Entrená Nan for di Infancia
INVESTIGACION moderno ta indicá cu “fetonan ta reaccioná fisiológicamente riba stemnan.” Investigadornan di University of North Carolina “a descubrí cu despues cu mamanan a lesa pa nan yunan den matris, e yunan recien nací a reaccioná ora e pasashinan a ser lesá atrobe,” segun Winnipeg Free Press. Ora hende muher ta lesa na bos haltu siendo na estado, esaki por contribuí masha bon na inculcá bon balornan moral den e yu. Bijbel ta bisa cu Timoteo ‘a conocé e skirbimentunan santu desde infancia.’ (2 Timoteo 3:14, 15) Evidentemente, su mama i su wela a comprendé e balor di entren’é desde infancia, locual muy probablemente a incluí lesamentu na bos haltu.
Lesamentu ta “e abilidad di bida di mas poderoso cu nos tin den nos sociedad awe,” segun autor Jim Trelease. E abilidadnan di idioma i di vocabulario ta ser mehorá dor di lesa na bos haltu.
Ta sabí pa cuminsá lesa na bos haltu por lo ménos tan pronto cu bo cuminsá papia cu bo baby. Maske bo yu no-nací of recien nací na principio lo no comprendé loke bo ta bisando, e posibel beneficionan di largu plaso ta bale la pena. Proverbionan 22:6 ta bisa: “Entrená un mucha homber conforme cu e caminda p’e; ni ora e bira bieu lo e no desviá for di dje.”
Kico bo por lesa cu ta tantu práctico como probechoso? Lesa e Bijbel na bos haltu pa bo yu tur dia. Lesa tambe otro publicacionnan cu ta bale la pena, manera Scuchando e Gran Maestro, Mi buki di relato bíblico, E homber mas importante cu hamás a biba, i artículonan for dje revistanan Toren di Vigilancia i Spierta!
Ta cierto cu duna di bo mes den e manera aki ta enbolbé tempu, pero esei ta tempu bon usá. Esei ta un manera concreto pa demostrá cu bo ta interesá den bo yu i ta stim’é.