Bo Por Progresá Spiritualmente

E BERDADERO balor di algu por ta difícil pa reconocé. Esei ta e caso cu diamanta. Aunke un diamanta di pòlish ta briya, un diamanta no-acabá ta djis lombra dòf asina. No obstante, den e profundidadnan dje diamanta grof tin e promesa evidente di un piedra precioso.

Cristiannan ta manera diamanta grof den hopi manera. Aunke ainda nos ta leu for di perfeccion, tog nos tin un balor den nos cu Jehova ta atesorá. Mescos cu diamanta, nos tur tin nos cualidadnan distinto. I cada un di nos por haci mas progreso spiritual si esei ta nos deseo di curason. Nos personalidad por ser di pòlish, pa e lombra cu mas briyo p’e gloria di Jehova.—1 Corintionan 10:31.

Despues cu un diamanta ser di slijp i di pòlish, e ta ser poné den un montura cu ta resaltá su cualidadnan di reflehá lus. Di igual manera, Jehova por usa nos den diferente circunstancia of asignacion si nos “bisti e personalidad nobo cu a ser creá segun e boluntad di Dios den berdadero husticia i lealtad.”—Efesionan 4:20-24.

Un progreso spiritual asina lo no bini di su mes, mescos cu un diamanta den su estado natural masha poco biaha ta briya manera un piedra precioso. Kisas nos tin cu deshací di algun debilidad cu t’ei ainda, ahustá nos actitud pa cu asumí responsabilidad, of asta haci esfuerso vigoroso pa sali for di un rutina spiritual monótono. Pero nos por haci progreso si nos realmente kier haci esei, ya cu Jehova Dios por duna nos “e poder mas ayá di loke ta normal.”—2 Corintionan 4:7; Filipensenan 4:13.

Jehova Ta Fortalecé Su Sirbidónan

Slijpmentu di diamanta ta exigí confiansa cu ta bini for di conocimentu exacto, siendo cu una bes bo slijp un parti dje diamanta grof kita afó, generalmente e ta bai perdí. Mester slijp kita un parti costoso afó, tin biaha te 50 porciento dje piedra no-refiná, pa producí e forma deseá. Nos tambe mester tin confiansa cu ta bini di conocimentu exacto pa por forma nos personalidad i pa progresá spiritualmente. Nos mester tin confiansa specialmente cu Jehova lo duna nos poder.

Sin embargo, tin biaha nos por sinti nos inadecuá of pensa cu nos no por haci mas. Den pasado, fiel sirbidónan di Dios a sinti asina algun biaha. (Exodo 3:11, 12; 1 Reynan 19:1-4) Ora Dios a asigná Jeremías pa ta un “profeta n’e nacionnan,” el a sclama: “Mira cu realmente mi no sa con papia, pasobra ta djis un mucha mi ta.” (Jeremías 1:5, 6) Pero apesar di su caracter reservá, Jeremías a bira un profeta yen di curashi cu a entregá mensahenan franco na un pueblo hostil. Con esaki tabata posibel? El a siña dependé riba Jehova. Despues Jeremías a skirbi: “Bendicioná ta e homber físicamente fuerte cu ta pone su confiansa den Jehova, i kende su confiansa Jehova a bira.”—Jeremías 17:7; 20:11.

Awe tambe, Jehova ta fortalecé esnan cu ta pone nan confiansa den dje. Edward,a un tata di cuater yu cu tabata progresá masha poco-poco spiritualmente, a haña cu esaki ta cierto. E ta splica: “Mi tabata un Testigo di Jehova pa nuebe aña, pero a parce cu mi a para ketu spiritualmente. E problema tabata cu mi tabatin tiki motivacion i mi no tabatin confiansa. Despues cu mi a muda pa Spaña, mi a haña mi mes den un congregacion chikitu cu tabatin un anciano i un sirbidó ministerial so. En bista dje necesidad, e anciano a pidí mi atendé hopi asignacion. Mi a tembla ora mi a duna mi promé discurso i partinan di reunion. Tog, mi a siña dependé riba Jehova. Semper e anciano tabata encomendá mi i duná mi sugerencia discreto pa mehorá.

Na mésun tempu, mi a aumentá mi actividad di sirbishi di veld i a hiba un mihó delantera spiritual den mi famia. Como resultado, e berdad tabatin mas nificacion pa henter e famia, i ami a sintí mi muchu mas satisfecho. Awor mi ta un sirbidó ministerial, i mi ta trahando duru pa desaroyá e cualidadnan di un superintendente cristian.”

“Kita e Personalidad Bieu”

Manera Edward a realisá, progreso spiritual ta rekerí confiansa den Jehova. Ta esencial tambe pa desaroyá e “personalidad nobo” manera di Cristo. Con nos por haci esaki? Un promé paso ta pa “kita” e característicanan cu ta parti dje personalidad bieu. (Colosensenan 3:9, 10) Mescos cu mester kita imperfeccionnan, manera mineralnan aheno for di un diamanta grof pa hacié un hoya briyante, asina nos tin cu deshací di actitudnan cu ta “pertenecé n’e mundu” pa nos personalidad nobo por resplandecé.—Galationan 4:3.

Un dje actitudnan ei ta ora nos no ta dispuesto pa aceptá responsabilidad pa miedu cu esaki lo rekerí muchu hopi di nos. Ta cierto cu responsabilidad ta nificá trabou, pero e ta un trabou satisfaciente. (Compará cu Echonan 20:35.) Pablo a admití cu debocion piadoso ta rekerí pa nos ‘traha duru i haci esfuerso vigoroso.’ El a bisa cu nos ta haci esei gustosamente “pasobra nos a pone nos speransa den un Dios bibu,” unu cu no ta lubidá nunca e trabou cu nos ta haci na fabor di nos compañeronan cristian i otronan.—1 Timoteo 4:9, 10; Hebreonan 6:10.

Algun diamanta ta sufri di “tension” creá durante nan formacion i p’esei mester atendé cuidadosamente cu nan. Sin embargo, cu yudansa di un instrumento cu yama un polariscop, e persona cu ta pòlish e piedra por localisá e tension i por traha riba e piedra sin dañ’é. Tal bes nos ta sufri di un tension interno, of un falta den nos personalidad, pa motibu di nos antecedente of un experencia traumático. Kico nos por haci? Na promé lugá, nos mes tin cu admití cu nos tin e problema ei i determiná pa venc’é mas tantu posibel. Nos siguramente mester tira nos carga riba Jehova den oracion, i kisas busca yudansa spiritual tambe di un anciano cristian.—Salmo 55:22; Santiago 5:14, 15.

Un tension interno asina a afectá Nicholas. E ta splica: “Mi tata tabata un alcohólico, i el a pone ami cu mi ruman muher sufri hopi. Ora mi a caba scol, mi a bai den ehército, pero no a tarda muchu cu mi tendencia di rebeldiá a hincá mi den problema. Autoridadnan di ehército a encarcelá mi pa a bende droga, i na un otro ocasion mi a desertá. Finalmente, mi a sali for di ehército, pero ainda mi tabatin problema. Aunke mi bida tabata un desaster debí na uso di droga i bebementu di mas, mi tabatin interes den Bijbel i a anhelá di tin un propósito den bida. Cu tempu, mi a bini den contacto cu Testigonan di Jehova, a cambia mi estilo di bida, i a aceptá e berdad.

Sin embargo, a tumá mi añanan promé cu mi a aceptá i trata cu un defecto den mi personalidad. Mi tabatin un disgustu profundo contra autoridad i tabata lanta contra ken cu a duná mi conseho. Aunke mi tabata kier pa Jehova usá mi plenamente, e debilidad aki a strobá mi. Finalmente, cu yudansa di dos anciano comprensivo, mi a admití mi problema i a cuminsá aplicá nan conseho bíblico amoroso. Aunke un tiki resentimentu ta lanta de bes en cuando, awor mi a dominá mi caracter rebelde. Mi ta masha gradicidu pa Jehova su manera di trata cu pacenshi cu mi i pa e yudansa amoroso dje ancianonan. Pa motibu di mi progreso spiritual, mi a ser nombrá recientemente como sirbidó ministerial.”

Manera Nicholas a descubrí, no ta fácil pa cambia actitudnan cu tin rais profundo. Nos por enfrentá un desafio similar. Tal bes nos ta krepchi. Nos por ta canando cu un rencor, of nos por ta poniendo muchu énfasis riba independencia. Esei por pone cu nos progreso cristian ta keda limitá. Hende cu sa pòlish diamanta ta experenciá algu similar cu piedranan cu nan ta yama naats. Esakinan ta realmente dos piedra di smelt den unu durante e formacion di diamanta. Como resultado, naats tin dos patronchi di crecementu conflictivo cu ta haci masha difícil pa slijp e den e direccion cu e liñanan ta core. Den nos caso, nos ta haña e ‘disposicion’ dje spiritu boluntario luchando contra e ‘disposicion’ dje carni imperfecto. (Mateo 26:41; Galationan 5:17) Tin biaha, nos por sinti nos incliná pa entregá completamente den e lucha, hustificando cu imperfeccionnan den nos personalidad no ta importante tog. Kisas nos ta bisa: ‘Al fin i al cabo, mi famia i mi rumannan ta stimá mi tog.’

Sin embargo, si nos tin cu sirbi nos rumannan i glorificá nos Tata celestial, nos tin cu ‘ser hací nobo den e forsa cu ta impulsá nos mente’ dor di bisti e personalidad nobo. E esfuerso ta bale la pena, manera Nicholas i numeroso otro rumannan por testificá. Un persona cu ta slijp diamanta sa cu un mancha por deslucí henter e diamanta. Asina tambe, dor di neglishá un faceta débil di nos personalidad, nos por daña nos aparencia spiritual. Pió ainda, un debilidad serio lo por hiba na nos caida spiritual.—Proverbionan 8:33.

Manera un “Candela” den Nos

Esun cu ta pòlish diamanta ta busca pa conserbá e briyo den e diamanta. E ta haci esaki dor di slijp e facetanan di tal manera cu nan ta causa e asina yamá efecto di regenboog. Paden dje diamanta e lus di diferente color ta reflehá bai bini, produciendo e candela cu ta haci diamanta briya. Di manera similar, e spiritu di Dios por ta manera un “candela” den nos.—1 Tesalonicensenan 5:19; Echonan 18:25; Romanonan 12:11.

Pero kico si nos ta sinti cu nos mester ser motivá spiritualmente? Con nos por logra esaki? Nos tin cu ‘considerá nos camindanan.’ (Salmo 119:59, 60) Esaki lo encerá identificá e cosnan cu ta slow nos paso spiritualmente, anto determiná ki actividadnan teocrático nos tin cu sigui cu mas vigor. Nos por profundisá nos aprecio spiritual mediante studio personal regular i oracion ferviente. (Salmo 119:18, 32; 143:1, 5, 8, 10) Ademas, dor di asociá cu esnan cu ta traha duru den e fe, nos lo sigui fortalecé nos determinacion pa sirbi Jehova celosamente.—Tito 2:14.

Louise, un señora cristian hóben, a admití: “Mi a considerá e trabou di pionero regular pa dos aña promé cu mi realmente a inscribí como pionero, of proclamadó di Reino di tempu completo. No tabatin nada pa strobá mi, pero mi tabatin un rutina fácil, i simplemente mi no a haci esfuerso pa sali for di dje. Anto mi tata a muri di ripiente. Mi a realisá con frágil bida ta i cu mi no tabata haciendo e mihó uso di esun di mi. Di manera cu mi a cambia mi punto di bista spiritual, a aumentá mi sirbishi i a bira un pionero regular. Di yudansa particular den esaki tabata mi rumannan spiritual cu semper a apoyá e areglonan di sirbishi di veld i cu regularmente tabata compañá mi den e ministerio. Mi a siña cu e norma i metanan di hende cu ken nos ta asociá, por influenciá nos pa bon of pa malu.”

Hací Skerpi Como si Fuera cu Heru

Diamanta ta e substancia natural mas duru cu por haña riba tera. P’esei, bo tin cu slijp un diamanta cu un otro diamanta. Esaki por haci studiantenan di Bijbel corda e proverbio cu ta bisa: “Heru cu heru mes ta haci otro skerpi. Asina un hende ta haci e cara di un otro skerpi.” (Proverbionan 27:17) Con e cara di un persona ta ser hací “skerpi”? Un individuo por logra haci e condicion intelectual i spiritual di un otro skerpi, mescos cu por usa un pida heru pa haci un blet cu ta trahá dje mésun material skerpi. Por ehempel, si nos bira deprimí debí na un of otro desapunto, e animacion di un otro persona por ta masha edificante. Asina nos aparencia tristu por cambia pa mihó, i nos por ser animá pa sigui atrobe cu nos actividad celoso. (Proverbionan 13:12) Foral ancianonan di congregacion por yuda haci nos skerpi dor di duna animacion i conseho bíblico pa mehorá. Nan ta sigui e principio cu Sálomon a declará: “Duna un persona sabí i lo e bira asta mas sabí. Impartí conocimentu na un persona hustu i lo e aumentá den saber.”—Proverbionan 9:9.

Naturalmente, entrenamentu spiritual ta tuma tempu. Pa mas cu dies aña, apostel Pablo a compartí su experencia i métodonan di siñansa cu Timoteo. (1 Corintionan 4:17; 1 Timoteo 4:6, 16) E entrenamentu largu cu Moises a duna Hosué pa un periodo di mas cu 40 aña a beneficiá e nacion di Israel pa un tempu largu. (Hosué 1:1, 2; 24:29, 31) Eliseo a compañá profeta Elías pa kisas 6 aña, ricibiendo un entrenamentu excelente pa su mes ministerio cu a dura rond di 60 aña. (1 Reynan 19:21; 2 Reynan 3:11) Dor di duna entrenamentu continuo cu pacenshi, ancianonan ta sigui e ehempel di Pablo, Moises i Elías.

Duna encomendacion ta un parti vital di entrenamentu. Expresionnan sincero di aprecio pa asignacionnan bon hací of pa actonan digno di alabansa lo por impulsá otronan pa deseá di sirbi Dios mas plenamente. Encomendacion ta edificá confiansa loke, en buelta, ta duna incentivo pa traha riba debilidadnan. (Compará cu 1 Corintionan 11:2.) Animacion pa progresá den e berdad tambe ta bini dor di ta intensamente ocupá cu e trabou di predicá e Reino i otro actividadnan di congregacion. (Echonan 18:5) Ora ancianonan asigná responsabilidad na ruman hombernan segun nan progreso spiritual, esaki ta duna e hombernan aki experencia balioso i probablemente lo fortalecé nan deseo pa sigui progresá spiritualmente.—Filipensenan 1:8, 9.

Bon Motibu pa Progresá Spiritualmente

Diamanta ta ser considerá como algu precioso. Mescos ta cierto di esnan cu awor ta bira parti dje famia mundial di Jehova su adoradónan. De facto, Dios mes ta yama nan e cosnan “deseabel” of “precioso” di tur e nacionnan. (Ageo 2:7, nota) Aña pasá, 375.923 persona a bira Testigo di Jehova bautisá. Pa acomodá e crecementu aki, tin un necesidad pa ‘haci e tent mas espacioso.’ Dor di progresá spiritualmente—i dor di haci esfuerso pa alcansá privilegionan di sirbishi cristian—ta posibel pa bo tin un parti den atendé e expansion aki.—Isaías 54:2; 60:22.

Distinto di hopi diamanta precioso cu ta wardá den ‘safe’ na banco i cu masha poco biaha bo ta mira, nos balor spiritual por lusa briyantemente. I segun cu nos ta slijp nos cualidadnan cristian regularmente i manifestá nan, nos ta glorificá Jehova Dios. Jesus a exhortá su siguidónan: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.” (Mateo 5:16) Sigur-sigur, esei ta duna nos motibu sólido pa progresá spiritualmente.

[Nota]