“Haci Oracion un pa Otro”

JEHOVA DIOS ta e “Scuchador di oracion.” (Salmo 65:2) E semper ta tende oracion di hende cu ta dedicá na dje cu tur nan curazón, i nos por keda sigur cu e ta scucha ora nan ta haci oracion un pa otro.

Pero, pakico haci oracion un pa otro? Oracion asina mester ta hací tocante kico? I cua calidad divino ta ser intensificá ora nos ta haci oracion un pa otro?

Pakico Haci Oracion un pa Otro?

E Scritura ta conseha e pueblo di Jehova Dios pa haci oracion un pa otro. Oracion pa otro tabata den peticion cu Pablo a haci na Dios. (Colosense 1:3; 2 Tesalonicense 1:11) Además, disípel Santiago a skirbi: “Haci oracion un pa otro.”—Santiago 5:16.

Oracion pa otro sirbidor di Dios ta efectivo. Esei ta ser mustrá den Santiago 5:13-18, unda un hende cristian spiritualmente enfermo ta ser urgí pa laga anciano dje congregacion “haci oracion riba dje i hunté cu azeta den e nomber di Jehova.” Ora hende afligí ta tende nan oracion, esei por fortalecénan i convencénan cu Dios lo scucha nan mes oracion també. (Salmo 23:5; 34:18) Además di reza cu e persona, anciano ta purba di restora su salud spiritual, expresando pensamento bíblico cu ta manera azeta suavizador.

Santiago a agrega: “E oracion di fe por sana esun enfermo, i Jehova lo lanté.” Sí, “oracion di fe” di anciano probablemente por yuda e persona spiritualmente enfermo. Además, Dios lo “lanté” na salud spiritual si e ta dispuesto di laga e Scritura yudé. Pero, con ta para si e enfermedad spiritual ta e resultado di picá serio? Wel, si e persona ta arrepentí, Jehova lo pordoné.

Santiago a bisa: “Confesa abiertamente boso picánan un cu otro i haci oracion un pa otro, pa boso ser saná. Súplica di hende husto, ora e ta na accion, tin hopi forza. Elías . . . a pidi pe no yobe; i e no a yobe riba tera pa tres aña i seis luna. I el a bolbe reza, i cielo a duna yobida i e tera a produci su fruta.” (1 Rey 17:1-7; 18:1, 42-45) Tin poder den e oracion di hende husto cu ta na armonía cu e boluntad di Dios.—1 Juan 5:14, 15.

Pidi Kico?

Cualkier asunto por ta e tópico di nos oracion pa otro hende creyente. Por ehempel, Pablo a pidi otro hende haci oracion pe por tin e capacidad di papia e bon nobo. (Efesio 6:17-20) Con ta para si nos sa cu un persona ta ser tentá? Nos por reza pe ‘no haci nada malu’ i pa Dios no bandoné den tentacion sino libré dje malbado, Satanás e Diabel. (2 Corintio 13:7; Mateo 6:13) I si un persona ta físicamente enfermo, nos por pidi Jehova Dios duné e fortaleza necesario pe wanta su enfermedad.—Salmo 41:1-3.

Semper ta correcto pa haci oracion pa otro adorador di Jehova Dios cu ta bao di persecucion. Pablo i socio di dje a sufri di persecucion intenso, i el a bisa cristian corintio: “Boso també por yuda e progreso cu boso súplica pa nos, afin cu hopi por duna agradicimento na fabor di nos pa loke ta ser duná na nos bondadosamente debí na hopi cara hizá ariba den oracion pa nos.” (2 Corintio 1:8-11; 11:23-27) Aunque nos ta encarcelá, nos por haci oracion pa otro rumanan persigí, semper cordando cu Jehova Dios ta tende “oracion di hende husto.”—Proverbio 15:29.

Nos mester reza specialmente pa nos rumanan cu ta acepta responsabilidad grandi den e organizacion di Jehova Dios. Esei ta inclui esnan cu ta dirigi e organizacion i ta prepara alimento spiritual cu e “sclabo fiel i prudente” ta comparti. (Mateo 24:45-47) Por ehempel, miembro dje Cuerpo Gobernante di Testigo di Jehova ta merece nos oracion, i nos por pidi Dios dúnanan “un spiritu di sabiduría.”—Efesio 1:16, 17.

Calidad Cristian Mehorá

Cu nos oracion hací pa otro hende creyente, nos ta mustra cu nos ta interesá, inegoísta, i amoroso. Interés inegoísta i amoroso pa nos rumanan spiritual ta armonizá cu e punto di Pablo di cu amor “no ta busca su mes interés.” (1 Corintio 13:4, 5) Oracion pa otronan ta un manera pa nos no sigi “vigilando cu interés personal boso mes asuntonan so, sino també cu interés personal den asunto dje otronan.” (Filipense 2:4) Ora nos ta haci e bienestar spiritual di otronan nos interés i nos ta mencioné den oracion, nos també ta haya cu nos ta hala mas cerca nan den e amor fraternal cu ta indentifica disípel di Jesús.—Juan 13:34, 35.

E calidad di compasion ta ser desaroya pa cu esnan pa locual nos ta reza. (1 Pedro 3:8) Nos tin simpatía pa nan, i ta participa den nan interés i angustia. Den e curpa humano, si un man tin herida, e otro man ta cuidé i ta purba di alivia e sufrimento cu e herida ta causa. (Compara cu 1 Corintio 12:12, 26.) Di igual manera, oracion hací pa rumanan den sufrimento ta desaroya nos compasion pa nan i ta yúdanos ténenan presente. Nos ta perde si nos ta neglisha otro hende cristian fiel den nos oracion, pasobra Dios i Cristo no ta bandonánan.—1 Pedro 5:6, 7.

Varios calidad divino ta intensificá ora nos ta haci oracion pa otronan. Nos ta eherce mas comprendimento i pacenshi pa cu nan. E raíz di amargura posiblemente ta ser rancá, permitiendo lugar pa pensamento edificante cu ta hácinos amoroso i gozoso. Oracion pa otro hende també ta promove paz i unidad den e pueblo di Jehova Dios.—2 Corintio 9:13, 14.

Sigi Haci Oracion un pa Otro

Mescos cu Pablo, nos por pidi otro hende haci oracion pa nos. Además di haci oracion hunto cu nos, nos amigonan den privá por haci oracion na Dios pa nos, mencionando nos nomber i problema, i pidi Dios yúdanos. I yudanza lo bini, pasobra “Jehova sa con pa libra hende di debocion piadosa for di prueba.”—2 Pedro 2:9.

Testigo di Jehova cu ta mencionános den nan oracion també tin dificultad—posiblemente pior cu loke nos mes tin. Sin embargo, nan ta hiba nos interésnan dilanti dje Rey di Eternidad, kizás asta dramando lágrima pa nos. (Compara cu 2 Corintio 2:4; 2 Timoteo 1:3, 4.) Ki agradicido nos mester keda p’sei! Pues, cu aprecio i pa otro motibo cu nos a caba di considerá, láganos haci oracion un pa otro.