A Resioning er a Jehovah Te Oumerang er a Jesus?

A KLAUMERANG EL KIREL A JESUS A KLOU A ULTUTELEL

Anthony: Alii e Tim. Ngkmal ungil a renguk el lmuut el me mesekau.

Tim: Ngak me ak dirrek.

Anthony: Tiakid a beches el Ongkerongel er kau. Ngulterekokl el mo dmeu a rengum el menguiu a suobel er a chelsel.

Tim: Ke kmal mesulang. Ngkmal ungil e le ke mlei, ngar er ngii a tekoi el soak el oker er kau.

Anthony: Kabong.

Tim: Ak milengedecheduch er a chad er a urerek el ouchais er ngii el kmo ak kmal semeriar el menguiu aika el babier el momeskak. Engdi ngdilu er ngak el kmo ngdiak el kirek el menguiu aika el babier e le a Resioning er a Jehovah a diak loumerang er a Jesus. Tiang mera el tekoi? Me ak dilu er ngii el kmo ak mo oker er kau sel omluut el mei.

Anthony: Ngmera el dmeu a renguk e le ke uleker er ngak. E le ke mekerang e mo medengelii a uldesuir a Resioning er a Jehovah a lsekum e ke mo oker er a ngodech el chad?

Tim: Ak kora ulemdasu el uaisei.

Anthony: A mera er ngii, a Resioning er a Jehovah a kmal oumerang er a Jesus. Aki oumerang el kmo a klaumerang er a Jesus a klou a ultutelel el kirel a osebeled.

Tim: Ak di mla omdasu el uaisei, engdi sera ledu er ngak a chad er a urerek el kmo ngdiak moumerang er a Jesus e ngmlo soak el oker er kau. Nglocha dirkak a ta el dosaod er tia el tekoi.

Anthony: Ngsebechek el ocholt a bebil er a bades er a Biblia el mesaod er a klungel a ultutelel a doumerang er a Jesus? Aikang a bades el leblechoel a Resioning er a Jehovah el ousbech sel loldingel a obliil.

Tim: Me kabong.

Anthony: Ngsebeched el omuchel el omes er a tekingel a Jesus el ngar er a Johanes 14:6. Aikang a cheldechedechal a Jesus el mo er a ta er a apostol er ngii. Kede menguiu el kmo: “Ma Jesus a dula er ngii el kmo, ‘Ngak a rael, e klemerang, e klengar; ng diak a chad el mor a Chedam, a lak lokiu ngak.’” Me sel domes er tia el bades, e ngera a di chimo el rolel e ngsebeched el mengedecheduch er a Chedam?

Tim: Ngokiu a Jesus.

Anthony: Nguaisei. E a Resioning er a Jehovah a kmal oumerang er tia el tekoi. Ka hall e ak oker er kau: Ngoeak aike el modengei el kirel a llechul a Dios, e ngkirel a chad el meluluuch el oeak a ngklel techang?

Tim: Ngoeak a ngklel a Jesus.

Anthony: Nguaisei, sei a uchul me sel kululuuch e ak ulengit a nglunguchek el okiu a ngklel a Jesus. A Resioning er a Jehovah a meruul er a osisiu el tekoi sel loluluuch.

Tim: Ak kol mocha medengei.

Anthony: A ta er a bades el sebeched el melatk er ngii a ngar er a Johanes 3:16. Tia el bades a kmal klou a ultutelel e le ngua kedeb el omesodel a Ebangkelio. A belkul tiang a kmo, a rokui el tekoi el milluches el kirel a klengar er a Jesus er tia el chutem me a omesiungel a mengai a uchetemel er tia el bades. Moutekangel el mo choiuii.

Tim: Ngmelekoi el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”

Anthony: Ke kmal mesulang. Ke medengelii tia el bades?

Tim: Ochoi, ngmla mo betok el taem el krengesii er a ikelesia er ngak.

Anthony: Ngkmal merael a chisel tia el bades. Me bo dekerekikl el omtab er a tekingel a Jesus. Ngdilu el kmo, a bltkil a rengul a Dios a uchul me ngmo er ngii a techellir a rechad el mo kiei el ngar er a deurreng el diak a ulebengelel, engdi ngera kired el meruul er ngii?

Tim: Ngkired el mo oumerang.

Anthony: Ochoi, ngkired el mo oumerang er a di ta el Ngelekel a Dios el Jesus Kristus. E tia el tekoi el kmo, a klaumerang el kirel a Jesus a mekengii a techall el mo nguu a diak a ulebengelel el klengar, a sebeched el mesang er a ongeru el llel tia el babier el bla kbeskau. Ngmesaod er a ta er a moktek er A Ongkerongel el kmo, ng “melisiich er a klaumerang el kirel a Jesus Kristus, el ngii a mlad me bo el sebeched el nguu a diak a ulebengelel el klengar, e ngii a mengedereder er chelechang el King er a Rengedel a Dios.”

Tim: Ngmera el tekoi, tiakid a babilengiu el ochotii el kmo a Resioning er a Jehovah a oumerang er a Jesus.

Anthony: Nguaisei.

Tim: Me ngera uchul me a rechad a melekoi el kmo ngdiak moumerang er a Jesus?

Anthony: Nglocha ngar er ngii a betok el uchul. E a ta er ngii a kmo, te melekoi el uaisei el tekoi el lerirenges er a rebebil a uchul, me a lechub e te mlosisechakl er a mengeteklel a klechelid er tir el mesaod a cheleuid el tekoi el kiram.

Tim: Ak kora di omdasu el kmo, alta e a rechad a melekoi el kmo ngdiak moumerang er a Jesus e le kemiu el oungakl er a Sioning er a Jehovah el diak el Sioning er a Jesus.

Anthony: Tilechang me nglocha dirrek el ta er a uchul.

Tim: Me ngera uchul me kom di blechoel el mesaod el kirel a Jehovah?

“BO LE MODANGES A CHEDAOL NGKLEM”

Anthony: A kot el uchul e aki oumerang el kmo ngklou a ultutelel a dousbech er a ngklel a Jehovah el di ua lurruul a Ngelekel el Jesus. Ka molatk er sel tekoi el Jesus a ullisechakl er a redisaiplo er ngii el mo meluluuch el kirel el ngar er a Mateus 6:9. Ngsebechem el mo choiuii tia el bades?

Tim: Ochoi. “Ng ua tiakid cho moluluuch: ‘Demmam el ngar a eanged: Bo le modanges a chedaol ngklem.’”

Anthony: Ke kmal mesulang. Ka momtab, a Jesus a dilu er tir me loluluuch me bo lemodanges a ngklel a Dios. Omomdasu e ngera uchul me ngdilu el uaisei?

Tim: Ngdiak sal medengei.

Anthony: Nglocha sebeched el omes er a kuk ta er a bades el lmuut el meketeklii tia el tekoi. Tiang a ngar er a Rellir 2:21. Ngar er a New World Translation e tia el bades a kmo: “Tirke el rokui el omekedong er a ngklel a Jehovah a mo suobel.”a Me a omomdasu, a lsekum ngkired el omekedong er a ngklel a Jehovah me bo desobel, e a Jesus ngmle medengelii tia el tekoi?

Tim: Ochoi.

Anthony: Me a osebelir a rechad el oltirakl er ngii a ta er a uchul me a Jesus a mle soal a bo lodengelii e lousbech er a ngklel a Dios. E tiang a dirrek el ta er a klou a ultutelel el uchul me aki blechoel el mesaod el kirel a Jehovah. Aki melechesuar a klungel a ultutelel a douchais er a rechad er a ngklel a Dios e dirrek el ngosuterir el mo omekedong er ngii el ngakl.

Tim: Engdi a lsekum a rechad a diak lodengelii a ngklel a Dios me a lechub e lousbech er ngii, me tir a dirk medengei el kmo te melekoi er techang sel losaod er a Dios.

Anthony: Tilecha sebechel el tekoi. Engdi a Dios a mla ouchais er kid er a ngklel me ngmo beot er kid el mo kmeed er ngii.

Tim: Ngmekera el uaisei?

Anthony: Ka molatk er tiang: Ngdimlak a ultutelel el bo dodengelii a ngklel a Moses. Ngsebeched el mo medengelii el kmo ngchad el milingii a Bekerekard el Daob me a lechub e ngchad el ngilai aike el Teruich el Llach. Me a Noah, ngera belkul a bo dodengelii a ngklel? Ngmle sebeched el di omekedong er ngii el chad el tileketekii a arhe e ulsebelii a telungalek er ngii me a charm. Me ngdi osisiu, ngsebeched el omekedong er a Jesus Kristus el ngike el chad el mla er a eanged el mei el me mad el kirel a kngtid, adang mekerang?

Tim: Ngmera el tekoi.

Anthony: Engdi a Dios a mle soal a bo dodengelterir tirka el chad el okiu a ngklir. Me alta e ngdirkak a ta el desa Moses, Noah, me a Jesus, engdi sel dodengei a ngklir tirka el chad e ngrullid el mo omes er tir el ua lemera el chad.

Tim: Ngkmal dimlak kumdasu el uaisei, engdi tilecha mera el tekoi!

Anthony: Me tiang a ta er a uchul me a Resioning er a Jehovah a blechoel el ousbech er a ngklel a Dios. Ngsomam el olengeseu er a rechad el mo omekeroul er a klaumerang er tir er a Jehovah el Dios me bo lemera el Chad er a rengrir e bo lolekeed er tir er ngii. E a osisiu el taem, e aki melisiich er sel tekoi el lurruul er ngii a Jesus el kirel a osebeled. Nglocha sebeched el choiuii a ta er a bades el lmuut el meketeklii tia el tekoi.

Tim: Kabong.

Anthony: Me a uchei e kede milenguiu er a tekingel a Jesus el ngar er a Johanes 14:6 el kmo: “Ngak a rael, e klemerang, e klengar.” Me kuk bo domes er a bades el uleakuchei er tiang el Johanes 14:⁠1. Ngsebechem el choiuii sel lullekoi er ngii a Jesus el ngar er a ulebengelel a bades?

Tim: Ochoi. Ngdmu el kmo: “Moumera er a Dios, e dirrek el moumera er ngak.”

Anthony: Mesulang. Me a omomdasu e a klemerang ngultuil er a di bo doumerang er a Jesus me a lechub e di doumerang er a Jehovah?

Tim: Ngdiak, e le Jesus a dilu el kmo ngkired el mo oumerang er tir el terung.

Anthony: Nguaisei. Me ke locha dirrek el kongei el kmo ngdiak di dolekoi el kmo kede oumerang er a Dios me a Jesus e lungiang. Ngkired el kiei el blekerdelel a klengar er kid a melisiich er tia el tekoi.

Tim: Ngmera el tekoi.

Anthony: Engdi ngmekerang a chad e ochotii el kmo ngmera el oumerang er a Dios me a Jesus? Ngsebeched el mo mesaod er tia el ker er a kuk ta er a taem.b

Tim: Ngkmal soak me ak mengiil er kau.