“Stima . . . ku Echo i ku Sinseridat”

1. Ki tipo di amor ta esun di mas elevá, i dikon? (Wak e promé plachi.)

AMOR basá riba prinsipio (agape) ta un regalo di Yehova, kende ta e Fuente di e amor ei. (1 Huan 4:7) E tipo di amor akí ta e forma di mas elevá di amor. E por inkluí mustramentu di afekto i kariño na otro hende, pero e ta muchu mas ku esei. Nos ta demostr’é ora nos ta hasi bon na otro hende sin mustra egoismo. Segun un obra di referensia, e úniko manera ku ‘bo por rekonosé [agape] ta na e obranan ku e ta motivá hende pa hasi.’ Ora nos ta mustra amor inegoista òf ora otro hende ta mustra esei na nos, nos ta yena ku goso i nos bida ta haña mas sentido.

2, 3. Den ki manera Yehova a mustra amor inegoista na humanidat?

² Yehova a mustra amor na hende asta promé ku el a krea Adam ku Eva. El a traha tera pa ta hende su hogar pa semper; no un lugá kaminda tin djis loke hende tin mester pa sobrebibí ma un lugá kaminda nan por gosa di bida. Yehova a hasi esaki únikamente pa nos benefisio i no pa su mes probecho. Ademas, el a sigui mustra amor inegoista ora el a bendishoná su yunan riba tera ku e speransa di biba pa semper den e Paradeis ku el a krea pa nan.

³ Despues ku Adam ku Eva a rebeldiá, Yehova a hasi e muestra di mas grandi di su amor inegoista. El a hasi tur loke ta nesesario pa reskatá e desendientenan di Adam ku Eva, pasobra e tabata konvensí ku algun di nan lo a mustra apresio pa su amor. (Gén. 3:15; 1 Huan 4:10) De echo, for di e momento ku Yehova a primintí di manda un futuro Salbador, ta komo si fuera e sakrifisio a ser hasí kaba. Anto mas o ménos 4.000 aña despues, Yehova a hasi un sakrifisio grandi i a duna su Yu unigénito pa henter humanidat. (Huan 3:16) Nos ta masha gradisidu pa Yehova su amor inegoista!

4. Kiko ta mustra ku hende imperfekto por demostrá amor inegoista?

⁴ Nos por mustra amor inegoista pasobra Dios a krea nos den su imágen. Imperfekshon a pone ku ta difísil pa nos mustra amor, pero tá posibel pa nos mustra amor. Abel a mustra ku e tabata stima Dios ora ku di kurason el a duna lo mihó ku e tabatin. (Gén. 4:3, 4) Noe a mustra amor inegoista na su próhimo ora el a prediká e mensahe di Dios pa dékadanan largu apesar ku hende no a mustra interes. (2 Ped. 2:5) Abraham a pone su amor pa Dios promé ku su mes emoshonnan ora e tabata dispuesto pa sakrifiká su yu Isak. (Sant. 2:21) Meskos ku e fiel sirbidónan ei di Dios, nos tambe mester mustra amor, apesar di e difikultatnan ku nos ta enfrentá.

KIKO TA AMOR BERDADERO?

5. Den ki maneranan nos por mustra amor berdadero?

⁵ Relashoná ku amor berdadero, Beibel ta bisa ku “nos no mester stima ku palabra òf ku boka so, ma ku echo i ku sinseridat.” (1 Huan 3:18) Esaki ke men ku nos no por mustra amor ku nos palabranan? Klaru ku nò! (1 Tes. 4:18) Mas bien, e ta nifiká ku no ta sufisiente pa djis bisa un ruman ku nos ta stim’é. Nos mester demostrá nos amor ku akshon. Por ehèmpel, ora un ruman ta den nesesidat, palabranan bondadoso so no ta sufisiente. (Sant. 2:15, 16) Di igual manera, amor pa Yehova i pa nos próhimo lo motivá nos pa no solamente pidi Dios pa “manda trahadó pa kosechá,” sino tambe pa nos partisipá plenamente den e trabou di prediká.—Mat. 9:38.

6, 7. (a) Kiko ta “amor sin hipokresia”? (b) Menshoná algun ehèmpel di amor ku no ta berdadero.

⁶ Apòstel Huan a skirbi ku nos mester stima “ku echo i ku sinseridat.” Pues, nos amor mester ta “sin hipokresia.” (Rom. 12:9; 2 Kor. 6:6) Esaki ta nifiká ku nos no por mustra amor berdadero i a la bes pretendé di ta algu ku nos no ta, komo si fuera nos tin un maskarada bistí. Kisas nos ta puntra nos mes: ‘Ta eksistí amor ku hipokresia?’ Nò. Esei lo no ta amor, sino un imitashon di amor, algu sin balor.

⁷ Ban analisá algun ehèmpel di amor ku no ta berdadero. Den e Hòfi di Edén, Satanas a pretendé ku e tabata interesá den Eva su bienestar, pero loke el a hasi en realidat a mustra ku e tabata egoista i hipókrita. (Gén. 3:4, 5) Den tempu di Rei David, Ahitofel a hasi manera e ta amigu di e rei, pero ora el haña chèns pa hasi algu pa su mes probecho, el a traishoná e rei. (2 Sam. 15:31) Di igual manera awe, apóstatanan i otro hende ku ta kousa divishon den e kongregashon ta usa “palabra dushi i labiamentu” pa laga parse ku nan ta mustra amor. Pero en realidat, nan tin intenshonnan egoista.—Rom. 16:17, 18.

8. Kiko nos mester puntra nos mes?

⁸ Amor ku no ta berdadero ta spesialmente bergonsoso pasobra hende ta us’é pa engañá otro. E hipokresia ei por gaña hende, pero e no por gaña Yehova. De echo, Hesus a bisa ku hende hipókrita lo haña “e kastigu di mas severo.” (Mat. 24:51) Klaru ku sirbidónan di Yehova nunka lo ke demostrá amor ku no ta berdadero. P’esei nos ta hasi bon di puntra nos mes: ‘Mi amor semper ta di kurason, sin rastro di egoismo òf engaño?’ Ban wak nuebe manera ku nos por demostrá amor “sin hipokresia.”

KON PA “STIMA . . . KU ECHO I KU SINSERIDAT”

9. Kiko amor berdadero lo motivá nos pa hasi?

⁹ Nos mester sirbi di buena gana asta ora otro hende no ta mira kiko nos ta hasi. Nos mester ta dispuesto pa “den sekreto” nos demostrá amor na nos rumannan, pues sin ku otro hende sa, ora esaki ta posibel. (Lesa Mateo 6:1-4.) Ananías ku Safira no a hasi esei. Nan no a keda kontentu ku hasi un donashon di forma anónimo, ma abiertamente nan a eksagerá nan donashon i a haña kastigu pa nan hipokresia. (Echo. 5:1-10) Na kontraste, amor berdadero lo motivá nos pa nos tin goso den sirbi nos rumannan sin haña atenshon òf rekonosementu. Por ehèmpel, e ruman hòmbernan ku ta yuda e Kuerpo Gobernante prepará kuminda spiritual ta hasi esei di forma anónimo, nan no ta hala atenshon na nan mes ni bisa riba ki informashon nan a traha.

10. Kon nos por tuma inisiativa den mustra onor na otro hende?

¹⁰ Nos mester tuma inisiativa den mustra onor na otro hende. (Lesa Romanonan 12:10.) Hesus a hasi e tareanan di mas humilde i asina a pone un bon ehèmpel den mustra onor na otro hende. (Huan 13:3-5, 12-15) Pa nos por mustra onor na otro hende di e manera akí, kisas nos mester traha duru pa desaroyá humildat. Asta e apòstelnan mes no por a komprondé kompletamente loke Hesus a hasi si no ta te ora nan a haña spiritu santu. (Huan 13:7) Nos por mustra onor na otro hende ora nos no ta pensa demasiado di nos mes debí na nos enseñansa, poseshon material òf responsabilidatnan ku nos tin den sirbishi na Yehova. (Rom. 12:3) Anto en bes di envidiá rumannan ku ta haña elogio, nos ta alegrá ku nan asta si nos ta sinti ku nos tambe meresé mes tantu elogio òf mérito pa loke a ser hasí.

11. Dikon nos mester duna elogio ku sinseridat?

¹¹ Nos mester elogiá nos rumannan di kurason. Nos mester buska oportunidat pa elogiá nos rumannan pasobra esei “ta bon pa edifiká” nan. (Efe. 4:29) Pero e mester ta sinsero i no djis pa labia e persona òf pa evitá nos responsabilidat di dun’é konseho nesesario. (Pro. 29:5) Nos lo ta un hipókrita si nos ta elogiá un hende pero despues ta kritik’é tras di su lomba. Apòstel Pablo no a kai den e trampa ei i a pone un bon ehèmpel den mustra amor berdadero na e manera ku el a elogiá otro hende. Por ehèmpel, di kurason el a elogiá e kristiannan na Korinto tokante algun aspekto di nan kondukta. (1 Kor. 11:2) Pero ora nan no a meresé elogio pa nan kondukta, el a splika nan e motibu pa esei na un manera kla i bondadoso.—1 Kor. 11:20-22.

12. Kon nos por demostrá amor berdadero ora di mustra hospitalidat?

¹² Nos mester mustra hospitalidat. Yehova ta manda nos pa ta generoso ku nos rumannan. (Lesa 1 Huan 3:17.) Pero nos mester hasi esei ku e motibunan korekto i no pa motibunan egoista. Puntra bo mes: ‘Mi ta mustra hospitalidat mas tantu na mi bon amigunan òf na rumannan ku mi ta haña ku ta importante den e kongregashon òf na rumannan ku lo por hasi algu pa mi bèk? Òf mi ta buska manera pa ta generoso ku rumannan ku mi no konosé bon òf ku no por hasi algu pa mi bèk?’ (Luk. 14:12-14) Òf suponé ku un ruman ta hañ’é den nesesidat pasobra el a tuma mal desishon òf un ruman no a gradisí nos pa nos muestra di hospitalidat. Den tal situashon nos mester apliká e siguiente konseho: “Sea hospitalario ku otro sin keha.” (1 Ped. 4:9) Si bo sigui e konseho akí, lo bo ta felis pasobra bo ta duna ku e motibunan korekto.—Echo. 20:35.

13. (a) Ki ora kisas nos mester mustra mas pasenshi? (b) Kiko nos por hasi pa yuda rumannan débil?

¹³ Nos mester apoyá e débilnan. E mandamentu bíbliko pa “apoyá e débilnan, tene pasenshi ku tur” por yuda nos tèst kon sinsero nos amor ta. (1 Tes. 5:14) Maske hopi ruman ku tabata débil a bira fuerte den fe despues, tin otronan ku te ainda tin mester di nos apoyo i nos mester sigui tene pasenshi ku nan. Esaki por enserá ku nos ta kompartí tekstonan di Beibel animante ku nan, invitá nan pa traha ku nos den sirbishi òf djis tuma tempu pa skucha nan. Ademas, en bes di pensa ku un ruman ta ‘fuerte’ òf ‘débil,’ nos mester rekonosé ku nos tur tin puntonan fuerte i puntonan débil. Asta apòstel Pablo a rekonosé su debilidatnan. (2 Kor. 12:9, 10) Pues, nos tur por benefisiá di e apoyo di nos rumannan.

14. Kon leu nos mester ta dispuesto pa bai pa mantené pas ku nos rumannan?

¹⁴ Nos mester hasi pas. Nos ta hasi tur loke nos por pa keda na pas ku nos rumannan, asta ora nos pensa ku tabatin un malkomprondementu òf ku nan a trata nos na un manera inhustu. (Lesa Romanonan 12:17, 18.) Si nos a hùrt un ruman, nos mester pidi despensa pero e mester ta di kurason. Por ehèmpel, en bes di bisa “ta duel mi ku bo ta sinti bo asina,” bo por atmití bo fout i bisa “despensa mi ku loke mi a bisa a hùrt bo.” Pas ta masha importante den matrimonio. Esposo i esposa no mester hasi manera nan ta stima otro ora nan ta den públiko pero ora nan ta na kas, nan ta keda sin papia ku otro òf ta usa palabranan kruel òf maltrato físiko pa hasi otro daño.

15. Kon nos por mustra ku nos ta pordoná di kurason?

¹⁵ Nos mester pordoná libremente. Nos por hasi esei ora nos ta pordoná un hende ku a hùrt nos i no warda renkor kontra dje. Ora nos ta ‘soportá otro den amor, hasiendo esfuerso sinsero pa mantené e union di spiritu den e vínkulo di pas,’ nos por pordoná hende ku kisas no sa ku nan a hùrt nos. (Efe. 4:2, 3) Pa nos pordoná di kurason, nos mester dominá nos pensamentunan pa nos ‘no keda kòrda e malu ku hende a hasi nos.’ (1 Kor. 13:4, 5) Si nos karga renkor, nos por daña nos relashon ku nos ruman i tambe ku Yehova. (Mat. 6:14, 15) Ademas, nos por demostrá ku nos a pordoná di kurason ora nos ta hasi orashon pa hende ku a peka kontra nos.—Luk. 6:27, 28.

16. Kon nos mester mira responsabilidatnan ku nos tin den sirbishi na Yehova?

¹⁶ Nos no mester buska nos propio benefisio. Si nos haña responsabilidat den sirbishi na Yehova, nos mester mira esakinan komo oportunidat pa mustra ku nos amor ta di kurason i ‘no buska nos mes benefisio, sino esun di e otro persona.’ (1 Kor. 10:24) Por ehèmpel, na nos asamblea- i kongresonan tin ùsher ku ta yuda ku asiento i nan ta yega promé ku otro hende por drenta e lugá, ma nan no ta mira nan asignashon komo un oportunidat pa warda e mihó asientonan pa nan mes i nan famia. Mas bien, hopi di e ruman hòmbernan akí ta skohe pa sinta kaminda ta ménos faborabel den e sekshon di asiento ku nan ta asigná na dje. Nan no ta buska nan propio benefisio i asina ta demostrá amor sin niun rastro di egoismo. Kon abo por imitá nan bon ehèmpel?

17. Kiko amor berdadero lo motivá un ruman pa hasi si el a kometé un piká serio?

¹⁷ Nos mester konfesá pikánan ku nos a hasi den sekreto i stòp di praktiká nan. Algun ruman ku a kometé un piká serio ta purba di skond’é pa evitá ku nan ta pasa bèrgwensa òf desapuntá otro hende. (Pro. 28:13) Pero esei lo no ta un muestra di amor pasobra e ta hasi daño tantu na e pekadó komo na otro hende. Esei por stroba e spiritu santu di Dios di obra den e kongregashon i por daña e pas ku ta reina einan. (Efe. 4:30) Amor berdadero lo motivá un ruman ku a kometé un pika serio pa papia ku e ansianonan pa nan por dun’é e yudansa nesesario.—Sant. 5:14, 15.

18. Kon importante amor berdadero ta?

¹⁸ Amor ta e kualidat di mas grandi. (1 Kor. 13:13) E ta identifiká nos komo siguidónan di Kristu i komo imitadónan di Yehova, e Fuente di amor. (Efe. 5:1, 2) Pablo a skirbi: “Si . . . mi no tin amor, mi no ta nada.” (1 Kor. 13:2) Pues, laga nos sigui mustra amor, no djis ku “palabra òf ku boka so, ma ku echo i ku sinseridat.”