Ngar er Ngii a Orrenges a Nglunguuch?

“Ngar er a mong ak kora uluumededenger el kmo ngar er ngii a Dios. Engdi a le bebil er a taem e ak milluluuch. Ngdimlak kudengei el kmo ngar er ngii a orrenges er a nglunguchek, engdi ak uluureng el kmo ulekum ngar er ngii a rongesak. Ngdimlak a moktek er a klengar er ngak e dimlak el deu a renguk. Ak mle bekikl el mo oumerang er a Dios e le ak ulemdasu el kmo ngdi tirke el mechitechut a rengrir el chad a oumera er ngii.”​—PATRICIA,a IRELAND.

NGMLA ta el momdasu el uaisei? Ke oumededenger er a Dios engdi ke dirk meluluuch? Ngdiak di lekau el tang a uaisei. Ka momtab aika el tekoi.

◼ A survey er a 2,200 el chad er a Britain a ouchais el kmo ngdi 22 el basent er a rechad a oumerang el kmo ngar er a ngii a Dios el milebii a chutem e dirrek el orrenges a nglunguuch. Engdi a 55 el basent er a chelsir tirka el chad a melekoi el kmo te meluluuch a lebebil er a taem.

◼ A ta er a survey er a 10,000 el chad er a betok el beluu a mileketeklii el kmo a 30 el basent er a rechad el diak loumerang er a Dios a dirk meluluuch.

Ngera Uchul Me Te Oumededenger?

A Allan el chad er a England a kmo: “Ak mle blechoel el melekoi el kmo ngdiak kuumerang er a Dios e le klechelid a di uleketmokl el omesiul er a rechad e mengereker. Me a lmuut el tang, a lsekum ngar er ngii a Dios e ngmo diak domes a betok el chelebirukel el omeruul. Engdi a lebebil er a taem e ak dengchokl el meluluuch el diak kudengei el kmo ak mengedecheduch er techang. Ak dirrek el di ngak el oker el kmo, ‘Ngera uchul me ak ngar er tiang?’ ”

Ngar er ngii a kakerous el uchul me a rechad a oumededenger el kmo ngmorenges a nglunguchir. Te mo omdasu el uaisei e le ngdiak lodengei a nger er a ker el kmo:

◼ Ngar er ngii a Ulemeob?

◼ Ngera uchul me a klechelid a blechoel el mo uchul a tellemall?

◼ Ngera uchul me a Dios a omechei a ringel me ngar er ngii?

Omko ke mo medengei a nger er aika el ker, e ke meluluuch el ulterekokl a rengum el kmo ngmorenges a nglunguchem?

[Footnote]