Keda den Siguridad Como Parti dje Organisacion di Dios

“E nomber di Jehova ta un toren fuerte. Den dje e hustu ta core drenta i ta ser duná proteccion.”—PROVERBIONAN 18:10.

1. Segun e oracion di Jesus, den ki situacion difícil cristiannan ta?

DJIS promé cu Jesus a muri, el a haci oracion na su Tata celestial na fabor di su siguidónan. Cu interes amoroso, el a bisa: “Mi a duna nan bo palabra, pero mundu a odia nan, pasobra nan no ta parti di mundu, mescos cu ami no ta parti di mundu. Mi ta pidí bo, pa no saca nan for di mundu, sino pa vigilá riba nan pa causa di e malbado.” (Juan 17:14, 15) Jesus tabata sa cu mundu lo tabata un lugá peligroso pa cristiannan. Lo el a demostrá su odio na nan dor di gaña riba nan i persiguí nan. (Mateo 5:11, 12; 10:16, 17) Tambe lo e tabata un fuente di corupcion.—2 Timoteo 4:10; 1 Juan 2:15, 16.

2. Unda cristiannan por haña un lugá di siguridad spiritual?

² E mundu cu lo a odia cristiannan ta consistí di esnan cu ta alehá for di Dios i cu ta bou di control di Satanas. (1 Juan 5:19) E mundu aki ta muchu mas grandi cu e congregacion cristian, i Satanas mes ta muchu mas poderoso cu cualkier hende. P’esei, e odio di mundu ta un berdadero menasa. Unda Jesus su siguidónan por haña siguridad spiritual? Un declaracion den e edicion di The Watchtower di 1 di december 1922, a indicá e contesta: “Awor nos ta den e dia di maldad. E lucha ta entre e organisacion di Satanas i e organisacion di Dios. Ta un lucha tenas.” Den e conflicto aki, e organisacion di Dios ta un lugá di siguridad spiritual. E palabra “organisacion” no ta aparecé den Bijbel, i aya den añanan ’20, “e organisacion di Dios” tabata un expresion nobo. Kico e organisacion aki ta anto? I con nos por haña proteccion den dje?

E Organisacion di Jehova

3, 4. (a) Segun un diccionario i The Watchtower, kico ta un organisacion? (b) Den ki sentido e compañerismo internacional di Testigonan di Jehova por ser yamá un organisacion?

³ Segun Concise Oxford Dictionary, un organisacion ta “un cuerpo organisá.” Cu esei na mente, nos ta comprendé cu pa motibu cu e apostelnan a organisá e cristiannan di promé siglo den congregacionnan local bou dje supervision di un cuerpo gobernante na Jerusalem, ta corecto pa papia dje “asociacion di rumannan” ei como un organisacion. (1 Pedro 2:17) Awe Testigonan di Jehova tin un structura organisacional similar. E unidad dje cuerpo di promé siglo a ser fortalecí cu “donnan den hende,” manera “wardadó i maestro.” Algun di esakinan a biaha di un congregacion pa otro, miéntras cu otronan tabata anciano den congregacionnan local. (Efesionan 4:8, 11, 12; Echonan 20:28) “Donnan” similar ta fortalecé e unidad di Testigonan di Jehova awe.

⁴ E edicion di The Watchtower di 1 di november 1922, a bisa tocante e palabra “organisacion”: “Un organisacion ta un asociacion di persona cu tin e propósito di cumpli cu un plan.” E Watchtower a sigui splica cu, si yama Testigonan di Jehova un organisacion, esei no ta haci nan “un secta den e sentido cu e término ei ta ser usá, sino e ta nificá simplemente cu e Studiantenan di Bijbel [Testigonan di Jehova] ta haciendo esfuerso pa cumpli cu e propósitonan di Dios i nan ta haci esei manera Señor ta haci tur cos, den un manera ordená.” (1 Corintionan 14:33) Apostel Pablo a mustra cu e cristiannan den su tempu tambe a actua den un manera ordená. El a compará e asociacion cristian di ungínan cu e curpa humano cu tin hopi parti, cada un cumpliendo cu su papel asigná di manera cu e curpa por funcioná bon. (1 Corintionan 12:12-26) Esei ta un ilustracion excelente di un organisacion! Pakico cristiannan tabata organisá? Pa sirbi “e propósitonan di Dios,” pa haci e boluntad di Jehova.

5. Kico ta e organisacion visibel di Dios?

⁵ Bijbel a predicí cu awe cristiannan berdadero lo ta uní, trecí huntu den un solo “tera” como un solo “nacion,” caminda nan lo ta “briyando como iluminadónan den mundu.” (Isaías 66:8; Filipensenan 2:15) Awe e “nacion” organisá aki ta mas cu cincu miyon i mei na cantidad. (Isaías 60:8-10, 22) Sin embargo, no ta te einan so e organisacion di Dios ta yega. E ta enbolbé angel tambe.

6. Den un sentido mas amplio, kendenan ta forma e organisacion di Dios?

⁶ Tin hopi ehempel di angel cu a traha huntu cu Dios su sirbidónan humano. (Génesis 28:12; Daniel 10:12-14; 12:1; Hebreonan 1:13, 14; Revelacion 14:14-16) Apropiadamente anto, e edicion di The Watchtower di 15 di mei 1925, a bisa: “Tur angel santu ta forma parti dje organisacion di Dios.” Ademas, el a bisa: “Na cabes dje organisacion di Dios [tin] Señor Jesucristo, kende ta poseé tur poder i autoridad.” (Mateo 28:18) P’esei, den e sentido mas amplio dje palabra, e organisacion di Dios ta consistí di tur esnan den shelu i riba tera cu ta traha huntu pa haci e boluntad di Dios. (Mira e cuadro.) Ta ki un privilegio maraviyoso pa forma parti di esaki! I ta ki un goso pa mira padilanti n’e tempu ora tur criatura bibiente den shelu i riba tera lo ta organisá pa alabá Jehova Dios den unidad! (Revelacion 5:13, 14) Kico, anto, ta e proteccion cu e organisacion di Dios ta suministrá awe?

Protehá den e Organisacion di Dios—Con?

7. Den ki manera e organisacion di Dios ta protehá nos?

⁷ E organisacion di Dios por yuda protehá nos contra Satanas i su mañanan. (Efesionan 6:11) Satanas ta pone presion, ta persiguí i ta tenta Jehova su adoradónan cu un solo meta na mente: alehá nan for di ‘e caminda den cua nan mester cana.’ (Isaías 48:17; compará cu Mateo 4:1-11.) Nos nunca por evitá e atakenan ei completamente den e sistema di cosnan aki. Sin embargo, nos relacion estrecho cu Dios i cu su organisacion ta fortalecé i protehá nos, i ta yuda nos permanecé asina den “e caminda.” Como resultado, nos no ta keda sin mira e cumplimentu di nos speransa.

8. Con e organisacion invisibel di Jehova ta apoyá su sirbidónan terenal?

⁸ Con e organisacion di Dios ta duna e proteccion aki? Na promé lugá, nos tin e apoyo infalibel di Jehova su sirbidónan spiritual. Ora Jesus tabata bou di presion intenso, un angel a dun’é yudansa. (Lucas 22:43) Ora Pedro tabata bou di menasa di morto, un angel a salb’é milagrosamente. (Echonan 12:6-11) Aunke milagernan asina no ta pasa mas awe, e pueblo di Jehova por conta cu apoyo di angel den nan actividad di predicá. (Revelacion 14:6, 7) Hopi bes, ora nan ta enfrentá situacionnan difícil, nan ta haña fortalesa mas ayá cu loke ta normal. (2 Corintionan 4:7) Ademas, nan ta conciente cu “e angel di Jehova ta stacioná tur rond di esnan cu ta tem’é, i e ta rescatá nan.”—Salmo 34:7.

9, 10. Den ki sentido “e nomber di Jehova ta un toren fuerte,” i con e principio aki ta aplicá n’e organisacion di Dios como un totalidad?

⁹ Jehova su organisacion visibel ta un proteccion tambe. Con asina? Na Proverbionan 18:10, nos ta lesa: “E nomber di Jehova ta un toren fuerte. Den dje e hustu ta core drenta i ta ser duná proteccion.” Esaki no kier men cu djis ripití e nomber di Dios ta duna proteccion. Mas bien, tuma refugio den e nomber di Dios ta nificá cu nos ta confia den Jehova mes. (Salmo 20:1; 122:4) E ta nificá apoyá su soberania, sostené su ley i principionan, i tene fe den su promesanan. (Salmo 8:1-9; Isaías 50:10; Hebreonan 11:6) E ta encerá duna Jehova debocion exclusivo. Solamente esnan cu ta adorá Jehova den e manera aki por bisa huntu cu e salmista: “Den [Jehova] nos curason ta alegrá; pasobra den su nomber santu nos a cifra nos confiansa.”—Salmo 33:21; 124:8.

¹⁰ Awor tur persona den e organisacion visibel di Dios ta bisa huntu cu Mikéas: “Nos, di nos parti, lo cana den e nomber di Jehova nos Dios te na tempu indefiní, asta pa semper.” (Mikéas 4:5) E núcleo dje organisacion di tempu moderno ta “e Israel di Dios,” cu den Bijbel ta ser yamá “un pueblo pa su nomber.” (Galationan 6:16; Echonan 15:14; Isaías 43:6, 7; 1 Pedro 2:17) P’esei, ser parti dje organisacion di Jehova ta nificá ser parti di un pueblo cu ta busca i ricibí proteccion den e nomber di Dios.

11. Den ki maneranan specífico e organisacion di Jehova ta duna proteccion na esnan cu ta parti di dje?

¹¹ Ademas, e organisacion visibel di Dios ta un comunidad di fe, un asociacion di compañeronan creyente cu ta fortalecé i animá otro. (Proverbionan 13:20; Romanonan 1:12) E ta un lugá caminda wardadónan cristian ta cuida e carnénan, ta animá esnan enfermo i deprimí, i ta busca pa restorá esnan cu a cai. (Isaías 32:1, 2; 1 Pedro 5:2-4) “E esclabo fiel i discreto” ta percurá “alimento n’e debido tempu” mediante tal organisacion. (Mateo 24:45) E “esclabo” ei cu ta consistí di cristiannan ungí, ta percurá e mihó cosnan spiritual: conocimentu exacto basá riba Bijbel cu por hiba na bida eterno. (Juan 17:3) Danki n’e guia for dje “esclabo,” cristiannan ta ser yudá pa mantené normanan moral haltu i pa ta “cauteloso manera colebra i tog inocente manera palomba” den e ambiente peligroso cu ta rondoná nan. (Mateo 10:16) I nan ta ser yudá pa semper nan tin “hopi di haci den e trabou di Señor,” cu riba su mes ta un proteccion poderoso.—1 Corintionan 15:58.

Ken Ta Parti dje Organisacion di Dios?

12. Ken ta ser identificá como parti dje organisacion celestial di Dios?

¹² Siendo cu e proteccion aki ta disponibel pa esnan cu ta parti dje organisacion di Dios, ken ta incluí den esaki? Pa loke ta e organisacion celestial, no tin duda tocante e contesta riba e pregunta aki. Satanas i su angelnan no ta den shelu mas. Di otro banda, e angelnan fiel sí t’ei ainda “den asamblea general.” Apostel Juan a mira cu durante e último dianan, “e Lamchi,” e kerubinnan (“e cuater criaturanan bibiente”), i “hopi angel” lo ta masha cerca dje trono di Dios. E 24 ancianonan, cu ta representá e cristiannan ungí cu a drenta caba den nan glorioso herencia celestial, lo ta huntu cu nan. (Hebreonan 12:22, 23; Revelacion 5:6, 11; 12:7-12) Sin duda, tur ta parti dje organisacion di Dios. Sin embargo, pa loke ta sernan humano, cos no ta asina simpel.

13. Con Jesus a identificá esnan cu ta parti dje organisacion di Dios i esnan cu no ta?

¹³ Jesus a bisa di algun cu lo a pretendé di siguié: “Hopi lo bisá mi den e dia ei: ‘Señor, Señor, nos no a profetisá den bo nomber, i a expulsá demoñonan den bo nomber, i a ehecutá hopi obra poderoso den bo nomber?’ I sin embargo, e ora ei lo mi confesá na nan: Nunca mi a conocé boso! Bai for di mi, boso, hacidónan di maldad.” (Mateo 7:22, 23) Si un hende ta un hacidó di maldad, sigur e no ta parti dje organisacion di Dios, ni maske kico e pretendé, ni maske unda e acudí pa adorá Dios. Tambe, Jesus a mustra con pa identificá un hende cu sí ta parti dje organisacion di Dios. El a bisa: “No ta tur hende cu ta bisá mi: ‘Señor, Señor,’ lo drenta e reino di shelu, sino esun cu ta haci e boluntad di mi Tata cu ta den shelu.”—Mateo 7:21.

14. Ki aspectonan dje boluntad di Dios ta obligatorio pa esnan cu ta parti dje organisacion di Dios?

¹⁴ P’esei, pa ser parti dje organisacion di Dios—di cua “e reino di shelu” ta e parti central—bo mester ta haciendo e boluntad di Dios. Kico ta su boluntad? Pablo a identificá un aspecto primordial di dje ora el a bisa: “[Dios] su boluntad ta pa tur clase di hende ser salbá i yega na un conocimentu exacto dje berdad.” (1 Timoteo 2:4) Si un persona di berdad ta busca pa gana conocimentu exacto for di Bijbel, pa aplik’é den su bida, i pa plam’é na “tur clase di hende,” e ta haciendo e boluntad di Dios. (Mateo 28:19, 20; Romanonan 10:13-15) Tambe, ta Dios su boluntad p’e carnénan di Jehova ser alimentá i cuidá. (Juan 21:15-17) Reunionnan cristian ta hunga un parti vital den esaki. Un persona cu ta liber pa asistí na reunionnan asina pero cu ta neglishá di haci esei ta falta aprecio pa su lugá den e organisacion di Dios.—Hebreonan 10:23-25.

Amistad cu Mundu

15. Ki spiertamentu Santiago a duna congregacionnan di su tempu?

¹⁵ Rond di 30 aña despues cu Jesus a muri, su mitar ruman Santiago a identificá algun factor cu por pone nos lugá den e organisacion di Dios na peliger. El a skirbi: “Adúlteronan, boso no sa cu amistad cu mundu ta enemistad cu Dios? P’esei, ken cu ta deseá di ser amigu di mundu ta haci su mes enemigu di Dios.” (Santiago 4:4) Un enemigu di Dios sigur no ta parti di su organisacion. Kico, anto, ta amistad cu mundu? Esei a ser splicá como algu cu tin diferente forma, manera cultivá of mete cu mal asociacion. Ademas, Santiago a enfocá riba algu masha specífico—actitud mental incorecto cu ta hiba na conducta inapropiado.

16. Kico tabata e contexto di Santiago su spiertamentu cu amistad cu mundu ta enemistad cu Dios?

¹⁶ Na Santiago 4:1-3, nos ta lesa: “Di ki fuente tin guera i di ki fuente tin pelea den boso? Nan no ta dje fuente aki, esta, di boso deseo fuerte pa placer sensual cu ta na conflicto den boso miembronan? Boso ta deseá, i tog boso no tin. Boso ta sigui mata i cudishá, i tog boso no por obtené. Boso ta sigui bringa i haci guera. Boso no tin, pasobra boso no ta pidi. Boso ta pidi sí, i tog boso no ta ricibí, pasobra boso ta pidi cu un mal propósito, pa boso gast’é riba boso deseo fuerte pa placer sensual.” Ta despues di a skirbi e palabranan aki Santiago a spierta contra amistad cu mundu.

17. Den ki manera tabatin “guera” i “pelea” den e congregacion cristian di promé siglo?

¹⁷ Siglonan despues cu Santiago a muri, cristiannan falsu a hiba guera contra otro i a mata otro den un sentido literal. Sin embargo, Santiago tabata skirbiendo n’e miembronan di “e Israel di Dios” di promé siglo, e prospecto ‘sacerdote i reynan’ celestial. (Revelacion 20:6) Nan no a asesiná otro of mata otro den gueranan literal. Pues, pakico Santiago a papia di cosnan asina entre cristiannan? Wel, apostel Juan a yama tur hende cu ta odia su ruman un matadó. I Pablo a papia di conflictonan di personalidad i rivalidad den e congregacionnan como “pelea” i “pleitu.” (Tito 3:9; 2 Timoteo 2:14; 1 Juan 3:15-17) Den e mésun sentido aki, ta parce cu Santiago tabata refiriendo na un falta di amor pa compañeronan cristian. Entre nan mes, cristiannan tabata actua den un manera cu tabata parce e moda cu esnan den mundu sa trata cu otro hopi bes.

18. Kico por causa accionnan i sintimentu cu ta falta amor entre cristiannan?

¹⁸ Pakico e cosnan ei a pasa den congregacionnan cristian? Pa motibu di mal actitud, manera cudishi i “deseo fuerte pa placer sensual.” Orguyo, yaluzí i ambicion tambe por desbaratá e compañerismo cristian amoroso den un congregacion. (Santiago 3:6, 14) Actitudnan asina ta haci hende amigu di mundu i, p’esei, enemigu di Dios. Ningun hende cu ta cana rond cu actitudnan asina por spera di keda parti dje organisacion di Dios.

19. (a) Ken ta principalmente culpabel si un cristian ripará cu pensamentu incorecto ta cuminsá saca rais den su curason? (b) Con un cristian por vence pensamentu incorecto?

¹⁹ Ken nos por culpa si nos ripará cu pensamentu incorecto ta cuminsá saca rais den nos curason? Satanas? Na un cierto grado, sí. E ta “e gobernante dje autoridad di laira” dje mundu aki, den cua actitudnan asina ta reina tur caminda. (Efesionan 2:1, 2; Tito 2:12) Pero, por lo general, raisnan di pensamentu incorecto ta sinta den nos mes carni imperfecto. Despues cu Santiago a spierta contra amistad cu mundu, el a skirbi: “Ta parce boso cu e scritura ta bisa por nada: ‘Ta cu un tendencia pa cu envidia cu e spiritu cu a establecé residencia den nos ta sigui anhelá’?” (Santiago 4:5) Nos tur tin un tendencia inherente di haci malu. (Génesis 8:21; Romanonan 7:18-20) Pero, nos por combatí e tendencia ei si nos admití nos debilidadnan i dependé riba e yudansa di Jehova pa vence nan. Santiago ta bisa: “E bondad inmerecí cu [Dios] ta duna ta mas grandi [cu nos tendencia inherente pa cu envidia].” (Santiago 4:6) Danki n’e yudansa dje spiritu santu di Dios i n’e apoyo di fiel rumannan cristian, i pa medio dje mérito dje sacrificio di rescate di Cristo, cristiannan fiel no ta laga debilidadnan di carni vence nan. (Romanonan 7:24, 25) Nan ta protehá den e organisacion di Dios. Nan ta amigu di Dios i no di mundu.

20. Ki bendicionnan ricu esnan cu ta parti dje organisacion di Dios ta disfrutá di dje?

²⁰ Bijbel ta primintí: “Jehova mes en berdad lo duna fortalesa na su pueblo. Jehova mes lo bendicioná su pueblo cu pas.” (Salmo 29:11) Si di berdad nos ta parti di Jehova su “nacion” di tempu moderno, su organisacion visibel, nos tambe lo ricibí e forsa cu e ta duna i disfrutá dje pas cu cua e ta bendicioná su pueblo. Berdad, e mundu di Satanas ta muchu mas grandi cu e organisacion visibel di Jehova, i Satanas ta muchu mas fuerte cu nos. Pero Jehova ta e Todopoderoso. Su forsa activo ta invencibel. Su angelnan poderoso tambe ta uní cu nos den sirbi Dios. Pues, apesar dje odio cu nos ta enfrentá, nos por para firme. Mescos cu Jesus, nos por vence mundu.—Juan 16:33; 1 Juan 4:4.

Bo Por Splica?

◻ Kico e organisacion visibel di Dios ta?

◻ Den ki maneranan e organisacion di Dios ta duna proteccion?

◻ Ken ta forma parti dje organisacion di Dios?

◻ Con nos por evitá di ta amigu di mundu?

[Kuadro na página 9]

Kico Ta e Organisacion di Dios?

Den literatura di Testigonan di Jehova, e expresion “organisacion di Dios” ta ser usá den tres manera.

1 Jehova su organisacion celestial invisibel consistiendo di fiel criaturanan spiritual. Bijbel ta yama esaki “Jerusalem djariba.”—Galationan 4:26.

2 Jehova su organisacion visibel di hende. Awe, esaki ta consistí dje resto ungí huntu cu e multitud grandi.

3 Jehova su organisacion universal. Awe, esaki ta consistí di Jehova su organisacion celestial huntu cu su yunan adoptá i ungí riba tera, kendenan tin un speransa spiritual. Cu tempu, lo e incluí hende perfecto riba tera tambe.

[Plachi na página 10]

Alimento spiritual di calidad haltu ta ser suministrá mediante e organisacion di Jehova