“Riba Tur Kos, Keda Ferviente den Boso Amor pa Otro”

“Fin di tur kos ta serka. . . . Riba tur kos, keda ferviente den boso amor pa otro.”—1 PEDRO 4:7, 8.

HESUS tabata sa ku su último oranan huntu ku su apòstelnan tabata presioso. E tabata sa kiko ta spera nan. Nan tabatin un trabou grandi pa hasi, pero hende lo a odia nan i persiguí nan, meskos ku nan a hasi ku Hesus. (Juan 15:18-20) Mas ku un biaha durante e último anochi ei ku nan tabata huntu, el a rekordá nan ku nan mester “stima otro.”—Juan 13:34, 35; 15:12, 13, 17.

² Apòstel Pedro, kende tabata presente e anochi ei, a komprondé e importansia di Hesus su rekordatorio. Añanan despues, den un karta ku Pedro a skirbi djis promé ku e destrukshon di Yerusalèm, el a enfatisá e importansia di amor. El a konsehá kristiannan: “Fin di tur kos ta serka. . . . Riba tur kos, keda ferviente den boso amor pa otro.” (1 Pedro 4:7, 8) Pedro su palabranan ta hopi importante pa hende ku ta biba durante “e último dianan” di e sistema di kosnan aktual. (2 Timoteo 3:1) Kiko ta nifiká ser “ferviente den boso amor”? Dikon ta importante pa nos tin tal amor pa otro hende? I kon nos por demostrá ku nos tiné?

Kiko Ta Nifiká ‘Ser Ferviente den Amor’?

³ Hopi hende ta pensa ku amor ta un sintimentu ku ta bin di mes. Pero Pedro no tabata papia simplemente tokante kualke tipo di amor; e tabata papia di e forma di mas noble di amor. E palabra “amor” na 1 Pedro 4:8 ta un tradukshon di e palabra griego a·gá·pe. E palabra ei ta referí na amor sin egoismo ku ta ser guiá, òf dirigí, dor di prinsipio. Segun un buki di referensia, Beibel por ordená un persona p’e tin e tipo di amor aki pasobra amor agape no ta prinsipalmente un emoshon sino ta un determinashon personal ku ta pon’é aktua na un sierto manera. Komo ku nos a heredá e inklinashon pa ta egoista, nos tin mester di rekordatorio pa mustra amor na otro, i pa hasié den maneranan ku ta basá riba e prinsipionan di Dios.—Génesis 8:21; Romanonan 5:12.

⁴ Esaki no ke men ku nos tin ku stima otro simplemente pasobra e ta nos deber. A·gá·pe no ta un amor sin kalor humano i sintimentu. Pedro a bisa ku nos mester keda ‘ferviente den nos amor pa otro’ (literalmente, “tene pa otro un amor ku ta ekstendé òf rèk,” Kingdom Interlinear).a Sin embargo, tal amor ta rekerí esfuerso. Relashoná ku e palabra griego tradusí “ferviente,” un erudito a bisa: “E ta transmití e imágen di un atleta ku na final di un kareda ta ekstendé òf rèk su múskulonan tur ku tin p’e saka su último gota di forsa ku a rest’é.”

⁵ Pues, nos amor no mester ta limitá na hasi solamente loke ta fásil ni limitá na un grupito. Amor kristian ta rekerí pa nos “ekstendé” òf rèk nos kurason, demostrando amor asta ora esei kisas ta difísil pa hasi. (2 Korintionan 6:11-13) Mas ku klaru, e tipo di amor aki ta algu ku nos tin ku kultivá i traha ariba, meskos ku un atleta tin ku train i traha pa mehorá su abilidatnan. Ta di sumo importansia pa nos tin tal amor pa otro. Dikon? Tin por lo ménos tres motibu.

Dikon Nos Mester Stima Otro?

⁶ Na promé lugá, “pasobra amor ta bin di Dios.” (1 Juan 4:7) Yehova, e Fuente di e kualidat atraktivo aki, a stima nos promé. Apòstel Juan a bisa: “Pa medio di esaki e amor di Dios a wòrdu manifestá den nos, ku Dios a manda su Yu unigénito den mundu pa nos por a biba pa medio di dje.” (1 Juan 4:9) Dios su Yu a ser ‘mandá’ dor di bira un kriatura humano, kumpli ku su sirbishi i muri na un staka di tormento; tur esei pa asina nos por haña bida. Kon nos mester reakshoná riba e ekspreshon supremo aki di Dios su amor? Juan a bisa: “Si Dios a stima nos asina tantu, nos tambe mester stima otro.” (1 Juan 4:11) Tuma nota ku Juan a skirbi: “Si Dios a stima nos asina tantu,” no simplemente abo sino nos. E punto ta bon kla: Si Dios ta stima nos kompañeronan den fe, anto nos tambe mester stima nan.

⁷ Na di dos lugá, awor ta spesialmente importante pa nos stima otro mas tantu, ya asina nos por yuda nos rumannan den nesesidat pasobra “fin di tur kos ta serka.” (1 Pedro 4:7) Nos ta bibando den “tempunan trabahoso.” (2 Timoteo 3:1) Kondishonnan mundial, desasternan natural i oposishon ta trese hopi sufrimentu riba nos. Bou di sirkunstansianan difísil, nos tin ku hala mas i mas serka otro. Amor ferviente lo uni nos mas tantu i motivá nos pa ‘perkurá pa otro.’—1 Korintionan 12:25, 26.

⁸ Na di tres lugá, nos tin ku stima otro pasobra nos no ke “duna Diabel oportunidat” p’e probechá di nos. (Efesionan 4:27) Satanas ta kla pa usa e imperfekshonnan di nos kompañeronan den fe—nan debilidatnan, faltanan i erornan—komo piedra di trompeká. Nos lo laga un komentario papiá sin pensa òf un akto no muchu amabel pone nos kita pia for di e kongregashon? (Proverbionan 12:18) No si nos ta ferviente den nos amor pa otro! E amor ei ta yuda nos mantené pas i sirbi Dios unidamente “den ún akuerdo.”—Sofonias 3:9.

Kon pa Demostrá Ku Bo Ta Stima Otro

⁹ Mustramentu di amor tin ku kuminsá na kas. Hesus a bisa ku hende lo identifiká su berdadero siguidónan na e amor ku nan tin pa otro. (Juan 13:34, 35) Amor mester ta bisto no solamente den e kongregashon sino tambe den famia: entre kasánan i entre mayornan i yunan. No ta basta pa sinti amor pa miembronan di famia; nos tin ku ekspres’é den maneranan positivo.

¹⁰ Kon kasánan por demostrá amor pa otro? Tuma e esposo. Na loke e ta bisa i hasi—tantu den públiko komo den privá—un esposo ku di bèrdat ta stima su kasá ta laga su esposa sa ku e ta apresi’é. E esposo ta respetá su kasá su dignidat personal i ta tene konsiderashon ku e esposa su pensamentu, su punto di bista i sintimentu. (1 Pedro 3:7) E esposo ta pone bienestar di su esposa promé ku di su mes, i ta hasi tur loke e por pa perkurá pa e esposa su nesesidatnan material, spiritual i emoshonal. (Efesionan 5:25, 28) Anto e esposa ku realmente ta stima su kasá ta respet’é, maske tin biaha e esposo no ta kumpli ku e esposa su ekspektativanan. (Efesionan 5:22, 33) E esposa ta apoyá su esposo i ta sumiso na dje, i no ta bin ku eksigensianan irasonabel, sino mas bien ta koperá ku su esposo pa sigui konsentrá riba asuntunan spiritual.—Génesis 2:18; Mateo 6:33.

¹¹ Mayornan, kon boso por mustra amor pa boso yunan? Un evidensia di boso amor ta e echo ku boso ta dispuesto pa traha duru pa perkurá materialmente pa nan. (1 Timoteo 5:8) Pero yu tin mester di mas ku kuminda, paña i un dak riba nan kabes. Pa nan por lanta ku amor pa e Dios berdadero i sirbié, nan tin mester di edukashon spiritual. (Proverbionan 22:6) Esei ta nifiká traha tempu komo famia pa studia Beibel, pa partisipá den sirbishi di vèlt i pa asistí na reunionnan kristian. (Deuteronomio 6:4-7) Pa boso ta konsistente den e aktividatnan ei ta eksigí basta sakrifisio, spesialmente den e tempu trabahoso aki. Boso interes i boso esfuerso pa perkurá pa e nesesidatnan spiritual di boso yunan ta un ekspreshon di amor, pasobra asina boso ta demostrá ku boso tin nan bienestar eterno na pechu.—Juan 17:3.

¹² Ta masha importante pa mayornan demostrá amor tambe dor di perkurá pa e nesesidatnan emoshonal di nan yunan. Mucha ta vulnerabel; boso mester sigurá nan kurason tierno bes tras bes di boso amor. Bisa nan ku boso stima nan, i duna nan hopi kariño, pasobra tal ekspreshonnan ta sigurá nan ku nan ta digno di risibí amor i ku nan tin balor. Elogiá nan na un manera sinsero i kaluroso, pasobra esei ta laga nan sa ku boso ta mira nan esfuerso i ta balorá esei. Disipliná nan ku amor, pasobra e tipo di korekshon ei ta mustra nan ku boso ta interesá den ki klase di persona nan ta birando. (Efesionan 6:4) Tur e tipo di ekspreshonnan sano ei di amor ta yuda forma un famia felis i hopi uní, un famia ku lo ta mihó prepará pa resistí e preshonnan di e último dianan aki.

¹³ Amor ta motivá nos pa pasa por haltu di e faltanan di otro hende. Kòrda ku ora Pedro a konsehá su lektornan pa “keda ferviente den [nan] amor pa otro,” el a duna e motibu dikon esaki tabata asina importante: “Pasobra amor ta kubri un multitut di piká.” (1 Pedro 4:8) “Kubri” piká no ke men skonde pikánan serio. Ta na su lugá pa raportá pikánan serio na esnan den puesto di responsabilidat den e kongregashon i laga nan atendé esei. (Levítiko 5:1; Proverbionan 29:24, NW) Lo ta un falta grandi di amor—i kontrario na prinsipio bíbliko—pa permití personanan ku ta kometé pikánan grave sigui hasi daño na esnan inosente òf gaña nan.—1 Korintionan 5:9-13.

¹⁴ Den mayoria kaso, e erornan i faltanan di kompañeronan den fe ta kosnan chikí. Nos tur tin biaha ta trompeká den loke nos ta bisa òf hasi, i ta desepshoná òf asta ofendé otro. (Santiago 3:2) Nos mester ta lihé pa laga tur hende sa di otronan su faltanan? Tal proseder solamente lo yuda krea frikshon den e kongregashon. (Efesionan 4:1-3) Si nos ta ser dirigí pa amor, nos lo no “divulgá un falta” di un kompañero den fe. (Salmo 50:20, NW) Meskos ku hende ta pleister un muraya i fèrf e pa kubri su imperfekshonnan, asina amor ta kubri e imperfekshonnan di otro hende.—Proverbionan 17:9.

¹⁵ Amor lo motivá nos pa yuda esnan ku ta den berdadero nesesidat. Segun ku e situashon den e último dianan ta bira mas malu, lo por tin biaha ku nos kompañeronan den fe tin mester di yudansa material òf físiko. (1 Juan 3:17, 18) Por ehèmpel, tin un miembro di nos kongregashon ku a hañ’é den problema ekonómiko serio òf ku a pèrdè trabou? Anto podisé nos por ofres’é un poko yudansa material, segun nos sirkunstansia ta permití. (Proverbionan 3:27, 28; Santiago 2:14-17) Tin kos di drecha na kas di un biuda di edat avansá? Anto podisé nos por tuma e inisiativa apropiá pa yuda ku e trabou.—Santiago 1:27.

¹⁶ Nos mustramentu di amor na otro hende no ta limitá na esnan ku kisas ta biba den nos bisindario. Tin biaha nos por tende di informenan tokante sirbidónan di Dios den otro pais ku a bira víktima di tormenta severo, temblor òf disturbionan sivil. Kisas urgentemente nan tin mester di kuminda, paña i otro artíkulonan. No ta importá si nan ta di un otro rasa òf grupo étniko. Nos “stima henter e asosiashon di rumannan.” (1 Pedro 2:17, NW) Pues anto, meskos ku e kongregashonnan di promé siglo, nos ta ansioso pa sostené trabounan di ousilio ku keda organisá pa duna un man. (Echonan 11:27-30; Romanonan 15:26) Ora nos ta mustra amor den tur e maneranan ei, nos ta hasi e laso ku ta uni nos den e último dianan aki mas fuerte.—Kolosensenan 3:14.

¹⁷ Amor ta motivá nos pa kompartí e bon nobo di e Reino di Dios ku otro hende. Konsiderá e ehèmpel di Hesus. Dikon el a prediká i siña hende? “El a sinti kompashon” pa e multitutnan debí na e kondishon spiritual lamentabel ku nan tabata aden. (Marko 6:34) Nan a ser neglishá i engañá dor di wardadónan religioso falsu ku eigenlijk lo mester a siña nan bèrdatnan spiritual i duna nan speransa. P’esei, motivá pa amor profundo i sinsero i tambe kompashon, Hesus a konsolá e hendenan ku e evangelio òf ‘bon nobo di e reino di Dios.’—Lukas 4:16-21, 43.

¹⁸ Awe tambe tin hopi hende ku spiritualmente a ser neglishá i engañá i ku ta sin speransa. Si nos, meskos ku Hesus, ta konsiente i pendiente di e nesesidatnan spiritual di e hendenan ku ainda no konosé e Dios berdadero, e ora ei amor i kompashon lo motivá nos pa kompartí e bon nobo di e Reino di Dios ku nan. (Mateo 6:9, 10; 24:14) En bista di e tempu kòrtiku ku a resta, ta mas urgente ku nunka pa prediká e mensahe aki ku por salba bida.—1 Timoteo 4:16.

“Fin di Tur Kos Ta Serka”

¹⁹ Kòrda ku Pedro a introdusí su konseho pa stima otro ku e palabranan: “Fin di tur kos ta serka.” (1 Pedro 4:7) Pronto Dios su hustu mundu nobo lo remplasá e mundu malbado aki. (2 Pedro 3:13) Pues anto, awe no ta tempu pa ta despreokupá i satisfecho ku nos mes. Hesus a spièrta nos: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa.”—Lukas 21:34, 35.

²⁰ Di tur manera anto, laga nos keda vigilá i “sea alerta” pa sa na unda nos ta den e koriente di tempu. (Mateo 24:42) Laga nos ta alerta pa kualke tentashon di Satanas ku lo por distraí nos. No permití nunka pa e mundu friu i sin amor aki stroba nos di demostrá amor pa otro hende. Mas ku tur kos, laga nos hala mas i mas serka di e Dios berdadero, Yehova, kende su Reino Mesiániko pronto lo kumpli ku e propósito glorioso ku e tin pa e tera aki.—Revelashon 21:4, 5.

[Nota]

PREGUNTANAN DI STUDIO

• Ki konseho di despedida Hesus tabatin pa su disipelnan, i kiko ta mustra ku Pedro a komprondé e importansia di esei? (Par. 1-2)

• Kiko ta nifiká ‘keda ferviente den amor’? (Par. 3-5)

• Dikon nos mester stima otro? (Par. 6-8)

• Kon bo por demostrá ku bo ta stima otro hende? (Par. 9-18)

• Dikon awor no ta tempu pa ta despreokupá i satisfecho ku nos mes, i kiko nos mester ta determiná pa hasi? (Par. 19-20)

[Plachi na página 29]

Un famia hopi uní ta mihó prepará pa resistí e preshonnan di e último dianan aki

[Plachi na página 30]

Amor ta motivá nos pa yuda esnan ku ta den berdadero nesesidat

[Plachi na página 31]

Kompartí e bon nobo di e Reino di Dios ku otro hende ta un akto di amor