Jehova—un Dios Cu Ta Siña Nos
“Nan tur lo ser siñá pa Jehova.”—JUAN 6:45.
1. Kico Jesus ta haciendo awor den Capernaum?
JESUCRISTO recientemente a haci milager i awor hende ta mir’é ta siñando den un snoa den Capernaum, cerca dje Laman di Galilea. (Juan 6:1-21, 59) Hopi hende ta expresá incredulidad ora e bisa: “Mi a baha for di cielu.” Nan ta murmurá: “Esaki no ta Jesus yu di Josef, kende su tata i mama nos conocé? Con por ta cu awor e ta bisa, ‘Mi a baha for di cielu’?” (Juan 6:38, 42) Reprendiendo nan, Jesus ta proclamá: “Ningun hende por bini cerca mi aménos cu e Tata, kende a mandá mi, ta atraé; i lo mi resucit’é den e último dia.”—Juan 6:44.
2. Ki base tin pa kere Jesus su promesa tocante e resureccion?
2 Ki un promesa maraviyoso—pa ser resucitá den e último dia, ora e Reino di Dios ta goberná! Nos por kere e promesa aki pasobra e ta ser garantisá dor di e Tata, Jehova Dios. (Job 14:13-15; Isaías 26:19) En berdad, Jehova, kende ta siña cu e mortonan lo lanta, ta “e maestro di mas grandi cu tur.” (Job 36:22, Today’s English Version) Dirigiendo atencion n’e siñansa dje Tata, Jesus ta bisa siguientemente: “Ta pará skirbí den e Profetanan, ‘I nan tur lo ser siñá pa Jehova.’ ”—Juan 6:45.
3. Ki preguntanan nos lo considerá?
3 Siguramente, lo ta un privilegio pa ta entre esnan di ken profeta Isaías a skirbi: “Tur bo yunan lo ta personanan siñá pa Jehova.” (Isaías 54:13) Nos por ser siñá? Ken tabata manera yu pa Jehova i a ricibí su siñansanan? Kico ta siñansanan vital di Jehova cu nos mester conocé i aplicá pa ricibí su bendicion? Con Jehova a siña hende den pasado, i e ta siña nos e mésun manera awe? Esakinan ta preguntanan cu nos lo considerá.
Tata, Maestro, Esposo
4. Ken tabata e promé yunan di Jehova cu a ricibí su siñansanan?
4 Promé Jehova a bira tantu Tata como Maestro ora el a crea su Yu unigénito, e Jesus prehumano. Esun aki ta ser yamá “e Palabra” pasobra e ta Jehova su Portabos Principal. (Juan 1:1, 14; 3:16) E Palabra a sirbi “na lado [dje Tata] como un obrero maestro,” i el a siña bon for dje siñansa di su Tata. (Proverbionan 8:22, 30) En realidad, el a bira e Agente mediante ken e Tata a crea tur otro cos, incluyendo e ‘yunan spiritual di Dios.’ Cuantu nan mester a alegrá pa ser siñá dor di Dios! (Job 1:6; 2:1; 38:7; Colosensenan 1:15-17) Mas despues, e promé hende, Adam, a ser creá. E tambe tabata un “yu di Dios,” i Bijbel ta revelá cu Jehova a dun’é instruccion.—Lucas 3:38; Génesis 2:7, 16, 17.
5. Ki privilegio precioso Adam a perde, tog ken Jehova a siña, i pakico?
5 Lamentablemente, Adam, dor di su desobedencia boluntario, a perde e privilegio di sigui ser yu di Dios. P’esei, su desendientenan no por a bisa cu nan ta yu di Dios simplemente riba e base di nacementu. Sin embargo, Jehova a siña hende imperfecto cu a acudí na dje pa guia. Noe, por ehempel, a resultá di ta “un homber hustu” kende “a cana cu e Dios berdadero,” i asina Jehova a instruí Noe. (Génesis 6:9, 13–Gén 6:13 pa 7:5) Dor di su obedencia, Abraham a duna prueba di ta “amigu di Jehova,” i p’esei e tambe a ser siñá dor di Jehova.—Santiago 2:23; Génesis 12:1-4; 15:1-8; 22:1, 2.
6. Ken Jehova a bin mira como su “yu,” i ki clase di maestro e tabata pa nan?
6 Hopi mas despues, durante e tempu di Moises, Jehova a drenta den un relacion di pacto cu e nacion di Israel. Como resultado, e nacion ei a bira su pueblo scogí i a ser mirá como su “yu.” Dios a bisa: “Israel ta mi yu.” (Exodo 4:22, 23; 19:3-6; Deuteronomio 14:1, 2) Basá riba e relacion di pacto ei, e israelitanan por a bisa, manera profeta Isaías a registrá: “Abo, O Jehova, ta nos Tata.” (Isaías 63:16) Jehova a asumí su responsabilidad paternal i amorosamente a siña su yunan, Israel. (Salmo 71:17; Isaías 48:17, 18) En realidad, ora nan a bira infiel, e misericordiosamente a suplicá nan: “Bolbe, O yunan apóstata.”—Jeremías 3:14.
7. Ki relacion Israel tabatin cu Jehova?
7 Como consecuencia dje relacion di pacto cu Israel, Jehova figurativamente a bira tambe e Esposo dje nacion, i Israel a bira su esposa figurativo. Profeta Isaías a skirbi di dje: “Bo Magnífico Formador ta bo doño marital, Jehova di ehército ta su nomber.” (Isaías 54:5; Jeremías 31:32) Aunke Jehova a cumpli onorablemente cu su papel como Esposo, e nacion di Israel a bira un esposa infiel. “Mescos cu un esposa a bai for di su compañero di un manera traicionero,” Jehova a bisa, “asina abo, O cas di Israel, a tratá mi di un manera traicionero.” (Jeremías 3:20) Jehova a sigui hala atencion dje yunan di su esposa sin fe; el a sigui ser nan “Magnífico Instructor.”—Isaías 30:20; 2 Crónicanan 36:15.
8. Aunke Israel como nacion a ser rechasá dor di Jehova, ki esposa antitípico i figurativo e tin ainda?
8 Ora Israel a rechasá i a mata Su Yu, Jesucristo, Dios finalmente a rechas’é. Pues e nacion hudiu ei no tabata un esposa figurativo mas pa Jehova, ni e no tabata e Tata i Maestro mas dje yunan desobediente dje muher ei. (Mateo 23:37, 38) Sin embargo, Israel tabata solamente un esposa típico of simbólico. Apostel Pablo a cita Isaías 54:1, cu ta papia di un “muher steril” cu ta diferente i distinto for di “e muher cu un doño marital,” e nacion di Israel natural. Pablo ta revelá cu cristiannan ungí ta yunan dje “muher steril,” kende e ta yama “Jerusalem djariba.” E muher antitípico i figurativo aki ta consistí di Dios su organisacion celestial di criaturanan spiritual.—Galationan 4:26, 27.
9. (a) Na ken Jesus tabata refiriendo ora el a papia di ‘bo yunan cu ta ser siñá pa Jehova’? (b) Riba ki base hende ta bira yu spiritual di Dios?
9 Pues, den e snoa di Capernaum, ora Jesus a cita e profecia di Isaías: “Tur bo yunan lo ta personanan siñá pa Jehova,” e tabata papiando tocante esnan cu lo bira “yunan” di “Jerusalem djariba,” Dios su organisacion celestial semehante na un esposa. Dor di aceptá e siñansanan dje representante di Dios for di cielu, Jesucristo, e oyentenan hudiu ei por a bira yunan di Dios su muher celestial anteriormente steril i forma “un nacion santu,” e ‘Israel spiritual di Dios.’ (1 Pedro 2:9, 10; Galationan 6:16) Describiendo e gran oportunidad cu Jesus a haci disponibel pa bira yu spiritual di Dios, apostel Juan a skirbi: “El a yega na su mes cas, pero su mes hendenan no a ricibié. Sin embargo, na tur esnan cu sí a ricibié, el a duna autoridad di bira yu di Dios, pasobra nan tabata eherciendo fe den su nomber.”—Juan 1:11, 12.
Siñansanan Vital di Jehova
10. Inmediatamente despues dje rebelion den Eden, kico Jehova a siña en cuanto e “simia,” i ken e Simia aki a resultá di ta?
10 Jehova, como un Tata amoroso, ta informá su yunan di su propósitonan. Pues, ora un angel rebelde a inducí e promé pareha humano pa desobedecé, Jehova a informá nan mesora kico lo e haci pa cumpli cu su propósito di haci e tera un paradijs. El a bisa cu lo e pone odio entre “e colebra original,” kende ta Satanas e Diabel, “i e muher.” Despues el a splica cu e “simia” dje muher lo machicá Satanas fatalmente, “den e cabes.” (Génesis 3:1-6, 15; Revelacion 12:9; 20:9, 10) Manera nos a ripará, e muher—despues identificá como “Jerusalem djariba”—ta Dios su organisacion celestial di criaturanan spiritual. Pero ken ta su “simia”? Esei ta e Yu di Dios, Jesucristo, esun mandá for di cielu i esun cu eventualmente lo destruí Satanas.—Galationan 4:4; Hebreonan 2:14; 1 Juan 3:8.
11, 12. Con Jehova a amplia riba su siñansa vital relacioná cu e “simia”?
11 Jehova a amplia riba e siñansa vital aki relacioná cu e “simia” ora el a primintí Abraham: “Lo mi siguramente multiplicá bo simia manera e streanan di cielu . . . I pa medio di bo simia tur nacion dje tera siguramente lo bendicioná nan mes.” (Génesis 22:17, 18) Jehova a usa apostel Pablo pa splica cu Jesucristo ta e Simia primintí di Abraham pero cu otronan tambe lo bira parti dje “simia.” “Si boso ta pertenecé na Cristo,” Pablo a skirbi, “boso realmente ta simia di Abraham, heredero en cuanto un promesa.”—Galationan 3:16, 29.
12 Tambe Jehova a revelá cu Cristo, e Simia, lo bini for dje desendencia real di Huda i cu na dje “obedencia dje pueblonan lo pertenecé.” (Génesis 49:10) Relacioná cu Rey David dje tribu di Huda, Jehova a primintí: “Siguramente lo mi establecé su simia pa semper i su trono manera e dianan di cielu. Su simia mes lo resultá di ta asta pa tempu indefiní, i su trono manera solo dilanti mi.” (Salmo 89:3, 4, 29, 36) Ora angel Gabriel a anunciá e nacementu di Jesus, el a splica cu e yu tabata Dios su Gobernante nombrá, e Simia di David. “Esun aki lo ta grandi i lo ser yamá Yu dje Haltísimo,” Gabriel a bisa, “i Jehova Dios lo dun’é e trono di David su tata, . . . i lo no tin fin na su reino.”—Lucas 1:32, 33; Isaías 9:6, 7; Daniel 7:13, 14.
13. Pa ricibí Jehova su bendicion, con nos mester respondé na su siñansa?
13 Pa por ricibí Jehova su bendicion, nos mester conocé i obra na armonia cu e siñansa vital aki tocante e Reino di Dios. Nos mester kere cu Jesus a baha for di cielu, cu e ta Dios su Rey nombrá—e Simia real cu lo supervisá e restoracion di Paradijs riba tera—i cu lo e resucitá e mortonan. (Lucas 23:42, 43; Juan 18:33-37) Ora Jesus a papia tocante resureccion dje mortonan den Capernaum, lo mester tabata claro p’e hudiunan cu el a papia e berdad. Wel, tabata solamente algun siman promé, probablemente den Capernaum mes, cu el a resucitá e yu muher di 12 aña di edad di un presidente dje snoa! (Lucas 8:49-56) Siguramente nos tambe tin tur motibu pa kere i obra na armonia cu Jehova su siñansa inspirador di speransa relacioná cu su Reino!
14, 15. (a) Ki importante Jehova su Reino ta pa Jesus? (b) Kico nos mester comprendé i ser capas pa splica tocante Jehova su Reino?
14 Jesus a dedicá su bida terenal na siña tocante Jehova su Reino. El a hacié e tema di su ministerio, i e asta a instruí su siguidornan pa pidi p’e den oracion. (Mateo 6:9, 10; Lucas 4:43) Hudiunan natural tabata den posicion pa bira “yunan dje reino,” pero debí na falta di fe, mayoria di nan a perde e privilegio ei. (Mateo 8:12; 21:43) Jesus a revelá cu solamente un “trupa chikitu” ta ricibí e privilegio di bira “yunan dje reino.” E “yunan” aki ta bira “co-heredero cu Cristo” den su Reino celestial.—Lucas 12:32; Mateo 13:38; Romanonan 8:14-17; Santiago 2:5.
15 Cuantu heredero di reino Cristo lo hiba cielu pa goberná cuné riba e tera? Solamente 144.000, segun Bijbel. (Juan 14:2, 3; 2 Timoteo 2:12; Revelacion 5:10; 14:1-3; 20:4) Pero Jesus a bisa cu e tabatin “otro carnénan,” cu lo ta súbditonan terenal dje gobernacion di Reino ei. Esakinan lo disfrutá di salú perfecto i pas pa semper riba un tera paradísico. (Juan 10:16; Salmo 37:29; Revelacion 21:3, 4) Nos tin cu comprendé i ser capas pa splica Jehova su siñansa tocante e Reino.
16. Ki siñansa vital di Jehova nos mester siña i practicá?
16 Apostel Pablo a identificá un otro siñansa vital di Jehova. El a bisa: “Boso mes ta siñá pa Dios pa stima un e otro.” (1 Tesalonicensenan 4:9) Pa agradá Jehova, nos tin cu demostrá tal amor. “Dios ta amor,” Bijbel ta bisa, i nos mester imitá su ehempel di mustra amor. (1 Juan 4:8; Efesionan 5:1, 2) Lamentablemente, mayoria hende a faya miserablemente pa siña stima nan próhimo manera Dios ta siña nos pa haci. Kico di nos? Nos a respondé n’e siñansa aki di Jehova?
17. Ken su actitud nos mester imitá?
17 Ta vital pa nos ser receptivo na tur Jehova su siñansanan. Laga nos actitud ser esun dje salmistanan di Bijbel kendenan a skirbi: “Hací mi conocé bo mes camindanan, O Jehova; siñá mi bo mes bereanan. Hací mi cana den bo berdad i siñá mi.” “Siñá mi bo disposicionnan reglamentario. Siñá mi bondad, sensates i conocimentu mes . . . Siñá mi bo mes decisionnan hudicial.” (Salmo 25:4, 5; 119:12, 66, 108) Si bo sintimentunan ta mescos cu esnan dje salmistanan, bo por ta entre un inmenso multitud cu ta ser siñá pa Jehova.
Multitud Grandi di Esnan Siñá
18. Kico e profeta Isaías a profetisá lo sosodé den nos tempu?
18 Profeta Isaías a profetisá loke lo pasa den nos tempu: “Mester sosodé den e parti final dje dianan cu e ceru dje cas di Jehova lo bira firmemente establecí riba e top dje cerunan . . . I hopi pueblo siguramente lo bai i bisa: ‘Boso ban, i laga nos subi n’e ceru di Jehova, n’e cas dje Dios di Jacob; i lo e instruí nos tocante su camindanan.’ ” (Isaías 2:2, 3; Mikéas 4:2) Ken ta e personanan aki siñá pa Jehova?
19. Ken awe ta incluí entre esnan siñá pa Jehova?
19 Nan ta incluí otro personanan aparte di esnan cu lo goberná den cielu cu Cristo. Manera a ser mencioná anteriormente, Jesus a bisa cu e tabatin “otro carnénan”—súbditonan terenal dje Reino—ademas dje “trupa chikitu” di herederonan di Reino. (Juan 10:16; Lucas 12:32) E “multitud grandi,” cu ta sobrebibí “e tribulacion grandi,” ta dje clase dje otronan carnénan, i nan ta disfrutá di un posicion aprobá dilanti Jehova riba e base di nan fe den Jesus su sanger dramá. (Revelacion 7:9, 14) Aunke e otro carnénan no ta directamente incluí entre e “yunan” di kende Isaías 54:13 a papia, nan ta bendicioná p’e echo cu nan ta ser siñá pa Jehova. P’esei, nan ta dirigí nan mes apropiadamente na Dios como “Tata” pasobra, en efecto, lo e ta nan Tawela mediante e “Tata Eterno,” Jesucristo.—Mateo 6:9; Isaías 9:6.
Con Jehova Ta Siña
20. Den ki maneranan Jehova ta siña?
20 Jehova ta siña den hopi manera. Por ehempel, e ta haci esei pa medio di su obranan di creacion, cu ta duna testimonio di tantu su existencia como su gran sabiduria. (Job 12:7-9; Salmo 19:1, 2; Romanonan 1:20) Ademas, e ta siña dor di comunicacion directo, manera el a haci ora el a instruí e Jesus prehumano. Di igual manera, na tres ocasion registrá, el a papia directamente for di cielu cu hende riba tera.—Mateo 3:17; 17:5; Juan 12:28.
21. Cua angel en particular Jehova a usa como su representante, pero con nos por sa cu otronan tambe a ser usá?
21 Tambe Jehova ta usa representantenan angelical pa siña, incluyendo su Primogénito, “e Palabra.” (Juan 1:1-3) Aunke Jehova por a papia directamente cu su yu humano perfecto, Adam, den e hofi di Eden, probablemente el a usa e Jesus prehumano pa papia den Su nomber. (Génesis 2:16, 17) Esaki tabata probablemente “e angel dje Dios berdadero cu tabata bayendo dilanti e campamentu di Israel” i tocante ken Jehova a manda: “Obedecé su bos.” (Exodo 14:19; 23:20, 21) Sin duda e Jesus prehumano tambe tabata e “prins dje ehército di Jehova” cu a aparecé na Hosué pa fortalec’é. (Hosué 5:14, 15) Tambe Jehova ta usa otro angelnan pa impartí su siñansanan, manera esnan cu el a usa pa transmití su Ley na Moises.—Exodo 20:1; Galationan 3:19; Hebreonan 2:2, 3.
22. (a) Ken riba tera Jehova a usa pa siña? (b) Cua ta e medio principal cu Jehova ta usa pa instruí hende awe?
22 Ademas, Jehova Dios ta usa representantenan humano pa siña. Mayornan den Israel mester a siña nan yunan; profetanan, sacerdotenan, prinsnan i levitanan a siña Jehova su Ley n’e nacion. (Deuteronomio 11:18-21; 1 Samuel 12:20-25; 2 Crónicanan 17:7-9) Jesus tabata Dios su Portabos principal riba tera. (Hebreonan 1:1, 2) Hopi biaha Jesus a bisa cu loke el a siña otronan tabata precisamente loke el a siña for dje Tata, pues su oyentenan, en efecto, a ser siñá pa Jehova. (Juan 7:16; 8:28; 12:49; 14:9, 10) Jehova a laga pa su dichonan ser registrá, i den nos tempu e ta siña hende principalmente pa medio dje Scritura inspirá aki.—Romanonan 15:4; 2 Timoteo 3:16.
23. Ki preguntanan lo ser considerá den e siguiente artículo?
23 Nos ta bibando den un tempu importante, ya cu e Scritura ta primintí cu ‘den e parti final dje dianan [den cua nos ta bibando] hopi pueblo lo ser instruí tocante Jehova su camindanan.’ (Isaías 2:2, 3) Con e instruccion aki ta ser percurá? Kico nos mester haci pa saca beneficio for di Jehova su gran programa di siñansa cu ta andando awor como tambe participá den dje? Nos lo considerá e preguntanan ei den e siguiente artículo.
Con Lo Bo Contestá?
◻ Con Jehova a bira un Tata, un Maestro i un Esposo?
◻ Kico Jehova ta siña relacioná cu e “simia”?
◻ Ki siñansa vital dor di Dios nos mester warda?
◻ Con Jehova ta siña?
[Plachi na página 10]
Resucitando yu muher di Jairo a percurá un base pa kere Jesus su promesa di resureccion