E Punto Di Bista Biblico

Bo Ta Balioso den Bista di Dios!

“DURANTE MAYOR PARTI DI MI BIDA, SINTIMENTUNAN DI CU MI TA INUTIL A TORMENTA MI,” UN SEÑORA CRISTIAN A SKIRBI. “MASKE CUANTU MI STIMA JEHOVA, I MASKE CUANTU ESFUERSO MI HACI PA SIRBIE, SEMPER MI TA SINTI CU ESEI NO TA SUFICIENTE.”

ABO conocé un hende cu ta lucha cu sintimentunan profundo di cu e no ta bal of no ta sirbi pa nada? Of abo mes sa sinti asina tin biaha? E sintimentunan ei no ta nada straño, ni entre adoradónan fiel di Dios. Niun hende no ta inmuno pa e efectonan di biba den e ‘tempu crítico aki, duru pa trata cuné.’ Hopi hende a experenciá negligencia i abusu na man di personanan cu ta “sin dominio propio, feros, sin amor pa bondad,” característicanan cu ta prevalente den “e último dianan.” (2 Timoteo 3:1-5) Experencianan penoso asina lo por laga sicatrisnan emocional profundo atras i ta causa sintimentunan di ta totalmente inútil.

Otro cos cu por causa sintimentunan negativo ta ora hende fiha normanan demasiado haltu pa nan mes. Si resultá cu nan no por alcansá e normanan ei, e sintimentu cu nunca nan no ta suficiente bon, ta bira mas fuerte. Sea cual sea e motibu, esnan cu ta lucha cu sintimentunan di inutilidad lo por haña cu ta difícil pa kere cu Dios, of cualkier otro hende, ta stima nan. Sí, nan lo por asta kere cu nan no ta merecé amor mes.

Pero no ta asina Jehova Dios ta pensa! Den su Palabra, Jehova ta spierta nos pa vigilá contra e “tácticanan engañoso” di su Adversario, Satanas e Diabel. (Efesionan 6:11, Jewish New Testament) Satanas ta usa su tácticanan engañoso pa purba kita nos di adorá nos Dios. Pa logra esei, Satanas ta stimulá e sintimentu den nos cu nos ta inútil, cu nunca Jehova lo no haña cu nos merecé amor. Pero Satanas ta “un mentiroso”; echo ta cu e ta “e tata di mentira.” (Juan 8:44) P’esei, nos no mester lagu’é gaña nos cu su tácticanan engañoso! Den Bijbel, Jehova ta papia pa su mes, i ta sigurá nos cu nos ta balioso den su bista.

Un Punto di Bista Balansá di Nos Balor

Bijbel ta spierta dje efecto negativo cu desanimacion por tin riba nos. Proverbionan 24:10 ta declará: “Bo a mustra bo mes desanimá den e dia di afliccion? Bo poder lo ta poco.” Sintimentunan negativo persistente lo por horta nos di nos fortalesa i pone nos sinti débil i vulnerabel. Bo por tin sigur cu Satanas sa esei masha bon. Ta difícil caba si nos curason ta tormentá cu sintimentunan di cu nos no ta bal nada. Sin embargo, ora Satanas purba haci mal uso dje sintimentunan ei, e ta haci un situacion asina mas pisá ainda.

P’esei ta importante pa nos tin un punto di bista saludabel i balansá di nos balor. Apostel Pablo a urgi: “Mi ta bisa cada un cu ta ei den boso pa no pensa mas di su mes cu ta necesario pa pensa; sino pensa cu sano huicio.” (Romanonan 12:3) Un otro traduccion ta bis’é asina aki: “Ami lo kier bisa cada un di boso pa no calculá su balor mas haltu di loke e ta en berdad, pero pa haci un evaluacion sobrio di su mes.” (Charles B. Williams) Pues, e texto aki ta animá nos pa nos tin un punto di bista balansá di nos mes. Di un banda, nos mester soru pa nos no ta arogante; di otro un banda, nos mester purba pa no bai n’e otro extremo, pasobra Pablo ta implicá cu pa nos por tin sano huicio, ta necesario pa nos pensa algu di nos mes. Sí, bou di inspiracion divino, Pablo ta indicá cu cada un di nos tin balor den Jehova su bista.

Nos por haña un sentido balansá di nos balor propio tambe den e palabranan di Jesus ora el a bisa: “Bo tin cu stima bo próhimo mescos cu bo mes.” (Mateo 22:39) E palabranan “mescos cu bo mes” ta indicá cu nos mester tin un sintimentu di balor propio, of respet propio. Ta cierto cu nos tin fayo i ta cometé eror. Pero ora nos ta haci esfuerso pa agradá Dios, ta sinti duele cu nos a faya, i ta busca su pordon, tog nos lo por tin un midí di balor propio. Nos curason cu ta condená nos lo por insistí cu no ta asina, pero corda cu “Dios ta mas grandi cu nos curason.” (1 Juan 3:20) Cu otro palabra, Jehova ta mira nos den un manera cu por ta bastante distinto for di e manera cu nos ta mira nos mes.

Curason Kibrá, Spiritu Aplastá

E salmista David a skirbi: “Jehova ta cerca di esnan kibrá di curason; i esnan cu tin un spiritu aplastá e ta salba.” (Salmo 34:18) Comentando riba e texto aki, Matthew Henry’s Commentary on the Whole Bible ta remarcá: “Ta hende hustu su caracter . . . pa nan ta di un curason kibrá i un spiritu abatí, esta, cu nan ta humiyá debí na picá i cu nan ta sinti cu nan no ta bal nada; nan ta inferior den nan mes bista, i no ta confia den nan mes mérito.”

Esnan cu ta “kibrá di curason” of “tin un spiritu aplastá,” lo por sinti cu Jehova ta leu di nan i cu nan ta demasiado insignificante pa Jehova wori cu nan. Pero esei no ta e caso. E palabranan di David ta sigurá nos cu Jehova no ta bandoná esnan cu ta “inferior den nan mes bista.” Nos Dios compasivo sa cu ta na momentonan asina nos tin mester di dje mas cu nunca, i e ta cerca di nos.

Considerá un ehempel. Algun aña pasá un mama a core bai hospital cu su yu di dos aña pasobra e tabata hañando un atake fuerte di tosamentu i falta di rosea. Despues cu e dokternan a saminá e mucha, nan a bisa e mama cu nan lo mester ten’é den hospital un dia. Unda e mama a pasa anochi ei? Den un stul den e kamber di hospital, banda dje cama di su yu. Su yuchi tabata malu, i e no por tabata otro caminda cu no ta banda di dje. Sigur nos por spera muchu mas for di nos amoroso Tata celestial, den ken su imágen nos ta trahá! (Génesis 1:26; Isaías 49:15) E palabranan conmovedor di Salmo 34:18 ta sigurá nos cu ora nos ta “kibrá di curason,” mescos cu un mayor amoroso, Jehova “ta cerca”—masha vigilante, atento i cla pa yuda.—Salmo 147:1, 3.

“Boso Bal Mas cu Hopi Mofi”

Durante su ministerio terenal, Jesus a revelá hopi cos tocante con Jehova ta pensa i sinti, incluso con E ta sinti tocante Su sirbidónan terenal. Mas cu un biaha, Jesus a sigurá su disipelnan cu nan ta balioso den Jehova su bista.—Mateo 6:26; 12:12.

Por ehempel, Jesus a duna un ilustracion dje balor individual cu cada un di su disipelnan tin. E di: “Nan no ta bende dos mofi pa un moneda di poco balor? Sin embargo, ni un di nan no ta cai na suela sin boso Tata sa. Pero tur e cabeinan mes riba boso cabes ta contá. P’esei, no tene miedu: Boso bal mas cu hopi mofi.” (Mateo 10:29-31) Pensa un ratu loke e palabranan ei mester a nificá pa esnan cu a para scucha Jesus e tempu ei.

Parce cu mofi tabata un dje paranan mas barata cu hende a usa pa cuminda. Por lo general nan tabata pluma e paranan chikitu aki, despues nan tabata hinca nan na palu i tabata hasa nan riba candela manera saté. Sin duda Jesus a yega di mira hende muher pober na marshe ta conta nan monedanan pa mira cuantu mofi nan por a cumpra. Hende tabata considerá e paranan ei di asina poco balor, cu un hende por a cumpra dos mofi pa un moneda di masha poco balor (literalmente, un asarion, cu ta bal ménos cu un debchi.)

Poco tempu despues, Jesus a bolbe ripití e ilustracion aki, pero cu un diferencia chikitu. Segun Lucas 12:6, Jesus a bisa: “Ta bende cincu mofi pa dos moneda di poco balor, no ta berdad?” Pensa un ratu. Pa un moneda di poco balor, un cumpradó por a haña dos mofi. Pero si e tabata dispuesto pa gasta dos moneda, e por a haña, no cuater mofi, sino cincu. E extra mofi tabata di ñapa, como si fuera e no tabatin ningun balor. “Tog,” Jesus a bisa, “Dios no ta lubidá ni un di nan,” ni esun cu nan a duna di ñapa. Jesus a aplicá su ilustracion dje siguiente manera: “Boso bal mas cu hopi mofi.” (Lucas 12:7) Esta animador e palabranan ei mester tabata pa esnan cu a scuch’é!

Bo a capta e punto di Jesus su ilustracion alentador? Si Jehova ta haña cu asta para chikitu ta balioso, cuantu mas e mester ta stima su sirbidónan terenal! Cerca Jehova, ningun di nos no ta perdí den e multitud. Cada un di nos ta asina balioso pa Jehova cu e ta tuma nota asta dje detaye mas chikitu di nos: e cabeinan mes riba nos cabes ta contá un pa un.

Claro cu Satanas lo sigui usa su “tácticanan engañoso,” manera probechá di nos sintimentu cu nos no ta bal nada, pa pone nos stop di sirbi Jehova. Pero no laga Satanas gana! Corda e señora cristian citá na cuminsamentu. Un artículo den e revista E Toren di Vigilancia cu a spierta contra e intentonan di Satanas pa probechá di nos sintimentunan, a yud’é.a E ta bisa: “Nunca mi no a realisá cu Satanas ta purba usa mi sintimentunan pa desanimá mi. Awor cu mi sa esaki, mi ta sinti mi motivá pa bringa contra e sintimentunan aki. Awor mi por lanta para contra e atakenan aki di Satanas, cu cara na laira.”

Jehova “sa tur cos.” (1 Juan 3:20) Sí, e sa kico nos ta pasando aden awor. E sa tambe loke nos a pasa aden den pasado cu lo por a aplastá nos respet propio. Pero corda cu ta e manera cu Jehova ta wak nos ta conta! No ta importá con inútil nos ta pensa cu nos ta, of cuantu nos ta sinti cu nos no merecé amor. Jehova ta sigurá nos cu cada un di su sirbidónan ta balioso p’e. Nos por confia riba Jehova su palabra, pasobra, distinto di su Adversario, Dios “no por gaña.”—Tito 1:2.

[Nota]

[Komentario na página 12]

Mescos cu un mayor amoroso, Jehova ta cerca di esnan cu ta tristu di curason

[Plachi na página 13]

Si Jehova no ta lubidá un mofi, ta con e por lubidá abo?

[Rekonosementu]

Lydekker

Illustrated Natural History