Ádam ku Eva A Desobedesé Dios

Un dia, un kolebra a papia ku Eva. Eva tabata su so. E kolebra a puntr’é: ‘Ta bèrdat ku Dios no ke pa boso kome fruta di tur e palunan?’ Eva a bisa: ‘Nos tin mag di kome fruta di tur e palunan. Ta fruta di un palu so, nos no tin mag di kome. Si nos kome fruta di e palu ei, nos ta muri.’ E kolebra a bis’é: ‘Boso lo no muri. Si boso kome fruta di e palu ei, boso lo bira manera Dios.’ Pero esei tabata bèrdat? Nò. Loke e kolebra a bisa tabata mentira. Pero Eva a kere e mentira ei. Eva a keda wak e fruta te ku el a haña gana di kom’é. El a kome e fruta i duna Ádam pa e tambe kome. Ádam tabata sa ku nan lo a muri si nan a desobedesé Dios, pero el a kome e fruta tòg.

Mas despues, riba e mesun dia ei, Yehova a papia ku Ádam ku Eva. Yehova a puntra nan ta dikon nan a desobedes’é. Eva a bisa ku ta e kolebra su falta, i Ádam a bisa ku ta Eva su falta. Ádam ku Eva a desobedesé Yehova. P’esei, Yehova a saka nan for di e hòfi. Anto Yehova a pone un spada, ku tabata na kandela, i algun angel na entrada di e hòfi pa asina Ádam ku Eva no drenta nunka mas den e hòfi.

Yehova a bisa ku e persona ku a gaña Eva tambe lo ser kastigá. En realidat, no ta e kolebra mes a papia ku Eva. Kolebra no por papia. Yehova no a traha nan pa papia. Ta un mal angel a pone e kolebra papia. E angel a hasi esei pa gaña Eva. E angel ku a gaña Eva yama Satanas òf Diabel. Den futuro, Yehova lo destruí Satanas pasobra Yehova no ke pa Satanas sigui pone hende hasi kos malu.