Capitulo 10

E Reino di Dios Ta Goberná

1, 2. Con gobiernonan humano a resultá di ta inadecuá?

KISAS bo tabatin e experencia di a cumpra un aparato, i despues a descubrí cu e no ta funcioná. Laga nos bisa, bo a yama un mecánico. Sin embargo, djis despues cu el a “drecha” e aparato, el a daña. Ki decepcionante esei tabata!

² Ta mescos cu gobiernonan humano. Humanidad semper a deseá un gobierno cu lo a sigurá pas i felicidad. Sin embargo, esfuersonan vigoroso pa drecha e fracasonan den sociedad no a resultá berdaderamente exitoso. Un gran cantidad di tratado di pas a ser cerá—i despues kibrá. Ademas, cua gobierno tabata capas pa caba cu pobresa, prehuicio, crímen, malesa, i ruina ecológico? Gobierno di hende ta ireparabel. Asta Israel su Rey sabí Sálomon a puntra: “En cuanto e homber terenal, con e por dicerní su caminda?”—Proverbionan 20:24.

3. (a) Kico tabata e tema di Jesus su predicacion? (b) Con algun persona ta describí e Reino di Dios?

³ No desesperá! Un gobierno mundial stabil no ta simplemente un soño. Esei tabata e tema di Jesus su predicacion. El a yam’é “e Reino di Dios,” i el a siña su siguidornan pa pidi p’e den oracion. (Lucas 11:2; 21:31) Naturalmente, e Reino di Dios ta ser mencioná algun biaha den círculonan religioso. En realidad, miyones di hende ta resa p’e tur dia ora nan ripití e Oracion di Señor (yamá tambe e Nos Tata of e oracion modelo). Pero hende ta contestá den vários manera ora puntra nan, “Kico ta e Reino di Dios?” Algun ta bisa, “E ta den bo curason.” Otronan ta yam’é cielu. E Bijbel ta duna un contesta claro, manera nos lo mira.

UN REINO CU UN PROPOSITO

4, 5. Pakico Jehova a scoge pa efectuá un manifestacion nobo di su soberania i kico esei lo logra?

⁴ Jehova Dios semper tabata Rey, of Gobernante Soberano, dje universo. E echo cu el a crea tur cos ta elev’é na e posicion halsá ei. (1 Crónicanan 29:11; Salmo 103:19; Echonan 4:24) Pero e Reino cu Jesus a predicá di dje ta subsidiario, of secundario, na e soberania universal di Dios. E Reino Mesiánico ei tin un propósito specífico, pero kico e ta?

⁵ Manera a ser splicá den Capítulo 6, e promé pareha humano a rebeldiá contra e autoridad di Dios. Pa motibu dje cuestionnan cu a lanta, Jehova a scoge pa efectuá un manifestacion nobo di su soberania. Dios a anunciá su propósito pa producí un “simia” cu lo destruí e Colebra, Satanas, i kita e efectonan di humanidad su picá heredá. E “simia” principal ta Jesucristo, i “e reino di Dios” ta e agencia cu lo derotá Satanas completamente. Mediante e Reino aki, Jesucristo lo restorá gobernacion riba tera den e nomber di Jehova i lo vindicá e soberania legítimo di Dios pa semper.—Génesis 3:15; Salmo 2:2-9.

6, 7. (a) Na unda e Reino ta i ken ta e Rey i su gobernantenan socio? (b) Ken ta e súbditonan dje Reino?

⁶ Segun un traduccion di Jesus su palabranan na e fariseonan malbado, el a bisa: “E reino di Dios ta den boso.” (Lucas 17:21, King James Version) Jesus tabata kier men cu e Reino tabata den e curason malbado dje hombernan corupto ei? No. Un traduccion mas exacto dje griego original ta bisa: “E Reino di Dios ta meimei di boso.” (Traducción del Nuevo Mundo). Jesus, kende tabata meimei di nan, pues a referí na su mes como e futuro Rey. Leu di ta algu cu un persona tin den su curason, e Reino di Dios ta un gobierno berdadero i operacional, teniendo un gobernante i súbditonan. E ta un gobierno celestial, pasobra e ta ser yamá tantu “e reino di cielu” como tambe “e reino di Dios.” (Mateo 13:11; Lucas 8:10) Den vision, profeta Daniel a mira e Gobernante dje Reino como “un persona manera un yu di hende” ser trecé dilanti Dios Todopoderoso i a ser duná na dje “gobernacion i dignidad i reino” duradero, “pa e pueblonan, gruponan nacional i lenganan tur sirbi asta e.” (Daniel 7:13, 14) Ken e Rey aki ta? Wel, e Bijbel ta yama Jesucristo “e Yu di hende.” (Mateo 12:40; Lucas 17:26) Sí, Jehova a designá su Yu, Jesucristo, pa ta Rey.

⁷ Jesus no ta goberná su so. Huntu cuné tin 144.000 cu a ser “cumprá for dje tera” pa ta su rey i sacerdotenan socio. (Revelacion 5:9, 10; 14:1, 3; Lucas 22:28-30) E súbditonan dje Reino di Dios lo ta un famia global di hendenan cu ta sumiso na Cristo su liderato. (Salmo 72:7, 8) Sin embargo, con nos por ta sigur cu e Reino realmente lo vindicá e soberania di Dios i restorá e condicionnan paradísico na nos tera?

E REALIDAD DI E REINO DI DIOS

8, 9. (a) Con nos por ilustrá e confiabilidad dje promesanan dje Reino di Dios? (b) Pakico nos por ta sigur dje realidad dje Reino?

⁸ Imaginá bo cu un candela a destruí bo cas. Awor un amigu cu tin e medionan pa traha un cas a primintí di yuda traha bo cas i percurá cuminda pa bo famia. Si e amigu ei semper a bisá bo e berdad, lo bo no ker’é? Suponé cu bo a yega for di trabou e siguiente dia i a haña cu trahadornan ya caba a cuminsá limpia e restonan dje candela i cu cuminda a ser trecé pa bo famia. Sin duda lo bo tin e confiansa completo cu segun tempu ta pasa, cosnan no solamente lo ser restorá sino asta lo ser mihó cu promé.

⁹ Di igual manera, Jehova ta duna nos e siguransa dje realidad di e Reino. Manera a ser demostrá den e buki bíblico di Hebreonan, hopi aspecto dje Ley a prefigurá e areglo dje Reino. (Hebreonan 10:1) Bistanan profético di loke e Reino di Dios lo ta, tabata bisto tambe den e reino terenal di Israel. Esei no tabata un gobierno comun, pasobra e gobernantenan a sinta riba “e trono di Jehova.” (1 Crónicanan 29:23) Ademas, a ser profetisá: “E bara di autoridad lo no apartá di Huda, ni e baston di mando di meimei su pianan, te cu Shiloh bini; i e obedencia dje pueblonan lo pertenecé na dje.” (Génesis 49:10)a Sí, tabata dje liña di desendencia aki dje reynan di Huda cu Jesus, e Rey permanente dje gobierno di Dios, mester a nace.—Lucas 1:32, 33

10. (a) Na ki tempu a establecé e fundeshi dje Reino Mesiánico? (b) Riba ki trabou importante Jesus su prospectivo co-gobernantenan lo ta hibando delantera riba tera?

¹⁰ E fundeshi dje Reino Mesiánico di Dios a ser establecé cu e scogementu dje apostelnan di Jesus. (Efesionan 2:19, 20; Revelacion 21:14) Esakinan tabata e proménan dje 144.000 cu lo reina den cielu como reynan socio cu Jesucristo. Miéntras nan tabata riba tera, e prospectivo co-gobernantenan aki lo hiba delantera den un campaña di duna testimonio, conforme cu Jesus su mandamentu: “Bai . . . i haci disipel di hende di tur nacion, bautisando nan den e nomber dje Tata i dje Yu i dje spiritu santu.”—Mateo 28:19.

11. Con e predicacion dje Reino ta ser efectuá awe, i kico e ta logrando?

¹¹ E mandamentu pa haci disipel awor ta ser obedecé na un escala sin precedente. Testigonan di Jehova ta proclamando e bon nobo dje Reino den henter e mundu, na armonia cu Jesus su palabranan profético: “E bon nobo aki dje reino lo ser predicá den tur e tera habitá pa un testimonio pa tur nacion; anto e fin lo yega.” (Mateo 24:14) Como un aspecto dje trabou di predicacion di Reino, un programa educacional grandi ta ser efectuá. Esnan cu someté nan na e leynan i principionan dje Reino di Dios ya caba ta experenciando un pas i unidad cu gobiernonan humano no por logra. Tur esaki ta duna evidencia claro cu e Reino di Dios ta un realidad!

12. (a) Pakico ta apropiado pa yama proclamadornan di Reino Testigonan di Jehova? (b) Con e Reino di Dios ta diferente dje gobiernonan humano?

¹² Jehova a bisa e israelitanan: “Boso ta mi testigonan, . . . asta mi sirbidor kende mi a scoge.” (Isaías 43:10-12) Jesus, “e Testigo Fiel,” a declará celosamente e bon nobo dje Reino. (Revelacion 1:5; Mateo 4:17) Pues ta apropiado cu proclamadornan actual dje Reino ta carga e nomber divinamente nombrá Testigonan di Jehova. Pero pakico e Testigonan ta dedicá asina tantu tempu i esfuerso papiando cu otronan tocante e Reino di Dios? Nan ta haci esaki pasobra e Reino ta e único speransa pa humanidad. Gobiernonan humano ta yega na un fin tardi of trempan, pero e Reino di Dios nunca lo yega na un fin. Isaías 9:6, 7 ta yama su Gobernante, Jesus, e “Prins di Pas” i ta agregá: “N’e abundancia dje gobernacion di prins i na pas lo no tin fin.” E Reino di Dios no ta manera gobierno di hende cu awe t’ei i mañan no t’ei mas. En berdad, Daniel 2:44 ta bisa: “E Dios di cielu lo establecé un reino cu nunca lo ser reducí na ruina. I e reino mes lo no ser pasá na ningun otro pueblo. . . . E mes lo para te na tempu indefiní.”

13. (a) Cua ta algun problema cu e Reino di Dios lo atendé exitosamente? (b) Pakico nos por ta sigur cu Dios su promesanan lo ser cumplí?

¹³ Cua rey humano lo por eliminá guera, crímen, malesa, hamber, i falta di bibienda? Ademas, cua gobernante terenal lo por resucitá esnan cu a muri? E Reino di Dios i su Rey lo regla e asuntunan aki. E Reino lo no resultá di tin defecto, manera aparato cu no ta funcioná bon i cu constantemente mester ser drechá. Mas bien, e Reino di Dios lo tin éxito, pasobra Jehova ta primintí: “Mi palabra cu ta sali for di mi boca . . . lo no bolbe bek na mi sin resultado, sino cu siguramente lo e haci loke mi tin deleite aden, i lo e tin éxito sigur den loke mi a mand’é.” (Isaías 55:11) E propósito di Dios lo no faya, pero na ki tempu e Reino mester a cuminsá goberná?

E GOBERNACION DJE REINO —NA KI TEMPU?

14. Cua malcomprendimentu e disipelnan di Jesus tabatin en cuanto e Reino, pero kico Jesus tabata sa di su gobernacion?

¹⁴ “Señor, bo ta restorando e reino pa Israel na e tempu aki?” E pregunta aki cu Jesus su disipelnan a haci a revelá cu na e momento ei nan no tabata sa e propósito dje Reino di Dios i e tempu señalá p’e cuminsá goberná. Spiertando nan pa no speculá tocante e asuntu, Jesus a bisa: “No ta pertenecé na boso pa adkerí conocimentu dje tempunan of temporadanan cu e Tata a pone den su mes hurisdiccion.” Jesus tabata sa cu su gobernacion riba e tera tabata reservá pa e futuro, hopi despues di su resureccion i subimentu na cielu. (Echonan 1:6-11; Lucas 19:11, 12, 15) E Scritura a profetisá esaki. Con?

15. Con Salmo 110:1 ta tira lus riba e tempu pa Jesus su gobernacion cuminsá?

¹⁵ Refiriendo proféticamente na Jesus como “Señor,” Rey David a bisa: “E expresion di Jehova na mi Señor ta: ‘Sinta na mi man drechi te ora cu mi pone bo enemigunan como un banki pa bo pia.’” (Salmo 110:1; compará cu Echonan 2:34-36.) E profecia aki ta indicá cu e gobernacion di Jesus lo no cuminsá inmediatamente despues di su subimentu na cielu. Mas bien, lo e warda na man drechi di Dios. (Hebreonan 10:12, 13) Cuantu tempu e speramentu aki lo dura? Na ki tempu su gobernacion lo cuminsá? E Bijbel ta yuda nos haña e contestanan.

16. Kico a sosodé na 607 P.E.C. i con esaki tabata relacioná cu e Reino di Dios?

¹⁶ E único stad na mundu cu Jehova a pone su nomber riba dje tabata Jerusalem. (1 Reynan 11:36) E tabata tambe e capital di un reino terenal aprobá di Dios cu a prefigurá e Reino celestial di Dios. P’esei, e destruccion di Jerusalem dor dje babilonionan na 607 P.E.C. tabata masha significativo. E suceso aki a marca e cuminsamentu di un interupcion largu di Dios su gobernacion directo riba su pueblo riba tera. Rond di seis siglo despues, Jesus a indicá cu e periodo aki di interupcion di gobernacion tabata ketu bai na vigor, pasobra el a bisa: “Jerusalem lo ser trapá dor dje nacionnan, te cu e tempu señalá dje nacionnan ta cumplí.”—Lucas 21:24.

17. (a) Kico ta “e tempu señalá dje nacionnan,” i cuantu tempu lo el a dura? (b) Na ki tempu “e tempu señalá dje nacionnan” a cuminsá i a terminá?

¹⁷ Durante “e tempu señalá dje nacionnan,” gobiernonan mundano lo a ser permití pa interumpí gobernacion aprobá dor di Dios. E periodo ei a cuminsá cu e destruccion di Jerusalem na 607 P.E.C., i Daniel a indicá cu lo e dura pa “siete tempu.” (Daniel 4:23-25) Con largu esei ta? E Bijbel ta mustra cu tres “tempu” i mitar ta igual cu 1.260 dia. (Revelacion 12:6, 14) Dos biaha e periodo ei, of siete tempu, lo ta 2.520 dia. Pero nada notabel a sosodé na final dje periodo di tempu corticu ei. Sin embargo, dor di aplicá “un dia pa un aña” na e profecia di Daniel i contando 2.520 aña for di 607 P.E.C., nos ta yega na e aña 1914 E.C.—Númeronan 14:34; Ezekiel 4:6.

18. Kico Jesus a haci djis despues di a ricibí poder di Reino i con esaki a afectá e tera?

¹⁸ Jesus a cuminsá reina den cielu na e tempu ei? E motibunan bíblico pa bisa cu el a cuminsá lo ser tratá den e siguiente capítulo. Naturalmente, e cuminsamentu dje reinado di Jesus lo no ser marcá dor di pas inmediato riba tera. Revelacion 12:7-12 ta mustra cu djis despues di ricibí e Reino, Jesus lo expulsá Satanas i e angelnan demoniaco for di cielu. Esaki lo nificá ai pa e tera, pero ta alentador pa lesa cu e Diabel a sobra solamente “un periodo di tempu corticu.” Pronto, nos lo por alegrá no solamente pasobra e Reino di Dios ta goberná, sino tambe pasobra lo e trece bendicionnan pa e tera i pa humanidad obediente. (Salmo 72:7, 8) Con nos por sa cu esaki lo sosodé pronto?

[Nota]

TEST BO CONOCIMENTU

Kico e Reino di Dios ta i for di unda e ta reina?

Ken ta goberná den e Reino, i ken ta su súbditonan?

Con Jehova a sigurá nos cu su Reino ta un realidad?

Na ki tempu “e tempu señalá dje nacionnan” a cuminsá i a terminá?

[Kuadro na página 94]

ALGUN SUCESO IMPORTANTE RELACIONA CU E REINO DI DIOS

• Jehova ta anunciá su propósito pa producí un “simia” cu lo machicá e cabes dje Colebra, Satanas e Diabel.—Génesis 3:15.

• Na 1943 P.E.C., Jehova ta indicá cu e “simia” aki lo ta un desendiente humano di Abraham.—Génesis 12:1-3, 7; 22:18.

• E pacto di Ley duná na Israel na 1513 P.E.C. ta proveé “un sombra dje bon cosnan pa bini.”—Exodo 24:6-8; Hebreonan 10:1.

• E reino terenal di Israel ta cuminsá na 1117 P.E.C., i ta sigui despues den e liña di desendencia di David.—1 Samuel 11:15; 2 Samuel 7:8, 16.

• Jerusalem ta ser destruí na 607 P.E.C., i “e tempu señalá dje nacionnan” ta cuminsá.—2 Reynan 25:8-10, 25, 26; Lucas 21:24.

• Na 29 E.C., Jesus ta ser ungí como Rey-Designá i ta continuá cu su ministerio terenal.—Mateo 3:16, 17; 4:17; 21:9-11.

• Na 33 E.C., Jesus ta subi na cielu, pa spera ei na man drechi di Dios te cu su gobernacion ta cuminsá.—Echonan 5:30, 31; Hebreonan 10:12, 13.

• Jesus ta ser entronisá den e Reino celestial na 1914 E.C. ora “e tempu señalá dje nacionnan” ta terminá.—Revelacion 11:15.

• Satanas i su demoñonan ta ser tirá abou den e becindario dje tera i ta trece un creciente ai pa humanidad.—Revelacion 12:9-12.

• Jesus ta supervisá e predicacion mundial dje bon nobo dje Reino di Dios.—Mateo 24:14; 28:19, 20.