Wardador I Carne Den Un Teocracia

“Jehova ta nos Hues, Jehova ta nos Dunador di Statuto, Jehova ta nos Rey; e mes lo salba nos.”​—⁠ISAIAS 33:22.

TEOCRACIA ta nificá un gobernacion dor di Dios. E ta enbolbé aceptá Jehova su autoridad i sigui su guia i instruccion den decisionnan grandi i chikitu cu nos ta tuma den bida. E congregacion di promé siglo tabata un teocracia genuino. E cristiannan dje tempu ei por a bisa honestamente: “Jehova ta nos Hues, Jehova ta nos Dunador di Statuto, Jehova ta nos Rey.” (Isaías 33:22) Cu e resto ungí como su núcleo, e organisacion di Jehova Dios awe ta igualmente un berdadero teocracia.

Den Ki Sentido Nos Ta Teocrático Awe?

² Pakico nos por bisa cu e organisacion terenal di Jehova ta un teocracia? Debí cu esnan cu ta pertenecé na dje en berdad ta someté nan mes n’e gobernacion di Jehova. I nan ta sigui e delantera di Jesucristo, esun kende Jehova a entronisá como Rey. Por ehempel, den e tempu di fin, e mandamentu directo aki for dje Gran Teócrata ta ser transmití na Jesus: “Hinca bo machete i cosechá, pasobra e ora a yega pa cosechá, pasobra e cosecha dje tera ta completamente hechu.” (Revelacion 14:15) Jesus ta obedecé i ta efectuá e trabou di cosecha dje tera. Hende cristian ta apoyá nan Rey den e gran trabou aki dor di predicá celosamente e bon nobo i haci disipel. (Mateo 28:19; Marco 13:10; Echo 1:⁠8) Haciendo esei, nan ta tambe colaborador cu Jehova, e Gran Teócrata.​—⁠1 Corintio 3:⁠9.

³ Den conducta tambe, hende cristian ta someté nan mes n’e gobernacion di Dios. Jesus a bisa: “Ken cu haci loke ta berdad ta bini n’e lus, afin cu por saca na cla cu su obra a ser hací na armonia cu Dios.” (Juan 3:21) Awe, tin debatenan sin fin over di normanan moral, pero e disputanan aki no ta tuma lugá entre hende cristian. Nan ta considerá como inmoral loke Jehova ta bisa ta inmoral i nan ta evitá inmoralidad completamente, como si e ta un malesa masha contagioso i fatal! Tambe nan ta percurá pa nan famianan, ta obedecé nan mayornan i ta keda sumiso na autoridadnan superior. (Efesio 5:​3-5, 22-33; 6:​1-4; 1 Timoteo 5:8; Tito 3:⁠1) Pues, nan ta actua teocráticamente, na armonia cu Dios.

⁴ Adam i Eva a perde Paradijs debí cu nan kier a tuma nan propio decisionnan en cuanto loke ta bon i loke ta malu. Jesus tabata kier net contrali. El a bisa: “Mi ta busca, no mi propio boluntad, sino e boluntad di esun cu a mandá mi.” Hende cristian ta busca e mesun cos. (Juan 5:30; Lucas 22:42; Romano 12:2; Hebreo 10:⁠7) Saul, e promé rey di Israel, a obedecé Jehova​—⁠pero solamente parcialmente. P’e motibu aki el a ser rechasá. Samuel a bis’é: “Pa obedecé ta mihó cu sacrificio, pa presta atencion [ta mihó] cu e vet di chubat’i carné.” (1 Samuel 15:22) Ta teocrático pa sigui Jehova su boluntad te na un cierto grado, talbes participando regularmente den e trabou di predicacion of den asistencia na reunion, anto comprometé den asuntunan di moralidad of den algun otro manera? Claro cu no! Nos ta forsa pa ‘haci e boluntad di Dios cu henter nos alma.’ (Efesio 6:6; 1 Pedro 4:​1, 2) Distinto di Saul, nos ta someté nos mes totalmente n’e gobernacion di Dios.

Un Teocracia Moderno

⁵ Den pasado, Jehova a goberná i a revelá berdadnan mediante individuonan, manera profeta, rey i apostelnan. Awe, esei no ta e caso mas; no tin profeta of apostel inspirá. Mas bien, Jesus a bisa cu durante su presencia real, lo e identificá un cuerpo fiel di siguidor, un “esclabo fiel i discreto,” i lo nombr’é riba tur su pertenencianan. (Mateo 24:​45-47; Isaías 43:10) Na 1919 tal esclabo a ser identificá como e resto di cristiannan ungí. Desde e tempu ei, representá p’e Cuerpo Gobernante, e tabata e centro di teocracia riba tera. Rond mundu, e Cuerpo Gobernante di Testigonan di Jehova ta ser representá pa Comiténan di Sucursal, superintendentenan biahero i ancianonan di congregacion.

⁶ Cooperacion cu organisacion teocrático ta un parti vital di sumision na teocracia. Tal cooperacion ta obra funcioná pa unidad i ordu mundial den “henter e asociacion di rumannan.” (1 Pedro 2:17) En buelta, esaki ta agradá Jehova, kende ta “un Dios, no di desordu, sino di pas.”​—⁠1 Corintio 14:33.

Ancianonan den un Teocracia

⁷ Tur anciano nombrá, sin importá nan posicion di autoridad, ta cumpli cu e cualificacionnan describí den Bijbel p’e funcion sirbishi di superintendente, of anciano. (1 Timoteo 3:​1-7; Tito 1:​5-9) Ademas, Pablo su palabranan n’e ancianonan efesio ta aplicá na tur anciano: “Presta atencion na boso mes i na tur e tou, entre cua e spiritu santu a nombra boso como superintendente, pa pastoreá e congregacion di Dios.” (Echo 20:28) Sí, ancianonan ta ser nombrá pa spiritu santu, cua ta bini for di Jehova Dios. (Juan 14:26) Nan nombramentu ta teocrático. Ademas, nan ta pastoreá e tou di Dios. E tou ta pertenecé na Jehova, no n’e ancianonan. E organisacion di Dios ta un teocracia.

⁸ Den su carta n’e efesionan, apostel Pablo a describí e responsabilidadnan general dje ancianonan, bisando: “El a duna algun como apostel, algun como profeta, algun como evangelisador, algun como wardador i maestro, cu un bista rib’e reahuste dje santunan, pa trabou ministerial, p’e edificacion dje curpa dje Cristo.” (Efesio 4:​11, 12) No tabatin mas apostel i profeta despues dje infancia “dje curpa dje Cristo.” (Compará cu 1 Corintio 13:⁠8.) Pero ainda ancianonan ta hopi ocupá haciendo trabou di evangelisá, di pastoreá i di siña.​—⁠2 Timoteo 4:2; Tito 1:⁠9.

⁹ Siendo cu teocracia ta gobernacion di Dios, ancianonan eficas ta cabalmente familiarisá cu e boluntad di Dios. Hosué a ser mandá pa lesa e Ley diariamente. Ancianonan tambe mester studia i consultá e Scritura regularmente i mester ta cabalmente familiarisá cu literatura bíblico cu e esclabo fiel i discreto a publicá. (2 Timoteo 3:​14, 15) Esaki ta incluí e revistanan Toren di Vigilancia i ¡Despertad! i otro publicacionnan cu ta mustra con principionan bíblico ta aplicá na situacionnan specífico.a Sin embargo, aunke ta importante pa un anciano conocé i sigui guia publicá den e literatura dje Sociedad Watch Tower, e mester ta tambe cabalmente familiarisá cu e principionan bíblico cu tin tras di nan. E ora ei lo e ta den un posicion pa aplicá guia bíblico cu comprendimentu i compasion.​—⁠Compará cu Miqueas 6:⁠8.

Sirbiendo Cu un Spiritu Cristian

¹⁰ Rond di aña 55 E.C., apostel Pablo a skirbi su promé carta n’e congregacion den Corinto. Un dje problemanan cu el a trata tabatin di haber cu cierto homber cu kier tabata prominente den e congregacion. Pablo a skirbi: “Boso ta hartá caba, no ta berdad? Boso ta ricu caba, no ta berdad? Boso a cuminsá reina como rey sin nos, no ta berdad? I mi ta deseá en berdad cu boso a cuminsá reina como rey, pa nos tambe por reina cu boso como rey.” (1 Corintio 4:⁠8) Den e promé siglo E.C., tur cristian tabatin e speransa di reina como rey i sacerdote celestial huntu cu Jesus. (Revelacion 20:​4, 6) Pero, evidentemente, algun den Corinto a lubidá cu riba tera no tin rey den e teocracia cristian. En bes di actua manera reynan dje mundu aki, wardadornan cristian ta cultivá humildad, un cualidad cu ta agradá Jehova.​—⁠Salmo 138:6; Lucas 22:​25-27.

¹¹ Humildad ta un debilidad? Di ningun manera! Jehova mes ta ser describí como siendo humilde. (Salmo 18:35) E reynan di Israel a guia ehércitonan den bataya i a goberná e nacion bou di Jehova. Tog, cada un mester a tene cuidou ‘pa su curason no halsa su mes riba su rumannan.’ (Deuteronomio 17:20) Jesus resucitá ta un Rey celestial. Ma ora e tabata riba tera, el a laba pia di su disipelnan. Ki humildad! I mustrando cu el a deseá pa su apostelnan ta humilde di mes manera, el a bisa: “Si ami, aunke mi ta Señor i Maestro, a laba boso pia, boso tambe mester laba pia di un e otro.” (Juan 13:14; Filipense 2:​5-8) Tur gloria i alabansa mester bai pa Jehova, no pa ningun hende. (Revelacion 4:11) Sea nan ta anciano of no, tur cristian mester pensa di nan mes den lus dje palabranan di Jesus: “Nos ta esclabo cu no ta sirbi pa nada. Loke nos a haci ta loke nos tabatin deber di haci.” (Lucas 17:10) Cualkier otro punto di bista no ta teocrático.

¹² Huntu cu humildad, ancianonan cristian ta cultivá amor. Apostel Juan a mustra e importancia di amor ora el a bisa: “Ken cu no ta stima no a yega na conocé Dios, pasobra Dios ta amor.” (1 Juan 4:⁠8) Individuonan cu ta falta amor no ta teocrático. Nan no conocé Jehova. En cuanto e Yu di Dios, Bijbel ta bisa: “Jesus, stimando esnan di dje cu tabata den mundu, a stima nan te na fin.” (Juan 13:⁠1) Papiando cu 11 homber cu lo a bira parti dje cuerpo gobernante den e congregacion cristian, Jesus a bisa: “Esaki ta mi mandamentu, pa boso stima un e otro mescos cu ami a stima boso.” (Juan 15:12) Amor ta e marca di identificacion di cristianismo berdadero. E ta atraé esnan di curason kibrá, esnan na luto i e prezunan spiritual cu ta anhelá pa libertad. (Isaías 61:​1, 2; Juan 13:35) Ancianonan mester ta ehemplar den mustra amor.

¹³ Awe, hopi biaha ancianonan ta ser puntrá pa yuda trata problemanan complicá. Dificultadnan di matrimonio por tin rais profundo i persistente. Hende hóben tin problemanan cu esnan adulto por haña ta duru pa comprendé. Enfermedadnan emocional hopi biaha ta difícil pa comprendé. Un anciano cu ta enfrentá tal cosnan kisas ta insigur di kico pa haci. Pero e por ta sigur cu si e ta confia den e sabiduria di Jehova huntu cu oracion, si e ta haci investigacion den Bijbel i den informacion publicá dor dje esclabo fiel i discreto, i si e ta trata humildemente i amorosamente cu e carnénan, lo e ta un influencia beneficioso asta den e situacion di mas difícil.

¹⁴ Jehova a bendicioná su organisacion ricamente cu “don den homber.” (Efesio 4:⁠8) De bes en cuando, e Sociedad Watch Tower ta ricibí cartanan caluroso cu ta duna testimonio dje amor mustrá dor di ancianonan humilde kendenan ta pastoreá e carnénan di Dios cu compasion. Por ehempel, un anciano di congregacion ta skirbi: “Mi no por corda un bishita di un superintendente di circuito cu a afectá mi mas of cu ainda ta ser comentá den e congregacion. E superintendente di circuito a yudá mi mira e importancia di un actitud positivo ora di trata cu e rumannan, cu un énfasis riba encomendacion.”

¹⁵ Un ruman muher, kende tabatin cu biaha pa un clínica leu pa ricibí tratamentu, ta skirbi: “Ki trankilisante tabata di por a topa un anciano e promé anochi di ansiedad den un hospital asina leu fo’i cas! E i otro rumannan a pasa hopi tempu cu mi. Asta hende di mundu cu tabata sa bon dor di kico mi mester a pasa, a sinti cu lo mi no a sobrebibí nunca sin e consuelo, cuido i oracion dje rumannan amoroso i dedicá ei.” Un otro ruman muher ta skirbi: “Mi ta na bida awe pasobra e cuerpo di anciano cu pacenshi a guiá mi atrabes di mi bataya cu depresion pisá. . . . Un ruman homber i su esposa no tabata sa kico pa bisá mi. . . . Pero loke a conmové mi mas tantu tabata cu aunke nan no a comprendé completamente loke mi tabata pasando aden, nan a interesá den mi amorosamente.”

¹⁶ Sí, hopi anciano ta aplicando e amonestacion di apostel Pedro: “Pastoreá e tou di Dios den boso cuido, no obligá, sino cu bon gana; tampoco pa amor pa ganashi desonesto, sino cu empeño; tampoco como dominando riba esnan cu ta herencia di Dios, sino birando ehempel p’e tou.” (1 Pedro 5:​1-3) Ki un bendicion tal ancianonan teocrático ta!

Carnénan den e Teocracia

¹⁷ Sin embargo, un teocracia no ta consistí solamente di anciano. Si e wardadornan mester ta teocrático, e carnénan tambe mester ta. Den ki manera? Wel, e mesun principionan cu ta guia e wardadornan mester guia e carnénan. Tur cristian, no solamente anciano, mester ta humilde si nan kier ricibí e bendicion di Jehova. (Santiago 4:⁠6) Tur mester cultivá amor pasobra sin dje nos sacrificio na Jehova no ta agrad’é. (1 Corintio 13:​1-3) I nos tur, no djis e ancianonan so, mester “ta yená cu e conocimentu exacto dje boluntad di [Jehova] den tur sabiduria i comprension spiritual.”​—⁠Colosense 1:⁠9.

¹⁸ Tantu hóben como bieu ta constantemente enfrentá cu decisionnan difícil segun cu nan ta purba keda fiel apesar di ta biba den mundu di Satanas. E tendencia di mundu den bistimentu, música, película i literatura ta desafiá e spiritualidad di algun. Un conocimentu superficial dje berdad no ta suficiente pa yuda nos mantené nos balansa. Pa haci sigur di keda fiel, nos mester ta yená cu conocimentu exacto. Nos mester dje dicernimentu i sabiduria cu solamente e Palabra di Dios por duna nos. (Proverbio 2:​1-5) Esaki ta nificá cultivá bon custumber di studio, meditá riba loke nos ta siña i pon’é na práctica. (Salmo 1:​1-3; Revelacion 1:⁠3) Pablo tabata skirbiendo na tur cristian, no solamente anciano, ora el a bisa: “Cuminda sólido ta pertenecé na hende maduro, na esnan kende mediante uzo tin nan facultadnan perceptivo entrená pa distinguí loke ta bon i malu.”​—⁠Hebreo 5:14.

Wardadornan i Carnénan Ta Traha Huntu

¹⁹ Finalmente, mester bisa cu un spiritu berdaderamente teocrático ta ser mustrá dor di esnan cu ta cooperá cu e ancianonan. Pablo a skirbi na Timoteo: “Laga e ancianonan cu ta presidí den un manera excelente ser considerá digno di dobel onor, specialmente esnan cu ta traha duru den papiamentu i siñamentu.” (1 Timoteo 5:17; 1 Pedro 5:​5, 6) E posicion di anciano ta un privilegio maraviyoso, pero mayoria anciano ta hombernan di famia cu ta bai nan trabou seglar tur dia i cu tin esposa i yu pa cuida. Aunke nan ta contentu pa sirbi, nan sirbishi ta mas fácil i mas recompensador ora e congregacion ta duna apoyo, no ta demasiado crítico i exigente.​—⁠Hebreo 13:17.

²⁰ Apostel Pablo a bisa: “Corda esnan cu ta hiba delantera den boso, kendenan a papia e palabra di Dios cu boso, i segun boso ta contemplá e resultado di nan conducta, imitá nan fe.” (Hebreo 13:⁠7) No, Pablo no a animá e rumannan pa sigui e ancianonan. (1 Corintio 1:12) Siguimentu di un hende no ta teocrático. Pero ta siguramente sabí pa imitá e fe probá di un anciano teocrático kende ta activo den e trabou di evangelisá, kende ta regular na reunionnan, i kende ta trata humildemente i amorosamente cu e congregacion.

Un Testament di Fe

²¹ Berdaderamente, e existencia di un organisacion teocrático den e tempu di mas degenerá aki di historia humano ta un testimonio dje poder dje Gran Teócrata. (Isaías 2:​2-5) E ta tambe un testimonio dje fe di casi cincu miyon homber, muher i mucha cristian, kendenan ta lucha cu e problemanan di bida di tur dia pero nunca ta lubidá cu Jehova ta nan Gobernante. Mescos cu fiel Moises “a sigui constante como si el a mira Esun cu ta invisibel,” asina cristiannan awe tin un fe similar fuerte. (Hebreo 11:27) Nan tin e privilegio di biba den un teocracia, i nan ta gradicí Jehova diariamente p’e. (Salmo 100:​4, 5) Segun cu nan ta experenciá e poder salbador di Jehova, nan ta contentu pa proclamá: “Jehova ta nos Hues, Jehova ta nos Dunador di Statuto, Jehova ta nos Rey; e mes lo salba nos.”​—⁠Isaías 33:22.

[Footnotes]

[Study Questions]

1. Pakico nos por bisa cu e cristiannan di promé siglo i esnan djawe ta un teocracia?

2. Cua ta un manera den cua Testigonan di Jehova ta someté nan mes n’e gobernacion di Jehova?

3. Con hende cristian ta someté nan mes na teocracia den asuntunan di moralidad?

4. Ki actitud robes Adam i Eva i Saul a manifestá, i con cristiannan ta mustra un actitud diferente?

5, 6. Con Jehova ta trata cu humanidad awe, i cooperacion cu e areglo aki ta resultá den kico?

7. Pakico nos por bisa cu ancianonan cristian ta ser nombrá teocráticamente?

8. Cua ta e responsabilidadnan general di ancianonan awe?

9. Con ancianonan mester prepará nan mes pa representá e boluntad di Dios den e congregacion?

10. Ancianonan mester vigilá contra ki mal actitud, i con?

11. (a) Cua ta algun ehempel sobresaliente di humildad? (b) Ki punto di bista di nan mes anciano i tur otro cristian mester tin?

12. Pakico amor ta un cualidad vital pa ancianonan cristian cultivá?

13. Aunke problemanan por ta difícil awe, con un anciano por ta un influencia beneficioso den tur situacion?

14, 15. Cua ta algun expresion cu ta mustra cu Jehova a bendicioná su pueblo cu hopi anciano excelente?

16. Ki amonestacion Pedro ta duna ancianonan?

17. Mencioná algun cualidad cu tur miembro dje congregacion mester cultivá.

18. (a) Pakico djis un conocimentu superficial dje berdad no ta suficiente? (b) Con nos tur por ta yená cu conocimentu exacto?

19, 20. Ki amonestacion nos tur ta ricibí pa cooperá cu e ancianonan, i pakico?

21. Con cristiannan ta manifestá un fe fuerte manera esun di Moises?

[Caption on page 16]

Adam i Eva a perde Paradijs debí cu nan kier a tuma nan propio decisionnan en cuanto loke ta bon i loke ta malu

[Caption on page 18]

Si un anciano ta trata humildemente i amorosamente cu e carnénan, lo e ta semper un influencia beneficioso

[Caption on page 20]

Kico Bijbel Ta Mustra?

◻ Den ki manera hende cristian ta someté na teocracia?

◻ Con teocracia ta ser organisá awe?

◻ Den ki manera ancianonan mester prepará nan mes pa cumpli cu nan responsabilidadnan?

◻ Ki cualidadnan cristian ta vital pa ancianonan cultivá i manifestá?

◻ Den e teocracia, ki relacion mester existí entre e carnénan i e wardadornan?