Hóbennan Sa Puntra . . .

Con Mi Por Haci e Berdad di Mi Mes?

“Mi a lanta como un Testigo di Jehova, i semper mi a kere cu si bo lanta asina, bo conocé Jehova. Ki ekibocá mi tabata!”—Antoinette.

“KICO ta berdad?” Poncio Pilato, e homber cu a entregá Jesus pa ser ehecutá, a plantia e pregunta famoso ei. (Juan 18:38) Sin embargo, ta evidente cu Pilato a usa su pregunta cínico, no pa habri un combersacion franco, sino pa termin’é. Eigenlijk e no tabata interesá den e “berdad.” Ke tal di abo? Bo ta interesá den e berdad?

Pa siglonan filósofonan a pensa hopi riba kico e berdad ta. Pero nan a logra asina tiki resultado cu nan no por mustra nan mes. Sin embargo, abo por haña contesta riba Pilato su pregunta. Jesucristo a siña cu e Palabra di Dios ta e berdad. Tambe el a bisa cu e mes ta “e berdad.” I apostel Juan a skirbi: “Berdad a yega di ser pa medio di Jesucristo.” (Juan 1:17; 14:6; 17:17) P’esei, e totalidad di siñansanan cristian, cu despues a bira parti di Bijbel, tambe ta ser yamá “e berdad” of “e berdad dje bon nobo.” (Tito 1:14; Galationan 2:14; 2 Juan 1, 2) E siñansanan cristian aki ta encerá cosnan manera Dios su nomber personal, e establecimentu di Dios su Reino, e resureccion i Jesus su rescate.—Salmo 83:18; Mateo 6:9, 10; 20:28; Juan 5:28, 29.

Miles di hóben a siña berdad bíblico cristian for di nan mayornan cristian. Pero esaki ta nificá cu e hóbennan aki ta “cana den e berdad”? (3 Juan 3, 4) No necesariamente. Por ehempel, Jennifer di binti aña a lanta como un Testigo di Jehova. E ta conta: “Mi mama tabata hibá mi congresonan di Testigonan i tabata insinuá pa mi pensa riba bautismo. Pero ami tabata pensa den mi mes: ‘Nunca mi kier bira un Testigo. E único cos cu mi kier ta pasa bon!’ ”

Algun hóben ta kere loke nan a siña, pero nan no a desaroyá un comprendimentu profundo di loke Bijbel ta siña realmente. E peliger? Jesus a spierta cu algun individuo “no tin rais den nan mes.” Hendenan asina lo por “sigui pa un tempu; anto asina cu tribulacion of persecucion lanta debí n’e palabra, nan ta trompecá.” (Marco 4:17) Otronan por splica nan creencianan basá riba Bijbel te na cierto grado, pero nan no a yega di conocé Dios riba un base personal. Un mucha muher cu yama Aneesa ta bisa: “Mi no ta kere cu mi tabatin un berdadero relacion cu Jehova tempu mi tabata mas yong . . .Mi ta suponé cu tur cos tabata dependé mas tantu riba e relacion di mi mayornan cu Dios.”

Con abo ta pará den esaki? Jehova ta simplemente e Dios di bo mayornan? Of bo por bisa, mescos cu e salmista bíblico: “Den bo mi a cifra mi confiansa, O Jehova. Mi a bisa: ‘Abo ta mi Dios’ ”? (Salmo 31:14) Kisas ta rekerí curashi pa enfrentá e echonan. Un yoncuman cu yama Alexander ta bisa: “Den mi caso, un examinacion propio onesto tabata e promé stap.” Despues di examiná bo mes bon, kisas lo bo por bin realisá cu nunca bo a ègt proba e berdad (e totalidad di siñansanan cristian) pa bo mes. Kisas bo no tin un conviccion firme, i p’esei por parce manera bo bida no tin doel, i no tin ègt un rumbo.

Hopi bes Testigonan di Jehova ta canta na nan reunionnan cristian un cantica titulá “Haci e Berdad di Bo Mes.”a Kisas e conseho ei ta apropiado pa bo. Pero con bo por haci esei? Na unda bo mester cuminsá?

Proba e Berdad pa Bo Mes

Na Romanonan 12:2, nos ta haña e conseho aki di apostel Pablo: “Proba pa boso mes loke ta e bon i aceptabel i perfecto boluntad di Dios.” Pero con bo por haci esei? Dor di adkerí “e conocimentu exacto dje berdad.” (Tito 1:1) E antiguo habitantenan dje stad di Berea no a aceptá sin mas loke nan a tende. Al contrario, nan a “[examiná] cuidadosamente e Scritura diariamente en cuanto si e cosnan aki [cu nan tabata siña] tabata asina.”—Echonan 17:11.

Un hóben cristian cu yama Erin a mira e necesidad di aplicá esaki e mes. E ta conta: “Mi a haci investigacion. Mi a puntra mi mes: ‘Con mi sa cu esaki ta e religion corecto? Con mi sa cu tin un Dios cu yama Jehova?’ ” Pakico no cuminsá bo mes programa di studio personal? Lo bo por cuminsá cu e buki basá riba Bijbel Conocimentu cu Ta Hiba na Bida Eterno.b Les’é bon. Busca tur e textonan di Bijbel mencioná i tuma nota kico nan tin di haber cu loke ta pará den e buki. Lo bo keda sorprendí di descubrí con diferente bo ta sinti tocante e berdad ora bo bira “un trahadó sin nada di tene bergwensa di dje, manehando e palabra dje berdad corectamente”!—2 Timoteo 2:15.

Apostel Pedro a bisa cu algun cos den Bijbel ta “difícil pa comprendé,” i lo bo haña cu ta asina. (2 Pedro 3:16) Pero Dios su spiritu por yudá bo capta asta cosnan difícil. (1 Corintionan 2:11, 12) Pidi Dios su yudansa ora bo haña cu un cos ta difícil pa comprendé. (Salmo 119:10, 11, 27) Purba haci un tiki mas investigacion den e publicacionnan di Sociedad Watch Tower. Si bo no sa exactamente con pa haci esei, pidi yudansa. Bo mayornan of kisas un otro miembro maduro dje congregacion cristian por yudá bo.

Corda, bo no ta studiando pa impresioná otronan cu bo conocimentu. Un hóben cu yama Collin ta splica: “Bo ta bezig ta siña conocé Jehova su cualidadnan.” Tuma tempu pa meditá riba loke bo ta lesa pa asina e baha bai den bo curason.—Salmo 1:2, 3.

Asociacion cu e congregacion na reunionnan cristian tambe por yudá bo. Al fin i al cabo, manera apostel Pablo a skirbi, e congregacion ta “un pilar i apoyo dje berdad.” (1 Timoteo 3:15) Algun hóben ta keha cu e reunionnan cristian ta laf. “Pero si bo no prepará pa reunion,” e hóben Collin ta recordá nos, “e ora ei lo bo no saca mashá for di nan.” Pues, prepará bo lesnan di antemano. Reunionnan ta muchu mas interesante ora bo participá, i no djis sinta wak.

Muchu Druk pa Studia?

Ta cierto cu teniendo tantu huiswerk i tarea di cas, ta difícil pa saca tempu pa studia. Un hóben cu yama Susan ta skirbi: “Pa añanan mi a lucha sabiendo cu mi mester prepará pa reunion i haci studio personal, pero tog nunca mi a logra hacié.”

Susan a siña ‘cumpra tempu’ for di actividadnan ménos importante. (Efesionan 5:15, 16) Promé, el a traha un lista di tur e cosnan cu e mester studia. Caba, el a programá tempu pa studia nan. Pero den su programa el a hinca tempu tambe pa recreá. E ta consehá: “No programá delaster un momento liber. Nos tur tin mester di tempu pa relahá.” Probablemente un programa asina lo resultá bon pa bo tambe.

Compartí Loke Bo Ta Siña

Usa loke bo ta siña ta un manera sumamente útil pa hacié un parti di bo. Purba siña un otro hende. E salmista a bisa: “Mi propio boca lo papia cosnan di sabiduria, i e meditacion di mi curason lo ta cosnan di comprendimentu.”—Salmo 49:3.

Si bo no tin bergwensa dje bon nobo, lo bo no vacilá pa compartié cu compañeronan di scol i otro hende cu bo topa. (Romanonan 1:16) Dor di probechá di oportunidadnan asina pa papia cu otronan tocante e berdad, lo bo usa loke bo ta siña; i asina lo bo graba e berdad den bo propio mente i curason.

Vigilá Bo Asociacion

Algun cristian di promé siglo a haci bon progreso spiritual. Pero no a tarda muchu cu apostel Pablo a hañ’é ta skirbi nan pa puntra: “Ken a stroba boso di sigui obedecé e berdad?” (Galationan 5:7) Algu asina a sosodé cu un hóben cu yama Alex. E ta admití cu su esfuersonan pa studia e Palabra di Dios a cai na awa dor di “anda cu mal asociacion.” Pa bo progresá spiritualmente, podisé bo tambe mester haci algun cambio den esaki.

Vise versa, bon asociacion por ègt yudá bo progresá. Proverbionan 27:17 ta bisa: “Heru cu heru mes ta haci otro skerpi. Asina un hende ta haci e cara di un otro skerpi.” Busca asociacion di personanan cu ta bon ehempel, hendenan cu ta aplicá e berdad den nan mes bida. Tal bes bo no tin nodi busca masha leu; kisas nan t’ei den bo famia mes. E hóben Jennifer ta conta: “Welo tabata mi mihó ehempel. Semper e tabata tuma tres ora pa prepará pa nos studio di Bijbel di congregacion riba diadomingo. E tabata busca tur texto cu tin den e les den vários traduccion di Bijbel i tabata busca palabranan den diccionario. E tabata un experto den echonan poco conocí di Bijbel. Kico cu bo puntr’é, e ta haña e contesta.”

Ora bo haci e berdad di bo mes, bo ta haña un posesion precioso: algu cu lo bo no kier perde pa nada di mundu. P’esei, nunca mira e berdad solamente como “e religion di mi mayornan.” Bo mester tin un conviccion manera esun dje salmista cu a bisa: “Den caso cu mi mes tata i mi mes mama bandoná mi, asta Jehova mes lo ricibí mi.” (Salmo 27:10) Dor di ègt sa loke Bijbel ta siña, ker’é, compartí bo creencianan cu otronan i, riba tur cos, biba na armonia cu e creencianan aki, lo bo demostrá cu bo a haci e berdad di bo mes.

[Notanan]

[Plachi na página 13]

Proba e berdad pa bo mes dor di haci bo mes investigacion i studio personal