Bo Mester Amplia Bo Punto di Bista?

UN TEMBLOR devastador a dal e stad di Kobe den west di Hapon, i boluntarionan cu un spiritu di sacrificio propio a bini rápidamente pa yuda e residentenan afligí. Pero, ora un tim di dokter bishitante a solicitá suministro médico, un hende dje Departamento di Salubridad a rechasá nan peticion cu mal airu. E funcionario ei, cu a la bes tabata director di un hospital municipal grandi, tabata kier p’e víctimanan bai n’e hospitalnan di Kobe en bes di laga e dokternan pasa angua i duna infuus caru na centronan di auxilio. Despues, e funcionario a onra e peticion dje dokternan, pero su actitud inflexibel na principio i aparente falta di compasion a causa crítica general.

Por ta bo a yega di experenciá e mesun actitud intransigente aki di parti di un persona cu autoridad. Kisas abo tabata esun intransigente. Bo por saca beneficio dor di desaroyá un punto di bista mas amplio?

Haña e Cuadro Completo

Ta comun pa hende mira cosnan for di un solo ángulo, of punto di bista, limitando asina nan percepcion i comprendimentu di cosnan. Hopi bes esaki ta debí na factornan manera educacion, experencia di bida i antecedente. Un persona por tuma decisionnan mas sabí ora e trata pa haña e cuadro completo. Por ehempel, si bo ta pasando na un crusada druk caminda no tin lus di tráfico, lo ta sabí pa djis wak stret bo dilanti? Sigur cu no! Mescos tambe, si nos amplia nos manera di pensa pa haña e cuadro completo, por ta hopi probechoso ora di tuma decision i actua den un manera responsabel. Esei por asta salba nos bida.

Probablemente, nos tur lo por mehorá den esaki. P’esei puntra bo mes: ‘Kico ta algun área den cua ami lo por saca beneficio dor di amplia mi manera di pensa?’

Bo Punto di Bista di Otro Hende

Kico bo ta wak ora bo ta mira otro hende? Bo tin e tendencia di mira loke nan ta bisa of haci como sea pretu of blancu, como si fuera no tin otro color of matis? E comentario cu un hende ta duna ta sea un compliment of un insulto? Un persona ta sea completamente bon of totalmente robes? Si bo tin e punto di bista ei lo bo ta mescos cu un fotógrafo cu ta ignorá e gran variedad di color briyante i matis den un paisahe bunita di otoño, como si fuera ta imágen pretu cu blancu so ta existí. Of bo tin tendencia di concentrá riba e áreanan negativo dje personalidad di un hende, mescos cu un biahero ta permití un tiki sushi cu otro bishitante sin consideracion a laga atras, ruiná su disfrute di un paisahe bunita.—Compará cu Eclesiástes 7:16.

Nos por siña hopi ora nos considerá e manera cu Jehova ta mira eror humano. Aunke e ta conciente di hende su hopi debilidad i fayonan, e ta scoge pa no enfocá riba nan. Cu gratitud e salmista a remarcá: “Si ta eror ta loke bo ta vigilá . . . o Jehova, ken lo por keda pará?” (Salmo 130:3) Jehova ta dispuesto pa pone eror di pecadónan repentí un banda, sí, veeg nan di un manera noble pa nan no mancha nos relacion cuné. (Salmo 51:1; 103:12) Jehova por a bisa di rey David, kende na un dado momento a cometé picá serio cu Bat-seba, cu e tabata un homber cu “a sigui mi cu tur su curason i a haci loke ta recto so den mi bista.” (1 Reynan 14:8) Pakico Dios por a bisa esaki di David? Pasobra el a enfocá riba e bon cualidadnan di David repentí. El a considerá tur e factornan cu ta al caso i a scoge pa sigui extendé misericordia na su sirbidó.

Cristo Jesus a reflehá e punto di bista amplio aki pa cu fayonan di otro hende di un manera intachabel. (Juan 5:19) Ora Jesus a haña su mes confrontá cu e faltanan di su apostelnan, el a mustra misericordia i comprension. Pa loke ta hende imperfecto, el a reconocé cu asta ora ‘e spiritu ta anheloso, e carni ta swak.’ (Mateo 26:41) Cu esaki na mente, Jesus por a trata cu e debilidad i faltanan di su apostelnan cu pacenshi i comprension. E no a concentrá riba nan fayonan, sino mas bien, a enfocá riba nan bon cualidadnan.

Na un ocasion despues cu Jesus a corigí e apostelnan dor cu nan a pleita tocante ken a parce di ta mas importante, el a agregá: “Sin embargo, boso ta esnan cu a permanecé cu mi henter ora durante mi pruebanan; i mi ta cera un pacto cu boso, mescos cu mi Tata a cera un pacto cu mi, pa un reino, pa boso por come i bebe na mi mesa den mi reino, i sinta riba trononan pa husga e diesdos tribunan di Israel.” (Lucas 22:24-30) Sí, apesar cu e apostelnan tabatin hopi fayo, Jesus a corda nan fieldad i nan amor p’e. (Proverbionan 17:17) Jesus tabatin confiansa den loke nan por a haci i lo a haci, p’esei el a cera un pacto pa un Reino cu nan. Sí, ‘Jesus a stima su disipelnan te na fin.’—Juan 13:1.

P’esei si un persona su comportacion straño i faltanan tin tendencia di iritá bo, imitá Jehova i Jesus. Amplia bo manera di pensa, i purba tuma tur factor na consideracion. Dor di mira cosnan den nan perspectiva corecto, lo bo haña cu ta mas fácil pa stima i apreciá bo rumannan.

Den Dunamentu di Cos Material

E privilegio di duna ta un dje gosonan cu cristiannan tin. Pero nos tin cu limitá nos dunamentu na un solo actividad, ban bisa, dor di participá den e ministerio di veld? (Mateo 24:14; 28:19, 20) Of bo por amplia bo punto di bista i pensa tambe riba e necesidadnan físico i bienestar di otro hende? Claro cu tur cristian ta comprendé cu dunamentu den sentido spiritual ta di mayor importancia. (Juan 6:26, 27; Echonan 1:8) Tog, pa importante cu dunamentu den sentido spiritual ta, sigur no mester neglishá dunamentu den sentido material.—Santiago 2:15, 16.

Ora nos contemplá e necesidadnan urgente di nos rumannan spiritual den nos mes congregacion i na otro parti di mundu, nos por mira mihó kico nos por haci pa yuda nan. Ora esnan cu ta den posicion pa haci esei compartí generosamente cu otro hende, un igualacion ta tuma lugá. Den e manera aki ta percurá p’e necesidadnan di tur nos rumannan. Un anciano cristian a expres’é asina aki: “Ora surgi un necesidad den un parti di mundu, rumannan na otro parti di mundu lo duna nan yudansa. Si nan no ta den posicion pa yuda, e ora ei rumannan di otro caminda lo haci esei. Den e manera ei ta percurá p’e necesidadnan di nos rumannan rond mundu. E hermandad mundial ta maraviyoso berde.”—2 Corintionan 8:13-15; 1 Pedro 2:17.

Un ruman muher cristian cu tabatin e deseo sincero di asistí na un dje congresonan internacional tené na Oost Europa simplemente no tabata den posicion pa haci esei. Pero el a tende cu e rumannan aya tabatin gran necesidad di Bijbel, di manera cu el a manda un contribucion p’e Bijbelnan ei via un persona cu a asistí. Asina el a experenciá e felicidad di duna, di compartí cu su rumannan den exterior.—Echonan 20:35.

Tal bes dor di amplia bo manera di pensa bo por duna un contribucion asta mas grandi n’e obra mundial di educacion bíblico cu ta sigui expandé, i asina trece goso pa bo mes i tambe pa otronan.—Deuteronomio 15:7; Proverbionan 11:24; Filipensenan 4:14-19.

Ora di Duna Conseho

Ora nos mester duna conseho of coreccion, razonamentu balansá i cu consideracion lo yuda nos gana e respet di nos rumannan spiritual i duna yudansa berdaderamente eficas. Ta masha fácil pa concentrá riba un par di detaye i core saca un conclusion parcial. Esaki ta duna e impresion cu nos no ta wak mas leu cu nos nanishi of asta cu nos tin un mente cerá, mescos cu e lidernan religioso dje tempu di Jesus, cu tabatin tendencia di carga otro hende cu nan regulacionnan interminabel. (Mateo 23:2-4) N’e otro banda, si nos evitá extremonan i duna bon conseho cu ta firmemente basá riba principionan bíblico, i cu ta reflehá Jehova su manera di pensa hustu i tog misericordioso i balansá, lo ta muchu mas fácil pa otro hende aceptá i aplicá nos sugerencianan.

Algun aña pasá rumannan yong di vários congregacion tabata bini huntu pa haci deporte. Desafortunadamente, a desaroyá un spiritu di competencia entre nan, i esei a resultá den pleitamentu serio. Con e ancianonan local a atendé e problema? Reconociendo e necesidad pa hóbennan tin recreo, nan no a recomendá nan pa stop di bini huntu. (Efesionan 5:17; 1 Timoteo 4:8) Mas bien, nan a duna nan spiertamentu razonabel pero firme tocante loke e spiritu di competencia por hiba na dje. Ademas, nan a ofrecé sugerencia práctico, manera, invitá otro rumannan mas grandi i responsabel tambe. E hóbennan a apreciá e sabiduria i conseho balansá i a reaccioná bon. Ademas, nan a haña mas respet i cariño p’e ancianonan.

Haci Esfuerso pa Amplia Bo Manera di Pensa

Aunke kisas bo no ta mustra prehuicio intencionalmente of concientemente, tog esfuerso special ta necesario pa amplia bo manera di pensa. Ora bo ta studia e Palabra di Dios, meditá riba dje pa asina bo capta i comprendé Jehova su manera di pensa. (Salmo 139:17) Purba comprendé e motibunan di loke Bijbel ta bisa i e principionan cu tin tras di nan, i haci esfuerso pa evaluá cosnan mescos cu Jehova. Esaki lo ta na armonia cu e oracion di David: “Haci mi conocé bo mes camindanan, o Jehova; siña mi bo mes bereanan. Haci mi cana den bo berdad i siña mi.”—Salmo 25:4, 5.

Segun cu bo ta adoptá un perspectiva mas amplio, lo bo ser bendicioná. Un dje bendicionnan di un punto di bista amplio ta cu bo ta gana e reputacion di ta balansá i comprensivo. Lo bo por reaccioná cu mas razonabilidad i comprension ora di duna yudansa den diferente situacion. Esaki, en buelta, lo contribuí n’e unidad i armonia maraviyoso dje hermandad cristian.

[Plachi na página 12]

Dunamentu generoso ta yuda otro hende, ta trece goso n’e dunadó i ta agradá nos Tata celestial