Tito—“Un Colaboradó pa Boso Interesnan”

TABATIN biaha cu problemanan a presentá den e congregacion cristian di promé siglo. Mester a solucioná esakinan, i esei a rekerí curashi i obedencia. Un homber cu a enfrentá mas cu un desafio asina cu éxito tabata Tito. Como un persona cu a traha huntu cu apostel Pablo den e obra, el a haci esfuerso sincero pa yuda otronan haci cosnan n’e manera cu ta agradá Jehova. P’esei Pablo a bisa e cristiannan na Corinto cu Tito tabata ‘un colaboradó pa nan interesnan.’—2 Corintionan 8:23.

Ken Tito tabata? Ki papel el a hunga den solucioná problema? I con nos por beneficiá dor di considerá su conducta?

E Cuestion di Circuncision

Tito tabata un griego incircuncidá. (Galationan 2:3)a Siendo cu Pablo ta yam’é “un berdadero yu segun un fe di cua nos ta participá en comun,” kisas Tito tabata un di su yunan spiritual. (Tito 1:4; compará cu 1 Timoteo 1:2.) Tito tabata huntu cu Pablo, Barnabas i otronan for di Antiokia, Siria, ora nan a bai Jerusalem rond di aña 49 E.C. pa trata e cuestion di circuncision.—Echonan 15:1, 2; Galationan 2:1.

Tin hende ta di opinion cu debí cu e combertimentu di gentilnan incircuncidá tabata bou di discusion na Jerusalem, e rumannan a bin cu Tito pa demostrá cu hudiu i hende no hudiu por a haña e fabor di Dios, sea nan tabata circuncidá of no. Algun miembro dje congregacion di Jerusalem cu tabata fariseo promé cu nan a aceptá cristianismo, a argumentá cu mester a obligá gentilnan combertí pa circuncidá i warda e Ley; pero otro cristiannan no tabata di acuerdo. Forsa Tito i otro gentilnan pa circuncidá, lo tabata igual cu nenga cu salbacion ta dependé di Jehova su bondad inmerecí i di fe den Jesucristo, en bes di obranan dje Ley. Tambe esei lo tabata un nengamentu dje evidencia cu gentilnan, of hende dje nacionnan, a ricibí Dios su spiritu santu.—Echonan 15:5-12.

Mandá na Corinto

Despues cu a solucioná e cuestion di circuncision, e rumannan a duna Pablo cu Barnabas tur autoridad pa predicá n’e nacionnan. Na mésun tempu, nan a trata tambe di tene hende pober na mente. (Galationan 2:9, 10) En berdad, ora e registro inspirá ta bolbe mencioná Tito rond di seis aña despues, e ta na Corinto como representante di Pablo pa organisá un colect pa e santunan. Sin embargo, segun cu Tito tabata haci e trabou aki, el a hañ’é den un otro situacion yen di tension.

Pablo su cartanan n’e corintionan ta revelá cu el a skirbi nan promé pa “no sigui den compania di fornicadó.” El a hañ’é ta bisa nan pa saca un fornicadó no-repentí for di meimei di nan. Sí, Pablo a skirbi nan un carta fuerte, haciendo esei “cu hopi lágrima.” (1 Corintionan 5:9-13; 2 Corintionan 2:4) Miéntras tantu, el a manda Tito bai Corinto pa yuda cu e colect cu tabata tumando lugá pa e cristiannan pober di Hudea. Por ta cu Pablo a mand’é tambe pa observá e reaccion dje corintionan riba su carta.—2 Corintionan 8:1-6.

Con e corintionan lo a reaccioná riba e conseho di Pablo? Ansioso pa haña sa, kisas Pablo a manda Tito for di Efeso crusando e Laman Egeo pa bai Corinto, cu instruccion pa raportá bek mas pronto posibel. Si Tito por a completá e mision ei promé cu barcunan stop di nabegá pa winter (rond di meimei di november), lo e por a bai Troas cu barcu of tuma e ruta mas largu riba tera via Hellespont. Probablemente Pablo a yega trempan n’e lugá palabrá na Troas, ya cu e motin cu e platénan a instigá a pon’é bandoná Efeso mas trempan cu el a anticipá. Despues di a spera ansiosamente na Troas, Pablo a realisá cu Tito lo no a bini cu barcu. P’esei, Pablo a sali bai via tera cu e speransa di top’é na caminda. Una bes riba suela europeo, podisé Pablo a coge e Via Egnacia, i finalmente a topa cu Tito na Macedonia. Pa Pablo su gran alivio i goso, tabatin bon noticia di Corinto. E congregacion a reaccioná faborablemente riba e conseho dje apostel.—2 Corintionan 2:12, 13; 7:5-7.

Aunke Pablo a preocupá tocante ki sorto di bon biní su representante lo a ricibí, Dios a yuda Tito cumpli cu su comision. E rumannan a ricibí Tito cu “temor i temblamentu.” (2 Corintionan 7:8-15) Usando e palabranan dje comentarista W. D. Thomas: “Nos por asumí cu sin debilitá Pablo su censura, [Tito] a súplica e corintionan cu abilidad i tacto; el a sigurá nan cu e único motibu pakico Pablo a papia asina ei, tabata pasobra e tabatin nan bienestar spiritual na mente.” Den e proceso, Tito a bin stima e cristiannan corintio debí na nan spiritu obediente i cambionan positivo. Nan actitud encomendabel a resultá di ta un fuente di animacion p’e.

Kico dje otro aspecto di Tito su mision na Corinto, esta, organisá e colect pa e santunan na Hudea? Tito a traha riba esei tambe, manera nos por saca afó dje informacion hañá na 2 Corintionan. Probablemente e carta ei a ser skirbí na Macedonia durante otoño di 55 E.C., djis despues cu Tito i Pablo a topa otro. Pablo a skirbi cu awor e tabata manda Tito, kende a iniciá e colect, bek huntu cu dos yudante, kende nan nomber no ta ser mencioná, pa por completá e colect. Siendo cu Tito tabata sinceramente interesá den e corintionan, e tabata masha dispuesto pa bolbe bek. Ora Tito a coge caminda pa bai bek Corinto, probablemente e tabatin Pablo su di dos carta inspirá p’e corintionan.—2 Corintionan 8:6, 17, 18, 22.

Tito no tabata solamente un bon organisadó, sino tambe e tabata e clase di homber cu bo por a confia cu encargonan delicado den situacionnan difícil. E tabatin curashi, i tabata maduro i firme. Evidentemente Pablo a considerá Tito capas pa trata cu e situacionnan trabahoso cu e “apostelnan superfini” di Corinto tabata causa continuamente. (2 Corintionan 11:5) E impresion aki di Tito ta ser confirmá dor di su siguiente mencion den e Scritura, den un otro asignacion exigente.

Riba e Isla di Creta

Ta probabel cu entre aña 61 pa 64 E.C., Pablo a skirbi Tito, kende e tempu ei tabata sirbiendo riba e isla mediteráneo di Creta. Pablo a lagu’é ei pa “corigí loke tabata defecto” i pa “haci nombramentu di anciano den stad tras di stad.” En general, cretensenan tabatin e reputacion di ta “mentiroso, bestia salbahe perhudicial, haragan desocupá.” P’esei, na Creta tambe Tito lo mester a bai actua cu curashi i firmesa. (Tito 1:5, 10-12) Tabata un tarea hopi responsabel, ya cu probablemente esei lo a determiná e futuro di cristianismo riba e isla. Bou di inspiracion, Pablo a yuda Tito dor di specificá kico pa busca den posibel superintendentenan. Ainda ta tuma e cualificacionnan ei na cuenta ora di nombra anciano cristian awe.

E Scritura no ta indicá ki tempu Tito a bai for di Creta. E tabata einan suficiente tempu pa Pablo pidié soru pa e necesidadnan di Zenas i Apólos, kendenan lo a pasa ei riba un biahe na un tempu no specificá. Pero Tito lo no a keda riba e isla pa hopi tempu mas. Pablo tabatin planeá pa manda Artemas of Tíkico ei, anto Tito lo mester a topa cu e apostel na Nicópolis, probablemente e stad prominente cu ta carga e nomber ei situá den nortwest di Grecia.—Tito 3:12, 13.

For dje último mencion breve di Tito den Bijbel, nos ta haña sa cu probablemente rond di 65 E.C., Pablo a mand’é riba un otro asignacion mas. Esei a hib’é Dalmacia, un region oost dje Laman Adriático, caminda awe ta Croacia. (2 Timoteo 4:10) Bijbel no ta bisa nos kico Tito mester a bai haci ei, pero algun hende ta pensa cu Pablo a mand’é pa drecha asuntunan di congregacion i participá den e actividad di misionero. Si ta asina, Tito lo a sirbi den mésun capacidad cu na Creta.

Ki gradicidu nos ta di tin superintendentenan cristian maduro manera Tito! Nan comprendimentu cla di principionan bíblico, i e curashi cu cua nan ta aplicá nan, ta yuda protehá e spiritualidad dje congregacion. Laga nos imitá nan fe i duna prueba di ta manera Tito, dor di promové e interesnan spiritual di nos compañeronan creyente.—Hebreonan 13:7.

[Nota]

[Plachi na página 31]

Tito tabata un colaboradó cu curashi, trahando na interes di cristiannan na Corinto i na otro parti