mengua na cas. E ora ei di ripiente nos por lubidá cu e esposa ainda ta nos ruman muher cristian of cu e esposo ainda ta e mésun ruman homber (i tal bes un sirbidor ministerial of un anciano) cu evidentemente ta ser respetá na Salon di Reino. Nervionan ta subi i discusionnan fuerte por desaroyá. Sin cu nos sa nos por a cuminsá usa un norma dobel den nos bida. Ya e no ta un relacion mas di esposo i esposa manera Cristo a mustr’é sino djis un homber i un muher cu tin desacuerdo cu otro. Nan ta lubidá cu mester tin un atmósfera santu na cas. Tal bes nan ta cuminsá papia manera hende mundano. Ki fácilmente un remarke desagradabel i sarcástico por sali e ora ei for di nan boca!—Proverbionan 12:18; compará cu Echonan 15:37-39.

⁹ Sin embargo, Pablo ta consehá: “No laga ningun dicho putrí [griego, loʹgos sa·prosʹ, “abla sushi,” p’esei profano] sali for di boso boca, sino tur dicho cu ta bon pa edificacion segun cu tin necesidad, pa duna loke ta faborabel n’e oyentenan.” I esei ta referí na tur esnan cu ta tende den e cas, incluyendo e yunan.—Efesionan 4:29; Santiago 3:8-10.

10. Con conseho tocante santidad ta aplicá na yunan?

¹⁰ E instruccion aki tocante santidad ta aplicá igualmente tambe n’e yunan den un famia cristian. Ki fácil ta pa nan yega cas for di scol i cuminsá imitá e papiá rebelde i sin respet di nan pareunan mundano! Yunan, no bai tras dje actitud dje mucha hombernan sin manera cu a insultá e profeta di Jehova i cu ta mescos cu hóbennan djawe cu nan boca sushi i ireverente. (2 Reynan 2:23, 24) Bo papiá no mester ta contaminá cu e idioma obseno di caya di hende cu ta muchu floho of cu no ta interesá pa usa palabra decente. Como cristiannan, nos papiá mester ta santu, placentero, edificante, bondadoso i “sasoná cu salu.” E mester distinguí nos como diferente for di otro hende.—Colosensenan 3:8-10; 4:6.

Santidad i Nos Miembronan di Famia Incrédulo

11. Pakico ser santu no ta nificá cu nos ta hustu den nos mes bista?

¹¹ Aunke nos ta purba practicá santidad na un manera conciencial, nos no mester actua como si fuera nos ta mihó i mas hustu cu otro hende, specialmente ora di trata cu miembronan di famia incrédulo. Nos conducta cristian bondadoso mester por lo ménos yuda nan mira cu nos ta diferente den un manera positivo, cu nos sa con pa mustra amor i compasion, mescos cu e bon samaritano di Jesus su ilustracion a haci.—Lucas 10:30-37.

12. Con cristiannan casá por haci e berdad mas atractivo pa nan partnernan?

¹² Pedro a enfatisá e importancia di un actitud corecto pa cu nos miembronan di famia incrédulo ora el a skirbi na esposanan cristian: “Boso, esposanan, di igual manera, sea sumiso na boso mes esposonan, afin cu, si cualkier no ta obediente n’e palabra, nan por ser ganá sin un palabra dor dje conducta di nan esposanan, debí cu nan tabata testigo ocular di boso conducta decente huntu cu respet profundo.” Un esposa cristian (of esposo, caminda esei ta aplicabel) por haci e berdad mas atractivo pa un partner incrédulo si su conducta ta decente, compasivo i respetuoso. Esaki ta nificá cu e programa teocrático mester ta flexibel di manera cu e casá incrédulo no ta ser neglishá of ignorá.a—1 Pedro 3:1, 2.

13. Con ancianonan i sirbidornan ministerial algun biaha por yuda esposonan incrédulo apreciá e berdad?

¹³ Ancianonan i sirbidornan ministerial tin biaha por yuda un pareha asina dor di siña conocé e esposo incrédulo riba un nivel social. Den e manera aki e por mira cu Testigonan ta hendenan normal, decente i cu un variedad amplio di interesnan, incluyendo tópiconan cu no ta di Bijbel. Den un caso, un anciano a mustra interes den e hobi di piscamentu di un esposo. Esei tabata suficiente pa vence e barera inicial i cuminsá un amistad. E esposo ei cu tempu a bira un ruman bautisá. Den un otro caso, un esposo incrédulo tabata fasiná cu canari. E ancianonan no a entregá. Un di nan a studia e tema di canari di manera cu e siguiente bes cu el a topa e homber, e por a cuminsá un combersacion riba e tema faborito dje homber ei! P’esei, ser santu, no kier men ser rígido of tene un mente cerá.—1 Corintionan 9:20-23.

Con Nos Por Ta Santu den e Congregacion?

14. (a) Kico ta un di Satanas su métodonan pa debilitá e congregacion? (b) Con nos por resistí e trampa di Satanas?

¹⁴ Satanas e Diabel ta un calumniador, pasobra e nomber griego pa Diabel, di·aʹbo·los, ta nificá “acusador” of “calumniador.” Calumnia ta un di su specialidadnan, i e ta purba us’é den e congregacion. Su método faborito ta redu. Nos ta permití nos mes di ser su víctimanan den e conducta profano aki? Con esei por sosodé? Dor di iniciá redu, dor di ripitié of dor di scuch’é. E proverbio sabí ta declará: “Un homber di intriga ta sigui manda contencion, i un calumniador ta separá hende cu tin trato familiar cu otro.” (Proverbionan 16:28) Kico ta e contra-veneno pa redu i calumnia? Nos mester haci sigur cu nos abla ta semper edificante i basá riba amor. Si nos busca e birtudnan mas bien cu e supuesto bicionan di nos rumannan, nos combersacion lo ta semper placentero i spiritual. Corda cu crítica ta fácil. I e persona cu ta haci redu cu bo riba otronan tambe por haci redu cu otronan riba bo!—1 Timoteo 5:13; Tito 2:3.

15. Ki cualidadnan cu Cristo a desplegá lo yuda tur keda santu den e congregacion?

¹⁵ Pa por tene e congregacion santu, nos tur mester tin e mente di Cristo, i nos sa cu su cualidad dominante ta amor. Pues, Pablo a consehá e colosensenan pa ser compasivo mescos cu Cristo: “P’esei, como scogínan di Dios, santu i stimá, bisti boso cu e tierno cariño di compasion, bondad, humildad di mente, suavedad, i gran pacenshi . . . , pordonando otro libremente . . . Ademas di tur e cosnan aki, bisti boso cu amor, pasobra esei ta e laso perfecto di union.” Anto el a agregá: “Tambe, laga e pas di Cristo controlá den boso curason.” Siguramente cu e spiritu di pordoná aki, nos por mantené e unidad i e santidad dje congregacion.—Colosensenan 3:12-15.

Nos Ta Mustra Nos Santidad den Nos Becindario?

16. Pakico nos adoracion santu mester ta un adoracion felis?

¹⁶ Kico di nos bisiñanan? Con nan ta mira nos? Nos ta reflehá e goso dje berdad, of nos ta hacié parce un carga? Si nos ta santu mescos cu Jehova ta santu, anto e mester ta evidente den nos abla i den nos conducta. Mester ta claro cu nos adoracion santu ta un adoracion felis. Pakico esei ta asina? Pasobra Jehova nos Dios ta un Dios felis, cu kier pa su adoradornan ta gososo. Pues, e salmista por a bisa tocante e pueblo di Jehova den tempunan antiguo: “Felis ta e pueblo kende su Dios ta Jehova!” Nos ta reflehá e felicidad ei? Nos yunan tambe ta manifestá contentamentu di ta entre Jehova su pueblo na Salon di Reino i na asambleanan?—Salmo 89:15, 16; 144:15b.

17. Cua ta un manera práctico pa mustra un santidad balansá?

¹⁷ Tambe nos por manifestá balansa den nos adoracion santu dor di nos spiritu di cooperacion i amabilidad cu bisiña. Algun biaha ta necesario pa bisiñanan uni forsa, tal bes pa limpia e becindario of, manera den algun pais, pa yuda mehorá e cayanan i autopistanan. Den e contexto aki, nos santidad por ta evidente den e manera con nos ta cuida nos hardin, curá, of otro propiedad. Si nos ta laga sushi bentá tur caminda of si nos tin un curá desordená i yen di potoshi, tal bes cu sobrá di auto pa tur hende mira, nos por bisa cu nos ta tratando nos bisiñanan cu respet?—Revelacion 11:18.

Santidad na Trabou i na Scol

18. (a) Kico ta un posicion difícil pa cristiannan awe? (b) Den ki manera nos por ta diferente for dje mundu?

¹⁸ Apostel Pablo a skirbi e cristiannan den e stad profano di Corinto: “Den mi carta mi a skirbi pa boso stop di mescla boso mes den compania di fornicadornan, sin nificá henteramente cu e fornicadornan dje mundu aki of personanan golos i estafadornan of idólatranan. Di otro manera, boso realmente lo mester sali for di mundu.” (1 Corintionan 5:9, 10) Esaki ta un posicion difícil pa cristiannan, kendenan mester mescla riba un base diario cu hende inmoral of sin moral. Esaki ta presentá un prueba grandi di integridad, specialmente den culturanan cu ta animá i ta pasa por haltu di molestia sexual, corupcion i desonestidad. Ni na trabou ni na scol nos no por permití nos mes di rebahá nos normanan pa asina parce “normal” pa esnan rond di nos. Mas bien, nos conducta cristian bondadoso pero diferente mester haci nos resaltá pa hende dicernidor, pa esnan cu ta reconocé nan necesidad spiritual i cu ta buscando algu mihó.—Mateo 5:3; 1 Pedro 3:16, 17.

19. (a) Ki pruebanan boso yunan ta haña na scol? (b) Kico mayornan por haci pa apoyá nan yunan i nan conducta santu?

¹⁹ Di igual manera, tin hopi prueba cu nos yunan ta enfrentá na scol. Boso como mayornan ta bishitá e scol cu boso yunan ta bai? Boso sa ki clase di ambiente ta reina ei? Boso tin un bon relacion cu e maestronan? Pakico e preguntanan aki ta importante? Pasobra den hopi área di stad dje mundu, scolnan a bira selvanan di violencia, droga i sex. Con boso yunan por warda nan integridad i conducta santu si nan no ta haña e pleno apoyo compasivo di nan mayornan? Corectamente Pablo a consehá mayornan: “Boso, tatanan, no fada boso yunan, pa nan no bira desanimá.” (Colosensenan 3:21) Un manera pa fada yu ta dor di keda sin comprendé nan problemanan i pruebanan diario. Preparacion p’e tentacionnan na scol ta cuminsá den e ambiente spiritual di un hogar cristian.—Deuteronomio 6:6-9; Proverbionan 22:6.

20. Pakico santidad ta esencial pa nos tur?

²⁰ Na conclusion, pakico santidad ta esencial pa nos tur? Pasobra e ta sirbi como un proteccion contra e invasionnan di Satanas su mundu i pensamentu. E ta un bendicion awor i lo ta un bendicion den futuro. E ta yuda garantisá nos e bida cu lo ta e berdadero bida den e mundu nobo di husticia. E ta yuda nos ser cristiannan balansá, acercabel i comunicativo—no fanáticonan sin misericordia. Bisá senciyamente, e ta haci nos semehante di Cristo.—1 Timoteo 6:19.

[Nota]

Bo Ta Corda?

◻ Pakico Pedro a mira e necesidad pa consehá cristiannan tocante santidad?

◻ Pakico no ta fácil pa hiba un bida santu?

◻ Kico nos tur por haci pa mehorá santidad den famia?

◻ P’e congregacion por permanecé santu, ki conducta profano nos mester evitá?

◻ Con nos por permanecé santu na trabou i na scol?

[Plachi na página 16]

Como Testigonan di Jehova, nos mester ta gososo den sirbi Dios i den otro actividadnan