E Punto di Bista Bíblico

Celebracionnan di Carnaval—Bon of Malu?

SEGUN Michael, “Bo simplemente no por resistí. E música ta lantá bo for di bo stul, ta move bo pia, ta yena bo cabes—bo tin e keintura di carnaval!” En berdad, tur aña carnaval ta un ocasion excitante pa miyones di hende rond di mundu, pero no tin excitacion na ningun parti manera esei den e pais unda Michael ta biba, esta, Brazil. Durante e siman promé cu diarason di shinishi, Brazil ta bistí na moda extravagante, ta lubidá obligacion i compromiso, i ta cuminsá un celebracion cu ta sagudí e pais for di selva tropical di Amazona te na e playanan di Rio de Janeiro. Ta ora pa canta, baila, i lubidá.

“Esei ta un motibu pakico e ta asina popular,” segun Michael, kende na ántes tabata un celebrador ardiente di carnaval pa hopi aña. “Carnaval ta duna hende e oportunidad di lubidá nan miseria.” I specialmente pa miyones di hende pober—cu tin cu biba sin suficiente awa, sin coriente, sin empleo, i sin speransa—tin basta cos pa lubidá. Pa nan, carnaval ta manera aspirin: tal bes e no ta cura problema, pero por lo ménos e ta doof e dolor. Ademas, considerá e punto di bista di carnaval di algun clero católico romano—un obispu a bisa cu carnaval ta “mashá útil p’e balansa sicológico di hende.” Pues, ta fácil pa mira pakico hopi hende ta kere cu carnaval ta un distraicion útil i cu tin e aprobacion dje iglesia. Pero, cua punto di bista Bijbel tin di celebracionnan di carnaval?

Gosamentu of Paranda?

E Palabra di Dios ta bisa cu tin “un tempu pa hari . . . i un tempu pa dal salto.” (Eclesiástes 3:4) Siendo cu e palabra hebreo pa “hari” por ta traducí tambe como “celebrá,” ta keda bisto cu asina leu cu e ta toca nos Creador, no tin nada malu den pasamentu di un ratu agradabel i saludabel. (Mira 1 Samuel 18:6, 7.) Realmente, e Palabra di Dios ta bisa nos pa alegrá i gosa. (Eclesiástes 3:22; 9:7) Pues, Bijbel ta aprobá di gosamentu apropiado.

Sin embargo, Bijbel no ta aprobá di tur sorto di gosamentu. Apostel Pablo a bisa cu paranda, of gosamentu ruidoso, ta pertenecé na “obra di carni” i cu practicantenan di paranda lo “no heredá e reino di Dios.” (Galationan 5:19-21) P’esei, Pablo a consehá hende cristian pa “cana decentemente, no den paranda.” (Romanonan 13:13) Pues, e pregunta ta, Carnaval ta cai den cua categoria—gosamentu inofensivo of paranda desenfrená? Pa contestá, laga nos duna mas splicacion promé na loke Bijbel ta considerá como paranda.

E palabra “paranda,” of koʹmos na griego ta ser usá tres bes den e Scritura Griego Cristian, semper den un sentido desfaborabel. (Romanonan 13:13; Galationan 5:21; 1 Pedro 4:3) I no ta straño pasobra koʹmos a nace for di celebracionnan baho bon conocí pa cristiannan di promé di abla griego. Cua celebracionnan?

Historiador Will Durant a splica: “Un grupo di hende hibando un imágen sagrado dje miembro sexual di homber i cantando cantica pa Dionisio . . . a componé, na idioma griego, un komos, of paranda.” Dionisio, e dios di biña den mitologia griego, a ser adoptá despues dor dje romanonan, cu a dun’é e nomber nobo di Baco. Pero, e nomber nobo no a cambia e relacion di koʹmos cu paranda. Escolástico bíblico Dr. James Macknight a skirbi: ‘E palabra koʹmois [un forma plural di koʹmos] ta bini di Comus, e dios di fiesta i paranda. E paranda aki a ser celebrá na onor di Baco, cu p’e motibu ei a ser yamá Comastes.’ Sí, celebracionnan pa Dionisio i Baco tabata e personificacion mes di paranda. Cua tabata algun rasgo di e fiestanan aki?

Detaye di Paranda

Durante e fiestanan griego na onor di Dionisio, segun Durant, multitud di celebradornan “a bebe desenfrenadamente, i . . . a considerá bobo ken cu no a bebe burachi. Nan a marcha den procesion salbahe, . . . i miéntras cu nan a bebe i a baila nan a cai den un excitacion den locual nan a kita tur freno.” Di igual manera, fiestanan romano onrando Baco (yamá bacanal) a enfatisá bebementu i cantica i música inmoral i tabata ocasion di “accion mashá desonrabel,” segun Macknight. Asina, multitudnan excitá, hopi bebementu, música i bailamentu sexual, i relacion sexual inmoral a forma e ingredientenan básico di paranda griego i romano.

Carnaval djawe ta contené e ingredientenan aki pa producí paranda? Considerá algun palabra di informe di noticia tocante celebracionnan di carnaval: “Multitud extremamente ruidoso.” “Un paranda di cuater dia di bebementu i celebracion henter anochi.” “E wayaba di carnaval por dura pa vários dia pa algun parandero.” “E presentacionnan di gruponan di ‘heavy metal’ ta nada compará cu e zonido cu casi ta haci hende surdu.” “Awe, cualkier celebracion di carnaval sin homosexual ta manera un steak au poivre pero sin e peper.” “Carnaval a bira sinónimo cu desnudes completo.” Bailamentu carnavalesco ta presentá “esena di masturbacion . . . i vários forma di relacion sex[ual].”

Realmente, e semehansa entre carnaval djawe i e fiestanan di antigwedad ta asina parecido di otro cu un parandero di Baco casi no por kere cu el a bai drumi den morto si e lanta den un fiesta di carnaval den e dia djawe. I esei no mester sorprendé nos, segun Cláudio Petraglia, un productor di television brazilero, pasobra el a bisa cu carnaval djawe “a originá dje fiestanan di Dionisio i Baco i esei, realmente, ta e caracter di carnaval.” The New Encyclopædia Britannica ta bisa cu carnaval por ta relacioná cu e fiesta pagano di Saturnalia di Roma di antigua. Pues, carnaval, aunke e ta pertenecé na un otro época, e ta miembro dje mésun famia di su antepasado. I con yama e famia? Paranda.

Ki efecto e conocimentu aki mester tin riba hende cristian awe? E mésun efecto cu e tabatin riba hende cristian di promé bibando den provincia di Asia Menor bou di influencia di Grecia. Promé cu nan a bira hende cristian, nan a participá “den echo di conducta inmoral, apetit sexual, demasiado biña, paranda [koʹmois], partido di bebe, i idolatria ilegal.” (1 Pedro 1:1; 4:3, 4) Sin embargo, despues di a siña cu Dios ta considerá paranda como “obra cu ta pertenecé na scuridad,” nan no a sigui participá den celebracionnan parecido di carnaval.—Romanonan 13:12-14.

Michael, mencioná anteriormente, a haci mescos. El a splica pakico: “Miéntras cu mi conocimentu bíblico a aumentá, mi a mira cu celebracionnan di carnaval i principio bíblico ta mescos cu zeta i awa—nan simplemente no ta mescla.” Na 1979, Michael a tuma su decision. El a kita for di celebracionnan di carnaval pa semper. Cua decision lo bo tuma?

[Plachi na página 30]

Poron griego pre-cristian cu Dionisio pintá (figura na man robes)

[Rekonosementu]

Courtesy of The British Museum