Pregunta di Lector

Promé Juan 4:18 ta bisa nos: “No tin temor den amor, sino amor perfecto ta saca temor afó.” Pero Pedro a skirbi: “Tene amor pa henter e asociacion di ruman, teme Dios.” (1 Pedro 2:17) Con nos por armonisá e dos versículonan aki?

Tantu Pedro como Juan tabata apostelnan cu a siña directamente for di Jesucristo mes. P’esei nos por tin confiansa cu loke nan a skirbi ta armonisá cu otro. Pa loke ta trata e versículonan citá ariba, e clave ta cu e dos apostelnan tabata papiando di diferente clase di temor.

Laga nos considerá promé e conseho di Pedro. Manera e contexto ta mustra, Pedro tabata ofreciendo compañeronan cristian conseho inspirá en cuanto nan actitud pa cu esnan den puesto di autoridad. Cu otro palabra, e tabata comentando riba e punto di bista corecto di sumision den cierto áreanan. P’esei, el a consehá cristiannan pa ta sumiso na hende cu ta den puesto di autoridad den gobiernunan humano, tal como reynan of gobernadornan. (1 Pedro 2:13, 14) Continuando, Pedro a skirbi: “Onra tur clase di hende, tene amor pa henter e asociacion di ruman, teme Dios, duna onor na e e rey.”—1 Pedro 2:17.

Considerando e contexto, ta keda claro cu ora Pedro a bisa cu cristiannan mester “teme Dios,” e tabata kier men cu nos mester tin un respet profundo i reverencial pa Dios, un temor di desagradá e autoridad supremo.—Compará cu Hebreonan 11:7.

Ki tal dje comentario di apostel Juan? Mas promé den 1 Juan capítulo 4, e apostel a trata cu e necesidad di test “expresionnan inspirá” tal como esnan cu ta bini di profetanan falsu. E expresionnan ei siguramente no ta originá cu Jehova Dios; nan ta bini dje mundu malbado of nan ta refleh’é.

Na contraste, cristiannan ungí “ta originá cu Dios.” (1 Juan 4:1-6) Siendo cu esei ta e caso, Juan a insta: “Stimánan, laga nos sigui stima un e otro, pasobra amor ta bini di Dios.” Dios a tuma e iniciativa den demostrá amor—el “a manda su Yu como un sacrificio di reconciliacion pa nos picánan.” (1 Juan 4:7-10) Con nos lo mester respondé?

Claramente, nos mester permanecé den union cu nos Tata amoroso. Nos no mester ta den temor di dje ni tembla na e prospecto di acerk’é den oracion. Mas promé Juan a consehá: “Si nos curason no ta condená nos, nos tin frankesa di expresion dilanti Dios; i kico cu nos pidi nos ta ricibí di dje, pasobra nos ta wardando su mandamentunan.” (1 Juan 3:21, 22) Sí, un bon concenshi ta duna nos frankesa pa acercá Dios sin temor paralisante of cu ta restringuí nos. Motivá pa amor nos ta sinti nos liber pa dirigí nos na Jehova of acerk’é den oracion. Den e aspecto aki, “no tin miedu den amor.”

Laga nos razoná anto riba e dos clasenan di temor. Un cristian semper mester tin un temor reverencial di Jehova, un temor cu ta originá di un respet profundo pa su posicion, poder i husticia. Pero tambe nos ta stima Dios como nos Tata i ta sinti un intimidad cuné i un frankesa pa acerk’é. En bes di ser restringuí dor di cualkier teror p’e, nos ta confia cu nos por acerk’é, mescos cu un mucha ta sinti’é liber pa acercá un mayor amoroso.—Santiago 4:8.