BO TABATA SA?
Dikon nan tabata kibra pia di kriminal kologá na staka?
E Evangelio di Huan ta bisa ku ora Hesus i dos kriminal tabata kologá na staka di tormento, “e hudiunan a pidi Pilato pa laga kibra pia di e hòmbernan i baha e kurpanan.”—Huan 19:31.
E Lei di Moises a bisa ku kurpa di un kriminal sentensiá na morto “no mester keda kologá henter anochi na e palu.” (Deuteronomio 21:22, 23) E hudiunan aparentemente tabata usa e mesun lei ei pa e hendenan ku e romanonan a ehekutá. Den kaso di Hesus i e dos hòmbernan, si a laga kibra nan pia nan lo a muri mas lihé i lo por a dera nan promé ku sabat kuminsá, esta, promé ku solo baha.
Hopi biaha, nan tabata klaba un hende su man i pia na e staka i despues nan tabata pone e staka para règt. Debí na esaki, e hende ei, ku tur su peso, a keda kologá na e klabunan i esaki a kous’é un doló inmenso. Pa e por a hala rosea, e mester a pusha su kurpa na laira ku yudansa di e klabu den su pianan. Pero si nan a kibra su pianan, lo e no por a pusha su kurpa na laira i lo no a dura muchu pa e muri di stek òf debí ku su sanger a stòp di sirkulá den su kurpa.
Kon nan tabata usa slenger di tira piedra den guera di antigwedat?
David a usa un slenger di tira piedra pa mata e gigante Goliat. Aparentemente, David a siña usa e arma akí tempu ku e tabata un wardadó di karné.—1 Samuel 17:40-50.
Relieve di tiradónan di slenger Asirio ku ta ataká un stat hudiu
Den obranan di arte di tempu bíbliko nos por mira ku tantu e egipsionan komo e asirionan tabata usa slenger. E arma akí tabata trahá di un pida kueru òf paña ku dos strèp òf kabuya pegá na dje. E tiradó di slenger tabata hinka un piedra rondó lizu den e pida kueru òf paña. E piedra a varia di 5 pa 8 centimeter i por a pisa un 250 gram. Despues, e tabata drei e slenger na haltu i tabata laga un di e strèp- òf kabuyanan lòs pa e piedra sali ku un velosidat haltu i logra dal e víktima.
Den Medio Oriente nan a koba saka masha hopi piedra ku sòldánan a usa den gueranan di antigwedat. Probablemente, sòldánan ábil a tira piedra ku por a alkansá un velosidat di entre 160 pa 240 kilometer pa ora. Ekspertonan no tin shen porshento sigur si e alkanse di un slenger ta meskos ku di un flecha, pero slenger definitivamente por ta mes mortal.—Huesnan 20:16.