Sea ku Sano Huisio Segun Ku e Fin Ta Aserká

¹ E Palabra di Dios bes tras bes ta deskribí ku e dia di Yehova lo bin “meskos ku un ladron,” es desir, diripiente, instantáneamente i ketu-ketu. (1 Tes. 5:⁠2; Mat. 24:⁠43; 2 Ped. 3:⁠10; Rev. 3:⁠3; 16:⁠15) Hesus a bisa: “Pa e motibu aki boso tambe sea prepará, pasobra e Yu di hende lo bin na un ora ku boso no ta pensa.” (Mat. 24:⁠44) Kon nos por mantené nos mes prepará den sentido spiritual segun ku e fin ta aserká? Un manera klave ta ser hañá den e spièrtamentu inspirá: “Sea ku sano huisio.”​—⁠1 Ped. 4:⁠7.

² Sano huisio ta enserá mira kos for di Yehova su punto di bista. (Efe. 5:⁠17) Esaki ta yuda nos mira nos mes manera “peregrinonan i stranheronan” den e sistema di kosnan aki. (1 Ped. 2:⁠11) Tambe e ta yuda nos distinguí loke realmente ta importante, pone prioridat i tuma bon desishon.​—⁠Fil. 1:⁠10, NW.

³ Pone Meta Spiritual: Dor di pone meta spiritual i logra nan, esei ta yuda nos tin sano huisio. Bo tin meta spiritual ku bo ta purba logra aworakí? Bo ta hasi esfuerso pa lesa Beibel tur dia, asistí na tur e reunionnan kristian, lesa kada edishon di E Toren di Vigilansia i Spièrta!, òf kisas oumentá bo partisipashon den sirbishi? Si bo pone meta ku ta apropiá pa bo, ta sigui hasi esfuerso pa logra nan i ta pidi Yehova pa bendishoná bo esfuerso, e resultadonan lo por sorprendé bo.

⁴ Un ansiano a puntra un pareha hóben ta kiko nan metanan spiritual ta. E pregunta a pone nan realisá ku si nan simplifiká nan bida i eliminá debenan ku ta un karga pisá, nan lo por traha pionero. Nan a disidí di pone esei komo nan meta. Diligentemente nan a paga nan debe i a deskubrí maneranan pa baha man na aktividatnan innesesario ku tabata kita nan tempu i energia. Presis un aña despues nan a logra nan meta. Ku ki resultado? E esposo a bisa: “Sin meta nos lo no ta kaminda nos ta awor. Nos ta mas felis. Nos bida ta mas trankil i mihó. E tin berdadero nifikashon i propósito.”

⁵ Segun ku nos ta warda riba e dia di Yehova, mantené nos mes prepará den sentido spiritual dor di biba ku sano huisio, konsentrando riba hasimentu di Dios su boluntat.​—⁠Tito 2:​11-⁠13.