• Kon Beibel Por Yuda Bo?
    Bo Por Disfrutá di Bida pa Semper!—Kurso di Beibel Interaktivo
    • Lès 1. Un Beibel habrí.

      LÈS 01

      Kon Beibel Por Yuda Bo?

      Mayoria di nos tin pregunta tokante bida, sufrimentu, morto i futuro. Ademas, nos ke sa kon pa trata ku situashon di tur dia, manera gana nos pan di kada dia i tin un bida di famia felis. Hopi hende a ripará ku Beibel ta yuda nan haña kontesta pa pregunta importante di bida. Banda di esei, nan a haña bon konseho den Beibel ku ta yuda nan den nan bida di tur dia. Ken mas bo ta kere por benefisiá di loke Beibel ta bisa?

      1. Kiko ta algun pregunta ku Beibel ta kontestá?

      Beibel ta kontestá pregunta importante. Por ehèmpel: Kon bida a kuminsá aki riba tera? Kiko ta propósito di bida? Dikon bon hende ta sufri? Kiko ta pasa ku nos ora nos muri? Dikon tin asina tantu guera si tur hende ta deseá pas na mundu? Kiko lo pasa ku nos planeta den futuro? Beibel ta animá nos pa buska kontesta pa e preguntanan ku nos tin. Miónes di hende a keda satisfecho ku e kontestanan ku nan a haña den Beibel.

      2. Kon Beibel por yuda nos tin un bida felis?

      Beibel ta duna nos bon konseho. Por ehèmpel, e ta siña nos kon nos por tin un famia realmente felis. Ademas, Beibel ta siña nos kon pa trata ku strès i kon pa disfrutá di nos trabou. Segun ku bo ta analisá e publikashon akí huntu ku e persona ku ta duna bo kurso di Beibel, lo bo haña sa loke Beibel ta bisa tokante e tópikonan ei i tokante hopi otro tópiko mas. Pues, nos ta spera ku lo bo keda konvensí ku “henter e Skritura [tur loke tin den Beibel] ta  . . . probechoso.”—2 Timoteo 3:16.

      E publikashon akí no ta remplasá Beibel. Mas bien, e ta animá bo pa wak pa bo mes kiko Beibel ta siña. P’esei, nos ke animá bo pa lesa e tekstonan di Beibel ku tin den kada lès i kompará nan ku loke bo ta siñando.

      KIKO MAS NOS POR SIÑA?

      Laga nos wak kon Beibel a yuda otro hende, kon bo por disfrutá di bo lesamentu di Beibel i dikon ta importante pa bo buska yudansa pa komprondé Beibel.

      3. Beibel por guia nos den nos bida

      Beibel ta manera un flèshlait ku ta yuda nos mira unda nos ta bai. Beibel ta yuda nos tuma bon desishon den bida. Ademas, e ta yuda nos haña sa kiko lo sosodé den futuro.

      Lesa Salmo 119:105. Despues, analisá e siguiente preguntanan:

      • Kiko e eskritor di e salmo akí tabata pensa di Beibel?

      • Kiko abo ta pensa di Beibel?

      Un hòmber ta kana kantu di awa kaminda tin yen di piedra ora ta birando skur i ta usa un flèshlait pa wak unda e ta bai.

      4. Beibel tin kontesta pa nos preguntanan

      Un señora a bin mira ku Beibel tin kontesta pa e preguntanan ku tabata preokup’é pa hopi aña. Pasa e VIDIO. Despues, analisá e siguiente preguntanan:

      VIDIO: Nunka Pèrdè Speransa! (1:48)

      • Ki pregunta e señora den e vidio tabatin?

      • Kon un kurso di Beibel a yuda e señora?

      Beibel ta mustra ku ta bon pa hasi pregunta. Lesa Mateo 7:7. Awor, analisá e siguiente pregunta:

      • Ki pregunta bo tin ku bo ke pa Beibel kontestá?

      5. Bo por disfrutá di bo lesamentu di Beibel

      Hopi hende ta gusta lesa Beibel i nan ta mira e benefisio ku esei ta trese kuné. Pasa e VIDIO. Despues, analisá e siguiente preguntanan:

      VIDIO: Lesamentu di Beibel (2:05)

      • Kiko e hóbennan den e vidio tabata pensa tokante lesamentu?

      • Aunke nan no ta gusta lesa, dikon nan ta gusta lesa Beibel sí?

      E instrukshonnan ku tin den Beibel ta konsolá nos i ta duna nos speransa. Lesa Romanonan 15:4. Awor, analisá e siguiente pregunta:

      • Bo ke haña sa kon Beibel por duna bo konsuelo i speransa?

      6. Nos por komprondé Beibel ku yudansa di otro hende

      Hopi hende a bin ripará ku, fuera di lesa Beibel riba nan mes, nan a saka mas benefisio ora nan a studia Beibel ku otro hende. Lesa Echonan 8:26-31. Despues, analisá e siguiente pregunta:

      Kolekshon di plachi: 1. Felipe, un evangelisadó, ta splika un hòmber di Etiopia kiko Skritura ta bisa. 2. Un Testigu di Yehova ta analisá Beibel ku un mama i su dos yunan.

      Un ofisial di Etiopia tabatin mester di yudansa pa komprondé Skritura. Awe, hopi hende ta mira e benefisionan di studia Beibel ku otro hende

      LOKE HENDE SA BISA: “Studiamentu di Beibel ta pèrdèmentu di tempu.”

      • Kiko lo bo kontestá i dikon?

      RESÚMEN

      Beibel ta duna nos bon konseho, ta kontestá pregunta importante di bida i ta duna nos konsuelo i speransa.

      Repaso

      • Ki tipo di konseho nos por haña den Beibel?

      • Kiko ta algun pregunta ku Beibel ta kontestá?

      • Kiko abo lo tin gana di siña for di Beibel?

      Meta

      MAS INFORMASHON INTERESANTE

      Wak dikon e konsehonan di Beibel te ainda ta práktiko.

      “Siñansa di Beibel Ku No Ta Bira Ouderwets” (E Toren di Vigilansia Num. 1 2018)

      Wak kon Beibel a yuda un hòmber ku tabata lucha ku su emoshonnan for di tempu ku e tabata mucha.

      Mi A Kuminsá un Bida Nobo i Felis (2:53)

      Analisá ki bon konseho Beibel ta duna kada miembro di famia.

      “12 Sekreto pa Felisidat den Famia” (Spièrta! Num. 2 2018)

      Hopi hende no sa ken realmente ta goberná mundu. Pero wak ken Beibel ta bisa ta goberná mundu.

      Dikon Analisá Loke Beibel Ta Bisa?—Vershon Kompleto (3:14)

  • Beibel Ta Mensahe di Dios pa Nos
    Bo Por Disfrutá di Bida pa Semper!—Kurso di Beibel Interaktivo

    • 1. Si hende a skirbi Beibel, dikon nos ta bisa ku e mensahe ku tin den Beibel ta bini di Dios?

      Mas o ménos 40 hòmber a skirbi Beibel. Beibel a ser skirbí durante un periodo di mas o ménos 1.600 aña, kuminsando for di aña 1513 promé ku Kristu te ku mas o ménos aña 98 despues di Kristu. E eskritornan di Beibel tabata masha diferente for di otro. Por ehèmpel, algun di nan tabata wardadó di karné, piskadó i rei. Apesar di esei, loke e eskritornan a skirbi no ta kontradisí otro. Kon esei ta posibel? Wèl, pasobra ta Dios ta Outor di Beibel. Ku otro palabra, tur loke tin skirbí den Beibel ta bini di Dios. (Lesa 1 Tesalonisensenan 2:13.) E eskritornan no a skirbi nan mes pensamentunan. Mas bien, nan “a papia di parti di Dios segun ku spiritu santu tabata guia nan.”a (2 Pedro 1:21) Dios a usa su spiritu santu pa inspirá òf guia e hòmbernan akí pa skirbi su pensamentunan.—2 Timoteo 3:16.