Berdadero Speransa pa Bo Sernan Kerí Ku A Muri

1-3. Ki enemigu ta persiguí nos tur, i dikon un konsiderashon di loke Beibel ta siña lo duna nos un poko alivio?

IMAGINÁ ku bo ta huyendo for di un enemigu kruel. E ta hopi mas fuerte i mas lihé ku bo. Bo sa ku e ta sin miserikòrdia pasobra bo a mir’é mata algun di bo amigunan. Pero kon ku bo purba kore bai lag’é, e ta sigui yega mas serka. Parse ku no tin ningun skapatorio. Pero diripiente, ata un reskatadó ta presentá na bo lado. E ta hopi mas poderoso ku bo enemigu, i e ta primintí di yuda bo. Ki un gran alivio bo ta sinti!

² Den un sentido, bo ta ser persiguí dor di un enemigu asina. I no abo so, nos tur. Manera nos a siña den e kapítulo anterior, Beibel ta yama morto un enemigu. Ni un di nos por kore bai lag’é ni resistié. Mayoria di nos a mira kon e enemigu aki a kita bida di hendenan ku nos stima. Pero Yehova ta hopi mas poderoso ku morto. E ta e Reskatadó amoroso ku ya kaba a demostrá ku e por derotá e enemigu aki. I el a primintí di destruí e enemigu aki—morto—unabes pa semper. Beibel ta siña: “E delaster enemigu ku lo wòrdu destruí ta morto.” (1 Korintionan 15:26) Esei ta bon notisia!

³ Laga nos konsiderá brevemente kon e enemigu, morto, ta afektá nos ora ku e kita bida di un hende ku nos konosé. Esaki lo yuda nos komprondé un promesa ku lo hasi nos felis. E kos ta ku Yehova ta primintí ku e mortonan lo biba atrobe. (Isaias 26:19) Nan lo haña resurekshon. Esei ta e speransa ku Dios ta duna nos.

ORA UN SER KERÍ MURI

4. (a) Dikon e manera ku Hesus a reakshoná riba morto di un ser kerí ta siña nos kiko ta Yehova su sintimentu tokante morto? (b) Hesus a desaroyá ki amistat spesial?

⁴ Bo a yega di pèrdè un ser kerí? E doló, tristesa i sintimentu di impotensia por parse insoportabel. Na momentunan asina, nos tin ku akudí na e Palabra di Dios pa haña konsuelo. (2 Korintionan 1:3, 4) Beibel ta yuda nos komprondé kiko Yehova ku Hesus ta pensa tokante morto. Hesus semper a reflehá su Tata perfektamente, i tin un relato ku ta konta kon Hesus a reakshoná ora ku el a eksperensiá e doló di pèrdè un ser kerí. (Juan 14:9) Tur biaha ku Hesus tabata na Yerusalèm, e tabatin kustumber di bai bishitá Lázaro i su ruman muhénan, Maria i Marta, kendenan tabata biba na Betania, un stat djis eibanda. Nan a bira amigu íntimo. Beibel ta bisa: “Hesus tabata stima Marta i su ruman muhé i Lázaro.” (Juan 11:5) Pero manera nos a siña den e kapítulo anterior, Lázaro a muri.

5, 6. (a) Kon Hesus a reakshoná ora ku e tabata huntu ku Lázaro su famia- i amigunan ku tabata yora? (b) Dikon Hesus su tristesa ta un animashon pa nos?

⁵ Kon Hesus a sinti ora ku su amigu a muri? E relato ta bisa nos ku Hesus a bai serka Lázaro su famia- i amigunan segun ku nan tabata yora su morto. Ora Hesus a mira nan, “el a bira profundamente konmoví den spiritu i masha emoshoná.” Anto e relato ta bisa: “Hesus a yora.” (Juan 11:33, 35) Hesus su tristesa a nifiká ku e no tabatin ningun speransa? Apsolutamente ku nò. De echo, Hesus tabata sa ku algu maravioso tabata a punto di tuma lugá. (Juan 11:3, 4) Pero tòg el a sinti e doló i tristesa ku morto ta trese.

⁶ Den un sentido, Hesus su tristesa ta un animashon pa nos. E ta siña nos ku Hesus i su Tata, Yehova, ta odia morto. Pero Yehova Dios por lucha kontra e enemigu ei i vens’é! Laga nos mira kiko Dios a kapasitá Hesus pa hasi.

“LÁZARO, BIN PAFÓ!”

7, 8. Dikon e kaso di Lázaro lo por a parse sin speransa pa e hendenan presente, pero kiko Hesus a hasi?

⁷ Lázaro tabata derá den un kueba, i Hesus a pidi pa kita e piedra ku a tapa boka di e kueba. Marta no tabata di akuerdo pa hasi esei pasobra despues di kuater dia, Lázaro su kurpa mester a kuminsá putri kaba. (Juan 11:39) Desde un punto di bista humano, ta ki speransa por tabatin?

⁸ Pero nan a hala e piedra, i Hesus a yama na bos haltu: “Lázaro, bin pafó!” Kiko a sosodé? “Esun ku a muri a bin pafó.” (Juan 11:43, 44) Bo por imaginá e alegria di e hendenan presente? Sea ku Lázaro tabata nan ruman, famia, amigu òf bisiña, nan tabata sa ku el a muri. Sin embargo, at’é aki—e mesun hòmber stimá—pará meimei di nan atrobe. Esei lo mester a parse un kos inkreibel. Hopi hende sin duda lo a brasa Lázaro di alegria. Ki un viktoria riba morto!

9, 10. (a) Kon Hesus a revelá e Fuente di su poder pa resusitá Lázaro? (b) Menshoná algun benefisio di lesa e relatonan di resurekshon den Beibel.

⁹ Hesus no a pretendé ku el a hasi e milager asombroso aki ku su mes poder. Den su orashon djis promé ku el a yama Lázaro pa sali, el a mustra bon kla ku ta Yehova tabata e Fuente di e resurekshon. (Juan 11:41, 42) Esaki no tabata e úniko biaha ku Yehova a usa su poder pa resusitá un hende morto. E resurekshon di Lázaro ta un di e nuebe milagernan di resurekshon ku tin pará skirbí den e Palabra di Dios.a Ta un plaser pa lesa i studia e relatonan aki. Nan ta siña nos ku Dios no ta hasi distinshon di persona, pasobra entre esnan resusitá tabatin hóben i bieu, hòmber i muhé, israelita i no-israelita. I ki un alegria e pasashinan aki di Beibel ta deskribí! Por ehèmpel, ora Hesus a lanta un hobensita for di morto, su mayornan “tabata for di nan mes di gran eksitashon.” (Marko 5:42, NW) Sí, Yehova a duna nan un motibu di alegrá ku nunka nan lo no a lubidá.

¹⁰ Klaru ku e personanan ku Hesus a resusitá, ku tempu a bolbe muri. Akaso esaki ta nifiká ku no a bale la pena resusitá nan? Nò. E relatonan bíbliko aki ta konfirmá bèrdatnan importante i ta duna nos speransa.

SIÑA FOR DI E RELATONAN DI RESUREKSHON

11. Kon e relato di Lázaro su resurekshon ta yuda konfirmá e bèrdat ku tin pará skirbí na Eklesiastés 9:⁠5?

¹¹ Beibel ta siña ku e mortonan “no sa nada.” Nan no ta na bida ni nan no tin un eksistensia konsiente ningun kaminda. E relato di Lázaro ta konfirmá e bèrdat aki. Ora Lázaro a bolbe na bida, akaso el a konta hende relatonan emoshonante tokante shelu? Òf el a spanta nan ku kuentanan horibel tokante un fièrnu di kandela? Nò. Beibel no tin ningun di e historianan ei for di boka di Lázaro. Durante e kuater dianan ku e tabata morto, e ‘no tabata sa nada.’ (Eklesiastés 9:5) Lázaro simplemente tabata drumí den morto.—Juan 11:11.

12. Dikon nos por tin sigur ku e resurekshon di Lázaro realmente a tuma lugá?

¹² E relato di Lázaro ta siña nos tambe ku e resurekshon ta un realidat, no un simpel kuenta di fantasia. Hesus a resusitá Lázaro dilanti di un multitut di testigu. Asta e lidernan religioso, ku tabata odia Hesus, no a nenga ku e milager aki a sosodé. Mas bien nan a bisa: “Kiko nos ta hasi? Pasobra e hòmber aki [Hesus] ta hasi hopi milager.” (Juan 11:47) Hopi hende a bai mira e hòmber resusitá. Komo resultado, mas hende ainda a pone fe den Hesus. Nan a mira Lázaro komo un prueba bibu di e echo ku ta Dios a manda Hesus. E evidensia aki tabata asina poderoso ku algun di e lidernan religioso hudiu di kurason duru, a plania pa mata tantu Hesus komo Lázaro.—Juan 11:53; 12:9-11.

13. Ki base nos tin pa kere ku Yehova realmente por resusitá e mortonan?

¹³ Ta irealístiko pa aseptá e resurekshon komo un echo? Nò, pasobra Hesus a siña e hendenan ku un dia “tur ku ta den graf” lo ser resusitá. (Juan 5:28) Yehova ta e Kreadó di tur bida. Ta duru pa kere ku e por bolbe krea bida? Esei lo ta dependé naturalmente di Yehova su memoria. E por kòrda nos sernan kerí ku a muri? Wèl, nos universo ta konsistí di míles di miónes di strea, i tòg Dios sa e nòmber di kada un di nan! (Isaias 40:26) Pues, Yehova Dios por kòrda tur detaye di nos sernan kerí ku a muri, i e ta kla pa restorá nan na bida.

14, 15. Manera nos por mira for di loke Jòb a bisa, kiko ta indiká ku Yehova ta deseá di resusitá e mortonan?

¹⁴ Beibel ta siña nos ku Yehova ta ansioso pa resusitá e mortonan. Kon nos por ta sigur di esaki? E hòmber fiel Jòb a puntra: “Si un hende muri, lo e bolbe biba?” Jòb a papia di warda den graf te ora ku e tempu yega pa Dios kòrda riba dje. El a bisa Yehova: “Abo lo yama, i ami lo kontestá bo; lo bo anhelá na e obra di bo mannan.”—Jòb 14:13-15.

¹⁵ Pensa riba esei! Bon mirá, Yehova ta anhelá pa trese e mortonan bèk na bida. No ta alentador pa sa ku Yehova ta sinti asina? Pero relashoná ku e futuro resurekshon aki, ken lo ser resusitá i na unda?

“TUR KU TA DEN GRAF”

16. E mortonan lo haña resurekshon pa biba bou di ki klase di kondishon?

¹⁶ E relatonan di resurekshon den Beibel ta siña nos hopi kos tokante e binidero resurekshon. E hendenan ku a ser restorá na bida aki mes riba tera a bolbe uni ku nan sernan kerí. E futuro resurekshon lo ta similar, pero hopi mas mihó. Manera nos a siña den Kapítulo 3, Dios su propósito ta pa henter e tera keda transformá den un paradeis. Pues e mortonan lo no resusitá den un mundu yen di guera, kriminalidat i malesa. Nan lo tin un oportunidat di biba pa semper riba e tera aki bou di kondishonnan di pas i felisidat.

17. Kon ekstenso e resurekshon lo ta?

¹⁷ Ken lo resusitá? Hesus a bisa ku “tur ku ta den graf lo tende [Hesus] su bos, i lo sali.” (Juan 5:28, 29) Asina tambe Revelashon 20:⁠13 ta bisa: “Laman a entregá e mortonan ku tabata den dje, i morto i Hades a entregá e mortonan ku tabata den nan.” “Hades” ta referí na e graf komun di humanidat. (Wak e artíkulo di Apèndiks Kiko Seol i Hades Ta?.) E graf kolektivo aki lo ser hasí bashí. Tur e míles di miónes di hendenan ku ta sosegá den dje lo biba atrobe. Apòstel Pablo a bisa: “Lo tin un resurekshon di tantu e hustunan komo e malbadonan.” (Echonan 24:15) Kiko esei ta nifiká?

18. Ken lo ta inkluí den “e hustunan” ku lo haña resurekshon, i ki efekto e speransa aki por tin riba abo personalmente?

¹⁸ “E hustunan” ta inkluí hopi di e hendenan ku nos ta lesa di dje den Beibel ku a biba promé ku Hesus a bin na tera. Lo bo por pensa riba Noe, Abraham, Sara, Moisés, Ruth, Ester i hopi otro mas. Hebreonan kapítulo 11 ta papia di algun di e hòmber- i muhénan aki ku tabatin fe firme den Dios. Pero “e hustunan” ta inkluí tambe e sirbidónan di Yehova ku muri den nos tempu. Debí na e speransa di resurekshon, nos por ser librá di kualke miedu di muri.—Hebreonan 2:15.

19. Ken ta “e malbadonan,” i Yehova bondadosamente ta duna nan ki oportunidat?

¹⁹ Kiko di tur e hendenan ku no a sirbi òf obedesé Yehova pasobra nunka nan no tabata sa di dje? Dios lo no lubidá e míles di miónes di hendenan ‘malbado’ aki. Nan tambe lo ser resusitá i lo duna nan tempu pa siña tokante e Dios berdadero i sirbié. Durante un periodo di mil aña, lo resusitá e mortonan i duna nan oportunidat di djòin hende fiel riba tera den sirbi Yehova. Lo ta un tempu maravioso. E periodo aki ta loke Beibel ta referí na dje komo Dia di Huisio.b

20. Kiko ta Gehena, i ken ta bai einan?

²⁰ Akaso esaki ta nifiká ku tur hende ku a yega di biba lo haña resurekshon? Nò. Beibel ta bisa ku algun di e mortonan ta den Gehena, tradusí komo “fièrnu” den Beibel Santu. (Lukas 12:5) Gehena a haña su nòmber for di un lugá di dùmp sushi ku tabatin pafó di antiguo Yerusalèm. Einan hende tabata kima sushi i kurpanan morto. E kurpanan morto ku nan a tira einan tabata di personanan ku e hudiunan no a konsiderá digno di haña un entiero i un resurekshon. Pues Gehena ta un símbolo apropiá di destrukshon eterno. Ounke Hesus lo hunga un papel den husga e bibu- i e mortonan, Yehova ta e Hues final. (Echonan 10:42) Nunka Yehova lo resusitá personanan ku e ta husga ku ta malbado i no ke kambia.

E RESUREKSHON SELESTIAL

21, 22. (a) Ki otro tipo di resurekshon tin? (b) Ken tabata e promé persona ku a yega di risibí un resurekshon pa bida komo persona spiritual?

²¹ Beibel ta referí tambe na un otro tipo di resurekshon, unu pa biba komo un kriatura spiritual den shelu. Den Beibel nos ta haña un solo ehèmpel di e tipo di resurekshon aki, esun di Hesukristu.

²² Despues ku nan a mata Hesus komo hende, Yehova no a permití su Yu fiel keda den graf. (Salmo 16:⁠10; Echonan 13:34, 35) Dios a resusitá Hesus, pero no komo hende. Apòstel Pedro a splika ku Kristu a ser “matá den e karni, ma hasí bibu den e spiritu.” (1 Pedro 3:18) Esaki tabata realmente un gran milager. Hesus tabata bibu atrobe komo un persona spiritual poderoso! (1 Korintionan 15:3-6) Hesus tabata e promé persona ku a yega di risibí e tipo di resurekshon glorioso aki. (Juan 3:13) Pero lo e no tabata e último.

23, 24. Ken ta forma Hesus su “tou chikitu,” i kuantu nan kantidat lo ta?

²³ Komo ku Hesus tabata sa ku pronto lo e bolbe na shelu, el a bisa su siguidónan fiel ku lo el a “prepará un lugá” pa nan einan. (Juan 14:2) Hesus a referí na esnan ku lo bai shelu komo su “tou chikitu.” (Lukas 12:32) Kuantu persona lo forma parti di e grupo relativamente chikí aki di kristiannan fiel? Segun Revelashon 14:⁠1, apòstel Juan a bisa: “Mi a wak, i ata e Lamchi [Hesukristu] tabata pará riba Seru Sion, i huntu kuné 144.000 ku tabatin su nòmber i e nòmber di su Tata skirbí na nan frenta.”

²⁴ E 144.000 kristiannan aki, ku ta inkluí Hesus su apòstelnan fiel, ta haña resurekshon pa biba den shelu. Na ki tempu nan resurekshon ta tuma lugá? Apòstel Pablo a skirbi ku lo e sosodé durante e tempu di Kristu su binida. (1 Korintionan 15:23) Manera lo bo siña den Kapítulo 9, nos ta bibando awor den e tempu ei. Pues, di e poko personanan ku a resta di e 144.000, esnan ku muri den nos tempu ta resusitá instantáneamente pa bida den shelu. (1 Korintionan 15:51-55) Sin embargo, e gran mayoria di humanidat tin e speransa di ser resusitá den futuro pa biba den Paradeis riba tera.

25. Kiko nos lo konsiderá den e siguiente kapítulo?

²⁵ Sí, Yehova realmente lo derotá nos enemigu morto, i lo e disparsé pa semper! (Isaias 25:8) Pero kisas bo ta puntra bo mes: ‘Kiko esnan ku haña resurekshon pa biba den shelu lo bai hasi einan?’ Nan lo forma parti di e maravioso gobièrnu di Reino den shelu. Nos lo siña mas tokante e gobièrnu ei den e siguiente kapítulo.