Sigui Crece den Conocimentu

“Suministrá na boso fe . . . conocimentu.”—2 PEDRO 1:5.

1, 2. (a) Kico lo bo por siña dor di mira na cielu? (Romano 1:20) (b) Kico ta e berdadero alcanse di hende su aumento den conocimentu?

KICO lo bo por siña dor di sali pafó riba un anochi scur sin nubia i mira n’e luna briyante i streanan incontabel? Lo bo por siña algu tocante Esun cu a crea tur esaki.—Salmo 19:1-6; 69:34.

² Si bo kier a aumentá e conocimentu ei, lo bo subi riba dak di bo cas i mira for di einan? Probablemente no. Albert Einstein a yega di usa un ilustracion asina pa splica cu científiconan realmente no a aumentá mashá den conocimentu dje universo i siguramente masha poco tocante Esun cu a cre’é.a Dr. Lewis Thomas a skirbi: “E mayor logro particular di ciencia den e siglo científicamente mas productivo aki ta e descubrimentu cu nos ta profundamente ignorante; nos sa masha poco tocante naturalesa i nos ta comprendé asta ménos.”

3. Den ki sentido un aumento di conocimentu ta aumentá doló?

³ Asta ora bo dedicá tur e añanan restante dje duracion di un bida normal buscando tal conocimentu, kisas bo ta djis bira mas conciente di con corticu bida ta i mira mas claramente cu hende su uso di conocimentu ta limitá dor di imperfeccion i e forma ‘trocí’ dje mundu aki. Salomon a splica e punto ei, skirbiendo: “Den e abundancia di sabiduria tin un abundancia di iritacion, di manera cu esun cu ta aumentá e conocimentu ta aumentá e doló.” (Eclesiastés 1:15, 18) Sí, ganamentu di conocimentu i sabiduria liber di cualkier coneccion cu Dios su propósitonan generalmente ta enbolbé doló i iritacion.—Eclesiastés 1:13, 14; 12:12; 1 Timoteo 6:20.

4. Ki conocimentu nos mester kier gana?

⁴ Bijbel ta recomendando pa nos no interesá den aumentá nos conocimentu? Apostel Pedro a skirbi: “No, ma sigui crece den e bondad inmerecí i conocimentu di nos Señor i Salbador Jesucristo. Na dje sea e gloria tantu awor i te n’e dia di eternidad.” (2 Pedro 3:18) Nos por i mester aceptá tal spiertamentu como aplicando na nos, instando nos pa crece den conocimentu. Pero ki sorto di conocimentu? Con nos por aumentá den dje? I nos realmente ta haciendo asina?

5, 6. Con Pedro a enfatisá cu nos mester gana conocimentu?

⁵ Aumentá den conocimentu exacto dje Creador di universo i di Jesus tabata un idea central den e segundo carta di Pedro. Den su apertura el a skirbi: “Laga bondad inmerecí i pas ser aumentá na boso dor di un conocimentu exacto di Dios i di Jesus nos Señor, siendo cu su poder divino a duna nos libremente tur e cosnan cu ta di interes pa bida i debocion piadoso, pa medio dje conocimentu exacto di esun kende a yama nos mediante gloria i birtud.” (2 Pedro 1:2, 3) Asina Pedro ta conectá tenementu di bondad inmerecí i pas cu nos ganamentu di conocimentu di Dios i su Yu. Esei ta razonabel, ya cu e Creador, Jehova, ta e punto focal di berdadero conocimentu. Un persona cu ta teme Dios ta capas pa mira asuntunan den e lus corecto i yega na conclusionnan bálido.—Proverbio 1:7.

⁶ Despues Pedro a insta: “Suministrá na boso fe, birtud, na boso birtud, conocimentu, na boso conocimentu, dominio propio, na boso dominio propio, awante, na boso awante, debocion piadoso, na boso debocion piadoso, cariño fraternal, na boso cariño fraternal, amor. Pasobra si e cosnan aki ta existí den boso i ta pasa over, nan lo prevení boso di bira sea inactivo of infructífero tocante e conocimentu exacto di nos Señor Jesucristo.” (2 Pedro 1:5-8)b Den e siguiente capítulo, nos ta lesa cu e ganamentu di conocimentu ta yuda hende scapa di contaminacion dje mundu. (2 Pedro 2:20) Asina Pedro a haci claro cu esnan cu ta birando cristian mester di conocimentu, mescos cu esnan cu ta sirbiendo Jehova caba. Abo ta cai den un dje categorianan ei?

Siña, Ripití, Usa

7. Den ki manera hopi hende a gana conocimentu exacto di berdad básico di Bijbel?

⁷ Kisas bo tin un studio di Bijbel cu Testigonan di Jehova pasobra bo a reconocé e zonido di berdad den nan mensahe. Un biaha pa siman, pa rond di un ora, bo ta considerá un tema bíblico usando un yudansa manera Bo por biba pa semper den Paradijs riba tera. Excelente! Hopi hende cu a haña un studio asina cerca Testigonan di Jehova a gana conocimentu exacto. Sin embargo, kico abo por haci pa aumentá e cantidad cu bo personalmente ta siñando? Ata’ki un par di sugerencia.c

8. Segun cu bo ta prepará pa un studio, kico bo por haci pa siña mas?

⁸ Di antemano, ora bo ta prepará pa bo studio, inspeccioná e material cu mester cubri. Esei ta encerá tira un bista riba título dje capítulo, subtema i cualkier plachi cu ta ilustrá e material. Despues, segun cu bo ta lesa un paragraf of seccion dje publicacion, busca e ideanan clave i e textonan di apoyo, dor di subrayá of marca esakinan. Pa mira si bo a siña e berdadnan cu a ser tratá, purba contestá e preguntanan riba e varios paragrafnan. Den hacimentu di esaki, purba formulá e contestanan den bo mes palabra. Finalmente, repasá e les, tratando na recordá e puntonan principal i argumentonan apoyador.

9. Con e aplicacion di sugerencia tocante studio lo yudá bo siña?

⁹ Bo por spera di aumentá den conocimentu si bo aplicá e sugerencianan aki. Pakico asina? Un motibu ta cu lo bo ta tratando cu e material cu un deseo sincero pa siña, preparando e tereno, na moda di papia. Dor di haña un bistaso general i despues busca e puntonan principal i liñanan di razonamentu, lo bo mira con e detayenan ta relacioná cu e tema of conclusion. Un repaso final lo yudá bo corda loke bo a studia. Kico lo yudá bo despues durante bo studio di Bijbel?

10. (a) Pakico djis un ripiticion di dato of informacion nobo ta di poco balor? (b) Kico ta enbolbí den “recordá cu espacio gradual”? (c) Con yunan israelita kisas a beneficiá di ripiticion?

¹⁰ Expertonan den e campo di educacion conocé e balor di ripiticion oportuno i cu propósito. Esaki no ta djis un ripiticion di palabra manera lora, cua kisas bo a purba na scol ora bo tabata siñando nomber, dato of idea fo’i cabes. Bo no a haña tog cu pronto bo a lubidá loke bo a recitá, cu el a desparcé lihé for di memoria? Pakico? Djis ripití un palabra of dato nobo por ta fastidioso i e resultadonan ta di corto duracion. Kico por cambia esei? Bo berdadero deseo pa siña lo yuda. Un otro clave ta ripiticion cu propósito. Algun minut despues cu bo a siña un punto, promé cu e disparcé for di memoria, purba saca for di bo mes loke bo a siña. Esaki ta ser yamá “recordá cu espacio gradual.” Dor di refrescá bo memoria promé cu e desvanecé, bo ta extendé e largura di retencion. Den Israel, tatanan mester a inculcá Dios su mandamentunan den nan yunan. (Deuteronomio 6:6, 7) “Inculcá” ta nificá siña mediante ripiticion. Probablemente, hopi dje tatanan ei a presentá e leynan na nan yunan promé; mas despues nan a ripití e informacion; i e ora ei nan a haci nan yunan pregunta encuanto loke nan a siña.

11. Kico bo por haci durante un studio di Bijbel pa aumentá siñamentu?

¹¹ Si un Testigo ta conducí un studio di Bijbel cu bo, e por yudá bo siña dor di tene resúmen progresivo de bes en cuando durante e curso dje studio. Esaki no ta algu infantil. E ta un técnica cu ta mehorá siñamentu, pues participá gososamente den e repasonan periódico. Anto, na fin dje studio, tuma parti den un repaso final den cua bo ta contestá fo’i memoria. Bo por splica den bo mes palabra e puntonan manera lo bo haci ora di siña un otro persona. (1 Pedro 3:15) Esaki lo yuda haci loke bo a siña parti di bo memoria di término largu.—Compará cu Salmo 119:1, 2, 125; 2 Pedro 3:1.

12. Kico un studiante mes por haci pa mehorá su memoria?

¹² Un otro paso probechoso lo ta pa, dentro di algun dia, bo papia cu un otro persona di loke bo a siña, kisas un compañé di scol, un co-trahador of un bisiña. Lo bo por mencioná e tópico i despues bisa cu bo djis kier mira si bo por corda e liñanan clave di razonamentu of dje textonan apoyador for di Bijbel. Esei por lanta interes dje otro persona. Asta si e no haci esei, e proceso mes di ripití e informacion nobo despues di un periodo di algun dia lo establec’é den bo memoria. E ora ei lo bo a siñ’é realmente, haciendo loke 2 Pedro 3:18 ta insta nos.

Siñando Activamente

13, 14. Pakico nos mester kier bai mas ayá cu djis gana i corda informacion?

¹³ Siñamentu ta mas cu djis absorbá dato of ser capas pa corda informacion. Hende religioso den dia di Jesus a haci esei cu nan oracionnan ripititivo. (Mateo 6:5-7) Pero con nan a ser afectá p’e informacion? Nan tabata produciendo fruta hustu? Apénas. (Mateo 7:15-17; Lucas 3:7, 8) Parti dje problema tabata cu e conocimentu no a penetrá den nan curason, afectando nan cu bon resultado.

¹⁴ Segun Pedro, mester ta diferente cu cristiannan, e tempu aya i awor. E ta insta nos pa suministrá na nos fe e conocimentu cu lo yuda nos evitá di bira inactivo of infructífero. (2 Pedro 1:5, 8) Pa esaki resultá cierto den nos caso, nos mester kier crece den tal conocimentu i kier lagu’é afectá nos profundamente, tocando e persona cu nos ta di paden. Esei kisas no ta sosodé semper.

15. Cua problema a desaroyá cu algun cristian hebreo?

¹⁵ Den tempu di Pablo e cristiannan hebreo tabatin un problema cu esaki. Siendo hudiu, nan tabatin algun conocimentu dje Scritura. Nan tabata sa di Jehova i di algun di su rekesitonan. Despues nan a agregá conocimentu tocante e Mesías, a ehercé fe i tabata bautisá como cristian. (Echo 2:22, 37-41; 8:26-36) Atrabes di luna i añanan, nan lo mester a asistí na reunion cristian, caminda nan por a participá den lesamentu di texto i den dunamentu di comentario. Tog, algun no a crece den conocimentu. Pablo a skirbi: “Aunke boso mester tabata maestro caba den bista dje tempu, atrobe boso mester di un hende pa siña boso for di principio e cosnan elemental dje declaracionnan sagrado di Dios; i boso a bira manera hende cu mester di lechi, no cuminda sólido.” (Hebreo 5:12) Con esei por tabata? E por pasa cu nos tambe?

16. Kico ta permafrost i con e ta afectá mata?

¹⁶ Como ilustracion, considerá permafrost, e tera permanentemente congelá na Polo Norte i na otro regionnan caminda e averahe di temperatura ta bou di punto di congelacion. E tera, baranca i awa subteráneo ta congelá bira un masa sólido, tin biaha na un profundidad di 900 meter. Den zomer, e superficie dje tera (yamá e capa activo) lo por dirti. Sin embargo, e capa fini di tera dirtí aki ta generalmente lodo debí cu humedad no por sak den e permafrost mas abou. Matanan cu ta crece den e capa fini na superficie hopi biaha ta chikitu of mal-desaroyá; nan rais no por penetrá den e permafrost. Kisas bo ta puntra, ‘Kico permafrost tin di haber cu si mi ta creciendo den conocimentu di berdad bíblico?’

17, 18. Con permafrost i su capa activo por ser usá pa ilustrá loke a desaroyá cu algun cristian hebreo?

¹⁷ Permafrost ta ilustrá bon e situacion di un persona kende su facultadnan mental no ta activamente enbolbí den gana, corda i usa conocimentu exacto. (Compará cu Mateo 13:5, 20, 21.) E persona probablemente tin e capacidad mental pa siña varios tema, incluyendo berdad bíblico. El a studia “e cosnan elemental dje declaracionnan sagrado di Dios” i kisas a cualificá pa bautismo, mescos cu e cristiannan hebreo. Tog, kisas e no ta “forsa padilanti na madures,” n’e cosnan mas aleu cu “e doctrina primario tocante Cristo.”—Hebreo 5:12; 6:1.

¹⁸ Visualisá algun dje cristiannan ei na reunion den e promé siglo. Nan tabata presente i lantá, pero nan mente tabata enbolbí den siñamentu? Nan tabata creciendo activamente i diligentemente den conocimentu? Talbes no. Pa esnan inmaduro, cualkier enbolbimentu den reunion a tuma lugá den un capa activo fini, na moda di papia, miéntras abou tabata un profundidad congelá. E rais di berdadnan mas sólido of complicá no por a penetrá den e region aki di permafrost mental.—Compará cu Isaías 40:24.

19. Den ki manera un cristian experenciá awe por bira mescos cu e cristiannan hebreo?

¹⁹ Por ta mescos cu un cristian awe. Aunke e ta presente na reunion kisas e no ta usa ocasionnan asina pa crece den conocimentu. Kico di participá activamente den nan? Pa un persona nobo of un hóben ofrecé su mes pa lesa un texto bíblico of duna un comentario den palabranan dje paragraf por exigí basta esfuerso, reflehando un ehercisio excelente i encomendabel di su capacidad. Pero Pablo a mustra cu otronan, den bista dje tempu cu nan ta cristian, mester avansá mas aleu cu tal etapa inicial di participacion si nan kier sigui crece den conocimentu.—Hebreo 5:14.

20. Ki análisis propio nos cada un mester haci?

²⁰ Si un cristian experenciá nunca a progresá mas aleu cu djis lesa un versículo di Bijbel of duna un comentario básico direct for dje paragraf, probablemente su participacion a bini for dje “capa activo” na superficie di su mente. Un reunion tras di otro por pasa cu e profundidad di su potencial mental permaneciendo den un estado congelá, pa sigui nos ilustracion di permafrost. Nos mester puntra nos mes: ‘Esei ta e caso cu mi? Mi a laga un tipo di permafrost mental drentá mi? Con mentalmente alerto i interesá pa siña mi ta?’ Asta ora nos no ta sinti nos cómodo cu nos contestanan onesto, nos por cuminsá dal paso awor pa crece den conocimentu.

21. Ki pasonan cu nos a considerá anteriormente nos lo por aplicá den prepará pa of asistí na reunion?

²¹ Nos cada un individualmente por aplicá e sugerencianan den paragraf 8. Sin importá con largu nos a asociá cu e congregacion, nos por determiná pa forsa padilanti na madures i mayor conocimentu. Pa algun esei lo nificá prepará mas diligentemente pa reunionnan, talbes rebibando custumbernan cu nos a sigui añanan pasá pero cu poco poco a bai perdí. Segun cu bo ta prepará, purba saca afó kico e puntonan clave ta i comprendé textonan desconocí cu ta ser usá pa desaroyá liñanan di razonamentu. Busca pa cualkier ángulo of aspecto nobo den e material di studio. Di igual manera, durante e reunion, purba aplicá den bo mes e sugerencianan mencioná den paragraf 10 i 11. Forsa pa ta alerto mentalmente, como si fuera teniendo e temperatura di bo mente haltu. Esei lo contrarestá cualkier tendencia pa “permafrost” drenta den; e esfuerso conciente aki lo dirti tambe cualkier condicion “congelá” cu kisas a desaroyá anteriormente.—Proverbio 8:12, 32-34.

Conocimentu, un Yudansa Pa Ta Fructífero

22. Con nos lo beneficiá si nos traha pa aumentá nos conocimentu?

²² Con nos lo beneficiá individualmente si nos traha rib’e asuntu aki di crece den e bondad inmerecí i conocimentu di nos Señor i Salbador Jesucristo? Dor di haci esfuerso conciente pa tene nos facultadnan mental alerto, cla pa haña conocimentu, e simianan di berdadnan bíblico nobo i mas complicá lo manda raisnan profundo abou, i nos comprendimentu lo aumentá i bira permanente. Lo e ta comparabel cu loke Jesus a bisa den un otro ilustracion tocante curason. (Lucas 8:5-12) E simianan cu ta cai riba tera excelente por saca rais firme pa sostené mata cu ta producí i carga fruta.—Mateo 13:8, 23.

23. Ki resultado por tin ora nos tuma 2 Pedro 3:18 na pechu? (Colosense 1:9-12)

²³ E ilustracion di Jesus tabata un tiki diferente, ma e bon resultadonan tabata similar na loke Pedro a primintí: “P’e mésun motibu aki, contribuyendo como contesta na tur esfuerso sincero, suministrá na boso fe, birtud, na boso birtud, conocimentu . . . Pasobra si e cosnan aki ta existí den boso i ta pasa over, nan lo prevení boso di bira sea inactivo of infructífero tocante e conocimentu exacto di nos Señor Jesucristo.” (2 Pedro 1:5-8) Sí, nos crecementu den conocimentu lo yuda nos ser fructífero. Nos lo haña cu ganando asta mas conocimentu lo ta asta mas placentero. (Proverbio 2:2-5) Loke bo siña lo bo corda mas fácil i lo ta útil segun cu bo ta siña otronan bira disipel. Pues den e manera aki tambe, lo bo ta mas fructífero i lo trece gloria pa Dios i su Yu. Pedro a concluí su segundo carta: “Sigui crece den e bondad inmerecí i conocimentu di nos Señor i Salbador Jesucristo. Na dje sea e gloria tantu awor i te n’e dia di eternidad.”—2 Pedro 3:18.

[Nota]

Bo Por Corda?

◻ Pakico bo mester ta interesá den aumentá bo conocimentu?

◻ Con un studiante bíblico nobo por beneficiá mas di su studio?

◻ Ki peliger bo kier evitá, segun e ilustracion di permafrost?

◻ Pakico bo mester ta determiná pa mehorá den bo abilidad di aumentá conocimentu?

[Plachi na página 15]

Ami tin un problema cu permafrost mental?