LÈS 52
Dikon Ta Importante pa Nos Presta Atenshon na Nos Manera di Bisti i na Nos Aparensia?
Nos tur tin nos mes gustu pa loke ta bistimentu i nos aparensia. Si nos sigui algun prinsipio di Beibel, nos por bisti loke nos ta gusta i na mes momento agradá Yehova. Laga nos wak algun di e prinsipionan ei.
1. Kiko ta algun prinsipio ku por yuda nos skohe kiko pa bisti i kon pa kuida nos aparensia?
Beibel ta animá nos pa bisti “na òrdu, ku modestia i sano huisio.” Ademas, nos mester sòru pa semper nos aparensia ta limpi pa asina otro hende por mira ku nos ta sirbidó di Dios, sí, ku nos ta “deboto na Dios.” (1 Timoteo 2:9, 10) Laga nos trata e kuater prinsipionan ku e teksto a menshoná: (1) Nos mester bisti “na òrdu.” Ora bo bai un reunion di Testigunan di Yehova, kisas bo ta ripará ku e rumannan ta bisti na diferente manera, pero semper nos manera di bisti i estilo di kabei ta mustra ku nos tin rèspèt pa Dios. (2) Ora nos ta bisti “ku modestia,” nos ta sòru pa nos manera di bisti no ta provokativo ni no ta hala muchu atenshon na nos mes. (3) Nos ta mustra ku nos tin “sano huisio” ora ku nos no ta bai tras di tur moda òf estilo ku ta popular. (4) Semper nos manera di bisti i nos aparensia mester demostrá ku nos ta “deboto na Dios.” Asina hende por mira klaramente ku nos ta adorá e Dios berdadero.—1 Korintionan 10:31.
2. Dikon nos tin ku tene kuenta ku nos rumannan ora di skohe loke nos ke bisti?
Aunke kada un di nos por disidí kiko nos ta bisti, ta bon pa nos pensa kon nos manera di bisti por laga otro hende sinti. Nos ta hasi nos bèst pa no ofendé niun hende; mas bien, nos ke “agradá [nos] próhimo pa su bon i pa fortales’é.”—Lesa Romanonan 15:1, 2.
3. Kon nos manera di bisti por duna hende gana di siña tokante Yehova?
Semper nos ta hasi nos esfuerso pa bisti na òrdu. Pero nos mester presta bon atenshon na nos manera di bisti foral ora nos ta bai reunion i ora nos ta sali den sirbishi. Nos ta hasi esaki pasobra nos no ke kita atenshon for di e mensahe importante ku nos ta prediká na hende. Mas bien, nos ke pa nos aparensia duna hende gana di siña tokante e Dios ku nos ta sirbi i pa e “dòrna e siñansa di nos Salbador.”—Tito 2:10.
KIKO MAS NOS POR SIÑA?
Laga nos wak kon nos por hasi sigur ku nos manera di bisti i nos aparensia ta laga otro hende mira ku nos ta sirbi Yehova.
Nos manera di bisti i nos aparensia ta mustra si nos tin rèspèt pa hende den puesto di outoridat. Aunke Yehova ta mira kiko tin den nos kurason, nos manera di bisti i nos aparensia tambe mester mustra ku nos tin rèspèt p’e
4. Ora nos aparensia ta representabel, nos ta mustra ku nos ta respetá Yehova
Kiko ta e motibu prinsipal pa nos sòru pa nos aparensia ta na òrdu? Lesa Salmo 47:2. Despues, analisá e siguiente preguntanan:
Kon e echo ku nos ta representá Yehova mester yuda nos ora di skohe kiko pa bisti?
Bo ta kere ku ta importante pa nos presta bon atenshon na nos aparensia ora nos ta bai reunion i ora nos ta sali den sirbishi? Dikon sí, òf dikon nò?
5. Kiko por yuda nos disidí kiko pa bisti i kon pa kuida nos aparensia?
No ta importá kuantu nos pañanan ta kosta. Loke ta importante ta pa nos pañanan ta limpi i apropiá pa kada okashon. Lesa 1 Korintionan 10:24 i 1 Timoteo 2:9, 10. Despues, analisá dikon nos mester evitá di bisti paña . . .
ku no ta limpi ni na òrdu òf ku ta muchu informal.
ku ta pèrtá, ku ta saka muchu parti di nos kurpa òf ku ta provokativo.
Awe, komo kristian, nos no ta sigui Lei di Moises. Pero e leinan ei ta yuda nos haña sa kiko Yehova ta pensa tokante sierto asuntu. Lesa Deuteronomio 22:5. Despues, analisá e siguiente pregunta:
Dikon un hende hòmber mester evitá ku su manera di bisti i su aparensia ta parse esun di hende muhé, i dikon un hende muhé mester evitá ku su manera di bisti i su aparensia ta parse esun di hende hòmber?
Lesa 1 Korintionan 10:32, 33 i 1 Huan 2:15, 16. Despues, analisá e siguiente preguntanan:
Dikon nos lo no ke pa nos manera di bisti i nos aparensia ofendé hende kaminda nos ta biba òf hende den nos kongregashon?
Kon e hendenan kaminda bo ta biba ta gusta bisti, i kon nan ta gusta pa nan aparensia ta?
Tin algun di e kosnan ku bo a menshoná ku no ta pas pa un kristian? Dikon sí, òf dikon nò?
Tin diferente manera di bisti i di kuida nos aparensia ku ta aseptabel pa Yehova
LOKE HENDE SA BISA: “Mi por bisti loke mi ke.”
Bo ta di akuerdo ku e pensamentu ei? Dikon sí, òf dikon nò?
RESÚMEN
Ora nos ta tuma bon desishon relashoná ku nos manera di bisti i nos aparensia, nos ta mustra ku nos ta respetá Yehova i otro hende.
Repaso
Dikon Yehova ke pa nos presta atenshon na nos manera di bisti i na nos aparensia?
Kiko ta algun prinsipio di Beibel ku por yuda nos ora ta trata di nos manera di bisti i nos aparensia?
Ki efekto nos manera di bisti i nos aparensia por tin riba hende ku no ta sirbi Yehova?
MAS INFORMASHON INTERESANTE
Kiko otro hende ta pensa di bo ora nan wak loke bo ta bisti?
“Kiko Mi Manera di Bisti Ta Bisa di Mi?” (artíkulo riba jw.org)
Wak dikon ta sabí pa bo pensa bon promé ku bo pone un tatuahe.
“Kiko Beibel Ta Bisa Tokante Tatuahe?” (artíkulo riba jw.org)
Wak algun prinsipio mas ku por yuda bo tuma bon desishon ora di skohe kiko pa bisti i kon pa kuida bo aparensia.
“Bo Manera di Bisti Ta Duna Gloria na Dios?” (E Toren di Vigilansia di sèptèmber 2016)
Wak kon un señora ku kier a agradá Dios a siña aseptá e manera ku otro hende ta bisti.