LÈS 27
Kon Morto di Hesus Por Salba Nos?
Nos ta peka, sufri i muri pasobra e promé pareha, Ádam ku Eva, a desobedesé Dios.a Sinembargo, nos tin speransa! Nos por ser librá for di piká i morto pasobra Yehova a manda su Yu, Hesukristu, na tera pa muri pa nos. Beibel ta siña nos ku ora Hesus a muri, el a pèrkurá un reskate. Un reskate ta e preis ku un hende ta paga pa libra un otro persona. Hesus a paga e preis ku su bida humano perfekto. (Lesa Mateo 20:28.) Komo ku Hesus a nase komo hende perfekto, outomátikamente el a haña e derecho di biba pa semper riba tera. Pero boluntariamente, Hesus a renunsiá e derecho ei. Ora el a hasi esei, el a habri kaminda pa nos por haña bèk tur loke Ádam ku Eva a pèrdè. Hesus a demostrá tambe kuantu e i Yehova ta stima nos. E lès akí lo yuda bo haña mas apresio pa e echo ku Hesus a muri pa nos.
1. Kon e morto di Hesus ta benefisiá nos for di awor?
Komo ku nos ta pekadó, nos ta hasi hopi kos ku ta desagradá Yehova. Asina mes, nos por bira bon amigu di Dios. Kiko nos mester hasi pa nos tin un amistat ku Dios? Nos mester arepentí di bèrdat di nos pikánan i pidi Yehova pa medio di Hesus pa pordoná nos. Ademas, nos mester hasi esfuerso pa nos no bolbe kometé e mesun pikánan. (1 Huan 2:1) Beibel ta bisa: “Kristu a muri ún biaha i pa semper, un hustu pa e inhustunan, pa eliminá piká i pa e por dirigí boso na Dios.”—1 Pedro 3:18.
2. Kon morto di Hesus lo benefisiá nos den futuro?
Yehova a manda Hesus na tera pa e duna su bida humano perfekto “pa tur ku pone fe den [Hesus] no bai pèrdí, ma haña bida eterno.” (Huan 3:16) Ádam su desobedensia tabatin hopi konsekuensia. Pero danki na Hesus su sakrifisio, pronto Dios lo eliminá tur e konsekuensianan ei. Esei ta nifiká ku si nos demostrá ku nos tin fe den e sakrifisio di Hesus, nos lo tin e oportunidat di disfrutá di bida pa semper den Paradeis riba tera!—Isaías 65:21-23.
KIKO MAS NOS POR SIÑA?
Siña mas tokante e motibu dikon Hesus a muri pa nos i kon su morto por benefisiá bo.
3. Morto di Hesus ta libra nos di piká i morto
Pasa e VIDIO. Despues, analisá e siguiente pregunta:
Ki oportunidat Ádam a pèrdè ora el a desobedesé Dios?
Lesa Romanonan 5:12. Despues, analisá e siguiente pregunta:
Kon Ádam su piká a afektá abo personalmente?
Lesa Huan 3:16. Despues, analisá e siguiente pregunta:
Dikon Yehova a manda su Yu na tera?
Ádam tabata un hòmber perfekto ku a desobedesé Dios. Pa motibu di su piká, tur hende ta peka i muri
Hesus tabata un hòmber perfekto i komo ku el a obedesé Dios, hende a haña e oportunidat pa bira perfekto i biba pa semper
4. Morto di Hesus por benefisiá tur hende
Pasa e VIDIO. Despues, analisá e siguiente pregunta:
Kon e morto di un solo persona por benefisiá henter humanidat?
Lesa 1 Timoteo 2:5, 6. Despues, analisá e siguiente pregunta:
Ádam tabata un hòmber perfekto. Pero, pa motibu di su piká, tur hende ta peka i muri. Hesus tambe tabata un hòmber perfekto. Kiko Hesus su morto a logra ku a hasi Hesus “un reskate korespondiente”?
5. E reskate ta Yehova su regalo pa bo
Hende ku ta amigu di Yehova ta mira e reskate komo un regalo personal. Lesa Galationan 2:20. Despues, analisá e siguiente pregunta:
Kon e palabranan di Apòstel Pablo ta mustra ku el a mira e reskate komo un regalo personal?
Ora Ádam a peka, e i tur su desendientenan a ser kondená na morto. Yehova a manda su Yu na tera pa muri pa nos pa asina nos por tin e oportunidat di biba pa semper.
Segun ku bo ta lesa e siguiente versíkulonan, imaginá bo kon Yehova a sintié miéntras ku su Yu tabata sufri. Lesa Huan 19:1-7, 16-18. Despues, analisá e siguiente pregunta:
Kon bo ta sinti ora bo pensa riba loke Yehova i Hesus a hasi pa bo?
SI UN HENDE PUNTRA: “Kon e morto di un persona por benefisiá tur hende?”
Kon lo bo kontestá?
RESÚMEN
Komo ku Hesus a muri pa nos, Yehova por pordoná nos pikánan i nos por biba pa semper.
Repaso
Dikon Hesus a muri?
Dikon nos por bisa ku Hesus su bida humano perfekto tabata un reskate korespondiente?
Kon Hesus su morto por benefisiá bo?
MAS INFORMASHON INTERESANTE
Haña sa dikon Hesus su bida humano perfekto ta un reskate.
Haña sa kiko nos tin ku hasi pa ser librá for di piká i morto.
Yehova ta pordoná piká serio?
“Pregunta Ku Beibel Ta Kontestá” (E Toren di Vigilansia di 1 di mei 2013)
Haña sa kon e sakrifisio di Hesus a yuda un hòmber kambia su personalidat.
a E palabra piká no ta referí solamente na e kosnan malu ku nos ta hasi. E ta enserá tambe e tendensia ku nos tin di hasi loke ta malu. Nos a heredá e tendensia akí di Ádam ku Eva.