OMESODEL A SUOBEL ER A MEDAL TIA EL BABIER
Te rua techang a Resioning er a Jehovah?
“Ak mle medengelii a Mike el kemanget el taem. Ngmle ta er a Sioning er a Jehovah. Engdi kmal mle rrau a renguk er a klechelid er ngii. Ngtechang a Jehovah? Ngera uchul me a Resioning a diak longedaol a chedaol el sils er a beluu? A Mike ngmle chedal a cheldebechel er a klechelid el ngar er ngii a chad el mengeteklir?”—Becky, California, U.S.A.
“Sera lomuchel el mesuub el obengterir a Resioning er a Jehovah a retonari er ngak, e ak millatk el kmo: ‘Ngera belkul tia el ngakl el Sioning er a Jehovah? Tia mera el ngodech a ngklel el klechelid!’”—Zenon, Ontario, Canada.
“Ngak me a bechik a ulemdasu el kmo a Resioning er a Jehovah a di uleldingel er kemam el sorir el omekcharm er a uldesuam e le ngdiak ki bo er a ikelesia. Aki millatk el kmo a lsekum aike el meklou el klechelid a diak el sebechel meskemam aike el ki mousbech, e aike el ngodech el osisecheklir a Resioning er a Jehovah a kmal diak el sebechel ngosukemam.”—Kent, Washington, U.S.A.
“Ngmera el dimlak kudengei el kmo te rua techang a Resioning er a Jehovah e ngera ike el loumerang el tekoi.”—Cecilie, Esbjerg, Denmark.
Ke locha mla mesterir el oldingel a obliil me a lechub e te ousioning er a buai, e merous a babier el mengai a uchetemel er a Biblia, e dirrek el ouchais er a rechad el kirel a diak locheraol el omesubel a Biblia. Ke locha ngiluu tia el babier er tir. Engdi ke locha dirk melatk el kmo te rua techang a Resioning er a Jehovah. Alta uldesuem a di uai a uldesuel a ta er tirke el chad el llechukl er bab.
A lsekum e ngar er ngii a chouaika el kerim me a sebekreng er kau, e ke mo metik a ngeso er ker? Ke mekerang e mo medengei el kmo ngera te mera el loumerang a Resioning er a Jehovah? Te ngmai a udoud er ker el melemolem er a omesiungir e meruul a blil a omengull er tir? E ngera uchul me te oldingel er a blim e dirrek el mengedecheduch er kau er a buai?
A Cecilie, el llechukl a tekingel er a uchelel tia el suobel a kmo: “Ak milenguiu a betok el tekoi el kirir a Resioning er a Jehovah el ngar er a Internet. Ak rirenges a bebil er a cheleuid el tekoi el kirir me a dirrek el betok el tekoi el omtok er tir. Sei a uchul me ngkmal mlo mekngit a uldesuek el kirir a Resioning er a Jehovah.” Engdi uriul, e ngdi mle ngii el mo mengedecheduch er a Resioning er a Jehovah e mlo medengei a nger er a keril.
Ngsoam el ngmai a melemalt el nger er a kerim el kirir a Resioning er a Jehovah? Aki melisiich er kau el mo er tirke el chad el kot el ungil medengei a nger er a kerim, el tir a Sioning er a Jehovah, el mirruul er tia el babier. (Osisechakl 14:15) Aki oureng me aike el ongingil el suobel bo lengesukau el mo mesa el kmo ki rua techang, ngera ike el tekoi el ki moumerang, e ua ngera el ureor aki moruul er ngii.