“Donnan den Hende” pa Cuida e Carnénan di Jehova

“Ora el a subi na haltu el a hiba catibu; el a duna donnan den hende.”—EFESIONAN 4:8.

1. Kico un ruman muher cristian a expresá tocante e ancianonan di su congregacion?

“DANKI pa ta asina interesá den nos. Boso sonrisa, boso cordialidad i boso interes intenso ta masha genuino. Semper boso t’ei pa tende nos i compartí palabranan for di Bijbel cu ta lanta nos ánimo. Mi ta pidi den oracion pa mi semper keda apreciá boso.” Asina un ruman muher cristian a skirbi e ancianonan di su congregacion. Claramente, e amor cu wardadónan cristian amoroso a mustr’é a toca su curason.—1 Pedro 5:2, 3.

2, 3. (a) Segun Isaías 32:1 i 2, con ancianonan compasivo ta cuida e carnénan di Jehova? (b) Ki ora nos por considerá un anciano un don?

² Ancianonan ta un percuracion di Jehova pa cuida su carnénan. (Lucas 12:32; Juan 10:16) Jehova stima su carnénan. E stima nan asina tantu cu, de facto, el a cumpra nan cu e sanger precioso di Jesus. Nada straño anto, cu Jehova ta keda contentu ora ancianonan trata su tou cu ternura. (Echonan 20:28, 29) Tuma nota dje descripcion profético dje ancianonan of ‘prinsnan’ aki: “Cada un mester resultá di ta manera un lugá di sconde for di bientu i un lugá di sconde for dje tempestad di awaceru, manera riu di awa den un tera secu, manera e sombra di un baranca grandi den un tera agotá.” (Isaías 32:1, 2) Sí, nan t’ei pa protehá, refrescá i consolá su carnénan. Ancianonan cu ta haci esfuerso pa cumpli cu loke Dios ta spera di nan, ta pastoreá e tou cu compasion.

³ Bijbel ta referí na ancianonan asina como “donnan den hende.” (Efesionan 4:8) Ora bo pensa riba un don of regalo, bo ta pensa riba algu duná pa yena un necesidad of pa haci esun cu ta ricibié felis. Nos por considerá un anciano un don ora e ta usa su abilidadnan pa duna asistencia necesario i pa contribuí n’e felicidad dje tou. Con e por haci esaki? E contesta cu nos ta haña den Pablo su palabranan na Efesionan 4:7-16, ta demostrá con grandi Jehova su interes amoroso ta den su carnénan.

Di Unda “Donnan den Hende” Ta Bini?

4. Na cumplimentu di Salmo 68:18, den ki manera Jehova a “subi na haltu,” i ken tabata e “donnan den forma di hende”?

⁴ Ora Pablo a usa e expresion “donnan den hende,” e tabata citando rey David, kende a bisa di Jehova: “Bo a subi na haltu; bo a hiba catibu; bo a tuma donnan den forma di hende.” (Salmo 68:18) Despues cu e israelitanan tabata den e Tera Primintí pa algun aña, Jehova a “subi” ceru Síon figurativamente i a haci Jerusalem capital dje reino di Israel cu David como su rey. Pero ken e “donnan den forma di hende” tabata? Nan tabata hombernan tumá prezu durante e conkista dje tera. Mas despues a pone algun dje prezunan aki na disposicion dje levitanan pa nan yuda cu e trabou n’e tabernáculo.—Esdras 8:20.

5. (a) Con Pablo ta indicá cu Salmo 68:18 ta cumpli den e congregacion cristian? (b) Den ki manera Jesus a “subi na haltu”?

⁵ Den su carta n’e efesionan, Pablo ta indicá cu e palabranan dje salmista tin un mayor cumplimentu den e congregacion cristian. Parafraseando Salmo 68:18, Pablo ta skirbi: “Awor, bondad inmerecí a ser duná na cada un di nos segun e manera cu e Cristo a compartí e don grátis. P’esei e ta bisa: ‘Ora el a subi na haltu el a hiba catibu; el a duna donnan den hende.’” (Efesionan 4:7, 8) Aki Pablo ta aplicá e salmo ei na Jesus como representante di Dios. Jesus a “vence mundu” dor di su curso fiel. (Juan 16:33) Tambe el a triunfá riba morto i riba Satanas dor cu Dios a resucit’é for di morto. (Echonan 2:24; Hebreonan 2:14) Na aña 33 E.C., Jesus resucitá a subi “hopi mas haltu cu tur shelu,” esta, mas haltu cu tur otro criatura spiritual. (Efesionan 4:9, 10; Filipensenan 2:9-11) Como vencedó, Jesus a hiba “catibu” for dje enemigu. Con asina?

6. Cuminsando na Pentecoste 33 E.C., con Jesus den shelu a cuminsá plunder Satanas su cas, i kico el a haci cu e ‘catibunan’?

⁶ Tempu Jesus tabata riba tera, el a demostrá su poder riba Satanas dor di libra esnan cu tabata den sclabitud n’e demoñonan. Tabata como si fuera Jesus a invadí Satanas su cas, mar’é i plunder su cosnan. (Mateo 12:22-29) Djis pensa, una bes resucitá i confiá cu ‘tur autoridad den shelu i riba tera,’ cuantu Jesus lo por a sakea e ora ei for di Satanas! (Mateo 28:18) Cuminsando na Pentecoste 33 E.C., Jesus den shelu, como representante di Dios, a cuminsá sakea Satanas su cas dor di “hiba catibu”, esta, hiba hombernan cu pa hopi tempu tabata sclabisá na picá i morto i bou di dominio di Satanas. E ‘catibunan’ aki di buena gana a bira ‘esclabo di Cristo, haciendo e boluntad di Dios di henter alma.’ (Efesionan 6:6) Eigenlijk, Jesus a libra nan for dje dominio di Satanas i, na nomber di Jehova, el a duna nan n’e congregacion como “donnan den hende.” Imaginá Satanas su furia impotente ora cu Jesus tabata saca nan for di bou di su nanishi!

7. (a) Den ki capacidadnan e “donnan den hende” ta sirbi den e congregacionnan? (b) Ki oportunidad Jehova a duna na cada homber cu ta sirbi como anciano?

⁷ Nos ta haña e “donnan den hende” ei den e congregacion awe? Sigur cu sí! Nos ta haña nan ta sirbi como anciano, trahando duru como ‘evangelisadó, wardadó i maestro’ den e mas cu 87.000 congregacionnan dje pueblo di Dios rond mundu. (Efesionan 4:11) Satanas lo tin masha gana di mira nan maltratá e tou. Pero no ta pa esei Dios a duna nan n’e congregacion mediante Cristo. Mas bien, Jehova a duna e hombernan aki p’e bienestar dje congregacion, i nan tin cu rindi cuenta na dje p’e carnénan cu el a confia na nan. (Hebreonan 13:17) Si bo ta sirbi como anciano, Jehova a duna bo un oportunidad maraviyoso pa bo duna prueba cu bo ta un don, of bendicion, pa bo rumannan. Bo por haci esei dor di cumpli cu cuater responsabilidad importante.

Ora Tin un Necesidad pa “Reahuste”

8. Den ki maneranan nos tur mester ser reahustá de bes en cuando?

⁸ Di promé, Dios a duna e “donnan den hende” “cu mira riba e reahuste dje santunan,” segun Pablo. (Efesionan 4:12) E sustantivo griego traducí como “reahuste” ta referí na pone algu “riba un liña stret.” Como hende imperfecto, de bes en cuando nos tur mester ser reahustá, esta, mester pone nos manera di pensa, actitud of conducta “riba un liña stret” na armonia cu Dios su manera di pensa i su boluntad. Amorosamente Jehova a duna “donnan den hende” pa yuda nos haci e ahustenan necesario. Con nan ta haci esaki?

9. Con un anciano por yuda reahustá un carné cu a cometé un eror?

⁹ Tin bes por sosodé cu ta pidi un anciano yuda un carné cu a cometé un eror. Tal bes el a ‘dal un paso robes promé cu el a realisá esei.’ Con un anciano por yuda? “Trata na reahustá e homber ei cu un spiritu di suavedad,” segun Galationan 6:1. P’esei, ora di ofrecé conseho, un anciano lo no zundra esun cu a cometé un eror, usando palabra skerpi. Conseho mester animá, i no “terorisá” esun cu ta ricibié. (2 Corintionan 10:9; compará cu Job 33:7.) Kisas e individuo tin bergwensa caba, pues un wardadó amoroso ta evitá di aplastá e persona ei su spiritu. Ora cu conseho, asta reprendementu firme, ta claramente motivá pa amor i duná cu amor, e tin mas chens di reahustá e manera di pensa of conducta di esun cu a cometé eror, i asina ei restor’é.—2 Timoteo 4:2.

10. Kico reahustá otro hende ta encerá?

¹⁰ Ora Jehova a duna “donnan den hende” pa nos reahuste, e tabatin na mente pa ancianonan ta spiritualmente refrescante i digno pa su pueblo imitá. (1 Corintionan 16:17, 18; Filipensenan 3:17) Reahustá otro hende ta encerá no solamente corigí esnan cu a bai den un curso robes, sino tambe yuda esnan fiel pa pega n’e curso corecto.a Awe, cu tin asina tantu problema cu por desanimá hende, hopi ruman tin mester di animacion pa sigui wanta. Podisé algun tin mester di yudansa tierno pa armonisá nan manera di pensa cu esun di Dios. Por ehempel, algun cristian fiel ta lucha cu sintimentunan profundo di inferioridad of di no ta digno. E “almanan deprimí” ei por sinti cu Jehova hamas lo por stima nan i cu hamas lo e por aceptá ni nan mihó esfuersonan pa sirbié. (1 Tesalonicensenan 5:14) Pero e manera di pensa aki no ta na armonia cu e manera cu Dios berdaderamente ta pensa di su adoradónan.

11. Kico ancianonan por haci pa yuda esnan cu ta lucha cu sintimentu di no ta digno?

¹¹ Ancianonan, kico boso por haci pa yuda hende asina? Duna nan bondadosamente prueba bíblico cu Jehova ta interesá den cada un di su sirbidónan i trankilisá nan cu e textonan aki di Bijbel ta aplicá na nan personalmente. (Lucas 12:6, 7, 24) Yuda nan mira cu Jehova a ‘atraé’ nan pa sirbié, p’esei sigur e mester ta mira balor den nan. (Juan 6:44) Sigurá nan cu nan no ta nan so—hopi sirbidó fiel di Jehova tabatin sintimentu similar. Un biaha profeta Elías tabata asina deprimí cu e kier a muri. (1 Reynan 19:1-4) Den e promé siglo algun cristian ungí a sinti cu nan mes curason a “condená” nan. (1 Juan 3:20) Ta un consuelo pa sa cu hende fiel den tempu di Bijbel tabatin “sintimentu mescos cu di nos.” (Santiago 5:17) Tambe bo por repasá artículonan animador for di E Toren di Vigilancia i Spierta! cu esnan abatí. E Dios cu a duna boso como “donnan den hende” lo no keda sin tuma nota di boso esfuersonan amoroso pa restorá e confiansa di personanan asina.—Hebreonan 6:10.

Pa “Edificacion” dje Tou

12. Kico e expresion “e edificacion dje curpa di e Cristo” ta indicá, i kico ta e clave pa edificá e tou?

¹² Di dos, Dios a duna “donnan den hende” cu mira riba “e edificacion dje curpa di e Cristo.” (Efesionan 4:12) Aki Pablo ta usa idioma figurativo. “Edificacion” ta pone nos pensa riba construccion, i “e curpa di e Cristo” ta referí na hende, e miembronan dje congregacion cristian ungí. (1 Corintionan 12:27; Efesionan 5:23, 29, 30) Ancianonan tin cu yuda nan rumannan crece bira fuerte spiritualmente. Nan meta ta pa ‘edificá i no kibra’ e tou. (2 Corintionan 10:8) E clave pa edificá e tou ta amor, pasobra “amor ta edificá.”—1 Corintionan 8:1.

13. Kico ta nificá mustra empatia, i pakico ta importante pa ancianonan mustra empatia?

¹³ Un faceta di amor cu ta yuda ancianonan edificá e tou ta empatia. Mustra empatia ta nificá sinti pa otro hende, es decir, identificá bo mes cu nan pensamentu i sintimentunan, tuma nan limitacionnan na consideracion. (1 Pedro 3:8) Pakico ta importante pa ancianonan tin empatia? Riba tur cos pasobra Jehova—esun cu ta duna “donnan den hende”—ta un Dios di empatia. Ora su sirbidónan ta sufri of ta pena, e ta sinti pa nan. (Exodo 3:7; Isaías 63:9) E ta tene cuenta cu nan limitacionnan. (Salmo 103:14) Con anto, ancianonan por mustra empatia?

14. Den ki maneranan ancianonan por mustra empatia na otro hende?

¹⁴ Ora un persona desanimá acercá nan, nan ta scucha, i ta respondé riba sintimentu dje persona ei. Nan ta purba comprendé e antecedente, personalidad i circunstancianan di nan rumannan. Anto ora ancianonan duna yudansa bíblico edificante, e carnénan lo haña cu ta fácil pa acept’é, pasobra e ta bini di wardadónan cu di berdad ta comprendé i ta interesá den nan. (Proverbionan 16:23) Ademas, empatia ta impulsá ancianonan pa tene cuenta cu e limitacionnan di otro hende i e sintimentunan cu por resultá for di eseinan. Por ehempel, algun cristian conciensudo por sinti nan culpabel pasobra nan no por haci mas den sirbishi na Dios, kisas debí na behes of problema cu salú. Di otro banda, algun lo por tin mester di animacion pa mehorá nan ministerio. (Hebreonan 5:12; 6:1) Empatia lo impulsá ancianonan pa haña “palabranan deleitabel” cu ta edificá otronan. (Eclesiástes 12:10) Ora Jehova su carnénan ta ser edificá i motivá, nan amor pa Dios lo impulsá nan pa haci tur loke nan por den nan sirbishi na dje!

Homber Cu Ta Promové Unidad

15. Kico e expresion “unidad den e fe” ta nificá?

¹⁵ Di tres, Dios ta duna “donnan den hende” pa asina “nos tur logra alcansá unidad den e fe i den e conocimentu exacto dje Yu di Dios.” (Efesionan 4:13) E frase “unidad den e fe” ta nificá unidad no solamente di creencia, sino tambe di creyentenan. Esaki anto, ta un otro motibu pakico Dios a duna nos “donnan den hende,” esta, pa promové unidad den su pueblo. Con nan ta haci esaki?

16. Pakico ta importante pa ancianonan mantené unidad entre nan mes?

¹⁶ Pa cuminsá, nan tin cu mantené unidad entre nan mes. Si e wardadónan ta dividí, e carnénan por ser neglishá. Reunion i debatenan largu riba cosnan menor, innecesariamente por tuma tempu precioso cu ancianonan por a dedicá na pastoreá e tou. (1 Timoteo 2:8) Kisas ancianonan no ta bai di acuerdo cu otro automáticamente riba tur cos cu nan trata, pasobra nan ta hende cu por tin personalidad bastante diferente for di otro. Unidad no ta stroba nan di tin opinion distinto for di otro, ni di expresá eseinan na un manera balansá durante un combersacion franco caminda nan ta habrí pa idea di otro. Ancianonan ta conserbá nan unidad dor di scucha otro respetuosamente sin prehuicio. I tanten cu no tin violacion di principio bíblico, cada un mester ta dispuesto pa cede i apoyá e decision final dje cuerpo di anciano. Un spiritu di cede ta mustra cu ta e “sabiduria djariba,” cu ta “pacífico, razonabel” ta guia nan.—Santiago 3:17, 18.

17. Con e ancianonan por yuda conserbá unidad den e congregacion?

¹⁷ Tambe ancianonan ta alerto pa promové unidad den e congregacion. Ora influencianan cu ta causa division—manera redu perhudicial, un tendencia pa atribuí mal motibu na otronan, of un spiritu pleitista—ta menasá pas, nan ta cla pa ofrecé conseho probechoso. (Filipensenan 2:2, 3) Por ehempel, kisas ancianonan ta na altura cu tin individuonan cu ta demasiado crítico of cu ta gusta mete den asuntu di otro hende. (1 Timoteo 5:13; 1 Pedro 4:15) E ancianonan lo trata na yuda personanan asina reconocé cu e curso ei ta contrario cu loke Dios a siña nos i cu cada ken tin cu “hiba su mes carga.” (Galationan 6:5, 7; 1 Tesalonicensenan 4:9-12) Usando e Scritura, nan lo splica cu Jehova ta laga hopi cos na nos concenshi individual, i cu ningun di nos mag husga otro riba cosnan asina. (Mateo 7:1, 2; Santiago 4:10-12) Pa sirbi huntu den unidad, mester tin un ambiente di confiansa i respet den e congregacion. Dor di ofrecé conseho bíblico ora ta necesario, e “donnan den hende” ta yuda nos conserbá nos pas i unidad.—Romanonan 14:19.

Nan Ta Protehá e Tou

18, 19. (a) Contra ken “donnan den hende” ta protehá nos? (b) For di ki otro peliger mester protehá e carnénan, i con ancianonan ta actua pa protehá e carnénan?

¹⁸ Di cuater, Jehova ta duna “donnan den hende” pa protehá nos for dje influencia “di tur bientu di siñansa pa medio di triki di hende, pa medio di astucia den inventá eror.” (Efesionan 4:14) E palabra original pa “triki” aparentemente ta nificá “traha trampa cu dou” of “arte den manipulá dou.” Esei no ta pone nos corda riba con astuto apóstatanan ta actua? Usando argumentonan mañoso, nan ta manipulá e Scritura den un intento pa lok cristiannan berdadero for di nan fe. Ancianonan tin cu vigilá contra e “lobonan opresivo” ei!—Echonan 20:29, 30.

¹⁹ Tambe mester protehá Jehova su carnénan for di otro peligernan. David, e wardadó di antigwedad, sin miedu a protehá e tou di su tata contra bestia salbahe. (1 Samuel 17:34-36) Awe tambe, por surgi ocasionnan ora wardadónan cristian atento tin cu mustra curashi pa por protehá e tou for di hende cu por maltratá of oprimí Jehova su carnénan, foral esnan mas vulnerabel. Ancianonan lo ta lihé pa eliminá for dje congregacion pecadónan boluntario cu deliberadamente ta usa triki, engaño i intriga pa cometé maldad.b—1 Corintionan 5:9-13; compará cu Salmo 101:7.

20. Pakico nos por sinti nos sigur bou dje cuido di “donnan den hende”?

²⁰ Ki gradicidu nos ta p’e “donnan den hende”! Nos por sinti nos sigur bou di nan cuido amoroso, pasobra nan ta reahustá nos tiernamente, nan ta edificá nos cu amor, nan ta cla pa conserbá nos unidad i ta protehá nos cu curashi. Pero con “donnan den hende” mester mira nan papel den e congregacion? I con nos por mustra cu nos ta apreciá nan? Nos lo trata e preguntanan aki den e siguiente artículo.

[Nota]

Bo Ta Corda?

◻ Ken ta e “donnan den hende,” i pakico Dios a duna nan n’e congregacion mediante Cristo?

◻ Con ancianonan ta cumpli cu nan responsabilidad pa reahustá e tou?

◻ Kico ancianonan por haci pa edificá nan compañeronan creyente?

◻ Con ancianonan por conserbá e unidad dje congregacion?

[Plachi na página 10]

Empatia ta yuda ancianonan animá esnan cu ta abatí

[Plachi na página 10]

Unidad entre e ancianonan ta promové unidad den e congregacion