E Punto Di Bista Biblico

Unidad Cristian Ta Permití Variedad?

UNIDAD ta vital den e congregacion cristian. Desunion den creencia doctrinal lo causa discusionnan fuerte, division i asta enemistad. (Echonan 23:6-10) Bijbel ta bisa cu “Dios no ta un Dios di desordu, sino di pas.” (1 Corintionan 14:33) P’esei, Bijbel ta amonestá cristiannan pa papia di acuerdo cu otro i pa nan ta uní den e mésun mente i den e mésun forma di pensa.—1 Corintionan 1:10.

Acaso e palabranan aki i pasashinan similar den Bijbel ta animá uniformidad estricto den tur aspecto entre cristiannan? (Juan 17:20-23; Galationan 3:28) Cristianismo berdadero, manera e ta describí den Bijbel, ta descurashá variedad ora ta trata di personalidadnan individual? Ta verwagt pa tur cristian pas den un of otro malchi rígido?

Dios Ta Atraé Nos Individualmente

Algun hende ta convencí cu Bijbel ta solamente un herment mas pa controlá e masanan arbitrariamente. Ta cierto cu hopi bes algun secta a malus’é cu e propósito ei. Sin embargo, Jesus a pinta un cuadro masha diferente dje Scritura i su Autor Divino. El a describí Dios como un persona cu tin interes intenso den cada un di su criaturanan.

Na Juan 6:44, Jesus a splica: “Ningun hende por bini cerca mi a ménos cu e Tata, kende a mandá mi, ta atra’é.” E verbo usá aki no ta indicá cu Dios ta trek hende, contra nan boluntad. Mas bien, Dios ta atraé nan tiernamente dor di apelá na nan curason. Tin, manera un erudito bíblico a bisa, ‘un influencia for di Dios pa persuadí e mente pa e kere.’ E Creador no ta mira e famia humano como un masa di hende sin individualidad. E ta evaluá personanan individual i tiernamente ta atraé esnan cu un curason di disposicion hustu na dje.—Salmo 11:5; Proverbionan 21:2; Echonan 13:48.

Ripará con adaptabel apostel Pablo tabata. El a reconocé e necesidadnan special di individuonan i tambe cu cierto punto di bista tabata comun cerca hende di cierto nacionalidad of antecedente. Anto el a adaptá su manera di acercá nan di acuerdo cu esei. El a skirbi: “Pa hudiu mi a bira manera hudiu, pa mi por gana hudiu . . . Pa hende débil mi a bira débil, pa mi por gana hende débil. Mi a bira tur cos pa tur clase di hende pa di tur manera mi por salba algun.”—1 Corintionan 9:20-22.

Ta bisto cu Pablo no a hala tur hende riba mésun liña i cu e no a trata nan tur mésun cos. El a duna e animacion aki: “Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.” (Colosensenan 4:6) Sí, Pablo i otro cristiannan mester a reconocé i respetá e echo cu cada persona ta único pa e por yud’é.

Dios Su Diseño Original

E respet aki pa un hende como individuo ta sigui despues cu e bira parti dje congregacion cristian. Dios su pueblo no ta perde nan identidad personal den un masa di hende completamente uniforme i totalmente conformá n’e preferencianan di esnan den autoridad. Mas bien, nan ta disfrutá di un gran variedad di personalidad i nan tin diferente abilidad, custumber i opinion. Nan no ta mira e individualidad di cada un como un molester of algu fastioso. Esei ta parti di Dios su diseño original.

P’esei, den e mundu nobo cu Bijbel ta primintí pa hende hustu, perfeccion entre hende lo permití gran diversidad. (2 Pedro 3:13) Bou dje tema “Perfeccion,” e enciclopedia bíblico Perspicacia para comprender las Escriturasa ta haci e siguiente comentarionan cu ta na nan lugá: “No obstante, perfeccion no ta nificá cu lo no tin variedad, manera hende ta pensa hopi bes. E reino animal, cu ta producto di Jehova su ‘actividad perfecto’ (Gén[esis] 1:20-24; Deu[teronomio] 32:4), ta contené un variedad inmenso.”

Perspicacia ta agregá: “E perfeccion di planeta Tera tampoco ta incompatibel cu variedad, cambio of contraste; tin lugá pa loke ta simpel i loke ta complicá, loke ta gewoon i loke ta elaborá, loke ta zuur i loke ta dushi, loke ta brutu i loke ta suave, sabana i selva, ceru i vaye. E ta abarcá e frescura stimulante dje cuminsamentu di primavera, e calor di zomer cu su shelu blou blou, e hermosura dje colornan di otoño, i e bunitesa puru di sneu cu a caba di cai. (Gén[esis] 8:22) Pues, hende perfecto lo no ta stereotiponan cu personalidad, talento i abilidadnan idéntico.”

Interes den Otro Hende

Sin embargo, loke berdadero cristianismo sí ta desanimá ta pa nos mustra un falta di consideracion egoista pa esnan rond di nos. Apostel Pablo a vigilá cada aspecto di su bida i conducta cuidadosamente pa evitá di pone otronan trompecá. Den su carta n’e congregacion na Corinto, el a bisa: “Di ningun manera nos ta duna un motibu pa tropieso, pa hende no haña falta den nos ministerio.” (2 Corintionan 6:3) Tin biaha nos mester controlá nos deseonan personal i pone e necesidad di otronan promé cu nos mes preferencia. Por ehempel, Pablo a skirbi e cristiannan na Roma: “Ta bon pa no come carni ni bebe biña ni haci nada cu ta trompecá bo ruman.”—Romanonan 14:21.

Mescos awe, un hende por scoge pa keda sin bebe alcohol den presencia di un persona cu tin problema pa controlá su bebementu. (1 Corintionan 10:23, 24) E ta haci esaki, no forsá pa conformá cu e otro persona su preferencia, sino como un acto noble di bondad i amor. “Asta e Cristo no a agradá su mes.” Jesus tabata un individuo, pero e no a insistí riba su preferencianan a costo dje sintimentu di otronan.—Romanonan 15:3.

Tog, un dje aspectonan mas refrescante di berdadero cristianismo ta su respet pa libertad i preferencianan individual denter dje límitenan di instruccionnan bíblico. E ta siña cu Dios a crea nos pa nos ta distinto i único. Na 1 Corintionan 2:11 nos ta lesa: “Ken entre humanidad conocé e cosnan di un hende excepto e spiritu di hende cu ta den dje?” Nos ta purba comprendé otro hende tantu cu nos por. Pero e versículo aki ta implicá cu nos cada un tin peculiaridadnan cu solamente nos mes i nos Creador ta comprendé. Nos tin un “persona secreto di curason” cu nos ta revelá manera nos kier.—1 Pedro 3:4.

Unidad i Variedad—Un Balansa Delicado

Apostel Pablo a pone un bon ehempel di balansa cristian. Maske e tabatin autoridad como apostel di Cristo, el a soru pa e no imponé su opinion riba otronan.

Por ehempel, Pablo tabatin un opinion masha fuerte tocante e bentahanan di keda soltero den e mundu imperfecto aki. E mes tabata soltero ora el a skirbi: “Esnan cu [casa] lo tin tribulacion den nan carni,” i “[un biuda] ta mas felis si e permanecé manera e ta, segun mi opinion.” E echo cu su palabranan a bira parti dje Palabra inspirá di Dios ta indicá cu su opinion no tabata malu. Sin embargo, el a splica tambe: “Asta si bo casa mes, lo bo no ta cometiendo un picá.”—1 Corintionan 7:28, 40.

Evidentemente, mayoria apostel tabata hombernan casá, manera Pablo a reconocé cu e palabranan: “Nos tin autoridad pa hiba un ruman muher como esposa, mescos cu e resto dje apostelnan i e rumannan di Señor i Céfas, no ta berdad?” (1 Corintionan 9:5) Cristiannan tabata sa cu den e asuntu aki nan por a scoge un opcion diferente for di Pablo i tog lo el a respetá nan.

Adoradónan di Dios semper a ser permití pa expresá nan fe na armonia cu nan personalidad único. De echo, Dios a asta permití escritornan di Bijbel usa un estilo individual ora di skirbi. Por ehempel, den tur humildad Nehemías a skirbi su relato den promé persona. (Nehemías 5:6, 19) Di otro un banda, debí na su modestia, apostel Juan no a usa su mes nomber ni un solo biaha den su relato di Evangelio i masha poco biaha a referí na su mes. Dios a aprobá tur dos estilo i a laga nan keda conserbá den Bijbel.

Nos por haña ehempelnan similar di balansa i razonabilidad den henter e Scritura. Un cos ta claro: unidad cristian ta permití variedad. Naturalmente, diversidad di antecedente i opinion por hiba na desunion ora nos falta cualidadnan spiritual. (Romanonan 16:17, 18) Pero ora nos ‘bisti nos cu amor, e laso perfecto di union,’ nos ta siña aceptá i gusta e personalidad único di otronan.—Colosensenan 3:14.

“P’esei, ricibí un e otro cu gustu,” Bijbel ta bisa, “mescos cu Cristo tambe a ricibí nos cu gustu, cu gloria pa Dios na bista.” (Romanonan 15:7) Cu yudansa di Dios su spiritu, cristiannan por logra e balansa delicado di mantené unidad miéntras cu nan ta disfrutá di un variedad di personalidadnan único den e congregacion.

[Nota]

[Komentario na página 14]

E Creador no ta mira e famia humano como un masa di hende sin individualidad

[Komentario na página 15]

Nos cada un tin peculiaridadnan cu solamente nos mes i nos Creador ta comprendé