“Siguramente bo Dios ta e Dios di diosnan i e Señor di reinan i Esun ku ta revelá misterio [òf, sekreto].”—DAN. 2:47.

1, 2. Kiko Yehova a revelá na nos, i dikon el a hasi esei?

KUA poder mundial lo ta dominando e tera ora ku e Reino di Dios pone fin na tur gobièrnu humano? Nos sa e kontesta pasobra Yehova Dios ta Esun ku ta revelá sekreto. Mediante e bukinan di profeta Daniel i apòstel Huan, el a revelá identidat di e poder mundial ei na nos.

² Yehova a duna e dos hòmbernan ei vários vishon tokante bestianan ku lo a presentá un tras di otro. Ademas, el a splika Daniel e nifikashon di un soño profétiko tokante un imágen inmenso di metal. Yehova a konserbá e relatonan akí den Beibel pa nos benefisio, sí, pa fortalesé nos speransa ku su Reino pronto lo aplastá tur gobièrnu humano.—Dan. 2:44; Rom. 15:4.

3. Pa nos por komprondé e profesianan den Beibel ku eksaktitut, kiko nos mester komprondé promé, i dikon?

³ E relatonan di Daniel i Huan no solamente ta identifiká ocho rei, òf gobièrnu humano, sino ta indiká tambe den ki sekuensia e potensianan ei lo a aparesé. Un kos sí, pa nos por komprondé e profesianan ei ku eksaktitut, nos mester komprondé e promé profesia ku ta pará skirbí den Beibel. Dikon? Pasobra e kumplimentu di e profesia ei ta e tema sentral di henter Beibel. Den un sentido, tur otro profesia ta dependé di e promé profesia ei.

E SIMIA DI E KOLEBRA I E BESTIA SALBAHE

4. Kua ta e dos partinan di e simia di e muhé, i kiko e simia ei lo hasi?

⁴ Djis despues di e rebelion den Edén, Yehova a primintí ku un “muhé” lo a produsí un “simia” òf desendiente.a (Lesa Génesis 3:15.) Ku tempu, e simia ei lo “heridá” e kolebra, Satanas, na su kabes. Despues Yehova a revelá ku e simia ei lo a bini for di Abraham, for di e nashon di Israel, for di e tribu di Huda i for di e famia di Rei David. (Gén. 22:15-18; 49:10; Sal. 89:3, 4; Luk. 1:30-33) Kristu Hesus ta e parti prinsipal di e simia ei. (Gal. 3:16) I e miembronan ungí di e kongregashon kristian ta forma e parti sekundario di e simia. (Gal. 3:26-29) Hesus huntu ku e ungínan akí ta forma e Reino di Dios, e medio ku Dios lo usa pa aplastá Satanas.—Luk. 12:32; Rom. 16:20.

5, 6. (a) Kuantu potensia e vishonnan di Daniel i di Huan ta menshoná? (b) Kiko e kabesnan di e bestia salbahe di Revelashon kapítulo 13 ta representá?

⁵ Den e promé profesia ku Yehova a duna den Edén, el a bisa tambe ku Satanas lo a produsí un “simia.” Su simia lo a ekspresá odio kontra e simia di e muhé òf odi’é. Ta ken ta forma e simia di e kolebra? Esei ta tur persona ku, meskos ku Satanas, ta odia Dios i bringa kontra su pueblo. Atraves di historia, Satanas a organisá su simia den vários movementu polítiko, òf reino. (Luk. 4:5, 6) Pero ta algun di e gobièrnunan akí so a bringa direktamente kontra e pueblo di Dios, sea kontra e nashon di Israel òf kontra e kongregashon di kristian ungí. Esaki ta yuda nos komprondé dikon e vishonnan di Daniel i di Huan ta deskribí solamente ocho poder mundial.

⁶ Na final di e promé siglo di e era kristian, Hesus resusitá a duna apòstel Huan un seri di vishon masha impreshonante. (Rev. 1:1) Den un di nan, Huan a mira un dragon—ku a representá Diabel—pará kantu di un laman inmenso. (Lesa Revelashon 13:1, 2.) Tambe Huan a mira Diabel duna gran outoridat na un bestia straño ku a sali for di e laman ei. Mas despues, Huan a mira un bestia koló kòrá bibu ku tabata un imágen di e bestia di Revelashon 13:1. Un angel a bisa Huan ku e shete kabesnan di e bestia koló kòrá bibu ta representá “shete rei,” òf gobièrnu. (Rev. 13:14, 15; 17:3, 9, 10) Tempu ku Huan a skirbi Revelashon, sinku di e reinan ei a kai kaba, unu tabata na poder, i unu “no a yega ainda.” Ta kua reino, òf poder mundial, eseinan tabata? Laga nos analisá kada un di e kabesnan di e bestia salbahe di Revelashon kapítulo 13. Nos lo mira tambe kon e buki di Daniel a duna nos mas detaye di algun di e gobièrnunan akí, asta siglonan promé ku nan a eksistí.

E PROMÉ DOS KABESNAN: EGIPTO I ASIRIA

7. Kiko e promé kabes a representá, i dikon?

⁷ E promé kabes di e bestia a representá Egipto. Dikon ta Egipto? Pasobra e tabata e promé potensia grandi ku a odia e pueblo di Dios i bringa kontra dje. Dios a primintí Abraham ku e simia di e muhé lo a bini di su famia. Wèl, e israelitanan tabata su desendiente i a bira masha hopi den Egipto, i Egipto a kuminsá oprimí nan. Satanas kier a kaba ku e pueblo di Dios promé ku e simia yega. Kon? El a usa Fárao pa purba di mata tur yu hòmber israelita. Pero Yehova no a permití esei sosodé i a libra su pueblo for di Egipto. (Éks. 1:15-20; 14:13) Mas despues el a duna nan e Tera Primintí.

8. Kiko e di dos kabes a representá, i kiko el a purba di hasi?

⁸ E di dos kabes di e bestia a representá Asiria. E reino poderoso akí tambe a purba di kaba ku e pueblo di Dios. Na promé instante, Yehova a usa Asiria pa kastigá e reino di dies tribu di Israel pasobra nan tabata adorá dios falsu i a desobedesé Yehova. Pero despues, Asiria a ataká Herúsalèm. Kisas Satanas tabata kier a destruí e famia real na Herúsalèm, ya ku Hesus mester a bini di e famia ei. E atake ei no tabata parti di e propósito di Dios, p’esei el a destruí e ehérsito asirio i milagrosamente a libra su pueblo fiel.—2 Rei. 19:32-35; Isa. 10:5, 6, 12-15.

E DI TRES KABES: BABILONIA

9, 10. (a) Kiko Yehova a permití Babilonia hasi? (b) Pa profesia por a kumpli, kiko mester a sosodé promé?

⁹ E di tres kabes di e bestia ku Huan a mira a representá e reino ku tabatin Babilonia komo su kapital. Yehova a permití e sòldánan di Babilonia destruí Herúsalèm i hiba su pueblo prezu. Ma promé ku Yehova a permití e humiashon akí, el a spièrta e israelitanan rebelde ku nan lo a sufri e tragedia ei. (2 Rei. 20:16-18) Ademas, el a profetisá ku lo e no a laga e reinan di Israel sinta mas riba su “trono” na Herúsalèm. (1 Kró. 29:23) Pero tambe Yehova a primintí ku un desendiente di Rei David, kende lo tabatin “derecho” riba e trono ei, lo a bini i risibí e outoridat akí bèk.—Eze. 21:25-27.

¹⁰ Un otro profesia a indiká ku e hudiunan lo tabata rindi adorashon ainda na e tèmpel na Herúsalèm ora ku e Mesías primintí, esta e Ungí, yega. (Dan. 9:24-27) I promé ku e israelitanan a bai den eksilio na Babilonia, un otro profesia a bisa ku e Mesías lo a nase na Bètlehèm. (Mik. 5:2) Pa e profesianan ei por a kumpli, e hudiunan lo mester a bandoná Babilonia, bolbe nan pais i rekonstruí e tèmpel. Pero Babilonia normalmente no tabata laga su prezunan bai. Pues, kon e pueblo di Dios lo a logra bai nan pais bèk? Yehova a revelá e kontesta na su profetanan.—Ámos 3:7.

11. Menshoná algun símbolo ku e profesianan a usa pa representá e Imperio di Babilonia. (Wak e nota na pia di página.)

¹¹ Profeta Daniel tabata un di e israelitanan ku nan a hiba Babilonia. (Dan. 1:1-6) Yehova a us’é pa revelá e seri di poder mundial ku lo a bini despues di Babilonia. Yehova a usa diferente símbolo pa revelá e sekretonan ei. Por ehèmpel, el a laga Rei Nabukodonosor di Babilonia soña tokante un imágen inmenso trahá di vários metal. (Lesa Daniel 2:1, 19, 31-38.) Via Daniel, Yehova a revelá ku e kabes di oro di e imágen a simbolisá e Imperio di Babilonia.b E pechu i e brasanan di plata a representá e poder mundial ku lo a bini despues di Babilonia. Kua potensia esei lo tabata, i kon lo el a trata e pueblo di Dios?

E DI KUATER KABES: MEDO-PERSIA

12, 13. (a) Kiko Yehova a revelá tokante e konkista di Babilonia? (b) Dikon e di kuater kabes di e bestia salbahe aptamente a representá Medo-Persia?

¹² Mas ku un siglo promé ku e tempu di Daniel, Yehova a revelá via profeta Isaías sierto detaye tokante e poder mundial ku lo a konkistá Babilonia. Yehova a revelá no solamente e manera ku lo a derotá e stat di Babilonia, sino tambe e nòmber di e konkistadó. E lider ei tabata Siro di Persia. (Isa. 44:28–45:2) Yehova a duna Daniel dos vishon mas tokante e Poder Mundial di Medo-Persia. Den unu, el a mira e reino manera un ber ku lo a “devorá hopi karni.” (Dan. 7:5) Den e otro, el a mira e poder mundial kombiná akí komo un chubatu di karné ku dos kachu.—Dan. 8:3, 20.

¹³ Yehova a usa e Imperio di Medo-Persia pa konkistá Babilonia i pa laga e israelitanan regresá nan pais, presis manera el a profetisá. (2 Kró. 36:22, 23) Pero despues e mesun poder mundial akí a hera di kaba ku e pueblo di Dios. Den e buki bíbliko di Èster, nos ta lesa tokante un kòmplòt di e promé minister di Persia, un hòmber ku tabata yama Haman. El a duna instrukshon pa eksterminá tur hudiu ku tabata biba den e inmenso imperio di Persia, i el a fiha un fecha spesífiko pa e matansa akí tuma lugá. Komo ku Yehova a intervení den e asuntu, Su pueblo un biaha mas a ser protehá kontra di e odio di e simia di Satanas. (Èst. 1:1-3; 3:8, 9; 8:3, 9-14) P’esei, e di kuater kabes di e bestia di Revelashon aptamente a representá Medo-Persia.

E DI SINKU KABES: GRESIA

14, 15. Ki detayenan tokante e antiguo Imperio di Gresia Yehova a revelá?

¹⁴ E di sinku kabes di e bestia salbahe di Revelashon a representá Gresia. Manera Daniel a revelá mas promé ora el a interpretá e soño di Nabukodonosor, e barika i bèlnan di pia di bròns (òf koper) di e imágen tambe a simbolisá e poder mundial ei. Ademas, Daniel a haña dos otro vishon ku a duna detaye remarkabel tokante e tipo di imperio ku Gresia lo tabata i tokante su gobernante mas prominente.

¹⁵ Den un di e vishonnan, Daniel a mira Gresia manera un leopardo ku kuater ala. Esei a indiká ku e imperio akí lo a konkistá otro nashonnan rápidamente. (Dan. 7:6) Den e otro vishon, Daniel a mira kon un kabritu ku un kachu masha grandi a kore bin dal un chubatu di karné di dos kachu mata. Yehova a bisa Daniel ku e kabritu a simbolisá Gresia i ku e kachu grandi a para pa un di su reinan. E chubatu di karné a representá Medo-Persia. Daniel a skirbi tambe ku e kachu grandi lo a kibra i ku kuater kachu chikitu lo a sali na su lugá. Tur detaye di e profesia akí a kumpli, aunke e tabata skirbí un dos siglo promé ku Gresia a bira un poder mundial. Aleksander e Grandi, e rei mas prominente di Gresia di antigwedat, a enkabesá e ehérsito griego kontra Medo-Persia. Pero e kachu akí no a dura mashá. E gran rei a muri ku 32 aña so, ora e tabata den pleno poder. I su reino ku tempu a keda partí entre kuater di su generalnan.—Lesa Daniel 8:20-22.

16. Kiko Antioko IV a hasi?

¹⁶ Despues di konkistá Persia, Gresia a goberná e pais di e pueblo di Dios. Pa e tempu ei e hudiunan ya tabata bèk na e Tera Primintí i a rekonstruí e tèmpel na Herúsalèm. Ainda nan tabata e pueblo di Dios, i e tèmpel ku nan a rekonstruí ainda tabata e sentro di adorashon berdadero. Ma den siglo 2 promé ku e era kristian, Gresia, e di sinku kabes di e bestia salbahe, a ataká e pueblo di Dios. Antioko IV, un di e generalnan ku a heredá un parti di e Imperio di Aleksander, a traha un altar pagano riba tereno di e tèmpel na Herúsalèm i a dekretá ku ken ku a praktiká e religion hudiu lo a haña kastigu di morto. Un biaha mas, e simia di Satanas a demostrá su odio kontra e pueblo di Dios! Pero poko despues, un otro potensia a remplasá Gresia. Kua reino lo tabata e di seis kabes di e bestia salbahe?

E DI SEIS KABES, “SPANTOSO I TERIBEL”: ROMA

17. E di seis kabes a kumpli ku ki parti klave di e profesia di Génesis 3:15?

¹⁷ Roma tabata e potensia dominante ora ku Huan a haña e vishon di e bestia salbahe. (Rev. 17:10) E di seis kabes a kumpli ku un parti klave di e profesia di Génesis 3:15. Satanas a usa ofisialnan romano pa heridá e “hilchi” di e simia, loke a paralis’é temporalmente. Kon asina? Wèl, nan a husga Hesus a base di e akusashon falsu di ta instigá hende kontra gobièrnu i a laga mat’é. (Mat. 27:26) Pero e herida ei a kura masha lihé, ya ku Yehova a resusitá Hesus.

18. (a) Kua nashon nobo Yehova a skohe, i dikon? (b) Kon e simia di e kolebra a sigui demostrá su odio kontra e simia di e muhé?

¹⁸ E lidernan religioso di Israel huntu ku representantenan di Roma a sera kabes kontra Hesus, i mayoria di hende di e nashon di Israel a rechas’é. Konsekuentemente, Yehova a rechasá Israel komo su pueblo. (Mat. 23:38; Echo. 2:22, 23) El a skohe e ora ei un nashon nobo, “e Israel di Dios.” (Gal. 3:26-29; 6:16) E nashon ei tabata e kongregashon di kristian ungí ku a konsistí di tantu hende hudiu komo no-hudiu. (Efe. 2:11-18) Despues ku Hesus a muri i resusitá, e simia di e kolebra a sigui demostrá su odio kontra e simia di e muhé. Na mas ku un okashon, Roma a trata di eliminá e kongregashon di kristian ungí ku ta forma e parti sekundario di e simia.c

19. (a) Kon Daniel a deskribí e di seis poder mundial? (b) Kiko un otro artíkulo lo analisá?

¹⁹ Den e soño ku Daniel a splika Rei Nabukodonosor, e pianan di heru a representá Roma. (Dan. 2:33) Ademas, Daniel a mira un otro vishon ku a duna un bon deskripshon di e Imperio Romano i tambe di e siguiente poder mundial ku lo a sali for di Roma. (Lesa Daniel 7:7, 8.) Pa siglonan, Roma tabata manera un bestia “spantoso i teribel i sumamente fuerte” den bista di su enemigunan. Ma e profesia a bisa ku “dies kachu” lo a sali for di e imperio akí i ku un “otro kachu, unu chikitu,” lo a sali meimei di nan i bira mas prominente. Kiko e dies kachunan akí ta, i kiko ta e kachu chikitu? Kua parti di e imágen inmenso ku Nabukodonosor a mira ta kuadra ku e kachu chikitu? E artíkulo na página 16 lo kontestá e preguntanan akí.

[Nota]

“Un revelashon di Hesukristu, ku Dios a dun’é, pa e mustra su esklabonan e kosnan ku tin ku sosodé pronto.”—REV. 1:1.

1, 2. (a) E profesianan di Daniel i di Huan ta yuda nos hasi kiko? (b) Kiko e promé seis kabesnan di e bestia salbahe a representá?

ORA nos konsiderá e profesianan di Daniel i di Huan huntu, nan ta yuda nos komprondé hopi kos ku ta pasando awe den mundu i kos ku lo bai pasa den futuro. Kiko nos por siña si nos kompará e vishon ku Huan a haña di e bestia salbahe ku Daniel su relato di e bestia spantoso ku tabatin dies kachu i ku Daniel su splikashon di e imágen inmenso? I unabes nos komprondé e profesianan akí bon, kiko nan mester motivá nos pa hasi?

² Laga nos analisá Huan su vishon di e bestia salbahe. (Rev., kap. 13) Manera nos a mira den e artíkulo anterior, e promé seis kabesnan di e bestia a representá Egipto, Asiria, Babilonia, Medo-Persia, Gresia i Roma. Tur e gobièrnunan ei a demostrá nan odio kontra e simia di e muhé. (Gén. 3:15) Roma, e di seis kabes, a keda un potensia polítiko dominante pa vários siglo despues ku Huan a skirbi su vishon. Ku tempu, e di shete kabes lo a tuma e lugá di Roma. Kua poder mundial polítiko esei a resultá di ta, i kon lo el a trata e simia di e muhé?

GRAN BRETAÑA I MERKA TA SUBI NA PODER

3. Kiko e bestia spantoso ku tabatin dies kachu a representá, i kiko e dies kachunan a para p’e?

³ Nos por identifiká e di shete kabes di e bestia salbahe di Revelashon kapítulo 13 si nos kompará e vishon di Huan ku e vishon ku Daniel a haña di e bestia spantoso ku tabatin dies kachu.a (Lesa Daniel 7:7, 8, 23, 24.) E bestia ku Daniel a mira a representá e Poder Mundial di Roma. (Wak e tabèl na página 14-15.) Den siglo 5 di e era kristian, e Imperio Romano a kuminsá plama for di otro. E dies kachunan ku a sali for di kabes di e bestia spantoso ei a representá e reinonan ku a sali for di e imperio ei.

4, 5. (a) Kiko e kachu chikitu a hasi? (b) Kiko tabata e di shete kabes di e bestia salbahe?

⁴ Den e profesia di Daniel tokante e bestia feros ku tabatin dies kachu, un otro kachu, “un chikitu,” ta sali i ranka tres di e dies kachunan ku rais ku tur. Esaki a kumpli ora Gran Bretaña, ku tabata un base militar chikitu di e Imperio Romano, a krese bira prominente. Te ku siglo 17, Gran Bretaña tabata un reino relativamente insignifikante. Tres otro region di e Imperio Romano bieu tabatin mas tantu influensia, esta, Spaña, Hulanda i Fransia. Pero Gran Bretaña a bringa kontra e potensianan ei, i un pa un el a kita nan for di nan puesto di prestigio. Pa meimei di siglo 18, Gran Bretaña tabata na kaminda pa bira e potensia dominante di e esena mundial. Pero ainda e no a bira e di shete kabes di e bestia salbahe.

⁵ Apesar ku Gran Bretaña a bira un potensia mas dominante, su kolonianan na Norteamérika a rebeldiá i a bira Estádos Unídos di Merka. Pero Gran Bretaña no a stroba Merka di bira un pais poderoso i asta a usa e forsa naval britániko pa protehá Merka. Na aña 1914, ora ku e dia di Señor a kuminsá, Gran Bretaña tabatin e imperio di mas grandi den historia i Merka a bira e potensia industrial di mas grandi riba tera.b Durante Promé Guera Mundial, Merka a bira un sosio íntimo di Gran Bretaña. Ta e ora ei nan a bira e Poder Mundial Kombiná di Gran Bretaña i Merka (òf, e Poder Mundial Angloamerikano). E poder mundial akí tabata e di shete kabes. Kon e kabes akí a trata e simia di e muhé?

6. Kon e di shete kabes a trata e pueblo di Dios?

⁶ Poko despues ku e dia di Señor a kuminsá, e di shete kabes a lansa un atake kontra e pueblo di Dios, esta, kontra e restu di e rumannan di Kristu ku tabata riba tera. (Mat. 25:40) Hesus a indiká ku durante su presensia un restu di e simia di e muhé lo tabata aktivo riba tera. (Mat. 24:45-47; Gal. 3:26-29) E Poder Mundial Kombiná di Gran Bretaña i Merka a bringa kontra e santunan ei. (Rev. 13:3, 7) Durante Promé Guera Mundial, e poder kombiná ei a oprimí e pueblo di Dios, prohibí algun di nan publikashonnan i enkarselá algun representante di e esklabo fiel. E di shete kabes di e bestia salbahe kasi a mata, òf para, e trabou di prediká pa un tempu. Yehova a revelá e suseso dramátiko akí na Huan den un vishon. Tambe el a bisa Huan ku e parti sekundario di e simia lo a rebibá i kuminsá prediká ku entusiasmo atrobe. (Rev. 11:3, 7-11) E historia di e sirbidónan di Yehova di e tempu akí ta konfirmá ku e susesonan ei a tuma lugá.

E PODER MUNDIAL KOMBINÁ DI GRAN BRETAÑA I MERKA I E PIANAN DI HERU KU KLEI

7. Ki parti di e imágen inmenso ta korespondé ku e di shete kabes di e bestia salbahe?

⁷ Ki parti di e imágen inmenso ta korespondé ku e di shete kabes di e bestia salbahe? Gran Bretaña—i indirektamente tambe Merka—a sali for di e Imperio Romano. Pero kiko di e pianan di e imágen? Daniel ta deskribí nan komo un meskla di heru ku klei. (Lesa Daniel 2:41-43.) E deskripshon akí di e pianan ta korespondé ku e tempu ora ku e di shete kabes, esta, e Poder Mundial Kombiná di Gran Bretaña i Merka, lo a bira prominente. Meskos ku un kos trahá di heru mesklá ku klei ta mas suak ku un kos traha di heru sólido, asina tambe e Poder Mundial Kombiná di Gran Bretaña i Merka ta mas suak ku esun for di kua el a sali. Dikon nos por bisa esei?

8, 9. (a) Kon e di shete poder mundial a mustra ku e tabata fuerte manera heru? (b) Kiko e klei di e pianan di e imágen ta representá?

⁸ Tabatin biaha ku e di shete kabes di e bestia tabata fuerte manera heru. Por ehèmpel, el a demostrá su poder ganando e Promé Guera Mundial. Durante Segundo Guera Mundial tambe e poder manera heru di e di shete kabes tabata bisto.c Despues di e guera ei, e di shete kabes na vários okashon a sigui demostrá su karakterístikanan di heru. Pero, for di den prinsipio e heru ei tabata mesklá ku klei.

⁹ Pa hopi tempu e sirbidónan di Yehova a trata di komprondé kiko e pianan di e imágen a representá. Daniel 2:41 ta deskribí e meskla di heru ku klei komo “un reino.” Pues, e klei ta representá sierto elemento den e Poder Mundial Kombiná di Gran Bretaña i Merka, sí, elementonan ku ta hasié mas suak ku e Imperio Romano ku a ser deskribí komo e pianan di heru sólido. Segun e profesia, e klei ta referí na “e simia di hende,” esta, na hende komun i koriente. (Dan. 2:43) E pueblo komun a suak e poder mundial kombiná akí ora ku nan a eksigí nan derechonan via di kampañanan di derecho sivil, sindikatonan laboral i movementunan di independensia. Nan a debilitá e poder mundial akí su kapasidat di aktua ku forsa di heru. Ademas, hende den e arena polítiko tin ideanan totalmente diferente for di otro. I resultadonan pèrtá di elekshon, ku no ta resultá den un gran mayoria, ta suak e poder di asta lidernan popular, di manera ku nan no ta haña un mandato kla pa implementá nan promesanan. Daniel a profetisá: “Un parti di e reino lo ta fuerte i un parti lo ta frágil.”—Dan. 2:42; 2 Tim. 3:1-3.

10, 11. (a) Kiko lo pasa den futuro ku “e pianan”? (b) Kiko nos por komprondé tokante e dedenan di pia?

¹⁰ Awe, den siglo 21, Gran Bretaña i Merka ainda ta sosio íntimo di otro. Hopi bes nan ta kooperá huntu den asuntunan mundial importante. E profesianan tokante e imágen inmenso i e bestia salbahe ta konfirmá ku ningun otro poder mundial lo no remplasá e Poder Mundial Kombiná di Gran Bretaña i Merka. Apesar ku e ta mas suak ku Roma, ku tabata e pianan di heru, lo e no kaba na nada riba su mes.

¹¹ Kiko di e kantidat di dede di pia di e imágen? Nan tin un nifikashon spesial? Den e otro vishonnan Daniel a menshoná kantidat spesífiko. Por ehèmpel, hopi di e bestianan tabatin un kantidat spesífiko di kachu. E kantidatnan ei ta importante. Pero Daniel no a bisa kuantu dede di pia e imágen tin. Pues, ta parse ku e kantidat di dede di pia no ta importante, meskos ku e kantidat di brasa, man, dede òf pia di e imágen no ta importante. Loke sí Daniel a bisa spesífikamente ta ku e dedenan di pia tabata trahá di heru ku klei. For di su deskripshon nos por komprondé ku e Poder Mundial Kombiná di Gran Bretaña ku Merka ta esun ku lo ta dominando ora ku e “piedra,” ku ta representá e Reino di Dios, dal e pianan di e imágen.—Dan. 2:45.

E KOMBINASHON GRAN BRETAÑA I MERKA I E BESTIA SALBAHE DI DOS KACHU

12, 13. Kiko e bestia salbahe di dos kachu ta representá, i kiko e ta hasi?

¹² Apesar ku e Poder Mundial Kombiná di Gran Bretaña i Merka ta un meskla di heru ku klei, e vishonnan ku Hesus a duna Huan ta mustra ku e potensia akí lo a sigui hunga un papel klave durante e último dianan. Kon asina? Den un vishon Huan a mira un bestia salbahe ku tabatin dos kachu i ku a papia manera un dragon. Kiko e bestia straño akí a representá? E tin dos kachu, pues e ta representá dos gobièrnu ku ta sosio di otro. Esaki ta indiká ku Huan a bolbe mira e Poder Mundial Kombiná di Gran Bretaña i Merka, pero e biaha akí den un kapasidat spesial.—Lesa Revelashon 13:11-15.

¹³ E bestia salbahe akí a “bisa” e hendenan pa traha un imágen di e bestia salbahe ku tabatin shete kabes i dies kachu. Huan a skirbi ku e imágen di e bestia lo a aparesé, disparsé i bolbe presentá atrobe. Esei ta presis loke a sosodé ku un organisashon ku a lanta despues di Promé Guera Mundial. Gran Bretaña i Merka a urgi e otro nashonnan pa djòin e organisashon akí ku supuestamente lo a uni e reinonan di mundu i papia pa nan.d E organisashon akí tabata yama Liga di Nashonnan. El a disparsé ora ku Segundo Guera Mundial a kuminsá. Durante e guera ei, e pueblo di Dios a anunsiá ku segun e profesia di Revelashon, e imágen di e bestia salbahe lo a bolbe aparesé. Anto esei ta eksaktamente loke a sosodé, pero e biaha akí el a aparesé bou di e nòmber Nashonnan Uní.—Rev. 17:8.

14. Den ki sentido e imágen di e bestia salbahe ta “un di ocho rei”?

¹⁴ Huan a deskribí e imágen di e bestia salbahe komo “un di ocho rei.” Den ki sentido esei ta? E no ta aparesé komo e di ocho kabes di e bestia salbahe original. E ta simplemente un imágen di e bestia ei. E poder ku e tin ta bini di e nashonnan ku ta miembro di Nashonnan Uní, spesialmente di su apoyadó prinsipal, e Poder Mundial Kombiná di Gran Bretaña i Merka. (Rev. 17:10, 11) Pero e ta risibí outoridat pa aktua komo rei pa kumpli ku un tarea spesífiko, sí, un tarea ku ta start un kadena di suseso ku lo kambia historia.

E IMÁGEN DI E BESTIA SALBAHE TA “HABRAKÁ” E PROSTITUTA

15, 16. Kiko e prostituta ta simbolisá, i kiko a pasa ku e apoyo ku e tabatin?

¹⁵ Huan a mira tambe den vishon un prostituta sintá riba un bestia salbahe koló kòrá bibu. E bestia akí a representá e mesun kos ku e imágen di e bestia salbahe. E prostituta tabatin e nòmber “Babilonia e Grandi.” (Rev. 17:1-6) E muhé akí aptamente ta representá tur religion falsu, di kua esnan prinsipal ta e iglesianan di kristiandat. Organisashonnan religioso públikamente a apoyá e imágen di e bestia i a purba di dirigié.

¹⁶ Pero durante e dia di Señor, Babilonia e Grandi a mira kon “e awanan” ku e ta sintá ariba a seka drástikamente; es desir, e hendenan no ta apoy’é mas manera ántes. (Rev. 16:12; 17:15) Por ehèmpel, tempu ku e imágen di e bestia a aparesé pa promé biaha, e iglesianan di kristiandat, un parti importante di Babilonia e Grandi, tabata dominá e mundu oksidental. Awe, hopi hende no tin rèspèt mas pa e iglesianan akí ni pa nan pastornan. De echo, hopi hende ta kere ku ta religion ta kontribuí na konflikto den mundu òf asta ta kous’é. Tin un grupo di intelektual masha krítiko i militante ku mas i mas ta eksigí pa pone un fin na e influensia ku religion tin riba sosiedat.

17. Kiko lo pasa djis akí ku religion falsu, i dikon?

¹⁷ Pero religion falsu lo no pèrdè su poder gradualmente i despues disparsé. E prostituta lo keda un forsa potente i lo trata di pone reinan hasi loke é ke, te ora Dios hinka un idea den kurason di esnan na poder. (Lesa Revelashon 17:16, 17.) Djis akí Yehova lo pone e elementonan polítiko di e mundu di Satanas, representá pa Nashonnan Uní, ataká religion falsu. Nan lo destruí su influensia i tur su rikesa. Un par di dékada pasá esei lo a parse algu masha improbabel. Pero awe, e prostituta akí ta tambaliando riba lomba di e bestia koló kòrá bibu. Asina mes, lo e no slep baha for di lomba di e bestia. Lo e dal abou diripiente i na un manera violento.—Rev. 18:7, 8, 15-19.

E BESTIANAN TA YEGA NA NAN FIN

18. (a) Kiko e bestia salbahe lo hasi, i ku ki resultado? (b) Segun Daniel 2:44, e Reino di Dios lo destruí kua reinonan? (Wak e kuadro na página 19.)

¹⁸ Despues ku e bestia salbahe, esta, Satanas su organisashon polítiko riba tera, destruí religion falsu, lo e ser instigá pa ataká e Reino di Dios. E reinan di e tera no por yega te den shelu serka e Reino, pues nan lo baha nan rabia riba e hendenan riba tera ku ta apoyá e Reino ei. Esaki ta hiba na un bataya final kontra Dios. (Rev. 16:13-16; 17:12-14) Daniel a deskribí un resultado inevitabel di e bataya final ei. (Lesa Daniel 2:44.) E bestia salbahe menshoná na Revelashon 13:1, su imágen i e bestia salbahe di dos kachu lo ser destruí.

19. Di kiko nos por ta sigur, i awor ta e momento pa hasi kiko?

¹⁹ Nos ta bibando den tempu di e di shete kabes di e bestia di Revelashon kapítulo 13. E bestia ei lo no haña mas kabes promé ku su destrukshon. E Poder Mundial Kombiná di Gran Bretaña i Merka lo ta e poder mundial dominante ora kaba ku religion falsu. E profesianan di Daniel i di Huan a kumpli te den e detayenan di mas chikitu. Nos por ta sigur ku e destrukshon di religion falsu i e bataya di Armagedon lo kuminsá pronto. Yehova Dios a revelá e detayenan akí di antemano. Nos lo hasi kaso di e spièrtamentunan profétiko akí? (2 Ped. 1:19) Awor ta e momento pa skohe e banda di Yehova i apoyá su Reino.—Rev. 14:6, 7.

[Nota]

[Kuadro na página 19]

NA KEN “TUR E REINONAN AKÍ” TA REFERÍ?

E profesia na Daniel 2:44 ta deklará ku e Reino di Dios “lo garna i pone un fin na tur e reinonan akí.” E profesia ei ta referí solamente na e reinonan ku e vários partinan di e imágen a representá.

Kiko di tur otro gobièrnu di mundu? Wèl, e profesia na Revelashon ku ta trata e mesun tópiko ta revelá e kuadro kompleto. E ta mustra ku “e reinan di henter e tera” lo reuní kontra Yehova riba “e gran dia di Dios, e Todopoderoso.” (Rev. 16:14; 19:19-21) Pues, no ta solamente e reinonan di e imágen, pero tur otro gobièrnu di mundu lo ser destruí na Armagedon.

E bukinan bíbliko di Daniel i Revelashon no solamente ta identifiká ocho rei, òf gobièrnu humano, sino ta indiká tambe den ki sekuensia nan lo a aparesé. Nos por saka afó kiko e profesianan ei ta nifiká, ya ku nos ta komprondé e promé profesia ku ta pará skirbí den Beibel.

Atraves di historia, Satanas a organisá su simia den vários movementu polítiko òf reino. (Luk. 4:5, 6) Pero ta algun di e gobièrnunan akí so a bringa direktamente kontra e pueblo di Dios, sea kontra e nashon di Israel òf kontra e kongregashon di kristian ungí. E vishonnan di Daniel i di Huan ta deskribí solamente ocho di e podernan mundial ei.

[Tabèl/​Plachi na página 14]

(Pa e teksto den su formato kompleto, wak e publikashon)

1. Egipto

2. Asiria

3. Babilonia

5. Gresia

6. Roma

E PUEBLO DI DIOS

2000 P.E.K.

Abraham

1500

Nashon di Israel

1000

Daniel 500

P.E.K./E.K.

Huan

Israel di Dios 500

1000

1500

2000 E.K.

[Nota]

[Plachinan]

E imágen inmenso (Dan. 2:31-45)

Kuater bestia for di laman (Dan. 7:3-8, 17, 25)

E chubatu di karné i e kabritu (Dan., kap. 8)

E bestia salbahe di shete kabes (Rev. 13:1-10, 16-18)

E bestia di dos kachu ta promové trahamentu di un imágen di e bestia salbahe (Rev. 13:11-15)

[Rekonosementu]

Krédito pa potrèt: Egipto i Roma: Potrèt saká pa kortesia di British Museum; Medo-Persia: Musée du Louvre, Paris