Kapítulo Dos

Halsa Yehova Komo e Úniko Dios Berdadero

1. Ken ta e úniko Dios berdadero?

BEIBEL ta bisa ku ounke hopi persona ta ser mirá komo dios, “tòg pa nos tin ún Dios so, e Tata.” (1 Korintionan 8:5, 6) E ‘solo Dios’ ei ta Yehova, Kreador di tur kos. (Deuteronomio 6:4; Revelashon 4:11) Hesus a referí na dje komo “mi Dios i boso Dios.” (Huan 20:17) E tabata di akuerdo ku Moises, kende mas promé a bisa: “Yehova ta e Dios berdadero; no tin ningun otro fuera di dje.” (Deuteronomio 4:35, NW) Yehova ta hopi mas superior ku kualkier opheto di adorashon, manera por ehèmpel ídolo, hende ku nan ta konsiderá komo dios òf su enemigu Satanas e Diabel, “e dios di e mundu aki.” (2 Korintionan 4:3, 4) Na kontraste ku tur esakinan, Yehova ta, manera Hesus a yam’é, “e úniko Dios berdadero.”—Huan 17:3.

2. Segun ku nos ta siña tokante Dios, ki efekto esei mester tin den nos bida?

² Hende gradisidu ku siña tokante e kualidatnan konmovedor di Dios i tambe tokante loke el a hasi i lo hasi ainda pa nos, ta sinti nan atraí na dje. Segun ku nan amor pa Yehova ta krese, nan ta sinti nan mes impulsá pa hals’é. Kon? Un manera ta dor di konta otro hende tokante dje. Romanonan 10:10 ta deklará: “Ku boka e ta konfesá [hasi deklarashon públiko, NW] pa haña salbashon.” Un otro manera ta dor di imitá Dios ku palabra i echo. Efesionan 5:1 ta bisa: “Sea imitadónan di Dios, manera yunan stimá.” Pa por hasi esei mas kabalmente, nos tin ku konosé Yehova su berdadero kualidatnan.

3. Kua ta e kualidatnan prinsipal di Dios?

³ Den Beibel tin hopi deklarashon ku ta identifiká Dios su kualidatnan sobresaliente. Su kuater kualidatnan prinsipal ta sabiduria, hustisia, poder i amor. “Serka Dios tin sabiduria.” (Job 12:13) “Tur su kamindanan ta hustu.” (Deuteronomio 32:4) E ta “vigoroso den poder.” (Isaías 40:26, NW) “Dios ta amor.” (1 Huan 4:8) Sin embargo, dje kuater kualidatnan prinsipal di Dios, kua ta esun mas sobresaliente, esun ku mas ta indiká ki klase di Dios e ta?

“Dios Ta Amor”

4. Kua dje kualidatnan di Dios a motiv’é pa krea universo i tur kos bibu?

⁴ Pensa kiko lo a motivá Yehova pa krea universo i kriaturanan inteligente, tantu spiritual komo humano. Tabata su sabiduria òf poder? Nò, maske Dios a usa eseinan, nan no tabata loke a motiv’é. I Dios no tabatin nodi kompartí e don di bida pa e ta hustu. Mas bien, ta Dios su gran amor a impuls’é pa kompartí ku otronan e goso di eksistí komo un persona inteligente. Amor a pone ku e tabata kier pa humanidat obediente biba pa semper den Paradeis. (Génesis 1:28; 2:15) Amor a pon’é hasi areglo pa kita e kondenashon ku Adam su piká a trese riba humanidat.

5. Segun Beibel, ki kualidat ta identifiká Yehova, i dikon?

⁵ Pues, di tur e kualidatnan di Dios, esun mas sobresaliente ta su amor. Esei ta su esensia, òf loke ta identifik’é. Pa importante ku su sabiduria, hustisia i poder ta, Beibel nunka ta bisa ku Yehova ta ningun di esakinan. Pero sí e ta bisa ku Dios ta amor. Sí, Yehova ta amor en persona. Esaki ta amor guiá pa prinsipio, no pa emoshon. E prinsipionan di bèrdat i hustisia ta dirigí Dios su amor. Esei ta e forma mas elevá di amor, i Yehova Dios mes ta e ehèmpel típiko di esei. E tipo di amor ei ta un ekspreshon di inegoismo total i semper e ta bai kompañá ku akshonnan ku ta duna evidensia palpabel di dje.

6. Kiko ta hasi posibel ku nos por imitá Dios, maske e ta superior ku nos?

⁶ Ta e maravioso kualidat aki di amor ta hasi posibel ku nos por imitá un Dios asina. Komo hende di kondishon humilde, imperfekto i ku ta inkliná na kometé eror, kisas nos ta pensa ku nunka nos lo por logra imitá Dios. Pero ata un otro ehèmpel di Yehova su gran amor: E sa i ta komprendé nos limitashonnan i no ta eksigí perfekshon for di nos. E sa ku awor akí nos ta leu di ta perfekto. (Salmo 51:5) P’esei Salmo 130:3 i 4 ta bisa: “Si abo, SEÑOR, tuma inikidatnan na kuenta, o Señor, ken lo por a keda para? Ma serka bo tin pordon.” Sí, Yehova ta un “Dios, yen di kompashon i grasia, kende no ta rabia lihé i kende ta abundá den miserikòrdia.” (Éksodo 34:6) “Abo, Señor, ta bon, i kla pa pordoná.” (Salmo 86:5) Esta un konsuelo! Esta refreskante pa sirbi e Dios maravioso aki i sinti su kuido amoroso i miserikòrdioso!

7. Kon nos por mira Yehova su amor den su obranan di kreashon?

⁷ Tambe nos por mira Yehova su amor den su obranan di kreashon. Pensa riba e kantidat di kos bon ku Yehova a perkurá pa nos gosa di dje, por ehèmpel seru, mondi, lago i oséanonan bunita. El a duna nos un asombroso variedat di kuminda pa deleitá nos paladar i pa sisti nos. Ademas, Yehova a perkurá un inmenso variedat di flor bunita i ku ta hole dushi, i tambe e fasinante mundu di animal. El a traha kosnan ku lo a duna hende plaser, maske esei no tabata nesesario. Ta bèrdat ku nos bida den e mundu malbado aki i ku e kondishon imperfekto ku nos ta aden awor, no ta pèrmití nos disfrutá plenamente di su kreashon. (Romanonan 8:22) Pero djis imaginá loke Yehova lo hasi pa nos den Paradeis! E salmista ta sigurá nos: “Bo ta habri bo man, i ta satisfasé e [bon] deseo di tur ser bibu.”—Salmo 145:16.

8. Kua ta e ehèmpel mas sobresaliente di Yehova su amor pa nos?

⁸ Kua ta e ehèmpel mas sobresaliente di Yehova su amor pa humanidat? Beibel ta splika: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Huan 3:16) Tabata debí na hende su bondat ku Yehova a hasi esaki? Romanonan 5:8 ta kontestá: “Dios ta demostrá su mes amor pa ku nos den esaki, ku tempu nos tabata pekador ainda, Kristu a muri pa nos.” Sí, Dios a manda su Yu perfekto na tera pa duna su bida komo un sakrifisio di reskate pa salba nos for di e kondenashon di piká i morto. (Mateo 20:28) Esaki a habri kaminda pa hende ku stima Dios por gana bida eterno. Afortunadamente, Dios su amor ta ekstendé na ken ku kier hasi su boluntat, pasobra Beibel ta bisa nos: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

9. E echo ku Yehova a duna su Yu komo un reskate pa nos, mester tin ki efekto riba nos?

⁹ Siendo ku Yehova a duna su Yu komo un reskate pa nos—habriendo asina e kaminda pa haña bida eterno—ki efekto esei mester tin riba e manera ku nos ta usa nos bida awor? Esei mester profundisá nos amor pa e Dios berdadero, Yehova. Na mesun tempu, esei mester motivá nos pa skucha Hesus, kende ta representá Dios. “[Hesus] a muri pa tur, pa esnan ku ta biba no biba mas pa nan mes, ma pa esun ku a muri” pa nan. (2 Korintionan 5:15) Ta un plaser pa por sigui e pasonan di Hesus, pasobra e tabata ehemplar den imitá Yehova su amor i kompashon. Esaki a keda demostrá den loke Hesus a bisa hende humilde: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.”—Mateo 11:28-30.

Mustrando Amor na Otro Hende

10. Kua ta algun manera ku nos por mustra amor na nos kompañeronan kristian?

¹⁰ Kon nos por mustra ku nos ta stima nos kompañeronan kristian manera Yehova i Hesus ta stima nos? Tuma nota di e kantidat di manera ku nos por mustra esaki: “Amor tin pasenshi, amor ta kariñoso i no ta yalurs; amor no ta gaba, i no ta arogante, e no ta komportá su mes indesente; e no ta buska su propio interes, e no ta wòrdu provoká, e no ta warda renkor, e no ta regosihá den inhustisia, ma ta regosihá den e bèrdat; tur kos e ta tapa, tur kos e ta kere, tur kos e ta spera, tur kos e ta soportá. Amor nunka no ta faya.”—1 Korintionan 13:4-8; 1 Huan 3:14-18; 4:7-12.

11. Na ken mas nos tin ku mustra amor, i kon?

¹¹ Na ken mas nos tin ku mustra amor, i kon? Hesus a bisa: “P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) Esaki ta enserá kompartí e bon notisia di Dios su binidero mundu nobo transformá den un paradeis ku esnan ku ainda no ta nos kompañeronan kristian. Hesus a mustra bon kla ku nos amor no mester ta limitá na esnan ku ta kompartí nos kreensia, pasobra e di: “Si boso stima [solamente] esnan ku ta stima boso, ki rekompensa boso tin? E publikanonan tambe no ta hasi meskos? I si boso kumindá boso rumannan so, kiko boso ta hasi mas ku otronan? E paganonan tambe no ta hasi meskos?”—Mateo 5:46, 47; 24:14; Galationan 6:10.

“Kana den e Nòmber di Yehova”

12. Dikon e nòmber di Dios por apliká na e so?

¹² Un otro aspekto importante di halsa e Dios berdadero ta konosé su nòmber úniko, Yehova, us’é i siñ’é na otro hende. E salmista a ekspresá su deseo sinsero: “Pa nan por sa ku abo so, kende su nòmber ta Yehova, ta e Haltísimo riba henter tera.” (Salmo 83:18, NW; Éksodo 3:14, Beibel na papiamentu koriente [SAB], nota na pia di página) E nòmber Yehova ta nifiká “E Ta Kousa pa Bira.” E ta Esun Magnífiko ku ta establesé su propósitonan i semper ta kumpli ku nan. I ta solamente e Dios berdadero tin derecho di karga e nòmber ei, pasobra hende nunka por ta sigur ku nan esfuersonan lo tin éksito. (Santiago 4:13, 14) Ta Yehova so por bisa ku su palabra ‘lo no bolbe bashí, sin alkansá e propósito ku kual mi a mand’é.’ (Isaías 55:11) Hopi hende ta keda emoshoná ora nan mira Dios su nòmber pa promé bes den nan Beibel i haña sa kiko e ta nifiká. (Éksodo 6:3, NW) Pero nan lo benefisiá dje konosementu aki solamente si nan “kana den e nòmber di [Yehova, NW] . . . pa semper.”—Mikéas 4:5.

13. Kiko ta enserá konosé e nòmber di Yehova i kana den su nòmber?

¹³ Salmo 9:10 ta bisa di e nòmber di Dios: “Esnan ku konosé bo nòmber lo pone nan konfiansa den bo.” Esaki ta enserá mas ku djis sa tokante e nòmber Yehova, pasobra esei no kier men ku outomátikamente un hende ta konfia den dje. Konosé e nòmber di Dios kier men komprendé i apresiá e klase di Dios ku Yehova ta, respetá su outoridat, obedesé su mandamentunan, konfi’é den tur kos. (Proverbionan 3:5, 6) Di igual manera, kana den e nòmber di Yehova ta impliká dediká nos mes na dje i represent’é komo un di su adoradónan, i ègt usa nos bida na armonia ku e boluntat di Dios. (Lukas 10:27) Bo ta hasiendo esei?

14. Si nos kier sirbi Yehova pa semper, kiko nos mester tin fuera di un sentido di obligashon?

¹⁴ Si nos kier sirbi Yehova pa eternidat, no ta simplemente un sentido di obligashon mester impulsá nos. Apòstel Pablo a animá Timoteo, kende tabatin hopi aña ta sirbi Yehova: “Entrená bo mes ku deboshon na Dios komo bo meta.” (1 Timoteo 4:7, NW) Deboshon ta sali di un kurason yen di gratitut p’e persona na ken bo ta dirigí bo deboshon. “Deboshon na Dios” ta ekspresá un onor i rèspèt profundo pa Yehova personalmente. E ta manifestá un laso tierno ku Yehova debí n’e enorme apresio ku nos tin p’e i pa su normanan. Esei ta pone ku nos kier pa tur hende respetá su nòmber. Nos tin ku kultivá deboshon pa Dios den nos bida si nos kier kana pa semper den e nòmber di Yehova, e úniko Dios berdadero.—Salmo 37:4; 2 Pedro 3:11.

15. Kon nos por duna Dios nos deboshon eksklusivo?

¹⁵ Pa sirbi Dios aseptablemente, nos tin ku dun’é adorashon eksklusivo, ya ku e ta “un Dios ku ta eksigí deboshon eksklusivo.” (Éksodo 20:5, NW) Nos no por stima Dios i na mesun tempu stima e mundu malbado aki, ku tin Satanas komo su dios. (Santiago 4:4; 1 Huan 2:15-17) Yehova sa presis ki klase di persona kada un di nos ta purba di ta. (Yeremías 17:10) Si di bèrdat nos stima hustisia, e ta mira esei i lo e yuda nos soportá nos pruebanan diario. Lo e respaldá nos ku su poderoso spiritu santu i asina hasi posibel pa nos triunfá riba e maldat ku ta reina den e mundu aki. (2 Korintionan 4:7) Tambe lo e yuda nos keda ku nos speransa firme di bida eterno riba un tera kombertí den un paradeis. Ki un speransa glorioso esei ta! Nos mester ta profundamente gradisidu pa esei i sirbi Yehova—e Dios berdadero ku a hasié posibel—di buena gana.

16. Kiko lo bo mester tin gana di hasi huntu ku miónes di otro hende?

¹⁶ Miónes di hende rònt mundu gustosamente a aseptá e invitashon dje salmista ku a skirbi: “O engrandesé SEÑOR ku mi, i laga nos halsa su nòmber huntu.” (Salmo 34:3) Yehova ta invitá bo pa ta entre e kresiente multitut den tur nashon ku ta engrandes’é i hals’é.

Komo Repaso

• Ki klase di persona Yehova ta? Kon un komprendementu kla di su kualidatnan ta benefisiá nos?

• Kon nos por yuda otro hende haña sa e bèrdat tokante Dios?

• Kiko ta enserá konosé Yehova su nòmber i kana den su nòmber?

[Plachi na página 14]

Yehova, den su gran amor, ‘lo habri su man i satisfasé e deseo di tur ser bibu’