Te ua ngera el chad a Resioning er a Jehovah?

Ngar er ngii a cheldebechelam el ileakl er a bek el cheldebechel er a klechelid. Me alta e sel klou el obis er kemam a ngar er a beluu er a Merikel, engdi a rebetok el Sioning er a Jehovah a kiei er a bebil er a beluu. Ngbekord el eai el miliol a ildisam el olisechakl er a Biblia el mo er a rechad el ngar er a kuk betok er a 230 el beluu. E aki meruul er tiang el oltirakl a tekingel a Jesus el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad.”​—Mateus 24:14.

Aki kerekikl el lolengesenges a llach er aike el beluu el ki mkiei er ngii engdi ngdiak kim molab el mo er a bitang me a bitang er a tekoi er a balatiks. Aki meruul el uaisei e le ki olengesenges er a Jesus me ngdiak kim kengei el mo “chedal a beluulchad.” Seikid a uchul me ngdiak kim teloi a ngii di el tekoi er a balatiks me a lechub e ki molisiich a mekemad. (Johanes 15:19; 17:16) Sel taem er a Ongeru el Mekemedil a Beluulechad, e a Resioning er a Jehovah a mlekelebus, e mlechelebed, e dirrek el mlad e le tir el dimlak lekengei el mo teloi aika el tekoi. Me a ta el chad er a Dois el mle bishop a milluches el kmo: “Ngoeak a ukltkir e ngdimlak lekengei el mo teloi aike el tekoi el lolisiich a Third Reich.”

Me nguaisei, engdi ngdiak ki moleakl er kemam er a rechad. A Jesus a milluluuch el mo er a Dios el kirir a rultirakl er ngii el kmo: “Ng diak kulengit er kau me moltobed er tir er a beluulchad.” (Johanes 17:15) Me ngsebechiu el mesekemam er a ureor me a stoang me a dirrek el skuul el ngar er a bek el beluu.