Mayornan, Siña Boso Yunan for di Chikitu

“YUNAN ta un herensia di SEÑOR; e fruta di barika ta un rekompensa,” Beibel ta bisa. (Sal. 127:3) Ta p’esei mayornan kristian ta asina kontentu ora nan yu nase!

Pero huntu ku e alegria ta bini tambe hopi responsabilidat. Pa e yu por krese sano i fuerte, e tin ku kome kuminda salú regularmente. Asina tambe, pa e por sera un bon amistat ku Yehova, e mester di kuminda spiritual i guia di su mayornan. Nan tin ku hasi esfuerso pa siñ’é e prinsipionan di e Palabra di Dios. (Pro. 1:8) Ma ki ora nan tin ku kuminsá siñ’é, i kiko e yu mester siña?

MAYORNAN TIN MESTER DI E YUDANSA DI DIOS

Laga nos analisá e kaso di e hòmber fiel Manoa. E tabata di e tribu di Dan i a biba na Zora, un stat di Israel di antigwedat. Manoa ku su kasá no tabatin yu, pero un dia un angel di Yehova a bisa e kasá ku lo e duna lus na un yu hòmber. (Hues. 13:2, 3) Naturalmente, e notisia ei a hasi Manoa ku su kasá masha kontentu, pero a la bes nan a keda hopi preokupá. P’esei Manoa a supliká Yehova den orashon: “O SEÑOR, pa fabor, laga e hòmber di Dios ku bo a manda bini serka nos atrobe, pa e siña nos kiko nos mester hasi pa e mucha ku mester nase.” (Hues. 13:8) Manoa ku su kasá a tuma e edukashon di nan yu masha na serio. Sin duda, nan a hasi nan bèst pa siña nan yu, Sámson, e lei di Dios. I nan esfuerso a duna bon resultado, pasobra Beibel ta bisa ku ‘e spiritu di Yehova a kuminsá move Sámson.’ Ta p’esei Sámson, komo un di e huesnan di Israel, por a hasi hopi kos ekstraordinario.—Hues. 13:25; 14:5, 6; 15:14, 15.

Ki ora mayornan mester kuminsá siña nan yu? Wèl, Beibel ta bisa di Timoteo ku “for di chikitu” su mama, Eunise, i su wela, Loida, a siñ’é “e skrituranan santu.” (2 Tim. 1:5; 3:15) Pues, Timoteo su edukashon den e Skritura a kuminsá for di komienso di su infansia.

Ta bon pa mayornan kristian pidi e guia di Yehova i plania di antemano pa nan por kuminsá eduká nan yunan “for di chikitu.” Proverbionan 21:5 (BPK) ta bisa: “Plan bon pensá ta duna bon resultado.” Indudablemente, mayornan ta prepará nan mes bon promé ku e yu nase. Kisas nan ta asta traha un lista di kos ku e yu mester. Pero ta importante tambe pa nan traha un lista di aktividat spiritual ku nan lo hasi kuné. Nan meta mester ta pa kuminsá siña nan yu tokante Yehova asina ku e nase.

Un buki tokante desaroyo di mucha a komentá lo siguiente: “E promé lunanan di bida di un bebi ta desisivo pa e desaroyo di su selebro. Durante e tempu ei e kantidat di sinápsis​—e konekshonnan entre e sèlnan di nèrvio di e selebro ku ta hasi posibel ku hende por siña kos​—ta bira 20 biaha mas tantu.” (Early Childhood Counts​—A Programming Guide on Early Childhood Care for Development) Ta masha importante anto pa mayornan probechá di e periodo kòrtiku akí den e desaroyo mental di nan yu pa inkulká e prinsipionan di Yehova i tambe su norma- i balornan den nan yu.

Un mama ku ta pionero regular a bisa tokante su yu muhé: “Mi ta bai kuné den sirbishi for di tempu ku e tabatin un luna. Klaru ku e no a komprondé kiko tabata pasa, pero mi ta kere ku esei tabatin un efekto masha positivo riba dje. Pa ora e tabatin dos aña, ya e tabata ofresé e hendenan tratado sin niun tiki miedu.”

No tin duda ku mayornan ta haña bon resultado ora nan kuminsá eduká nan yu for di chikitu den e kaminda di Yehova. Pero hopi mayor ta atmití ku esei no ta semper fásil pa hasi.

‘USA BOSO TEMPU DI E MIHÓ MANERA’

Por lo general, mucha su atenshon ta kita masha lihé i nan no gusta sinta ketu. Esaki por ta un reto pa e mayornan. Pero ta e mucha su kuriosidat ta pone ku e ke konosé e mundu rònt di dje, i su tinu ta bula bai di un kos pa otro. Pues, kon mayornan por yuda nan yu konsentrá riba loke nan ta purba di siñ’é?

Pensa riba loke Moises a bisa na Deuteronomio 6:6 i 7: “E palabranan akí, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” E teksto akí ta mustra ku mayornan tin ku ripití bes tras bes loke nan ta siña nan yunan. Un mucha ta meskos ku un mata ku a kaba di sprùit i ku bo mester muha ku regularidat. Si ripitishon ta yuda hende grandi kòrda kosnan importante, kuantu mas esei lo no yuda mucha chikitu kòrda kos!

Pa mayornan por siña nan yunan e bèrdat, nan tin ku pasa tempu huntu ku nan. Ma den e mundu agitá djawe tal bes no ta niun tiki fásil pa nan saka tempu pa esei. Pero apòstel Pablo a konsehá nos pa ‘usa nos tempu di e mihó manera,’ sí, pa atendé nos responsabilidatnan kristian. (Efe. 5:15, 16) Kon nos por hasi esaki? Por ehèmpel, un ansiano a konta ku tabata un reto pa haña e balansa entre eduká su yu muhé, atendé su responsabilidatnan teokrátiko i traha pa su pan di kada dia. Su kasá, kende ta un pionero regular, tambe tabatin un agènda yen. Kon nan a logra saka tempu pa eduká nan yu muhé? E tata a splika: “Tur mainta, promé ku mi bai trabou, ami ku mi kasá ta lesa sea e teksto di dia p’e òf algu for di Mi Buki di Relato Bíbliko. Anochi, promé ku e bai drumi, nos ta bolbe lesa p’e. I ora nos ta bai prediká, nos ta bai kuné. Nos no kier pèrdè niun oportunidat durante e promé añanan akí di su bida.”

YUNAN TA “MANERA FLECHA”

Naturalmente, nos tur ke pa nos yunan bira adulto responsabel. Pero e motibu prinsipal pakiko nos ta eduká nan ta pa nan siña stima Dios di kurason.​—Mar. 12:28-30.

Salmo 127:4 ta bisa: “Manera flecha den man di un guerero, asina ta e yunan hañá den un hende su hubentut.” Den e versíkulo akí, yunan ta ser kompará ku flecha ku ta den man di un tiradó di flecha. E mester mek bon riba e blanko, pasobra unabes e tira e flecha, e no por kue bèk. Mayornan tin e “flecha,” esta, nan yu, pa un periodo relativamente kòrtiku huntu ku nan. P’esei nan mester probechá di e tempu ei pa inkulká prinsipionan di Beibel den e mente i kurason di nan yunan.

Apòstel Huan a skirbi tokante su yunan spiritual, esta, hende ku el a yuda pa bira sirbidó di Yehova: “No tin nada ku ta hasi mi mas kontentu ku esaki: di tende ku mi yunan ta sigui kana den e bèrdat.” (3 Huan 4) Mayornan kristian ta sinti e mesun satisfakshon ora nan mira nan yunan “sigui kana den e bèrdat.”