Víctimanan di Guera Ta Haña Otro Cara
“E GUERANAN djawe ta otro for di esnan di pasado . . . Ta ciudadanonan comun i coriente, en bes di soldá,” ta esnan cu mas i mas ta bira víctima, segun “Perspectiva,” un programa transmití dor di Radio di Nacionnan Uní (ONU). Por ehempel, durante e promé guera mundial, solamente 5 porciento di tur víctima tabata civil. Sin embargo, durante di dos guera mundial, e cantidad di víctima civil a bula bai te 48 porciento. I awe, segun Radio ONU, “casi tur víctima den conflicto ta civil—90%—i mayoria di esakinan ta hende muher, mucha i anciano.”
Segun Olara Otunnu, kende ta e Representante Special pa Mucha i Conflicto Armá dje secretario general di ONU, “ta ser calculá cu un dos miyon mucha a ser matá den situacionnan di conflicto armá desde 1987.” Esei ta suma na mas cu 450 mucha pa dia como víctima di guera durante e último 12 añanan! Ademas, durante e mésun periodo ei, mas cu seis miyon mucha a ser lesioná seriamente of hací mancaron permanentemente.
Un manera cu ONU lo por combatí e creciente cantidad di mucha cu ta víctima di guera, segun sr. Otunnu, ta dor di promové zonanan di pas. “Mester mira localidadnan caminda muchanan ta predominá, manera scol, hospital i lugánan di hunga, como zonanan liber di bataya.” Sin embargo, Radio ONU a agregá, “na promé lugá, prevení conflicto” ta e manera mas eficas pa ONU haci sigur cu ciudadanonan comun i coriente no ta bira víctima di guera. Sí, pa eliminá víctimanan di guera ta exigí realmente pa eliminá guera mes. Pero esei lo sosodé un dia?
Debí na humanidad su registro largu di guera, mayoria hende cu rason ta pensa cu hende mes nunca lo no trece pas mundial. Sin embargo, e Palabra di Dios, Bijbel, ta primintí cu Jehova Dios lo haci esei: “E ta haci gueranan stop te n’e extremidad dje tera.” (Salmo 46:9) Na ki tempu esaki lo tuma lugá? I di con nos por ta sigur cu Dios su promesa di pas mundial lo ser realisá? Si bo tin gana di haña un contesta riba e preguntanan aki, por fabor, skirbi e publicadónan dje revista aki, usando e adres mas cerca bo mencioná na página 5, of bel un Salon di Reino di Testigonan di Jehova den bo becindario. No tin ningun obligacion ni costo, simplemente contestanan stret.
[Rekonosementu pa Potrèt na página 31]
UN PHOTO 156450/J. Isaac