Yega n’e Curason cu e Arte di Persuasion

HOPI hende ta mira e palabra “persuasion” cu cierto desconfiansa. E por duná bo e idea di un bendedó agresivo of un propaganda diseñá pa engañá of manipulá e consumidó. Asta den Bijbel, tin biaha e idea di persuasion tin conotacionnan negativo, indicando cu e ta corumpí of desviá un persona. Por ehempel, apostel cristian Pablo a skirbi n’e galationan: “Boso tabata core bon. Ken a stroba boso di sigui obedecé e berdad? E clase di persuasion aki no ta for di Esun cu ta yama boso.” (Galationan 5:7, 8) Tambe Pablo a spierta e colosensenan pa no laga ningun hende ‘gaña nan cu argumentonan persuasivo.’ (Colosensenan 2:4) Tal persuasion ta dependé riba argumentonan astuto basá riba fundeshi falsu.

Sin embargo, den su di dos carta na Timoteo, apostel Pablo a usa e idea di persuasion den un sentido diferente. El a skirbi: “Sigui den e cosnan cu bo a siña i a keda persuadí pa kere, sabiendo for di ki personanan bo a siña nan.” (2 Timoteo 3:14) Cu Timoteo a ser “persuadí pa kere” no ta nificá cu el a ser manipulá dor di su mama i su wela, via ken el a siña berdadnan bíblico.—2 Timoteo 1:5.a

Miéntras Pablo tabata bou di aresto di cas na Roma, el a duna testimonio cabal na hopi, “usando persuasion cu nan tocante Jesus for di tantu e ley di Moises como e Profetanan, di mainta te atardi.” (Echonan 28:23) Pablo tabata gañando su auditorio? Di ningun manera! Claramente anto, persuasion no ta semper un mal cos.

Usá den un sentido positivo, e rais dje palabra griego traducí como “persuadí” ta nificá convencé, ocasioná un cambio di mente pa medio di razonamentu sano i lógico. Asina, un maestro por edificá riba un fundeshi bíblico, usando persuasion pa inculcá den otronan un conviccion di berdad di Bijbel. (2 Timoteo 2:15) Sí, esaki tabata un marca di Pablo su ministerio. Asta Demetrio, e platé cu a haña cu siñansanan cristian tabata falsu, a mencioná cu “no solamente den Efeso sino den casi henter e distrito di Asia, e Pablo aki a persuadí un multitud basta grandi i a pone nan cambia na otro opinion, bisando cu esnan cu ta trahá na man no ta dios.”—Echonan 19:26.

Usando Persuasion den e Ministerio

Jesucristo a instruí su siguidónan: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso. I, mira! mi ta cu boso tur e dianan te n’e conclusion dje sistema di cosnan.” (Mateo 28:19, 20) Den mas cu 230 pais, Testigonan di Jehova ta obedeciendo e mandamentu aki. Cada luna durante nan aña di sirbishi di 1997, nan a conducí un promedio di 4.552.589 studio di Bijbel rond mundu.

Si bo tin e privilegio di conducí un studio di Bijbel, lo bo por anticipá desafionan cu lo rekerí pa bo usa e arte di persuasion. Por ehempel, suponé cu na bo siguiente sesion di studio ta lanta un pregunta relacioná cu Trinidad. Kico bo ta haci si bo sa cu bo studiante ta kere den e doctrina aki? Lo bo por dun’é un publicacion cu ta trata e tópico ei. Despues cu el a les’é, bo por haña cu el a ser persuadí pa kere cu Dios i Jesus no ta e mésun persona. Pero si algun pregunta keda cologá, con lo bo sigui?

Scucha cuidadosamente. Esaki lo yudá bo determiná kico bo studiante ta kere caba tocante un cierto tema. Por ehempel, si bo studiante bisa, “mi ta kere den Trinidad,” lo bo por pasa mesora pa un consideracion di textonan bíblico pa desaprobá e doctrina aki. Pero tin vários creencia relacioná cu Trinidad. Bo studiante lo por ta kere algu bastante diferente for di loke abo lo definí como e doctrina di Trinidad. Mescos nos por bisa di otro creencianan, manera reencarnacion, inmortalidad di alma i salbacion. Pues, scucha cuidadosamente promé cu bo papia. No asumí loke e studiante ta kere aden.—Proverbionan 18:13.

Haci pregunta. Esakinan lo por ta, entre otro: ‘Semper bo a kere den Trinidad? Bo a yega di haci un studio a fondo di loke Bijbel ta bisa riba e tema aki? Si Dios tabata parti di un trinidad, su Palabra, Bijbel, lo no bisa nos esei claramente i directamente?’ Ora di siña e studiante, para de bes en cuando i hacié pregunta manera esakinan: ‘Loke nos a trata te asina leu ta zona razonabel pa bo?’ ‘Bo ta di acuerdo cu e splicacion aki?’ Dor di usa pregunta ábilmente, bo ta enbolbé e studiante den e proceso di siña. E no mester djis scuchá bo splica un tema.

Usa razonamentu lógico. Ora di trata e doctrina di Trinidad, por ehempel, lo bo por bisa bo studiante: ‘Ora Jesus a bautisá, un bos a sali for di shelu, bisando: “Abo ta mi Yu, esun stimá.” Si ta Dios mes a ser bautisá riba tera, lo el a proyectá su bos pa shelu i despues bini bek pa asina e hendenan riba tera por a tende e palabranan ei? Esei lo no tabata algu pa despistá hende? Dios, “kende no por gaña,” lo a haci un cos engañoso asina?’—Lucas 3:21, 22; Tito 1:1, 2.

Hopi biaha razonamentu lógico presentá cu tacto ta bastante eficas. Considerá e ehempel di un señora cu nos lo yama Barbara. Henter su bida el a kere cu Jesus ta Dios i parti di un trinidad cu a incluí e spiritu santu. Pero djei un Testigo di Jehova a bis’é cu Dios i Jesus ta dos persona distinto, i a mustr’é textonan pa apoyá e declaracion ei.b Barbara no por a refutá Bijbel. Na mésun momento, e tabata frustrá. Apesar di tur cos, e tabata stima e doctrina di Trinidad.

Cu pacenshi e Testigo a razoná cu Barbara. El a puntr’é: “Si bo kier purba siñá mi cu dos persona ta igual cu otro, ki relacion di famia lo bo usa pa ilustr’é?” E señora a pensa un ratu anto a contestá: “Por ta lo mi usa dos ruman homber.” E Testigo a contestá: “Exactamente. Tal bes asta dos ohochi idéntico. Pero ora Jesus a siña nos pa mira Dios como e Tata i e mes como e Yu, ki mensahe e tabata transmitiendo?” Cu wowo hanchu habrí, Barbara a contestá: “Mi ta mira. E ta describiendo unu como mas bieu i cu mas autoridad.”

“Sí,” e Testigo a contestá, “i specialmente Jesus su auditorio hudiu cu a biba den un sociedad di patriarca, lo a yega n’e conclusion ei.” Pa enfatisá su punto, e Testigo a concluí: “Si nos mes a bini cu un ilustracion apropiado pa siña igualdad—esun di ruman of ohochi idéntico—Jesus, e Gran Maestro, sigur lo por a haci esei tambe. Mas bien, el a usa e términonan ‘tata’ i ‘yu’ pa describí e relacion entre su mes i Dios.”

Finalmente Barbara a comprendé e punto, i el a acept’é. E Testigo a yega na su curason cu e arte di persuasion.

Con pa Trata cu Emocionnan

Creencianan religioso cu rais profundo hopi biaha ta enbolbé un aspecto emocional. Considerá e caso di Edna, un católico deboto. Su nietunan tiener a mustr’é prueba bíblico cla cu Dios i Jesus no ta e mésun persona. Edna a comprendé loke el a tende. No obstante, el a declará bondadosamente pero cu firmesa: “Ami ta kere den e santísima Trinidad.”

Tal bes bo tabatin un experencia similar. Hopi hende ta mira e doctrinanan di nan religion como si fuera parti di nan identidad mes. Pa persuadí studiantenan di Bijbel asina, mas ta necesario cu djis lógica secu of asta un seri di texto cu ta proba cu e persona su punto di bista ta robes. Por resolvé situacionnan asina bon dor di balansá e arte di persuasion cu compasion. (Compará cu Romanonan 12:15; Colosensenan 3:12.) Ta berdad cu un maestro eficas mester tin conviccionnan firme. Por ehempel, Pablo a usa frasenan manera “mi ta convencí” i “mi sa i ta persuadí den e Señor Jesus.” (Romanonan 8:38; 14:14) Sin embargo, ora nos ta expresá nos conviccionnan, nos no mester asumí un tono dogmático, di ta hustu den nos mes bista, ni nos no mester ta sarcástico ni rebahá hende ora nos ta presentá berdadnan bíblico. Nos sigur no kier ofendé ni insultá e studiante.—Proverbionan 12:18.

Ta muchu mas eficas pa respetá e studiante su creencianan i reconocé su derecho di tin nan. Humildad ta e clave. Un maestro humilde no ta sinti cu di naturalesa e ta superior cu su studiante. (Lucas 18:9-14; Filipensenan 2:3, 4) Persuasion piadoso ta incluí un humildad cu, den un sentido, ta bisa: ‘Jehova misericordiosamente a yudá mi mira esaki. Lagá mi compartié cu bo.’

Pablo a skirbi su compañeronan cristian na Corinto: “E armanan di nos guera no ta carnal, sino ta poderoso pa medio di Dios pa tumba cosnan fuertemente ancrá. Pasobra nos ta tumba razonamentunan i tur cos halsá cu ta lanta contra e conocimentu di Dios; i nos ta trece tur pensamentu bou di control pa hacié obediente na e Cristo.” (2 Corintionan 10:4, 5) Awe, Testigonan di Jehova ta usa e Palabra di Dios pa tumba doctrinanan falsu fuertemente ancrá i tambe práctica i característicanan cu rais profundo cu ta desagrad’é. (1 Corintionan 6:9-11) Haciendo esaki, e Testigonan ta corda cu Jehova amorosamente a mustra pacenshi cu nan. Ki contentu nan ta di tin su Palabra, Bijbel, i pa usa e instrumento poderoso aki pa saca siñansa falsu i yega n’e curason cu e arte di persuasion!

[Nota]

[Kuadro na página 23]

Yega n’e Curason di Bo Studiante

◻ Pidi Jehova den oracion pa su direccion pa yega n’e curason dje studiante di Bijbel—Nehemías 2:4, 5; Isaías 50:4.

◻ Dicerní kico e studiante ta kere i pakico kisas e ta haña un creencia falsu atractivo.—Echonan 17:22, 23.

◻ Den un manera bondadoso i cu pacenshi, desaroyá un argumento bíblico lógico miéntras bo ta mantené tereno comun.—Echonan 17:24-34.

◻ Si ta posibel, reforsá e berdadnan di Bijbel cu ilustracionnan eficas.—Marco 4:33, 34.

◻ Mustra e studiante e beneficionan di aceptá conocimentu exacto for di Bijbel.—1 Timoteo 2:3, 4; 2 Timoteo 3:14, 15.