“Alimentá ku e Palabranan di e Fe”
1 Pa hiba un bida di deboshon na Dios nos tin ku hasi hopi esfuerso. (1 Tim. 4:7-10) Si nos purba hasi esei riba nos mes forsa, pronto nos lo kansa i trompeká. (Isa. 40:29-31) Un manera ku nos por haña forsa for di Yehova ta dor di wòrdu “alimentá ku e palabranan di e fe.”—1 Tim. 4:6.
2 Alimento Spiritual Riku: Yehova ta duna nos alimento spiritual riku mediante su Palabra i mediante “e esklabo fiel i prudente.” (Mat. 24:45) Nos ta hasi nos parti pa benefisiá for di dje? Nos ta lesa Beibel tur dia? Nos tin oranan fiho pa estudio personal i meditashon? (Sal. 1:2, 3) Un dieta spiritual saludabel asina ta animá nos i ta protehá nos for di e efektonan debilitador di e mundu di Satanas. (1 Juan 5:19) Si nos yena nos mente ku kosnan saludabel i apliká nan den nos bida, Yehova lo ta ku nos.—Fil. 4:8, 9.
3 Tambe Yehova ta fortalesé nos mediante reunionnan di kongregashon. (Heb. 10:24, 25) E instrukshon spiritual i asosiashon saludabel ku nos ta haña na e reunionnan aki ta fortifiká nos pa keda firme maske nos haña nos ku prueba. (1 Ped. 5:9, 10) Un hóben kristian a bisa: “Mi ta bai skol henter dia, i esei ta kaba ku mi. Pero e reunionnan ta manera un oásis den desierto, kaminda mi ta ser refreská pa por logra pasa e siguiente dia na skol.” Esta un bendishon nos ta haña pa e esfuerso ku nos ta hasi pa asistí na e reunionnan!
4 Proklamando e Bèrdat: Pa Hesus, e trabou di prediká na otro hende tabata manera kuminda. Esei a dun’é ánimo. (Juan 4:32-34) Asina tambe, ora nos ta papia ku otro hende tokante e maravioso promesanan di Dios, nos ta sinti nos yen di ánimo atrobe. Ademas, ora nos ta okupá den e ministerio, nos kurason i mente ta keda enfoká riba e Reino i e bendishonnan ku lo bini pronto. Esei realmente ta refreská nos.—Mat. 11:28-30.
5 Esta privilegiá nos ta di por benefisiá di e alimento spiritual riku ku Yehova ta proveé pa su pueblo awe! Laga nos sigui dal gritu di goso na alabansa di Yehova.—Isa. 65:13, 14.