Sigi e Camina Superior di Amor
JEHOVA DIOS ta e personificacion di amor. (1 Juan 4:8) Su Yiu, Jesucristo, a bisa cu nos mester stima Dios i nos próhimo. (Mateo 22:37-40) Sí, Dios ta dirigi henter e universo riba e base di tal calidad! Pues, pa haya bida eterna na cualkier parti, nos mester sigi e camina di amor.
Dios a mustra amor pe nacion di Israel pero despues a rechaza tal organizacion pa su infieldad. Anto el a identifica e congregacion di disípel di Jesús como Su organizacion nobo. Di ki manera? Cu manifestacion special di su spiritu santo el a autorizánan pa papia cu lenga di stranhería i pa profetiza. P’sei, na Pentecoste di aña 33 EC, tres mil hudío i prosélito a bira creyente i a bandona e organizacion bieu i a acepta esun nobo di Dios. (Echo 2:1-41) Siendo cu don di spiritu tabata duná despues mediante di apóstol di Jesús, tal manifestacion a termina ora nan a muri. (Echo 8:5-18; 19:1-6) Ya ne tempo ei tal don a duna prueba cu e fabor di Dios tabata cu Israel spiritual.—Galatio 6:16.
Milagro cu a resulta di don di spiritu tabata beneficioso. Sin embargo, e demonstracion di amor i interés inegoísta den otro hende ta mas importante cu haya don di spiritu. Apóstol Pablo a mustra esei den su promé carta dirigí na corintio (c. 55 EC). Den dje el a menciona amor como “un camina superior.” (1 Corintio 12:31) E camina ei ta ser considerá den 1 Corintio capítulo 13.
Sin Amor, Nos no ta Nada
Pablo a razoná: “Si mi ta papia cu lenga di hende i di angel pero no tin amor, mi ta bira un pida di coper cu ta klink of un cimbal cu ta borota.” (1 Corintio 13:1) Sin amor, no ta nifica nada si hende a papia na idioma humano cu e spiritu a duna of den un lenga angelical celestial. Pablo a prefera di papia cinco palabra edificante en bez di diez mil den un lenga cu hende no ta comprende. (1 Corintio 14:19) Hende sin amor ta manera “un pida di coper cu ta klink”—un ruidoso klok fastioso—of un “cimbal cu ta borota” sin melodía. Un papiamento sin amor na lenga no ta un manera calmante i spiritualmente edificante pa glorifica Dios i yuda su pueblo. Awe, nos ta mustra amor usando un idioma comprendible den e ministerio cristian.
E apóstol a sigi bisa: “Si mi tin e don di profetizá i mi ta conoce tur secreto sagrado i tur conocimento, i si mi tin tur fe afin di transplanta montaña, pero no tin amor, mi ta nada.” (1 Corintio 13:2) Profetizamento milagrosamente, comprendimento special di secreto sagrado, i conocimento cu e spiritu ta duna por beneficiá otro hende pero no e hende cu tin tal don si e persona dotá cuné no tin amor. Pablo a usa su comprendimento special di secreto sagrado pa yuda otro hende, i un don di conocimento a haci posibel pe profetiza di sobrebibencia di víctima di naufragio. (Echo 27:20-44; 1 Corintio 4:1, 2) Sin embargo, si e tabatin ‘tur conocimento i tur fe’ pero tabata sin amor, e no tabata nada den e bista di Jehova.
Awe, e spiritu di Jehova Dios ta yuda su testigonan comprende profecía bíblico i secreto sagrado i ta guíanan pa siña tal conocimento na otro hende. (Joël 2:28, 29) E spiritu també ta produci e fe necesario pa vence obstáculo manera montaña. (Mateo 17:20) Siendo cu e spiritu ta haci tal cos, ta malu pa busca gloria personal for di nan. Nos no ta sirbi pa nada amenos cu nos ta haci cosnan pe gloria di Dios i cu amor pe i pa nos próhimo.—Galatio 5:6.
Sacrificio sin Amor no ta di Ningun Probecho
Pablo a bisa: “Si mi ta duna tur mi pertenencia pa alimenta otro, i si mi entrega mi curpa, pa mi por gaba, pero no tin amor, esei no ta di ningun probecho pa mi.” (1 Corintio 13:3) Sin amor, no tabata di ningun probecho pa Pablo si el a duna loke tabata di dje pa alimenta otro hende. Dios ta recompensános pe amor cu ta conmovénos pa duna, no pe balor material di esei of pa motibo cu nos ta busca gloria como dunador, manera Ananías i Safira gañador. (Echo 5:1-11) Pablo a pone un ehempel excelente amorosamente dunando di su mes en relacion cu un sirbishi di alivio pa hende creyente den Hudea.—1 Corintio 16:1-4; 2 Corintio 8:1-24; 9:7.
Asta un martirio sin amor como un testimonio dje berdad no ta importa Dios. (Proverbio 25:27) Jesús a menciona su sacrificio pero no a broma tocante dje. En bez di broma, el a duna su mes boluntariamente cu amor. (Marco 10:45; Efesio 5:2; Hebreo 10:5-10) Su rumanan spiritual ta ‘presenta nan curpa como un sacrificio bibo’ den e sirbishi di Dios i no den martirio pa nan propio gloria sino di manera no espectacular cu ta glorifica Jehova Dios i ta demonstra nan amor pe.—Romano 12:1, 2.
Algun Manera cu Amor lo Hácinos Actua
Pablo a skirbi: “Amor ta wanta i ta bondadoso.” (1 Corintio 13:4a) Pa hopi hende, e awante di Dios desde e picá di Adam ta nifica arrepentimento cu ta resulta den salbacion. (2 Pedro 3:9, 15) Si nos tin amor, cu pacenshi nos lo siña otro hende e berdad. Nos lo evita zundramento emocional i lo mustra consideracion i pordoná. (Mateo 18:21, 22) Amor ta bondadoso també, i nos ta ser atraí na Dios debí na su bondad. Bondad, un fruta di su spiritu ta yúdanos evita di exigi mas di otro hende cu Dios ta exigi di nos. (Efesio 4:32) Amor asta ta hácinos trata hende malagradicido cu bondad.—Lucas 6:35.
Pablo a agrega: “Amor no ta jaluz, no sa broma, no ta hincha cu orguyo.” (1 Corintio 13:4b) Jaluzi ta un obra di carni cu por haci hende perde e Reino di Dios. (Galatio 5:19-21) Amor ta preveni hende di síntinan jaluz di posesion of circunstancia favorable di otro hende. Si un otro persona ta recibi un privilegio di sirbishi cu nos a deseá, amor ta hácinos alegrá cuné, duné nos apoyo, i agradici Dios cu e persona por ta usá pe beneficio dje congregacion.
Siendo cu amor “no sa broma,” e no ta conmovénos pa broma tocante loke Dios ta permitínos haci den su sirbishi. Algun corintio a broma como si nan mes a origina don di spiritu, pero tal don a bini di Dios, mescos cu privilegio den su organizacion djawe. En bez di broma tocante nos puesto den e organizacion di Dios, anto, láganos tene cuidao pa nos no cai. (1 Corintio 1:31; 4:7; 10:12) Amor “no ta hincha cu orguyo,” pero e mente di hende sin amor por hincha cu importancia propio. Hende cu tin amor no ta síntinan superior cu otro hende.—1 Corintio 4:18, 19; Galatio 6:3.
No ta Indecente, Egoísta, Yen di Rencor
Amor “no ta comportele indecentemente, no ta busca su mes interés, no ta bira provocá.” (1 Corintio 13:5a) Amor ta promove cortesía, conducta piadosa, respet pa autoridad, i comportamento decente den reunion cristian. (Efesio 5:3-5; 1 Corintio 11:17-34; 14:40; compara cu Hudas 4, 8-10.) Siendo cu amor ta haci tur hende síntinan necesario, mescos cu tur parti dje curpa humano, un congregacion amoroso ta un lugar di paz i refugio. (1 Corintio 12:22-25) En bez di ‘busca bo mes interés’ egoístamente, amor ta hácinos sacrifica nos derecho aveces i mustra interés den otro hende i den nan bienestar. (Filipense 2:1-4) Amor ta hácinos ‘bira tur cos pa hende di tur sorto, pa nos por salba algun’ cu nos ministerio.—1 Corintio 9:22, 23.
Amor “no ta bira provocá.” Atake di rabia ta obra di carni pecaminoso, pero amor ta hácinos “tarda pa rabia.” (Santiago 1:19; Galatio 5:19, 20) Aunque nos ta rabia hustamente, amor no ta láganos keda provocá, i asina permiti lugar pe Diabel. (Efesio 4:26, 27) Anciano specialmente mester evita rabia ora otro creyentenan no ta cumpli cu un cierto sugerencia.
Pablo a bisa també tocante amor: “E no ta tene cuenta di daño.” (1 Corintio 13:5b) Amor no ta tene cuenta di ofensa, manera boekhouder. Amor ta mira algo bon den otro hende creyente i no ta purba di vinga ofensa berdadero of imaginario. (Proverbio 20:22; 24:29; 25:21, 22) Amor ta yúdanos “sigi tras di loke ta contribui na paz.” (Romano 14:19) Pablo i Barnabas tabatin un discusion i a parti for di otro den e sirbishi di Dios, pero amor a cura e herida i a prevenínan di carga rencor.—Levítico 19:17, 18; Echo 15:36-41.
Dispuesto pa Husticia i e Berdad
Pablo a sigi bisa tocante amor: “E no ta alegrá riba inhusticia, sino ta alegrá cu e berdad.” (1 Corintio 13:6) Algun hende ta gusta inhusticia asina hopi cu “nan no ta drumi amenos cu nan ta haci maldad.” (Proverbio 4:16) Pero, den e organizacion di Dios nos no ta pleita cu otro ni no ta alegrá si hende ta cai den picá. (Proverbio 17:5; 24:17, 18) Si tabatin suficiente amor pa Dios i pa husticia den e congregacion di Corinto, nan lo no a tolera inmoralidad ei. (1 Corintio 5:1-13) Entre otro cosnan, amor pa husticia ta prevenínos di goza programa indecente na television, cine, of teater.
Amor ta “alegrá cu e berdad.” E ta haci contraste entre e berdad i inhusticia. Evidentemente esei kier men cu amor ta hácinos alegrá door cu e berdad ta influenciá hende pa haci bon. Nos ta haya gozo den loke ta edifica hende i cu ta promove e causa dje berdad i husticia. Amor ta prevenínos di papia mentira, ta dúnanos gozo ora prueba ta ser duná cu hende recto ta inocente, i ta hácinos alegrá den e triunfo dje berdad di Dios.—Salmo 45:4.
E Manera cu Amor ta Trata cu Tur Cos
Continuando cu su nificacion di amor, Pablo a skirbi: “E ta soporta tur cos, ta kere tur cos, ta spera tur cos, ta wanta tur cos.” (1 Corintio 13:7) ‘Soportando tur cos,’ amor ta un proteccion contra rencor mescos cu un bon dak ta un proteccion contra awaceru. Si un hende ta ofendénos pero despues ta pidi pordón, amor ta hácinos wanta e perhuicio, pordonando e ofensor en bez di haci redashi. Den amor nos ta purba di ‘gana nos ruman.’—Mateo 18:15-17; Colosense 3:13.
Amor ta “kere tur cos” den e Palabra di Dios i ta hácinos keda agradicido pe alimento spiritual percurá mediante e “sclabo fiel i prudente.” (Mateo 24:45-47) Aunque nos no ta ‘kere lo todo,’ amor ta prevenínos di tene un curazón no creyente i ta prevenínos di kere cu otro creyente tin mal intencion. (Eclesiastés 7:21, 22) Amor també ta “spera tur cos” cu ta pará skirbí den e Scritura, tal como e berdad tocante e Reino di Dios. Conmoví pa amor, nos ta spera i ta pidi e mihor resultado den situacion dificultoso. Amor ta conmovénos també pa bisa otro hende e motibo pa nos speranza. (1 Pedro 3:15) Además, amor ta “wanta tur cos,” incluyendo picá contra nos. (Proverbio 10:12) Amor pa Dios també ta yúdanos wanta persecucion i otro dificultad.
Pablo a agrega: “Amor nunca ta faya.” (1 Corintio 13:8a) Amor no por caba ni faya, no mas cu Jehova Dios. Siendo cu nos Dios eterno ta amor mes, tal calidad lo no caba nunca. (1 Timoteo 1:17; 1 Juan 4:16) Amor semper lo goberna e universo. P’sei, láganos semper pidi Dios yúdanos vence inclinacion egoísta i demonstra tal fruta eterno di spiritu.—Lucas 11:13.
Loke Mester Pasa
Siñalando ne futuro, Pablo a skirbi: “Pero si tin don di profetizá, nan lo ser elimina; si tin lenga, nan lo caba; si tin conocimento, lo e ser eliminá.” (1 Corintio 13:8b) ‘Don di profetizamento’ a haci posibel pa nan doño declara profecía nobo. Aunque tal don a desparce despues cu e congregacion cristian tabata establecí como e organizacion di Dios, su poder prófetico nunca ta caba, i su Palabra ta contene tur profecía cu nos mesté awor. E poder cu e spiritu a duna pa papia cu lenga straño també a termina, i conocimento special tabatin cu “caba,” conforme cu e profecía. Pero e Palabra completo di Jehova Dios ta percura loke nos mester sa pa salbacion. (Romano 10:8-10) Además, e pueblo di Dios ta yená cu su spiritu i ta produci e fruta di dje.
Pablo a sigi: “Pasobra nos tin conocimento incompleto i nos ta profetiza incompletamente; pero ora loke ta completo ta yega, loke ta incompleto lo ser eliminá.” (1 Corintio 13:9, 10) E don di conocimento i di profetizamento tabata incompleto. Aparentemente, tal profecía no a duna detaye, i cada profeta tabata incompleto revelando e futuro, faltando un conocimento perfecto di loke el a profetiza. Sin embargo, awor comprendimento di profecía ta bira completo gradualmente. Por ehempel, echo na cumplimento di profecía bíblica ta confirma cu Jesús a recibi autoridad real riba humanidad na 1914. Desde e tempo ei, nos ta den e “tempo di fin” i ta disfruta di aumento continuo den conocimento spiritual i comprendimento di profecía bíblica. (Daniel 12:4) P’sei, nos ta yega na conocimento perfecto i “loke ta completo” mester ta cerca.
E Calidad di mas Importante ta Permanece
Haciendo referencia ne progreso dje congregacion, Pablo a skirbi: “Ora mi tabata baby, mi tabata papia manera baby, pensa manera baby, razona manera baby; pero awor cu mi a bira homber, mi a elimina [inclinacion] di baby.” (1 Corintio 13:11) Siendo cu baby ta sigi riba base di conocimento i desaroyo fisical limitá, bo por hibé p’aki i p’ayá, como si bo ta zoyé den su cuna. Pero hende grandi ta hopi mas desaroyá físicamente, tin mas conocimento, i generalmente no ta ser hibá fácilmente. Nan ta bandona nan pensamento, actitud, i método di mucha. Di igual manera, despues cu e organizacion di Dios a crece, lagando atrás su infancia, Dios a huzga cu e no tabatin mester di don spiritual tal como profetizamento, lenga, i conocimento. Aunque miembro dje congregacion djawe, cu ta den su behez awor, tampoco no ta sinti un necesidad pa tal don, nan ta keda contentu pa sirbi Dios bao di guía di su spiritu.
Pablo a agrega: “Pasobra actualmente nos ta mira na moda nebliná pa medio di spiel di metal, pero e ora ei lo ta cara cara. Actualmente mi ta conoce incompletamente, pero e ora ei lo mi conoce cu exactitud mescos cu nan lo conocémi cu exactitud.” (1 Corintio 13:12) Durante e infancia dje congregacion, no tabata e tempo di Dios di revela cierto cosnan. P’sei, nan tabata mirá nebliná, como si hende cristian tabata wak den un spiel di metal cu no por a refleha exactamente. (Echo 1:6, 7) Pero, nos a sali for dje neblina. Cumplimento awor ta refleha símbolo i profecía cla cla, pasobra esaki ta e tempo dje revelacion di Dios. (Salmo 97:11; Daniel 2:28) Aunque Pablo mes a conoce Dios, e máximo di conocimento di Jehova i e relacion di mas íntimo cuné lo bini ora e apóstol ta ser resusitá na bida celestial, i asina recibi e recompensa completo di su carreda cristian.
Concluyendo su splicacion di amor, Pablo a skirbi: “Sin embargo, awor ta permanece fe, speranza, amor, e tresnan ei; pero e mayor di nan ta amor.” (1 Corintio 13:13) Apesar dje ausencia di don spiritual milagroso, e congregacion tin mas conocimento completo awor i un motibo pa fe, speranza, i amor mas ricu. E tin e fe di cu tur loke Dios a priminti ta mescos cu cumplí caba. (Hebreo 11:1) Rasgo di fe lo termina ora loke ta profetizá den e Palabra di Dios ta ser cumplí. Aspecto di speranza lo termina ora nos ta mira loke nos a spera. Pero, amor lo permanece pa semper. P’sei, laga tur Testigo di Jehova continuá sigiendo e camina superior di amor.